مذكرات شاب أيام الحرب على غزة .

[PaLeSt!Ne SouL]

واجا اليوم التنين و العشرين..
وكل يوم بنقول هادة أقوى يوم.. وأعنف يوم ..
لا بس بجد.. اليوم أعنف وأقوى يوم شفناه..
كنا نشوف أغلب القصف على التلفزيون .. هلقيت صار قدامنا مباشر..
طول الليل الدنيا تضوي وتطفي.. زي الألعاب النارية..
بس العالم الألعاب النارية عندها من الأرض للسما.. إلا في غزة.. من السما للأرض..
هيهم وصلوا تل الهوى.. يعني بشيكل بكونوا عنا.. مش بشيكل ونص حتى..
أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة.. ومستغربين اني قاعد عالنت.. على أساس إنو الدنيا حرب لازم أضل قاعد ألطم..

تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار..
مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..
ما علينا.. الحلو في الموضوع انه شلومو بتبين حنيته في وقت الحرب .. بقولك حفاظاً على رفاهية الشعب.. اعطونا تلت ساعات تهدئة في اليوم.. الواحد يعمل فيهم اللي بده اياه..
وأحلى ما فيهم انهم مشكلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة..
وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..
والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..
اليوم قعدت أفكر أفكر ايش أعمل.. لقيت احسن اشي أعمله اني أنام.. عشان الجو بكون هدوء وفش صوت قصف (نسبياً) ..
لأنه طول الليل صوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح..

طول ما الواحد قاعد وهوة بسمع يا صوت صاروخ قريب.. يا بعيد.. يا بحس بهزة.. وبدينا نسمع مناطق غريبة صاروا يقصفوها..
مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد)..
طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده..
شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني..
الأعمار بيد الله.. الواحد عنده يقين انه كل شي بأمر الله.. عالرغم بإنه الواحد بطل يخاف زي أول لما يسمع صوت صاروخ..
بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..
دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"..
بس هالمقولة بتنطبقش عالصواريخ.. ولا ايش رأيكم..؟

أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية..
كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واحد بقولك جيش الدفاع الاسرائيلي..
ويطلع الشب بحزرك انه يكون عندك سلاح.. أو تتعامل مع واحد من المقاومة..
بس اليوم حسيت انه فش إلا تلفونا بكل غزة.. مسكتش وهوة يرن..
- ألو السلام عليكم...
- وعليكم السلام..
- معك فلانة من ليبيا.. الله معكم.. الله ينصركم.. الله يقويكم..
- تسلمي يا حجة.. إدعولنا..
- الله ينصركم ويحفظكم..
- يلا سلام عليكم..
- وعليكم السلام..
هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..
ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..

لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور..
بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..

طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة.. وهية رياضة براميل الميا..
أول ما أفتح عنيا على طول بمارس الرياضة اليومية.. بطلع على سطح الدار بتفقد براميل الميا.. وقديش ضايل ميا.. طبعاً عن طريق الدقدقة على البرميل..
الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه..

أنا لقيت حالي لهلقيت عايش قلت أكتبلكم أحكيلكم عن وضعنا.. بكرة يمكن أكون عايش بس مش قادر أكتب.. أو مش عايش من أصلو..
إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..
ونشوفكم على خير..


هاي مذكرات شاب في الحرب يوم واحد وعشرين


شر البلية ما يضحك

[مُـحَـمَّـدٍ]

هههههههههههههههههههه
احلى ما القصه كلمتها الشعبية العاميه

كتييييييييير حلوة القصه
مشكورة اخت دمعة اسى
بارك الله فيكى وجزاكى كل خير

[بسملة]

: )

[بسمة صفا]

بارك الله فيك
منيح انك نمت فى الحرب
احنا اسبوع كامل ما نمنا
اصعب ايام مرت علينا الله ما يعيدها من ايام ولا يوريها حدا يارب
تقبل مرورى

[RaNa <3]

عنـــجد كثــير حــلوة .. يــا اللهـ كــانت أيـام صعــبة .. مــع إنـي ماكنتـش في غــزة كنتـ في الإمــارات بس اللـهـ يخلـي التيـليفـزيون ..

ومــاشاءاللهـ كـلو قـاعد بنـوح وبصيــح :)

تســلمي أختـي دمـعة أسـى ع المـوضوع الحلـو تحياتي

[Ṝậ₥ắ]

أيام صعبة مرت عالجميع
كنا ما ننام ولا نرتاح
صحيح كنت بالاردن بس طول الوقت نتفرج عالتلفزيون ما بدنا يروح علينا خبر
او نازلين مسيرة بشوارع عمان ,, او بنلف على الخيم التضامنيه الي انعملت بالشوارع لحتى يجمعوا فيها تبرعات لاهل غزة



ايام تنذكر وما تنعاد
الله يرحم الشهدا كلهم ويشافي جميع الجرحى
ويصبر اهلنا وحبايبنا بغزة على ابتلائهم
وينصرهم على كل من عاداهم



دمعه اسى ,, فعلا شر البليه ما يضحك
كل التحية للاخوان الغزازوة الي رفعوا راسنا بصبرهم وايمانهم وثباتهم

وشكرا الك :)

[Mzajye ~]

بتزكر هالايام كانها صارت مبارح

خواتي التلاتة و اخوي هناك بغزة

انا هون بالامارات كان عندي امتحانات الفاينل

و ماما بالمستشفى عندها عملية

ما كان ينطفى التلفزيون دقيقة

كنت اقرا جملة من الكتاب و بعدين اقضيها ساعات اتفرج و اتصل

و يا حلاوة لما كنت اتصل باختي هناك و بعد عناااء ليلقط الخط و فجاة اسمع صوت صاروخ و يفصل الخط

انا كنت اقول خلص ودعوا خواتي و اخوي

ايام صعبة كمان للي بعاد و الي الهم اهل هناك

الله ينتقم منهم بس

ربنا كبير ما بنسى حدا

[فدى الاقصى]

ياالله عليك .. ولا خفتي ولا كأنو حرب

ايام حرب غزة انا جتني حاااالة نفسيييييية صعبببببببة من الي شفت بالتلفزيون بخووووووف وبحزن جتني هستيريا
بظحك وببكي بنفس الوقت كأني مجنونة

مع اني سعودية .. بس والله كأن الحرب عندنا جنيت وجننت اهلي معي

23 يوم وانا مثل المجنوووووووووووووووونة كوابيس ولا باكل ولا بشرب ولا بعرف انام ... الله لا يعيد هالايام

[نسمة بلادي]

كانت أصعب أيام والله

بس زادتنا تقرب من ربنا ~

[PaLeSt!Ne SouL]

المشاركة الأصلية كتبت بواسطة محمد 99 هههههههههههههههههههه
احلى ما القصه كلمتها الشعبية العاميه

كتييييييييير حلوة القصه
مشكورة اخت دمعة اسى
بارك الله فيكى وجزاكى كل خير

: )

يا الله !!

حتى البخل هان

ولك تعبي ايديك شوي و اكتبي كم كلمة

دووم هالضحكة يا رب

بارك الله فيك
منيح انك نمت فى الحرب
احنا اسبوع كامل ما نمنا
اصعب ايام مرت علينا الله ما يعيدها من ايام ولا يوريها حدا يارب
تقبل مرورى

إن شاء الله ما تنعاد

نورتي