جامعة الأزهر تفصل 11 طالبا الخارجين عن القانون

[نغم الحياه]

شو ياأخى محود

انا بادرس فيها .. بادرس بكلية الطب

يعنى منها وفيها

وباحكيلك الازهر فاشله على كل المستويات
سواء اكاديميا او اداريا او تربويا اوو او

ياأخى لانريد ان ندافع عن خطأ
هل تقارن الازهر بالاسلاميه

لا اعتقد ذلك

[محمود]

انا ممكن أقارن الك الأزهر بالاسلامية
من ناحية الدراسة والتخصص الي بدرسوا
لو تشوفي الكتب الي عم أدرسها وتقارنيها بكتب جامعة الاسلامية بتشوفي الفرق
وراح تتفاجئي انهم ما بدرسوا ربع الي احنا ندرسو غير هيك عندهم معظم المنهج باللغة العربية
وانا ما بنكر قوة الجامعة الاسلامية بشتى المجالات . لكن توجد منافسة شديدة بينها وبين جامعة الأزهر
وما بنقدر انو نقول جامعة الازهر انها فاشلة لأنها خرجت علماء ودكاترة عم بدرسوا في الجامعة الاسلامية .
ممكن سؤال (( ليش دخلتي جامعة الازهر مادامها فاشلة ؟؟)) ...

[لولينا]

مرحبا جميعا

الصراحه انا سجلت بالمنتدى من فترة قصيره وما الي مشاركات كتير لكن هالموضوع لازم نحكي لانه بخصنا شخصيا خصوصا اني طالبة بجامعة الازهر
اولا بشكرك اخي ابو مهدي لنقل الخبر وان شاء الله بخلص التعليق على خير

بالنسبه للاخت نغم الحياه فحابه اقولك انه كلام الاخ محمود صح جامعة الازهر قويه دراسيا ولكن فيها مشاكل الامن والنظام وهاي مشكلتها بس لكن تعليمها قوي واظن حسب علمي اقوى من الاسلاميه زي ما وصف الاخ محمود
ومدامك من جامعة الازهر فكيف بتحكي هيك عن جامعتك يعني بعد ما تتخرجي وحد يجئ يقلك جامعة مش كويسه وفاشله هدا بكون قصده انه شهادتك كلام فاضي وما اخدتيها بجدارتك واذا كنت شايفه هيك فأنتي حرة

شكرا الكوا

[~ | Mazaj]

ههههههههههههه .. انا شايفة جامعة الازهر منتقلة عنا ..

محمود .. انا ممكن اجاوبك ع سؤال اللي موجه لنغم ..

هيا بتدرس طب .. والطب مش موجود في غزة الا بالازهر .. الاسلامية لساتها ما فتحت قسم الطب

والكل صار يحكي انو الطب تاع الازهر بيقرف الواحد .. وبيعطوا الطالب فوق طاقتوا فيها ..

غير كمان انو ما فيها قسم تشريح .. وبيسفروهم ع مصر على ما اظن بالسنة التانية او التالتة .. عشان يطبقوا التشريح ..

ع العموم .. الازهر مختلطة .. وهادا بحد ذاتو بينافي شريعتنا .. وتقاليدنا

[محمود]

أختي روسانا
انتي بتقولي مختلطة
لكن تعالي على الأزهر وشوفي الشباب والبنات من وين بيجوا ؟
اول شي معظم طلاب الازهر بكونوا في قاعات المحاضرة
والي في الساحات طلاب اسلامية يعني الممنوع مرغوب .
بردوا أنا ما بنكر قصة الاختلاط . وقصة الحرمانية في الموضوع .
لكن كل انسان مصوان لذاته ----
بالنسبة لدراسة الطب في غزة كتير متعبة والله يعينك عليها .
مشكورة أختي روسانا على المرور

[نغم الحياه]

لو تشوفي الكتب الي عم أدرسها وتقارنيها بكتب جامعة الاسلامية بتشوفي الفرق

ماحدا بينكر هذا أخى الفاضل .. لسبب واحد وهو انه احنا الى عم بندرس ... ومو الدكاترة
الدكتور بييجى وبيعطى رءوس الاقلام ,, وحتى لو كان بيشرح منيح .. بيضل انه خايف مثلا حدا يفجره او يضربه اذا غلط عليه
ولا تنسى كتير شباب كانوا يروحوا على مكاتب الدكاترة ويهددوا اذا مانجحوهم .. مااباعرف شو راح يعملوووو..

ممكن سؤال (( ليش دخلتي جامعة الازهر مادامها فاشلة ؟؟)) ...

ياأخى .. انا بادرس فى الازهر لانه مافى خيار تانى لالى
وبعدين انا مو من الازهر .. انا بكلية طب فلسطين جامعة ابو ديس فى القدس " هاى جامعتى الاصلية "
لكن بما انه الطرق سكرت ... فكانت الازهر فرع لهالكليه هوون فى غزه

وبعدين .. كتير اشياء بتنجبر تعملها فى حياتك ومابتكون موافق عليه .. الخيار مو دايما معك


هاى رأيى ياأخى محمود.. وبدى اضيف شى بيكفى انه الاسلاميه معترف فيها فى الشرق الاوسط وبشهادتها
والازهر لأ

ولو كان فى الاسلامية فرع كليتى .. تأكد ماكنت راح اجى على الازهر

[نغم الحياه]

فكيف بتحكي هيك عن جامعتك يعني بعد ما تتخرجي وحد يجئ يقلك جامعة مش كويسه وفاشله هدا بكون قصده انه شهادتك كلام فاضي وما اخدتيها بجدارتك واذا كنت شايفه هيك فأنتي حرة

حبيبتى لولينا .. اولا هلا فيكى معنا فى المنتدى
وبعدين انا لما اتخرج ماراح اتخرج من الازهر

راح اتخرج من كليتى ... جامعة ابو ديس
وصراحة مابيشرفنى تكون كلمة الازهر على شهادتى

[نغم الحياه]

يامحموووووووووووووود


روسانا كلامك صحيح ... لكن هى كلية طب
واحده
فى فلسطين كلها .. لكن كان فى فرع فى النجاح
والتانى فى غزة .. وطبعا مافى غير الازهر

اول شي معظم طلاب الازهر بكونوا في قاعات المحاضرة

ماشاء الله عليهم .. يخزى العين حولهم وحواليهم
مافى حدا بيحضر محاضرات غير الى الى ماله" سنند وواسطه " والباقى ضارب طناش

وحكاية انه الطلبه الاسلاميه هما الى بيكونوا فى الساحه ... هل انت جد مستغرب
ممنوع عندهم يشوفوا اى بنت .. وبعدين يلاقى جامعه فيها كل شى مباح ... شو بدك من هالشباب يعملوووو

ياأخى بيضلو شباب .. وبعدين لاتنسى ان شباب الازهر والاسلامية هما اخوانى واخوانك وقرايبناااا

انا مقتنعه فى كلمة من كلامى .. وياريت تقتنع ... مو لسبب .. ولكن لان الحق يجب ان يقال

عذرا على اطالتى

[محمود]

أختى الكريمة
انا انسان بعرف الحق كويس وانا ما بكابر
فالأزهر جامعتي
وانا صحتلي طب في اليونان منحة كاملة
لكن انا رفضت وحبيت ادرس هندسة الكمبيوتر وتكنولوجيا المعولمات
والازهر في هذا المجال أقوى من الاسلامية
وخاصة انها ما صارت بالاسلامية كلية هندسة على عكس الازهر
أختى الكريمة يمكن السبب الي بدفعك انك تحكي عن الازهر انك ابعدتي عن جامعتك
وشوفتي الفرق بين التنين .
بعدين بكل صراحة انا راح أفتخر لما تنكتب على شهادتي جامعة الازهر
وهيا راح تفتخر فينا ان شاء الله ..
لكن مهما صار بتضلها جامعة معترف فيها دوليا (( مش زي ما بتحكي أختي ))
النظام الاكاديمي فاشل بكل جدارة
لكن لبنة العلم والتعلم موجودة فيها والحمد لله
وهذا اكتر ما يهمنا ،،
وبكفي انها جامعة فلسطينية وشوفي الظروف الي مرت فيها الجامعة ولسا محافظة على نظام وزمن الدراسة
والي صار فيها لو صار بأي جامعة تانية لو ما كملت سنة .
وربنا يوفقك ويوفق الجميع .
وانا بشكرك جدا على المناقشة الرائعة

[لولينا]

مرحبا اختي نغم

انتي بتقولي انه الاستاذ بعطي بس رؤس اقلام والباقي على الطالب انا شايفه انه هدا هو اساس الدراسه بالجامعه وهيك الكل بحكي الاعتماد على الطالب ومجهوده والاستاذ مجرد مرجع ترجعيله ان احتجتي شي مش هو يشرحلك كل شي واي جامعه بالعالم هيك بتعمل فهذا مش تقيم لتحكي وبالنسبه انه شباب بهددوا الاساتذه
فاحنا قلنا انه مشكلة الازهر هي فقدان الامن والنظام بسبب بعض الشباب المتهورين لكن مش كل طلبة الازهر
والمفروض انه يسير نظام وما حد يدخل الازهر لا بنات ولا شباب من بره الجامعه وافتكر انه اجت فترة كان ممنوع حد يدخل الا بالكرني وكانت ايامها الجامعه فاضيه حسيتها وهدا بدل على انه عدم النظام جاي من ناس متطفلة اكتر من بعض الاشخاص الي بكونوا بالجامعه وما بستهلوها

شكرا