قفشات ....غير بريئة

[almuhandes]

بشار الأسد في لقاء متلفز

سيادة الرئيس هل أنت من أعطى الأوامر بإطلاق النار على المتظاهرين.؟

الأسد
أنا رئيس سوريا ولم أصدر الأوامر لأحد لكن من أعطى الأوامر اشخاص آخرين

يا عيني يا عيني
شو خفة هالدم
شو هايدا يا عمي الرئيس
إذا إنت ما عم تعرف مين بصدر الأوامر لشو حضرتك موجود
وإذا إنت ما عم تمون عليهن هدوليك الناس لشو جنابك رئيس
عوجا
والله عوجا
والطابق مكشوف

[almuhandes]

قفشة رياضية ع الطاير

مباراة الريال وبرشلونة
القنوات الفضائية العربية (الرياضية)
حشدت ما أمكنها من محللين ناهيك عن المعلقين

الجميل
في الموضوع أنو اسبانيا ذاتها مش مهتمة بالمبارة اهتمام الشارع العربي
أنو المشجعين الاسبان ما ذبحوا بعض وسيلوا الدم زي ما عملنا
الأجمل المحللين البيرفكت
ينتقدوا المدربين وخطتهم في اللعب
بينتقدوا توزيع الواجبات على اللاعبين
الروح المعنوية
وووووووووووو
يعني بين قوسين اشطر منهم في لت الحكي ما في
بس المصيبة انو ولا فريق عربي عليه العين
ولا منتخب بيرفع الراس
والمصيبة انو معظمهم كانوا مدربين وفي منهم لسه بدرب
وافشل من هيك فرق ومنتخبات ومدربين ما رح نلاقي ولا نشوف
يا ناس تخبوا وبلا عجن عالفاضي
صدعتونا
اما الشارع العربي هنيئا لك بفوز برشلونة وعودة فلسطين وحل مشاكل الوطن العربي
وانتصار ثورة سوريا
ونجاة ثورة اليمن من مبادرة المؤامرة

( على فكرة انا مش ضد الفرجة والاستمتاع بالمباراة أنا ضد المجانين عنا)

[almuhandes]

قفشة برلمانية

سوريا تنزف
سوريا مضرجة بالدماء


سوريا
انتخابات برلمانية حرة


ندوة تلو الأخرى عن نزاهة وشفافية الإنتخابات
عن المشاركة الكثيفة
عن حرية الناخب
نجاح الديمقراطية

لقاءات عدة مع الناخبين لإثبات ما تتناقله وسائل إعلام الحكومة

انتخابات,اصلاحات,تصليح,تجليس ,دهان بودي وتلميع
مادام كل هالحرية بترف زي سرب الحمام الأبيض على راس الشعب السوري
لشو كل هالتفحيط والتقحيط والتشتيت.؟
يمكن ناقص الشعب بولش ..يمكن
يمكن بدو الشعب افرهول ليبطل ينزف كرامة
كل شي جايز
عموما
اذا كان صاحب الكراج ما بفهم بالصنعة الشغيلة بياكلوه
أموت في الانتخابات والانتباخات واللبخات
وكل مهزلة والحرية بخير

[almuhandes]

عباس المساوي
لمن لا يعرفه
ناعق إعلامي يمني
بوق ينفخ بريحه النتنة كيفما اتفق

قبل شهرين ظهر على شاشة التلفاز في أحد البرامج
كان يلعن الثورة والثائرين
ويمجد علي صالح وزمرتة


اليوم ظهر على شاشة التلفاز
في نفس البرنامج مع نفس المقدم
قال ليذهب علي عبد الله صالح فقد ولى زمنه
أخذ بالتباكى على الدماء المسفوحة
وعلى الوطن المنكوب
ويروج للمبادرة الخليجية الخبيثة

يا هذا
يا من كلك مساوىء من رأسك حتى أخمص قدميك
ألا تستحي
سيدك ذهب إلى مزبلة التاريخ
تريد ان تمكن بمبادرتك الخليجية أفراد أسرتة الفاسدين
أن تلتف على الثورة
أن تغدر الثائرين
ألا تعلم بأن الشعوب تعي
ألا تعلم بأن أمثالك سبة في جبين الكلمة والموقف
ألم تتعظ بغيرك
ممن صفقوا للقذافي
ورقصوا لمبارك
وهتفوا لأبن علي
أنت وأمثالك سقط
لجهنم إن شاء الله وبئس المصير

[almuhandes]

دولة جنوب السودان

الدولة الوليدة
الوليد الغير شرعي

الوليد الغث
تتحكم في مقدرات النفط السودانية

كلينتون
فقعت تصريح من الآخر
حصلنا على امتياز في النفط
لمن لا يعرف حكاية النفط السوداني
عندما تم اكتشافه كان الإمتياز لشركات أمريكية وبريطانية
يتقاسموا الكعكة ويسكروا ثمامهم
السودان كبّر راسه وشافها مش موفيه ومش طايله من الكعكة إلا شوية كريما
سحب الإمتياز واعطاه للصينيين
هلا تسحب اللقمة من الثم مصيبة لأمريكا
زعلت الحجة امريكا
وقسمت السودان غصب عن الراضي والزعلان
ولهفت النفط
بس تعرفوا
هاي هبله كلينتون
زادتنا دولة على دولنا
كثرتنا
مع انها ختيارة هالكلينتون بس سحرها وسحر مكياجها كلفنا دولة جديدة
و هم على همومنا
كرمال عيون الحلوة بنصير ألف دولة
كرمال طراوة ايدها بنذبح بعض
كرمال سيقانها بنشلح ثوب عروبتنا وبنورجيها عورتنا
كرمال عين تكرم مليون عين
تكرم كل امريكا
وعلى راسي الدولة والنفط والحدود وما رح أنسى أم عيون جريئة

[almuhandes]

حماس تحتفل في غزة بذكرى انطلاقتها المجيدة

السلطة تمنع حماس من إقامة احتفال في الضفة الغربية

طبعا رح تمنع وتذبح وتسلخ كمان
شو هي الشغلة فوضى ولا فوضى
يعني ما بكفي غزة بدكم كمان الضفة يا حماس
لا هيك تخينة أوي
وبعدين ليش انتو ما بتعذروا
يا عمي أبو العبس
ملتزم ع الآخر مع حبايبه
صاحب كلمة الأخ وواجب
كيف بدو يسمح والتنسيق الأمني شغال
كيف بدو يسمح والمفاوضات من تحت الطاولة شغالة
كيف ..؟
طيب كلينتون أم عيون جريئة قبل كم يوم رشت علينا تصريح فضحهم
بقول على الفلسطينين والإسرائليين عدم التحدث عن المفاوضات
يعني خليها ماشية بالسر
وقدام الشعب هيو ابو مازن عامل بدو مصالحه
وبهيك بسكت الناس على كذبة كبيرة
والتواقيع من جهة تانية نازلة زي زخ المطر
وكل مصالحة والشعب الفلسطيني بخير
وتصبحوا على خير
انخرف ولا إنام...

[almuhandes]

إعتداء شرس على المعتصمين في ميدان التحرير بمصر
أدى لسقوط تسعة قتلى وجرح عدد كبير
الإعتداء على المعتصمين تخلله إطلاق نار بالرصاص الحي واستخدام العصي والهراوات
كما تم إحراق الخيام بكامل محتوياتها في الميدان

الجنزوري

هنالك جهة خارجية تعبث بأمن الدولة
وهذه التظاهرات هي انقضاض على الثورة

يا جنزوري وحد الله ... روقنا يا
إنقضاض على الثورة
اووووووف يا لطيف
يعني إنت مش منقض عليها
يعني المشير عاتقها بحالها
يا جنزوري معروف إنك من اتباع الصنم مبارك ومن زبانيته كماااان
هلا جاي تزايد على الثورة
بعدين خليني افهم راسي من رجلي
ليش كل دولة عربية بتصير فيها مظاهرات مباشرة الديباجة معروفة
جهة خارجية
عصابات مسلحة
أي اذا كان الجيش بعظمتة والمخابرات بجبروتها والأمن بوقاحته مش قادرين على شوية عصابات
لشو دخلك هدول موجودين من اصله
وكيف بدو المواطن يوثق فيهم بكرة ليحموه من عدو خارجي ..ها... أفهم بليز
مبارح يا جنزوري كانت ثورة
واليوم انت والمشير صارت عندكم جهة خارجية
طبعا يا عمي وصلوا لسدة الحكم
واللي كان كان
لك والله شي بيفلق
خليني اروح افش خلقي بالطلاب احسن

[almuhandes]

عناوين عريضة

القوات الأمريكية تكمل انسحابها من العراق


هوشيار زيباري
يقول أن انسحاب القوات الأمريكية خير للعراق والمنطقة بأكملها

:
:

على ذمة الراوي القوات الأمريكية انسحبت
تحت جنح الظلام كاللصوص سحبت جنودها متجهة للكويت لتغادر من هناك
انسحبت.......
هيك بقولوا
يا حبيبي على هيك انسحاب
بس تركت 16 الف موظف في السفارة
والآف مؤلفة تحت مسميات أخرى
شي لتدريب القوات العراقية
شي للحراسة
شي لتسيير الأمور
وشي واشياء كثيرة
الله لا يجبركم 16 الف بس في السفارة..!
نص امريكا في السفارة وبحكوا انسحبوا
ونصها التاني موزع هون وهون زي كلاب الأثر وبقولوا انسحبوا
هاد لو ما انسحبوا كان شو عملوا...؟!!
ولا عربو مكيفين على حالهم القوات انسحبت
ها ها ها ها هاي
يا حبيبي على هيك انسحااااااب
لك رجعوا العراق للقرون البدائية
وصار العراق سني وشيعة وأكراد
والنفط بلعوه
والمواطن بهدلوه
والكرامة شطبوها من القاموس
وتركوا نص امريكا تكوش عالباقي
وبقولوا انسحبوا
مرحبا انسحاب وانبطاح وانعطاف وانعواج وانتصار
ودقي يا مزيكة عالوحدة ونص
وبهدلني يا جدع

[almuhandes]

مصدر مسؤول أردني
العجز حتى نهاية تشرين الثاني من العام الجاري بلغ 40,5 مليون دينار
مديونية المملكة حتى نهاية شرين لثااني للعام الجاري بلغت 13067 مليون دينار

محاربة الفساد في الأردن

تم توجيه التهم لبعض الأسماء المعروفة وتحويلهم للتحقيق بتهم الفساد

ندوة تلفزيزنية مع أحد أعضاء لجنة مكافحة الفساد
بتكلم عن واحد من المشاريع تم دفع رشوة 14,5 مليون فقط
وطبعا عدد الملفات حدث ولا حرج

الحكومة الأردنية حتى تمتص نقمة الشعب
وتحمي ظهرها وما يصير فيها زي ما صار بباقي الدول
تكرمت مشكورة بتشكيل لجنة لمكافحة الفساد من زماااااان
وكل يوم المواطن عم يشوف عناوين رنانة تم تحويل فلان وعلان أخو غسان وإبن الجيران لعند عمنا
سلمان
ليحقق معو
والله شي حلو ومرتب خطوة باتجاه الإصلاح
بس يا ترى ليش المواطن بشوف تم تحويل وتم التحقيق وما شاف لهلا لا فلان ولا علان ولا غسان ولا ابن الجيران واحد منهم انحكم..؟
أنا بقول ليش
لأنهم اولاد حلال مصفيين
وايديهم ما سرقت غير الملايين
وحساباتهم ما بتقبل إلا بالعملة الصعبة
وايدهم طايله من هون لهناااااااااااااااااااااااااااااااا ااااااااااااااااااك
يعني ............. الحدق يفهم


الدين عم يزيد والمساعدات رش زي المطر
والحرامية أكثر من السكان وجيوبهم واسعة زي ذممهم
لهيك رح يظل المواطن ملعون سنسفيل ابوه يدفع ضرايب وخاوة ومجاري وكهربا وتلفون وقرش الجامعة وفلس الريف وتعريفة الدعم وحق الهوا ونص دينار الرغيف وهو مش ملاقي يوكل ولا يشتغل
الدين بزيد والشبيحة رشوتهم الله لا يشبعهم بالملايين والمساعدات مدري وين بتتبخر
يعني الله يعين الدولة على المواطن بالموت ليدفع الأتاوة والخاوة المفروضة عليه
لهيك كل يوم عم بتزيد المديونية والبلد فالو على حالو لورا
لازم الحكومة يكون الها موقف وتضرب المواطن المتعتس وتفرض عليه ضريبة على الاولاد والمرة والنفس
والبيت واللي حواليه
حتى تسترد عافيتها وتبطل ملاحقة رجال الأوحال الشريفين
ضريبة تضرب هيك شعب شو انو بلا فايدة وقت الزنقات
:
عاش الإصلاح على طريقة المنسف الأردني
وكل قضية رشوة والبلد والمواطن بدين

[ملوكة]

استمعت بكتاباتك خيووو

تقبل مرووري