كَلاّيِة بندورة !

[falasteene]

في إحدى الليالي المقمرة،وبينما كان "أبو شحادة" منهمكا بمتابعة نشرة الاخبار في التلفاز، دخلت عليه زوجته قائلة:
** بِدَّكِشْ تتعشى يا بو شحادة؟ إعْملت لك كَلاّيِة بندورة،و شَكَحْتْ لك زَقْطِة البطيخ.
** إستني يا مَرَة ،لما تخلص نشرة الأخبار.
**يا زلمة هو إنت ما بتزهك من هالأخبار هاي؟ طول النهار والليل وانت بِتْْكلّب في هالكَنوات من نشرة لنشرة..هي الأخبار بتتغير، وأخبار امبيرْحِيّات نفس اخبار اليوم.
**يا مَرَة كومي انكِلْعي من كُدّامي لَلُطّك خماسي ..وخليني اعرف شو بصير في البلد
**وشو الجديد يعني..؟؟ كل يوم نفس الاخبار..
" اسرائيل كَصْفَت.. اسرائيل اعتكْلت..اسرائيل هدمت..... السلطة اعتكلت كم واحد من حماس او الجهاد...
السلطة احبطت عملية استشهادية كان واحد من حماس ناوي يفجر حاله في اليهود.".....
"زلمتنا" كل يوم من اول ما ورث الكرسي وكَعد عليه وحط عليه غِرا، وهو بِردّد إنّو بدو يِكْظي عالفساد ويحاسب الفاسدين، والمصيبة إنو هالفساد هذا ما سمعنا عنه إلا لما أجا زلمتنا هو وجماعته من لبنان وتونس،وهالحكي إنا بنسمعه من أيام عهد الختيار الأول وما شفنا غير حكي فاضي ..
وكمان زلمتنا كل شوي بكول إنو بدو يكظي عالإنفلات الأمني..( شو يعني انفلات أمني يا بوشحادة ؟)
** ما شالله حولَك..إللي بسمعك بِكول إنك كونداليزا رايس مش إم شحادة
** أنا كُندرة يابو شحادة؟؟؟
** ولِكْ مين جاب سيرة الكنادر يا مْشَحّرة؟؟ أنا كُلِت كونداليزا مش كندرة.. كَطْع أهلِك شو ثورة..
الله يسامحك يابا اللي جوّزتني هالمصيبة هاي..اصلا أكبر غلط إنو واحد مْثَكّف مثلي وساكِط توجيهي
يتجوز مَرَة ما بتعرف غير دكّ الرصيع وعمل كلاّ ية البندورة..
يا ريتني تجوزت " رشدية" بنت خالي " تيلَخ " ،عالأكَلّ هذيك متعلمة ومعها شهادة صف خامس ابتدائي مش طَلْطَميس مثلك..
** شو كُصدك يعني؟؟ إِنِتْ لو لفيت " الشعراوية" من أولها لآخرها ما بِتْلاكي واحدة إمْعدَلة مثلي
إحمد ربك يابو شحادة إني إكْبِلِتْ فيك يا زلمة.. ياما خُطاب كثار طلبوني وانا رفظت، اللي من ذنابة،واللي من عتيل واللي من شويكة واللي من الدير..حتى من الساوية أجو...احمد الله اللي وافَكِت عليك..وجاي في الآخر تعايرني برشدية تيلخ..
** طيب هالسَّعِيّات بِتْسَكْري لي نيعك وخليني ارجع واسمع الأخبار منيح..
** وكلاّية البندورة مين اللي بدو يوكلها بعد ما بردت
**يا مَرَة مِشان الله تْحِلّي عن سماي وخليني اسمع خبر " زلمتنا" اللي بدّو يكظي عالفساد..
** ولا عمره بَكْدر يعمل إشي، لأنو هالجماعة اللي بحكي إنو بدو يكظي عليهم ، مثلهم مثله،والجماعة عارفينو منيح وإن الزلمة " لا بِهِش ولا بِنِش"، وزيو زي كِلْته ، وما بمون حتى على " ثُ-ُ – ْ تُه ". والمسالة فيد واستفيد
** آه فهمت كصدك يا ست كونداليزا.. بدك تكولي انه حاميها حراميها، ما كل الناس عارفين إنهم من ساعة ما أجو من لبنان وتونس واستعبدونا
واحنا كل يوم بزيد عندنا عدد الفُكَراء وعدد اللي مش لاقيين لُكمة الخبز يطعموا اولادهم،وصار كل رجالنا وشبابنا عاطلين عن العمل ، وكل يوم
بزيدوا علينا انواع ظرايب ما بتخيّلها عَكِل ،والله إنهم بِمُصّوا دمنا مص وما شفنا منهم خير من ساعة اليوم الشؤم اللي شفنا فيه خِلْقِتهم،
وبنفس الوكِت –يا ست كونداليزا- بنشوف لصوص وسرسرية من جماعتهم وكيف بعضهم بلعب بالملايين لِعِب، شركات ظخمة وسيارات
عُمُر أبو أبوي ما سمع عنها ولا شافها ، ومصانع أسمنت وباطون بِتْبيع انتاجها لليهود عشان يبنوا المستعمرات والجدار العازل ، والمصيبة انو المصنع صاحبه واحد بحكي عن الوطنية وبهاجم الجدار العازل والمستعمرات ليل نهار، وهو اللي ببيع انتاج مصنعه لليهود عشان يبنوا المستعمرات
والجدار...عُمرِك شفتي رئيس وزراء وقليل حيا زي ابو كَرْعة هاذ..
** وليش نسيت "أبو الغُرّة" اللي كان شحاد في خان يونس واللي الموساد لمّعوه وصار "ثورجي"،وِبْكُدْرِة كادِر صار عَكيد لمّن سافر عَتونس عند الختيار ورجع مع شلة " النَّوَر " وخلال سنة صار يملك أكبر فُنْدُك على شط غزة..
كل لي من وين جاب هالمصاري هاي كلها يا بو شحادة واحنا كلنا عارفين مين أبوه ومين عيلته.
** إحنا عارفين إنو ما عنده اي مؤهلات غير إنو شارون وموفاز بحبّوه كثير وهو مستعد يبيع أهله بس يرظو عليه اليهود وسدْكيني يا إم شحادة إنو أبو الغُرة هاذ صار يهودي أكثر من اليهود نفسهم ووظيفته يحكّك الهم اهدافهم وينفذ مخططاتهم ويعتكل ويسجن أي واحد بكول كلمة عاطلة عن اليهود، أنتي نسيتي إنو أول ما أجا بلّش يبني زنازين ومعتقلات في غزة
بدل ما يبني مدارس ومستشفيات، طيب كولي لي ليش زلمتنا الختيار الثاني وافك إنو يكون وزير في الوزارة رغم إنو كل الشعب بكره الارظ اللي بخبط عليها، يا مرة حتى الختيار الأول كان يخاف منه ويعمل له ألف حساب..وهاذ أكبر مجرم في فلسطين..
شو يعني بلدنا ما فيها كفاءات غير هالشلاطي عشان يعينوه وزير؟؟؟

** يا زلمة هاذ مخطط يهودي شاروني موفازي، يعني اليهود شاطرين كثير، همة حسبوها منيح، كالوا ليش نتعب حالنا ونحرس مستعمراتنا
وحدودنا ونتعب حالنا؟؟ في حل أحسن وأريَح إلنا، وهو نجيب هالثورجية ونخليهم نواطير على مستعمراتنا وشعبنا وهيك الشعب بِنام في أمان
واللي بِرفع راسوا من حماس أو الجهاد همة بِكطعولوا اياها ..يعني زي ما بِكول المثل " من دِهنو كَلّيلو " : وفخّار يطبّش بعضه "
" وهيك مزبطة بدها هيك ختم " ،وما دام احنا ساكتين ورجالنا صاروا زي الحريم وبخافوا يحكو ويرفعوا صوتهم ويكولوا " لا " معناتو
إحنا بنستاهل كل هاللي صار ورح يصير لنا..
يعني يا زلمة الشغلة مبينة من أول ما أجو هون..همة نواطير لليهود وظيفتهم يحموهم من صواريخ الكسّام ويعتكلوا أي واحد من الجهاد وحماس
وهيك بكونو اليهود بعاد عن اللعبة وفيه مين يكوم بهالمهمة بدالهم..
** وَلِك والله كِنّك ناوية تحبسينا.. وطِي حِسّك يا مَرَة لحدا يسمعنا..هذول الجماعة ما بعرفوا الله وما عندهم رحمة ،والواحد منهم مستعد يحبس أبوه أو يُكْتِل أخوه في سبيل يرضي شارون وموفاز..
بس بس سَكْري نيعِك وكومي بسرعة هاتي كَلاَية هالبندورة خليني اتسمم وانخمد..........

[محمود]

يسلموو فلسطيني

[رفعت]

يعطيك العافية

[sas]

واللي بِرفع راسوا من حماس أو الجهاد همة بِكطعولوا اياها ..يعني زي ما بِكول المثل " من دِهنو كَلّيلو " : وفخّار يطبّش بعضه "
" وهيك مزبطة بدها هيك ختم " ،وما دام احنا ساكتين ورجالنا صاروا زي الحريم وبخافوا يحكو ويرفعوا صوتهم ويكولوا " لا " معناتو
إحنا بنستاهل كل هاللي صار ورح يصير لنا..
يعني يا زلمة الشغلة مبينة من أول ما أجو هون..همة نواطير لليهود وظيفتهم يحموهم من صواريخ الكسّام ويعتكلوا أي واحد من الجهاد وحماس
ـــــــــــــــــــــــــــــــــــ ـــــــــــــــــــــــــــــــــــ ـــــــــــــــــــــــــــــــــــ ـــــــــــــــــــــــــــــــــــ ــــــــــــــــــــــــــ

على سيرة الكذب الي طالع نازل في البلد
والتناقضات الفظيعة داخل حركة حماس

تعلن حركة حماس مرارا وتكرار انها تتمسك يالشريعة الاسلامية والغريب الي بين الكذبة
انه قائمة حركة حماس تتضمن مرشح مسيحي انا فسؤال الي اصحاب العقول هل يجوز انتخاب مشرع سيشرع لنا القوانين من غير المسلمين

الكذبة التانية ايضا مرارا وتكرارا تعلن حركة حماس انها لا تعترف بالكيان الصهيوني وان فلسطين بالنسبة لها هي فلسطين التاريخية ثم تدخل الانتخابات التي سقفها اوسلو
ولنفترض ان حماس فازت بعدد ما من المقاعد
هل تعلمون كيف يباشر العضو عمله في المجلس التشريعي
لكي يباشر العضو عمله كعضوا ً في المجلس التشريعي عليه اداء القسم التالي

" أقسم بالله العظيم أن أكون مخلصاً للوطن وأن أحافظ على حقوق ومصالح الشعب والأمة وأن أحترم القانون الأساسي، وأن أقوم بواجباتي حق القيام، والله على ما أقول شهيد ".
هنا سيقسم فائزي كتلة حركة حماس على احترام القانون الاساسي والذي يتضمن اعتراف بوجود اسرائيل

لا اعرف تفسير لهذه الازدواجية في الموقف الرسمي لحركة حماس

ودمتم ودام الكذب

[رولينا]

يسلموو
فلسطيني
على..فكرة..اسمك..حلو

[ابوخضر]

الله يعطيك العافيه يا اخي فلسطيني

[ابن الانتفاضة]

يسلمو ويعطيك الف الف عافية ... بس هي هيك الدنيا وهيك الثورة .. بيقودها ثائر وبيقطف ثمارها خائن وجبان

[رفعت]

السلام عليكم ورحمة الله

اخي الحبيب ساس كل عام وانت بالف خير

اولا بحب اوضح شوية شغلات من باب انك سالت مش اتهمت

اول شي بالنسبة لقصة المسيحين بحب احكي انه المسيحين الهم كوتة بالمجلس التشريعي يعني الهم عدد مقاعد سواء رضينا او مرضيناش لازم يكون الهم مقاعد
حماس لو بدها تفلت هذا المقعد المسيحي اكيد مش رح يوخدو الا مسيحي علماني

وبالتالي بيكون هذا المسيحي العلماني صوت ضد القرارات اللي ممكن تقترحها حماس في التشريعي او غير حماس من الاسلاميين

فنزلت حماس واحد مسيحي ومضته على تعهد انه ما يخالف ولا قرار من قرارات حماس ويصوت الها في التشريعي هذا تعهد منه طبعا وبالتالي اصبح بالنسبة للقرارات مثله مثل حماس ومش معقول يكونو المسيحية اغلبية هذا اشي اكيد

النقطة الثانية اخي الكريم الحبيب

بالنسبة لقضية اوسلو بالفعل نحن ما بنكر انه اوسلو ما انتهت على الرغم انه تنازع الموت ولكن يا اخي الحبيب لما الاسلاميين يشعروا انهم ممكن يكونو اغلبية وممكن يقدرو يغيروا ليش ما يبدو بالتغيير يعني لو ضل الوضع على انه المجلس التشريعي اوسلو ممكن تجاوبني كيف ممكن يتغير الوضع

اكيد لازم حدا يجي يغيروو

وبالاصل لما صارت اوسلو وقع عليها المجلس التشريعي وبالتالي التشريعي وحده اللي بيقدر يلغيها

فاذا حماس وغير حماس من اللي رافضين اوسلو ضلهم مقاطعين التشريعي اكيد الوضع رح يضل مثل ما هوو واصبح انه لازمنا اقل الضررين

واخر نقطة نقطة القسم سالت فيها دكتور معاه درجة استاذ حكى انه الدين يسر انه يتم القسم بشرط تكون النية خلع هذا القسم ةتغيروو كخطوة بداية لاول النهاية مش اكثر

ارجو اخي انك تتفهم كلامي منيح

وما تحاول تكون عاطفي او حتى متحيز وكون عقلاني واحسبها من كل النواحي

وربنا يولي الصالح فينا

وبالنسبة للاخ جيفارا انا بحييك على وجهة نظرك بس ما حدا بيقدر ينكر اللي عمله ثوار حماس وكتائب القسام وهذا يكفي انهم يقودو مرحلة والخيار بالول والاخر للشعب والشعب مش كله جاهل مع احترامي للجميع

[صقر جباليا]

السلام عليكم ورحمة الله وبركاته ...
انا بدي احكي بس انا عارف انو الاخ محمود رح يزعل مني وبقلي انتا رجعت المنتدى علشان تعمل مشاكل بس يا محمود الكلام اللي بصير هادا ما حدا بيرضى فيه ... يعني مين اللي اجا من سوريا ولبنان ولاد كلب ولا ولاد حرام انا اجيت من لبنان وابوي مناضل واكبر شريف واكبر وطني وما بسمح لمخلوق الله خلقه انو يزاود عليه لانو ناضل 32 سنة طلع من غزة وعمره 18 ورجع في ال50 مين فيكو يا حضرات بقدر يزاود على نضال حركة فتح يا اخ ابوحماس ولا ابو ابو الجهاد انتا مهو كل العمليات اللي بتفشل معروف مين اللي بفشلها اللي باعت الاستشهادي هو اللي بيكشف عنه وبكون الو اتصال مع اليهود وما نحط الحق على السلطه في كل اشي لاني متاكد ما في حدا فيكو الا ابوه او اخوه او حد من قرايبه بالسلطه يعني لحم كتافنا من خير السلطه والله يخلف عليها ومين اللي بقول انها بتحرس اليهود مهو في الانتفاضة الاولى لما ما بقى في سلطه كنتو زلام الساعه 8 ممنوع حد يطلع برة ولما يقول حظر تجوال كلكو بتصيروا ابطال وبتقعدوا في الدور احمدوا ربكوا انكوا عايشين بامان ما في يهودي بنص الليل يجي يخلق باب الدار وياخدك ... وبالنسبة لقصة حاميها حراميها بدي اقلكوا اشي انا فتحاوي متعصب بس نفسي حماس اللي تفوز بالتشريعي علشان تدوق حلاوة الدولار وساعتها كلنا بنعرف شو بصير ولا الكرسي اللي بدو يقعد عليه ولا السيارة وشغلات كتير رح تقلب كيانكوا وما بقدر اقول غير شغله وحدة اللي بزاود على نضال حركة فتح يروح يدور على حاله ويشوف مع مين بيشتغل ...
سلام

[رفعت]

لا تعليق