,,يا حلالي ويا مالي,,

[فلسطينيه]

،،

للتحميل

حلالي ويا مالي

غني ع البداوية ردو حلالي ويا مالي

***

الليلة السهرة هنية *** وفيكم الحفلة مضوية

وع صف البدوية *** هب الهوا شمالي

***

جينا هالليلة نغني *** للعريس المستني

منك موال ومني *** لا تخليني لحالي

********

يللا نغير هلمغنى *** ونغني ع السبعاوية

ونخلي النغمة تعلا ** * وتسمع كل الأهلية

ونقدملك يا عريس*** التحيات القلبية

الله يتمم هلأفراح*** بطاعة رب البرية

*****

غرد يا طير الحسون *** وسلم ع غصن الزيتون

سهرتنا احلى ما يكون *** فوق القمر بلالي

***

مبارك عرسك يا مهيوب *** ويا نشمة وغالي ومحبوب

منشيلك دروي دروب *** الخيل تنادي الخيالة

*****

فتح يا زهر الياسمين *** فتح صبح وعشية

للعريس المتهني *** في هالليلة الوردية

عقبال الخلفة عقبال *** تيجي الخلفة رضية

انت شادي وانت حادي *** وكملت هلوداعية

*****

طلعت مية بقلب البير *** يللا نسقي الحواكير

والمطر نزل غزير *** وشرب كرم الدوالي

***

تنادينا الأرض نلبي *** وعبي بالسلة عبي

نتشكر نعمة ربي *** النعمة تبقى هطّالة

*****

حط ايديك بايدي يا جار *** حتى نعمل سوية

ناويلني ع طول ايدك *** تأشبكها بايدي

أنا بصفي قلبي *** وانت بتصفي النية

والسعد خير ووعد *** من خلاق البرية

*****

صلوا ع النبي صلوا *** كل الحبايب وصلوا

والعريس ع مهلو *** اللي ببالو في بالي

***

شوف العريس بجيله *** كل العزوة تيجيلو

والفرقة بتغنيلوا *** نغمة حلوة وموالي

*****

جانا من تلا يافا*** أحلى نسمة بحرية

جانا من شجر عكا *** هبة هوا ندية

الله يحمي هلقدس *** هلمحروسة الزكية

ما يوم الا قبالو يوم*** وبعد العتمة صبحية

*****

يا عريس الله يحماك *** بزهور الفرحة نحماك

جينا تنوقف معاك *** ونسهر أحلى الليالي

***

يا ما أحلى هاذي الساعة *** في حضرة هلجماعة

بستنى ساعة بساعة *** تأشوف الدبيكة قبالي

*****

نور يا غصن الرمان *** زهورك حلوة وسحرية

ندعيلك يا هلعريس *** تخلف أحسن ذرية

تلولح يا قطف العنف *** وعلي شبوك العلية

ويا قمر طال السهر *** أنوارك فينا بهية

*****

دار الفرح فينا دار *** الله يحماك يا دار

سمار تقابل سمار *** بين حباب غوالي

لسا السهرة طويلة *** في هلحفلة الجميلة

ع ضو القناديلي *** محلى الحفلة اسلامية

*****

يا عريس السلامة *** بشهامة ورجولية

حفل معدّل ومبارك *** نغمة ولحن وأغنية

خذ مني يا أبو العريس *** تهاني مع تحية

بس تهنى وتمنى *** وخلي الباقي علية



علو رايات الأفراح

علوا رايات الأفراح

ويا ما أحلى أيام الأعراس

فيها الهمة والحماس

وحفلتنا ترفع الراس

حيينا زين العرسان

ورشوا الورد والريحان

حيينا كل الخلان

وشدو الهمي شدوها

رايات الفرحة علوها

الليلة الليلة جلوها



مثمن

خلينا نغني مثمن *** المثمن من احلى مغنى

والأصحاب اثنين اثنين *** نزلوا هالسهرة معنا

المثمن كلماته ترن *** تعطينا احلى معنى

ويا هلعريس اطمئن *** اسمعنا باحلى سهرية

*******

من ورد البستان نلم *** أوراق الورد ونهديها

انت تشم وانا اشم *** ونحكي عن معانيها

هذا خال وهذا عم *** العزوة ما أحلى أهليها

وأفراح المسلم اتم *** بعتابا وبدوية

*******

علي علي يا حمام *** علي من فوق براجك

ونسم يا بحر أنسام *** ريحني وهدي مواجك

ويا ليل الفرحة التمام *** ضوي من نور سراجك

يا سلام ويا سلام *** ع النغمة السبعاوية

******

يا وطن تسلم ما أغلاك *** تسلم عن عيني ما تروح

ما أطيب هالنسمة بهواك *** ما احلاها بترد الروح

قلبي حن وما بنساك *** لو كثرت فيي الجروح

وما أقدر ع العيشة بلاك *** وما بقدر خيي وبيي

*******

ما أحسن خيرك يا البلاد *** يا اللي بنعشق ترابك

وصّونا كل الاجداد *** كل أصحابك وأحبابك

نرجّع أيام المجاد *** نحني زهرة شبابك

وزمان الهنا لو عاد *** نلعب سحجة ودحية

*********

لا تهتم بقيل وقال *** توجع راسك علفاضي

تتعب في كل الاحوال *** وما تعرف مين تراضي

الحقاني عمره ما مال *** مع قوة وسيفه ماضي

وهذا هو فعل الرجال *** اسمع مني الوصية

[COLOR=silver]،،

[ZaMorANo]

شكرا اخي فلسطينية ..
الاغنية روعة عنجد روعة ..

[فلسطينيه]

مرورك الاروع خيوو

والله يعطيك العافيه على المرور

[محمود]

مشكورة فلسطينية ،،

لكن رابط الانشودة لا يعمل :(

[فلسطينيه]

للتحميل

خيوو شوف هالرابط وان شاء الله تشتغل

[فلسطيني وافتخر]

يسلموو اخت فلسطينيه

ما اشتغل الرابط معي

سلاااااام

[فلسطينيه]

مش مشكلة خيوو

وتسلم على المرور الطيب