ايش تعمل لو صار معك هيك ؟؟؟؟

[مصدومة]

السلام عليكم ياشعب بلدي
هاي اول مشاركة لئلي بالمنتدى أتمني تتقبلوني عضوة جديدة

أنا راح احكي موضوعي للبنات والشباب حياكم الله بالمشاركة

ايش تعملي لو صار واتجوزتي واحد كان بيعرف وحده قبلك بس ما كملو مع بعض
طبعا مو هون المشكلة
المشكلة لو رجعت اللي كان بيعرفها تتواصل معه بس مشان تخرب بيتك يعني تنتقم من حبها القديم
راح أوضح اكتر

أنا متزوجة وزوجي ربي يحفظة بيجنن طيب وحنون بس كان بيعرف وحدة قبل
أنا ما بتفرق معي صراحة حتى او عرف 100 وحدة قبلي المهم بعد الزواج
بس هالبنت رجعت تتواصل معه مرة تانية اتصلت عليه كتير وبعتت ايميلات كتيرة حتى يرجعو لبعض بس عرفت انو أتزوج صارت تبعت ايميلات تهديد وتهدد فينا راح تخرب بيتنا وما بعرف شو

طبعا ما حدا عبرها وتركناها تضرب راسها بالحيط
بعد فترة رجعت تتصل مرة تانية على دار اهل زوجي وتحكي انو أنا حاطة صورها بالفيس بوك طبعا استغربت صرت احكيلها ما عندي صور الك لحتى احطهم بالفيس حكتلي لا أنا كنت ببعت صور لجوزك وانتي أخدتيهم وسرقتي ايميلي وهددتيني وعندي سجل محادثاتك وراح اشتكيكي واخسرك حقي...... أنا متأكدة انو هي اللي حاطه صورها بإيدها بس لتنتقم

أنا طبعا ما بخاف منها ولا بتهز فيا شعره وما راح تعمل شي أنا عارفة لسبب بسيط هي قاعدة بغزة وانا بالسعودية@_@وما بتقدر تثبت شي اساسا

لو أنتو مكاني ايش بتعملو أنا فكرت كتير انتقم منها بس ما بيزبط اشتكي عليها لازم نكون بنفس البلد عشان اقدر اشتكي فكرت ارجع فلسطين بس عشان اعرفها مقامها خرابة البيوت واشتكيها بس جوزي منعني وحكالي خليها تضرب راسها بالحيط ولا تعبريها
فكرت افضحها بالصحافة لان اختي صحفية وعندها معارف كتير بس مترددة

شو اعمل برأيكو ؟؟؟
وشو راح تعملو لو كنتو بنفس موقفي؟؟؟

[sadness eyes]

وعليكم السلام ورحمه الله وبركاته

&

اولا اهلين وسهلين فيكي اختي

تانيا مابعرف شو احكي بس لو كنت مكانك بعيد الشر عني اكيد حنقهر بس طنشيها احسن

مدام زوجك مو معبرها وهيي بعيده عنك وبلاش تفضحيها بالصحافه لانو من ستر مسلمابالدنيا ستره

الله بالاخره.

لاتردي عليها وخلي زوجك يغير ايميلو وغيرو ارقامكم ومدام انت بالسعوديه وهيي بغزه فخلص سيبيها

انتي بعيده عنها وهيي من حالها بتمل بس خلي زوجك يحكيلها تبعد ويهددها مش اكتر بس تفضحيها

بلاش وانتي اتحسبني عليها بكل صلاه وفوضي امرك لـ الله.

الله يعينك ويسعدك مع زوجك ويهنيكم ببعض ويبعدكم عن المشاكل

بتمنى كون فدتك بس بصراحه مش عارفه شو احكيي اكتر من هيك

ان شاالله هون حدا احسن مني بيحكيلك

اهلين من جديد فيكي

^,^

[مصدومة]

تسلمي اختي على كلامك يبرد القلب
أنا والله ما بحب المشاكل ولا بفكر افضح بس هي اللي فضحت حالها لو تشوفي كيف حاطة صورها بالفيس
والله تقرفي من حالك
بس هي زودتها كتير عن جد
حسبي الله ونعم الوكيل عليها الف مرة

أنا فعلا غيرت أرقام تلفوناتي بس رجعت تحكي على دار اهل زوجي لما ما قدرت توصللنا

وأكيد راح أخذ بكلامك
تسلمي مرة تانية

[sadness eyes]

الله يسلمك يارب شكرا

مدام هيي عارضه صورها هاي مابتخاف الله خلص سيبيها

واهل جوزك يتحملوها فتره وبتمل من حالها بس الاهم انها بعيده عنك الحمدلله

الله يهنيك بحياتك ويستر علينا

^,^

[PaLeSt!Ne SouL]

السلام عليكم ~

زي ما قالت سادنس سيبك منها

و طالما بعيدة ما تخليها تعكر عليكي حياتك

[مصدومة]

تسلمو حبيباتي على كلامكو الحلو
بس أنا جربت طنش مرة رجعت تلاحقني
أخاف ازا طنشتا مرة كمان ترجعلي بشي جديد
بس شو اعمل والله غير اسمع كلامكو واطنشها

حسبي الله ونعم الوكيل فيها وخلاص

بس كمان بدي ردود شباب واراءكو

[William Fichtner]

مسا الخير

بالبداية فعلاً انتو زوجين متفقين وفاهمين بعض ،، وخصوصا إنتي لانك متبعه الآيه الكريمه قوله تعالي (يا أيها الذين آمنوا لا تسألوا عن أشياء إن تبد لكم تسؤكم) ،، يعني ما بهمك شو كانت حياة زوجك قبل الزواج ،، مهما كانت وصارت ،، وهاد اشي حلو

وثاني اشي اهمالك للبنت هاي تعتبر قمه بالنضج الفكري ،، لانه فعلاً هي لا تستحق العناء ،، ولا تضييع وقت ،، وهيك بزيد غيظها

وبالنسبه لمضايقاتها ،، فطنشيها ،، أكيد رايحه تزهق ،، واذا ما زهقت ،، بكون خلص لازم وضع حل ،،

والحل ممكن تعرفي رقم تلفونها ،، او جوزك بعرف مين البنت وين ساكنه ،، وتخليه يحكي مع حدا بمون عليه ،، يروح عن أهلها ويحكي معاها ،، وهيك اعتقد هاد الحل الوحيد ،، لانه الناس فيها خير لسه ،، يعني رايحين يتفهمو الوضع ،،

والله يجيب الي فيه خير

لك الورد والود

[مصدومة]

كلامك جداً رائع يا ويليام
وانا فعلا ما بتدخل بحياة جوزي فبل الجواز
بس هي وحدة ما بتنهد وأهلها كمان زيها مصدقينها وقاعدين يهددو فينا
ناس فاضية


أنا خلاص راح اطنشها زي ما حكيتو بس يا ريت هي كمان تبطل تلاحقني

[§عاشقة غزة§]

اولا اهلا وسهلا فيك مصدومة
نورتي منتدانا الغالي

ثاني شي ها البنت شكلها بتتفرج على افلام كثير
برايي دام في اتفاق بينك وبين زوجك
لا تعيريها اي اهتمام
ولا تديها اكثر من حقها
كونك بدك تشتكي عليها او تفضحيها بالصحافة
هذا راح بفهمها انك مهتم فيها او خايفة منها
ومن ناحية ثانية شو تكوني استفدتي اذا عاملتيها بالمثل
الواحد ما لازم ينزل لمستوى ها النوعية من البشر
خلاصة الامر ومثل ما حكى زوجك
خليها تخبط راسها بالحيط
والله يهنيك انتي وزوجك يا رب

[shereey]

أختي اهلين فيكي بيننا
واقولك اتحسبني عليها وخلص ،أصلا هاي مش فارقه معها لانو ما عندها شي تخسرو إذا سمعتها هي بتلطخ فيها بإيدها اتركيها في متل بيقول"إعوي يا كلب وإرتاح يا قلب"
وبعدين إنتي وذوجك متفاهمين