الحكاية الشعبية الفلسطينية

[أبو يقين]

"كان يما كان، في سالف العصر والاوان"

"كان هان شيخ لعرب..."

"وحدوا الله...
الله يمسي الحاضرين بالخير...."

"اللهم صلي على سيدنا محمد ...
وزيدوا البني صلاه..."

كلمات، جمل، بدايات، توسيط حكايه، وربما نهايات اخرى
هذا ما اعتادت على سماعه الاذن الفلسطينيه عند رواية القصص والحكايا، قبل نوم الاطفال ، من الجده، او اكبر افراد العائله. في المضافه، وبين اشجار البياره، ولا ننسى في خيمة شيخ العشيره وفارس العروبة.


الحكاية الشعبية الفلسطينيه، تاريخ لم يوثق الا بالذاكره وبراعة اللسان، عراقه ترجع الى عصور قديمه، حكايات تملأها الاشواق والبطولات، قصص الحب، الوطن، الطفولة المحرومه، وللفقر فيها النصيب الاكبر. صراعات فروسيه، انتقادات لاذعه بأسطر باللهجه المحكيه لواقع عاشوه اهلنا، ربما فقدنا الارض التي اقتبست منها الحكايه، وربما شردنا من موطن القصة، وفقدنا ابطالها وفرسانها، لكنها وصلتنا رغم التهجير والتغريب والاحتلال، لنحاول ان نوثق هنا...


اهداف الحكاية الشعبيه الفلسطينيه:

1- تحقيق حلم لم يتمكن الانسان الفلسطيني من تحقيقة في واقعه، تعويض عن شيء مفقود صعب تحقيقة، غناء مفاجئ، شفاء سريع، قوة سحريه في تحقيق طلب ما .. الخ
2- للحكاية وظيفة اخلاقية سلوكية وحكمة دفينه بين الاسطر، مغزى ما ودلالة معينه، ان صح التعبير ممكن نقول انه لكل حكاية حكمتها ونقدها لشيء معين او صراع بين صفتين إحداهما خير والاخرى شرّ.
3- نهايتها الجميله دائما وانتصار الخير على الشر، أيضا له قيمه معنوية كبيره لمتلقي هذه الحكاية
4- مقتبسة من الواقع والعادات والتقاليد الاجتماعيه، فهي ثقافة مورثة بالضرورة تعكس بيئة القاص نفسها.


الحكاية الشعبية الفلسطينيه بتجسد ثلاث انماط اجتماعيه: وهي ابن المدينه ، و ابن الريف ، و ابن الباديه تبعا للطبيعه الجغرافيه ولكن ان أردنا ان نكون منصفين في هذا التقسيم فعلينا تطبيقه ما قبل النكبة عام 48 والنكسه عام 1967، وذلك بسبب التهجير والتنقل والاندماج بين الثلاث فئات وفقا لبلد اللجوء والنزوح.

اتطرق الان الى الحكاية "الشعبية الاصليه" وأقصد هنا ماقبل النكبه والنكسه. وربما أن أهل الريف اليوم مثلا زاد تمسكهم بنمط حكاياتهم القديم، وهذا رد فعل طبيعي على حالة الاندماج والاختلاط التي يعيشونها بعد اندماجهم بأهل المدن وطابع حياة المدينه.ويغلب على تلك الحكايات (اهل الريف) النص الخرافي الاسطوري، وذلك لمحاولة منهم للخروج عن الواقع.

أما حكايات المجتمع البدوي (بدو بئر السبع وبدو السهل الشمالي من فلسطين، وبدو منطقة بيت لحم والخليل، وبدو الاغوار) غالبا ما تروي حكاياهم على لسان شاعر الربابه، بنص نثري مدموج بمقتطفات شعرية عاطفيه مؤثره مرافقه للقهوه الساده. وتعكس ايضا ترحال البدو وغزواتهم وحياة القبائل التي يمتازون بها والتغني بالفروسية والبطولة وقصص الحب المستحيلة بين ابناء القبائل.

ولو قارّنا بشكل سريع بين الحكاية الشعبية الريفيه والبدوية، لوجدنا الثانيه أقرب الى الواقع الذي يروي امجاد شيخ القبيلة واشهر فرسانها وغزواتها، عكس الاولى التي امتازت بالاسطورة والخرافه. رغم تقارب المجتمعين جغرافيا.

ولابد لنا من الاشاره الى التغيير الحاصل للحكاية الشعبية الفلسطينيه بعد النكبه والهجره، حيث برز فيها الشوق والحنين للوطن، ذكريات أيام البلد وليالي فلسطين، وحلم العودة والدعوات والامنيات بالاضافه الى قصص الاحتلال ومعاناة شعبنا. أو ضرب أمثله على المسافات في الحكاية من واقع الارض الفلسطينيه المغتصبه كتعبير( مثل المسافيه بين يافا وحيفا).


ميزات الحكاية الشعبية الفلسطينيه:

1- الأقدميه: أصول الحكاية ترجع بالغالب الى الديانات القديمه وما اشيع من اساطير خرافيه عنها وبقيت الى اليوم بسبب تناقل الشعب لها.
2- الجانب الاجتماعي: حيث تطلعنا على قيم الشعب في مختلف المجتمعات البدوية او الريفيه او المدنيه. وتحدثنا عن تقاليد كل مجتمع مثلا

القهوه السادة وتقاليد البدو في استقبال الضيف وقصص الحرب والغزو بين القبائل. والعلاقات العاطفيه بين ابنة الشيخ وابن شيخ القبيلة المعادية ..الخ

قصص اخرى تعكس البيئة الزراعيه الريفيه وحياة الفلاح في أرضه والمضافه وفك ا لخصومات ومقاهيم الشرف والاخلاق. ولا ننسى تقاليد الاعراش ومهرجانات الافراح والوفيات.

لتنقلنا حكايا المدن الى واقع التجاره والترحال والتنقل، وحكايا ومواقف حذت في البلدان المجاورة.

3- الجانب السياسي: برزت ايضا قصص الحميّه والدفاع عن الارض، وايراد القصص الوطنيه البطولية ايضا، والختام بالعودة الى الوطن في النهاية مهما طال الاغتراب.
4- الجانب الفكري: فغالبا ما تنتصر الشخصية الدينيه او المتعلمه والمثقفة صاحبة الفكر الجيد والتفكير السليم.
5- ويمتاز ادب الحكايات (الحكاية الفلسطينيه خصوصا) ايضا بالتطرق الى شخصيه بطولية تعاني الكثير لتحقيق ماتريد، وتنتصر بالنهاية دون التركيز على مسمى معين لذه الشخصيه والاكتفاء بالتعبير عنها بالفارس والشيخ، البنت، الاب، الام ..الخ ومحاولة التركيز على خاصيّة الوصول الى الكمال
منقول

[أبو يقين]

أول حكاية:


العنزة العنزية


كان يا مكان يا مستمعين الكلام. وما يطيب الهرج والكلام إلا بذكر الله. لا إله إلا الله.

في هالعنزة إلها أربع أولاد واحد اسمه سعسع وواحد اسمه حمحم وواحد اسمه معمع وواحد اسمه حماحم. كل يوم بتطلع العنزة الصبح وبترجع الظهر حامله على ظهرها يندك(1) حشيش وابزازها مليانه حليب. أولاداتها جوا الدار. بتدق ع الباب.

- يا أوليداتي ما.. يا اسخيلاتي ما.. افتحوا بويباتي با. ع ظهري بندك حشيش... وابزازي مليانات حليب.

بهيظوا(2) الأولاد، وبفتحوا الباب. بوكلوا هالحشيش ويرظعوا الحليبات وبقيلوا بجنب امهم.

والله يوم من ذات الأيام طلعت العنزة في رزقة أولادها.. هي بتطلع من هون والغول بيجي من هون. أثاري الغول يبقى سامع وعارف إنه في غنزه وأولادها. أجا الغول. صار يدبدب ع الباب ويقول بصوت هرج.

- يا أوليداتي ما.. افتحوا ابويباتي با. ع ظهري بندك حشيش... وابزازي مليانات حليب.

هاظوا السخول يفتحوا.. نط الزغير.. قالهم ولكم هذا الغول. الغول. مش الغول... ما ردوش على سعسع وراح يفتحوا الباب. زرق واتخبى بالقش. والله فتحوا الباب من هون والغول فات من هون.

صاروا يتفارخوا(3). نط عليهم الغول وسرطهم(4) في بطنه.

ما أقرب من فرج الله أجت العنزه.. لقيت الدار قفره والمزار بعيد(5). خرفها سعسع من قصقص لسلام عليكم.. طلعت.. راحت على ظهر بيت الغول وقعدت تدبك... صار الغول يقول:

مين اللي ع حيطاننا كسر فخارنا

ردت عليه العنزة:

- هاي العنزة العنزية، أم قرون احديدية، اللي أكل معمع وحمحم وحماحم يطلع ع البر يزاحم.

قالها الغول استنيتي تمني أعمل قرون من عجين وانزل لك. استنته. عمل قرون من عجين وقعد بالشمس. ونزل لها. قالت يا ستين بقرون العجين وكسرتهن بظربة واحدة. قالها استنيني تمني أعمل قرون من طين... عمل قرون من طين وقعد بالشمس تانشفت ونزل لها.. برظه كسرتهن بظربه واحدة. قالها استنيني تمني أعمل قرون حديد. فاظت مع العنزة. قالت له وبعدين معاك وراحت ظاربه بطنه بقرونها وفجرته.. نطوا أولادها معمع وحمحم وحماحم.. أخذتهم وخلت الغول متلس(6). ----------------------------------------------------------------------------------------------------------------
هوامش الحكاية :

1- كومة ضخمة، حمل

2- يهجمون

3- يصرخ الواحد في أثر الآخر

4- ابتلع

5- لا أحد موجود

6- ميت وملقى على الأرض

[أبو يقين]

الحكاية الثانيه:

الشاطر محمد

هذا يا أولاد في هالشيخ.. اختيار هرمان صار عمره في السبعين وما جاهوش أولاد.. عجز الطب والدوا. ما خلى حكيم إلا راح له. بدون فايدة. ومرته زغيره. ما كان يجيه ولد. يوم والله هو قاعد وإلا هلي(1) ينادي: «اللي بدها دوا للحبل.. اللي بدها دوا للحبل».. سمع وسمعت مرته.. نادوه. إجا. قاله: «اسمع.. احنا عجزنا الطب والدوا ومر عنا ناس كثير مثلك.. كيف بطلع بيدك تداوي هالمرة». قاله: «عندي ولازم ذمتي».. قاله: «إذا داويت هالمره وجابت إلك اللي تطلبه مكافأة تملي جرابك(2)». قاله: «أنا مصاري ما بوخذ.. بس أول ولد بيجيك بتعطيني إياه يوم ما بولد وبرجع لك بعد خمستا عشر سنة.. أو بتعطيني اياه على طول بعد الخمستاش».

فكر هالختيار.. فكر.. قال بعد خمستا عشر سنة يخلق ما لا تعلمون.. يا سرج بميل يا عنان بنقطع(3).. يا أنا برحل.. يا هو بموت..

قاله: «أنا موافق.. بعد خمستاشر سنة أن إجانا ولد والله أحيانا خذه».

وافق الحكيم. داوي المرة. والله أعطاها. جابت هالولد اللي ما شاء الله عنه. شو وجهه زي البدر. هالعنين اوساع وهالنصاحة وهالحلاة اللي تعالي وتفرجي.

كبر الولد وابن الخرافيه بساع بكبر.. وعلمه أبوه.. قراه(4).. وتعلم ركوب الخيل وصار هالشاب اللي ما شاء الله عنه.. يوم ما كمل الخمستاشر سنة ما استفاقوا إلا الحكيم جاي.. قال لأبوه: «بدي الولد.. بدي الشاطر محمد».. قاله «كيف بدي أعطيك إياه.. بعد ما ربيت ولبيت هس أعطيك إياه». قاله: «اللي أوله شرط آخره رضا». منه منه نتش الولد.. وفقدوهم ما لقيوهم.. الحكيم يمشي والولد لاحقه كأنك طارده بمطراك.. سحره.

ظلوا يمشوا تاوصلوا هالبلد. الحكيم يقول للشاطر محمد بابا وهذاك يقول له بابا.. الحكيم يطش يشتغل يداوي.. الله أعلم بيه الشاطر محمد يقعد في الدار.. يطلع ع البلد.. يتفرج.. يتعرف على الناس..

يوم والله هو ماشي وإلا هالزلمه اختيار قاعد ع باب هالدار.. حاطط هالكرسي الزغيره وقاعد بنش ع هالغليون(5)... اطلع في الشاطر محمد وهو يصرخ: «يابا يا حبيبي»... وصار يبوس في هالولد.. ويعيط في هالولد.. والشاطر محمد مش داري اشو يقول.. الختيار.. يقول له: «يابا يا حبيبي يا محمد...» بعد ما هدي الزلمه قاله: «يا عمي.. صحيح أنا اسمي محمد.. بس أنا مش ابنك» قاله الختيار: «أنا عارف بس أنت مثل ابني مخلق منطق.. وهذا الله بعثك إلي مشان أبل شوقي من ابني اللي مات في زهرة شبابه...». وقعد الختيار ينهق(6)... هذا الولد صار يعيط.. ويحاول يهدي بالختيار.. فاتوا مع بعظ ع الدار... وقعدوا.. كل واحد منهم قص قصته للثاني.. الختيار قص قصة ابنه.. والولد قص قصته مع الحكيم الساحر.. قال الولد: «والراي بها الحكيم.. إن شافني بالبلد برد يسحرني ويستعبدني وأنا مش حابب أظل معاه. قاله: بس هذه هي» قاله: «وهذه بسيطة؟». قاله.. «استني علي».. قام الختيار جاب هالطاقية مطرزة ومدندشة(7) وحطها ع رأس الشاطر محمد.. قاله الشاطر محمد «شو هذه»؟ قاله «استنى تاقول لك» نادى الختيار ع الخدام.. قاله «صب قهوة».

صب الخدام قهوة لسيده.. قاله: «صب للشاطر محمد».. صار الخدام يتلفت حواليه.. قاله «طيب روح»... راح الخدام.. قال الشاطر محمد: «مال خدامك كنه ما بشوف الظيوف؟» قاله: «بشوفش اللي ع راسه طاقية اخفا.. انت ع راسك طاقية لا بتخلي حدا يشوفك ولا يسمع صوتك».. قاله: «يعني أفلتت من الحكيم الساحر». قاله: «بعون الله».

قعد الشاطر محمد عند هالختيار.. في النهار يطلع.. يلبس طاقية الاخفا ويدور في هالبلد... يوم ماشي من تحت هالقصر شاف هالبنت بتطل على هالقصر عند هالبنت عاد هو ما حدش بشوفه ما دام لابس طاقية الاخفاء..

طلع.. مرق من بين هالحراس وهالخدم.. وطلع على هالدرج.. شو قصر ملوك. مرق من عند هالطباخ بصفط في هالجاج(8) على هالرز.. حط الطباخ جاجه.. فسخ فسخة منها وأكلها.. صار الطباخ يتلفح(9) حواليه ويقول: اسم الله... رد تناول الجاجة وعاود حطها.. ظل الطباخ يتلفح. دشر الطباخ وطلع عند البنت. لاقاها لابسه ثوب هالحرير وممددة على هالسرير بتقرأ بهالكتاب.. من ساعة ما فات شافها قعدت تتظبظب(10) قامت طالت تخت الرمل وقعدت تحسب. قالت له «قيم الطاقية عن راسك يا شاطر محمد.. أنت نصيبي من هالدنيا وجابك الله وجيت.. إنت جوزي اللي الكتب حكت لي عنك.. اظهر وبان وعليك الأمان..». الشاطر محمد قالك اظهر ما اظهر.. بعدين ما قدرش يطلع ويتركها وراه.. قام هالطقية.. وقرب سلم عليها.. قعدته بجنبها.. إجا تامنه يحكي لها قصته قالت له: «لا تتعب حالك.. أنا بدرج(11) فيك من يوم ما ولدت تاجيت على هالبلد. وأنا عارفة إنك لا بد وتيجي».

قامت سفقت(12) بايديها.. اجو هالخدم.. فرشوا هالسفرة وقامت هي والشاطر أكلوا وشربوا واستحمدوا الله.. وقعدوا يحكوا ولعبوا.

فات ابوها.. قالها: (مين هذا يا بنت؟» قالت له: «هذا اللي طول عمري بستناه.. هذا الشاطر محمد». قاله: «يا ميت أهلاً وسهلاً.. أنت الشاطر محمد اللي ع شانك رفظت أولاد الملوك».. قاله «أنا الشاطر محمد».

قام عقد لهم ع بعظ وجوزهم وعملهم هالعرس وهالعرنسة وقعد عندهم الشاطر محمد كم يوم.. وقال لعمه: «يا عمي البلاد طلبت أهلها». قاله: «آ.. يا عمي.. شو عليه». سوي لهم هالزادة وهالزوادة وقالهم الله ييسر أمركم..

مشوا.. مشوا.. تقول من هول لحيفا... قعدوا يتريحوا. والله ما لحقوا يقعدوا وإلا هي بتقوله: «آخ.. آخ.. البس الطاقية يا شاطر محمد..» قالت له: «هذا ابن عمي طلبني وأنا رفظته مشانك وهاي أنا وقعت تحت إيده..» سحب سيفه وقالها: «هس بخلصلك عليه» قالت له: «سيفك ما بفيدك.. هذا ابن عمي وأنا بعرفه.. ساحر ما فيه حدا أقدر منه.. وروحه مش معه.. البس طاقيتك وخلينا نشوف كيف بدنا نساوي فيه».

لما وصل قالها: «جابك الله والنصيب.. طول عمرك ما بدك اياني وهاي الله حطك تحت ايدي..» قالت لحالها: «يا بنت سايريه(13)، قال اللي قبلنا بوس الكلب من ثمة تاتوخذ حاجتك منه» قالت له: «ولو يا ابن عمي.. هو أنا بدي ألاقي أحسن منك».. قالها: «ومين اللي بقى معك؟» قالت له: «الشاطر محمد..» قالها: «ومين الشاطر محمد» قالت له: «هذا ساحر معاه طاقية اخفا.. وطلبني من أبوي وأبوي جوزني غصبن عني». قالها: «وإذا قتلته؟» قالت له: «ريحني منه وأنا بتجوزك.» قالها: «امليح امليح امليح». قعد هناك يظرب بتخت الرمل.. يظرب.. ويحسب.. فش فايده.. قام قالها فوتي معاي على قصري وأنا بدبره.. فاتوا هالمغارة فات الشاطر محمد معاهم بين باب هالقصر قرأ عليه كلمتين فتح.. الشاطر محمد حفظ الكلمتين وفات معهم.. شو هالقصر.. تقول عنه قصر ملك.. هالخدم وهالحشم.. وهالمال اللي ما بتوكله نيران. فاتت هي على هالغرفة.. قالت له: «بدي اغير أواعي». وهو راح يدور ع كتب السحر. الشاطر محمد فات مع مرته. سد الباب وشلح الطاقية.. قالت له «اسمع خليك معانا الليلة... ظلك معانا أجرك واجرنا.. بعد العشا.. بنتعشى.. وبنسهر على كتب السحر بتاعيته وأنا بخليه ينطق ويقول وين روحه.. بتروح بتجيبها» قالها: «طيب». قالت له «فتح عينيك وذنيك».

والله.. غيرت أواعيها.. ومشطت وتهندزت. طلعت قعدت عند ابن عمها. أجو الخدم. حطوا هالسفره، وقعدوا يتعشوا. صف الشاطر محمد معهم.. بس عاد ما حدا شايفه الطاقية ع راسه. أكلوا وشربوا وظحكوا ولعبوا قاموا.. قعد ابن عمها يقرأ بالكتب وقعدت هي توخذ وتعطي معاه عن السحر والأرواح والجن. منه كلمه.. منها كلمه.. قالت له: «إلا قل لي.. روحك وين». قالها: «يا مرحومة البي روحي في علبه في بطن ذيب في وادي الوحوش.. ذيب اسود وع صباحه (جبينه) نقطة بيظه».

الشاطر محمد سامع.. سحب حاله وراح.. يدورع الذيب.. نزل ع واد الوحوش.. دور دور.. فش فايده.

قال بدي أدور لي ع غنمات أرعاهن.. الغنم بتجلب الذياب. مرق على هالعجوز بتحوحي على هالغنمات.. قالها: «ياخالتي ما بترعيني هالغنمات؟» قالت له: «برعيك». رعي عندها.. صار يسوق هالغنم في واد الوحوش وهو لابس طاقية الإخفاء تبين هالغنم كأنها دايرة ع رأسها. والله يوم وإلا هالذيب الأسود جاي من بعيد يركظ ع ريحة الغنم. اطلع ع صباحه وإلا هالنقطة البيظة. قاله الله جابك.. سحب سيفه وتاوصل الذيب وقط راسه إلا هو مبلطح هاظ عليه. فجره. وفتح بطنه وطال هالعلبه.. ووينك يا القصر. بطريقة رد الغنمات للعجوز وراح.

بالتصادف لقي الأمير ناصب لمرته عرس. إلا بدك تجوزي.. هي تقول له بصيرش أجوز اثنين.. اقتل الشاطر محمد وأنا بجوزك.. رفع الشاطر محمد الطاقية عن راسه وقال: هذا الشاطر محمد إجا لحدك تعال اقتله.. مرت الشاطر محمد فنت الزغروت(14) سحب الأمير سيفه وهجم على الشاطر محمد. رفع الشاطر محمد العلبه بيده وقاله «اللي بحمل لهم السيف الرجال مش السحرة الملاعين». الأمير وقف وسقط السيف من ايده. فرك هالعلبه. وقع الأمير ما بعنيه بله. نادى الشاطر محمد ع الخدم. جروا الملعون وكبوه.

قام الشاطر محمد.. لم الذهب والمال وكل شيء خفيف الحمل غالي الثمن.. وأخذ مرته.. وروح على أمه وأبوه.

والتم شمل العيلة وانبسطوا.

ودشرتهم(15) مبسوطين وجيت.


----------------------------------------------------------------------------------------------------هوامش الحكاية :

1- هذا الذي

2- تملأ كيسك بالنقود

3- لا بد وأن يحصل شيء ما

4- علمه القراءة

5- يدخن على الغليون

6- يجهش بالبكاء

7- مزخرفة

8- الدجاج

9- ينظر هنا وهناك مشدوها

10- تلم حاجاتها

11- أراقب خطواتك

12- صفقت

13- اتبعي طريق المدارة

14- زغردت

15- تركتهم

[أبو يقين]

تخونني نفسي الان، وتسابقني دموعي احتضان الذكريات واللهجه التي نفتقدها
كلمات تراثية من صلب فلسطيننا المحتله تعانق مسامعي وانا اتلفظ بها
اشتاقكِ فلسطين
اشتاق ترابك، تراثك، وربما عرقاً يسيل من الجبين على أرضك


فلسطين أنت الأمل أنت المستقبل أنت الماضى أنت الحاضر أنت لا أستطيع وصفكى الا أن تكونى الوطن الوطن الوطن palestine our land فلسطين أرضنا

[أبو يقين]

وين الردود الحلوة يا جماعة وين وين شكلو الموضوع ما هوا عاجبكوا يلا يلا بلا هبل ورجونا ردودكوا الحلوة يا جماعة الخير
هذه القصص تمثل التراث الفلسطينى

[ادهم اللداوي]

Great!

[قمر الخليل]

يسلمووووووووووو جييييييييييفاااااااااارااااااا ااا

روعةروعة روووووووووعة

كلمات واللهجة والله روعة

يسلمو يسلمو كتير حلو مجهوووود رائع جدا

بس رح انسقلك بالخط واكبرو


رح اثبتلك الموضوع لمدة معينة

وبامكانك المشاركة بمسابقة القصة القيرة



http://www.shabab.ps/vb/showthread.php?t=28947

يسلمو على مشاركاتك القيمة وعلى تنشيط هالقسم : )

[أبو يقين]

مشكورة قمورة على تنسيقك الرائع ومرورك الطيب الجميل وان شاء الله أشارك فى مسابقة القصص القصيرة

[أبو يقين]

الموضوع مهم بس ما فى حدا يرد أو يطلع

شكرا الك قمر الخليل لأنك ثبتي الموضوع اقل ما فيها شجعتينى

[أنين]

رووووووعه أبو يقين القصص اكتير حلووه يسلمووو