الزاوج المـبكر .. مُؤيد أم مُعارض

[هلــون]

::
السلام عليكم ..

طبعا هاد الموضوع ببالي من فتــرة ... طبعا هاد الموضوع عـام ولك حق النقاش 100%

الزواج المبكر أصبح قضيه يتباحثها المجتمع بعد أن كان أهم مطلب من متطلبات الزمن الماضي أو بمعنى أصح الجيل السابق . فقد كان من الطبيعي جدا أن تُزف الفتاه بعد بلوغها مباشرة أو عندما تصل لسن الخامسه عشر كأقصى حد لعريسها الذي لا يتجاوز العشرين من عمره . و تبدأ رحلة الحياه بحلوها و مرها ينجبا الأولاد الواحد تلو الأخر فهم لا يعرفون لتحديد النسل طريق .



و ها نحن ثمار الجيل الفاضل السابق أحد أهم إيجابيات الزواج المبكر تربينا و ترعرعنا بكنف أباءنا عشنا معهم أهم مراحل تدرجهم بالحياه عاصرنا مشاكلهم شاركناهم بحلها و كانوا لنا أصدقاء أكثر من أباء و كل ذلك يرجع لتقارب أعمارنا مع أعمارهم بفضل الزواج المبكر .


بالعصر الراهن أصبح الزواج المبكر موضه قديمه ينظر لها شبابنا على أنه تخلف و رجعيه بل و يعتبره البعض ظلم يربط مصير الفتاه أو الشاب مبكرا بقيود مسؤليات الحياة .

و رغم كل ما ذكرت عن الزواج المبكر فهو كغيره من أمور و متطلبات الحياه له سلبيات و إيجابيات أرجوا منكم توضيحها بالإجابه عن الأسئله التاليه :



أخواني أخواتي الأعضاء هل تؤيدون الزواج المبكر إذا توافرت لكم الفرصه لإتمامه ؟




ماهي سلبيات و إيجابيات الزواج المبكر ؟



ماهي سلبيات و إيجابيات التأخر في الزواج ؟


هل التقارب العمري بين الأباء و الأبناء ضروري لإنجاح العلاقه بينهما ؟ و هل فارق السن بينهما سبب في التناحر و الإختلاف بينهما ؟



هل يؤدي الزواج المبكر و لو تم عن طريق الحب إلى إزهاق الحب بعد طول العشره بين الزوجين ؟و مالحل ليدوم ذلك الحب لسنين طويله ؟



ما هوي العمر المناسب للزواج بوقتنا الحالي ؟؟
//
الموضوع موضوع نقاش ولا أرد دردشة رجاءا ..
::

[حمساوي الحرية]

لا انا مش مع الزواج المبكر .

[ابتسامة الحياة]

هل تؤيدون الزواج المبكر إذا توافرت لكم الفرصه لإتمامه ؟

لأ.. لانه الزواج مسؤولية كبيرة ،،، وبده مين يكون قدها

ماهي سلبيات و إيجابيات الزواج المبكر ؟
السلبيات : يمكن رح تصير خلافات كتيرة كونهم تنيناتهم اعمارهم صغيره
مش رح يستوعبوا بعضهم
الايجابيات : انهم رح يجيبوا اولاد بسن صغيره ولما يكبروا ما بكون في فرق كبير بينهم وبين اولادهم



ماهي سلبيات و إيجابيات التأخر في الزواج ؟
السلبيات بالنسبه للطرفين ان كان عالشب او البنت ،
رح بتقل الفرص يعني البنت كل ما كبرت ما رح تلاقي الشب اللي بتحلم فيه او بالمواصفات اللي كانت تتمناها
والشب نفس الشي برضو مش رح يقدر يرتبط بالبنت اللي كان يتمنى فيها صفات معينه
كونه رح يكون كبير شوي ورح يضطر يتزوج حد بعيد كل البعد عن اللي كان في باله
وكمان في سلبيات من وجهة نظري لما تتاخر البنت في الزواج بتصير الها شخصيتها وكيانها
واستقلاليتها اللي مش رح تخليها تسمع كلام زوجها او تعيش معه زي ما هو بده
الايجابيات : بالنسبة الي في الزواج كله تحمل المسؤولية واني اكون قدها وكمان من الايجابيات الاستقرار



هل التقارب العمري بين الأباء و الأبناء ضروري لإنجاح العلاقه بينهما ؟ و هل فارق السن بينهما سبب في التناحر و الإختلاف بينهما ؟
مزبوط لما يكون الاباء اعمارهم مقاربه من اعمار ابنائهم رح يكون
في بينهم علاقة حلوة رح يكون في تفاهم رح يكون في صحبة وصداقة
والاهل رح تفهم الاولاد وتفهم الجيل او العصر اللي عايشين فيه ورح تعرف كيف تتعامل معهم بعكس
الاهل اللي بكونوا كبار كتير وفي فرق كبير بينهم وبين اولادهم
رح تنعدم روح الصداقه بينهم
لانه جيلهم رح يكون مختلف تماما عن جيل اولادهم
يمكن رح تصير خلافات ومشاكل كتيرة بينهم لانهم هما مش فاهمين اولادهم
واولادهم نفس الاشي صعب انهم يفهموا انهم اهلهم عاشوا بجيل تاني
مختلف كتيييييييير عن جيلهم



هل يؤدي الزواج المبكر و لو تم عن طريق الحب إلى إزهاق الحب بعد طول العشره بين الزوجين ؟و مالحل ليدوم ذلك الحب لسنين طويله ؟

اللي بحب بحب لو كان زواج مبكر او متاخر
والحب رح يدوم طول ما في احترام وتبادل بالمشاعر كلها
وطول ما احنا مقدرين العشرة الحياة الحلوة بتدووووووم

ما هوي العمر المناسب للزواج بوقتنا الحالي ؟؟
بالنسبة الي البنت لازم تتزوج بسن العشرين لانه صايرين نشوف بلاوي بهالدنيا
يعني الزواج ستر واستقرار للبنت ...
اما بالنسبة للشباب لو كبروا وصارروا فوق ال 26 كتيييييييييير منيح
لانه وبكل صراحه شباب هالايام مش كتير بحملوا مسؤولية
هاي وجهة نظري
وبتمنى تتقبلوا رأيي
واسسفه كتير عالاطاله
ويسلمو كتييييير هلون عالموضوع الروعه

[اجمل احساس]

أخواني أخواتي الأعضاء هل تؤيدون الزواج المبكر إذا توافرت لكم الفرصه لإتمامه ؟
كل زواج مرتبط بظروف على أساسها بنحدد اذا كان مبكر او لأ عشان يتم يعني ما بنقدر نحكم على القصة من مجرد سؤال عام لازم يكون في تفاصيل عشان نقدر نحكي على القصة ونحكم عليها صح.


ماهي سلبيات و إيجابيات الزواج المبكر ؟
سلبياتو انو ما بيكون الطرفين واعيين بشكل كافي لمسؤوليات الزواج وتربة الاطفال وكمان غالبا بيكون عقلهم صغير يعني ما بيقدرو يتحكموا بمتطلبات الحياة وفق منهج واعي وفهيم.

ايجابياتو انو بيكون الطرفين من عمر متقارب غالبا يعني بكون تفكيرهم نفس المستوى ( برأيي هاي كمان نص نص يعني شوي فيها شغلة سلبية للاسباب يلي حكيتها بالسؤال السابق)


ماهي سلبيات و إيجابيات التأخر في الزواج ؟
السلبيات برأيي انو التأخر بالزواج بيأثر على النفسية وكمان في الو سلبيات من ناحية الإنجاب.
الإيجابيات للتأخر بالزواج انو بكونوا اكتسبوا خبرة كافية ووافية بالحياة ( بس كل شي بيزيد عن حدو بينقلب لضدو )


هل التقارب العمري بين الأباء و الأبناء ضروري لإنجاح العلاقه بينهما ؟ و هل فارق السن بينهما سبب في التناحر و الإختلاف بينهما ؟
اكيد لانو بيكونو كاشفين حركات بعض هههه

لا بمزح اكيد ضروري لإنجاح العلاقة عشان يكون في تفاهم بينهم
اما اذا كان العكس كمان ممكن تكون ناجحة بس غالبا يصبح الابناء ايتام وفي هاي الحالة بيعيشو بدون حنانهم من اصلو.
اما اذا كانوا عايشين والله يطول بعمر الجميع ، ممكن يكون في تفاهم لكن بيكون نوع من العصبية لانو كبر سنهم بيخليهم ما يستحملو كل شي وبيتعاملو مع الامور من ناحية ووجهة نظر وحدة بس.(طبعا هادا غالبا مش دايما يعني )



هل يؤدي الزواج المبكر و لو تم عن طريق الحب إلى إزهاق الحب بعد طول العشره بين الزوجين ؟و مالحل ليدوم ذلك الحب لسنين طويله ؟
لا مش شرط كل شي بيضل متل ما هو لكن بشرط التفاهم بينهم واكيد كل شي مع العشرة بيتغير يعني بتصير علاقتهم علاقة ود واحترام اكتر من كونها حب متل ايام خطبتهم مثلا
وليدوم الحب سنين طويلة هادا على عاتق الطرفين مش واحد منهم وهاي الها طرق كتيييرة منها الثقة والصراحة بين الطرفين .

ما هوي العمر المناسب للزواج بوقتنا الحالي ؟؟
ما في عمر معين وكل شي بأوانوا يعني كلو نصيب ما بنقدر نحط عمر معين هيك رأيي
وبتمنى ما اكون زهقتك بأجوبتي ،،، موضوعك كتير حلو حبيبتي وبدو نقاش اكتر من هيك بس انا طولت عليكي وبكفي هيك، يعطيكي العافية يارب وما تحرمينا من متل هالمواضيع المميزة طبعا
تحياتي إلك

[امورة فلسطينية]

يسلمو على الموضوع الرائع وكتير منتشر بس صارو الاهل انو خلص يلا بس تتزوج البنت وتروح بيت زوجها بس انا ابدا مو مع الزواج المبكر لانو ما بكون للبنت الوعي الكامل ولا بمون عندها قدرة للتحمل هيك مسؤولية بس يسلمو واكيد قلو سلبيات كتيرة وكبيرة تقبلي مروري امورة

[هلــون]

المشاركة الأصلية كتبت بواسطة حمساوي الحرية لا انا مش مع الزواج المبكر .

::
أشكر ردك أخ حمساوي

ولكن السؤال لماذا لا تؤيد الزواج المبكر ؟؟؟؟

//
شكرا عالمرور
::

[حمساوي الحرية]

لا اؤيد الزواج المبكر :

لانو بصراحة هاي الايام مش متل هديك الايام ..

زمان كانت البركة تعم الواحد يتزوج وعمره 18 سنة وعندو 8 او 9 اولاد .

بس هسة حرام لانو الوضع المادي ما بيسمح والبركة انتزعت والباقي عندك اختي ...

وكمان شي انو جيل اليوم قصدي جيل البسكويت والشوكلاته والطراوة ما بيرتكن عليه يتزوج ويفتح بيت ويخلف اولاد لانو لساته متخلف ...

ولا حول ولا قوة الا بالله العلي العظيم على هيك جيل مش نافع ومش قادر يفيد حالو ....

والله شاب هالايام اذا بتزوج وهو صغير راح يظلم زوجته ويدمرها ....

مشكورة اختي .. تقبلي مروري .. هذا رأيي !!!!!

[هلــون]

هل التقارب العمري بين الأباء و الأبناء ضروري لإنجاح العلاقه بينهما ؟ و هل فارق السن بينهما سبب في التناحر و الإختلاف بينهما ؟
مزبوط لما يكون الاباء اعمارهم مقاربه من اعمار ابنائهم رح يكون
في بينهم علاقة حلوة رح يكون في تفاهم رح يكون في صحبة وصداقة
والاهل رح تفهم الاولاد وتفهم الجيل او العصر اللي عايشين فيه ورح تعرف كيف تتعامل معهم بعكس
الاهل اللي بكونوا كبار كتير وفي فرق كبير بينهم وبين اولادهم
رح تنعدم روح الصداقه بينهم
لانه جيلهم رح يكون مختلف تماما عن جيل اولادهم
يمكن رح تصير خلافات ومشاكل كتيرة بينهم لانهم هما مش فاهمين اولادهم
واولادهم نفس الاشي صعب انهم يفهموا انهم اهلهم عاشوا بجيل تاني
مختلف كتيييييييير عن جيلهم

::
أختي ابتسامة ردك مضبوط كلامك 100%

بنشوف عائلات كتيرة .. ابوهم كبير ما بعرفوا يتأقلموا معو ....

//
اما بالنسبة للعمر .. يعني برايك الفتاة لما اتكون 20 سنة سنها مناسب ,, انا من رايي صغيرة ,,

صح بدول الشام البنت بال20 بتكون خلص مستعدة للزواج .. بس انا لا اؤيد هاي الفكرة .. اصلا 20 ما بتكون خلصت لا جامعة ولا حتى معهد !!!


يعني من المدرسة بعدها بسنة بتكون اتزوجت .. والحياة تجارب وهيي ما شافت ولا تجربة بحياتها من المدرسة !!
::



شكرا على ردك ..

[هلــون]

::

اختي احساس اشكر مشاركتك ..


بس في نقطة بأجوبتك بدي فيها تفسير !!

ما هوي العمر المناسب للزواج بوقتنا الحالي ؟؟
ما في عمر معين وكل شي بأوانوا يعني كلو نصيب ما بنقدر نحط عمر معين هيك رأيي

//


يعني لو كانت الفتاة بعمر 16 سنة .. واجاها عريس .. هاد يعتبر نصيب !!


في عائلات بالسعودية والشام بتزوج بناتها على 15 سنة واقل وبتحكي نصيب ؟؟

اي نصيب والبنت بعمر 15 ؟؟؟ هيي البنت بتفكر ولا بتفهم بالنصيب اصلا ؟؟

وشو دور الاهل ؟؟ يعني خلص اجاكي عريس هاد نصيبك .. وهاد ببعض الدول الي بصير .. البنت عمرها 15 -14-13 بزوجوها

؟؟
انا بختلف معك بهاي النئطة عزيزتي ..


بنتظر ردك !!


::

[هلــون]

المشاركة الأصلية كتبت بواسطة امورة فلسطينية يسلمو على الموضوع الرائع وكتير منتشر بس صارو الاهل انو خلص يلا بس تتزوج البنت وتروح بيت زوجها بس انا ابدا مو مع الزواج المبكر لانو ما بكون للبنت الوعي الكامل ولا بمون عندها قدرة للتحمل هيك مسؤولية بس يسلمو واكيد قلو سلبيات كتيرة وكبيرة تقبلي مروري امورة

::
امورة اشكر جوابك الي اقنعني .. وهاي النئطة الي كنت بناقشها مع احساس

انو فعلا الاهالي لازم يكون الهم دور .. شو خلص يلا عبيت زوجك ؟؟

//
مشاكل الحياة عم تكتر وزمن أول تغير !!! كانو زمان يتزوجوا بدري لانو البنت ممنوع تطلع من البيت ولا تروح ولا تيجي ..!!

اما هلأ غير الموأة صارالها استقلاليتها وتتعلم وتكمل دراستها ...


بس للاسف في عائلات لسه تفكيرهم قديم ..


يسلمو كتير امورة

::