البش مهندس فى مصنع التكرير ..^^

[حسام المصرى]

طبعا .. ولأنى داخل إن شاء الله على بكاليريوس أو آخر سنة .. بالكلية ..

فالواحد لازم يتدرب عشان يطلع مهندس فاهم .. إن شاء الله ..

وبعد تدريبى الأولانى الى كان فى تخصصى البحت وهو الحفر والإنتاج ..

لقيت نفسى فاضى فرحت أدرب فى شركة إسكندرية للبترول .. هى شركة للتكرير ..

يعنى بيجيلها الزيت خام .. من الموقع ..

وهى بتبتدى تفصله لمكوناته .. بنزين ومازوت .. وكيورسين .. وبربوان وبيوتان والحجات دى .. اللى أنتم درستوها فى الكيمياء


وبالمرة الواحد يستفيد فى تخصص فرعى ليه شوية .. وياخد فلوس .. هى قليلة بس مش مشكلة .. ( أصلى بحوش عشان الزواج .. ما معى غير 2200 دولار ... )


الصور ..


أدى مدخل للشركة ..



طبعا شايفين فى الصور .. معظمها ابراج تقطير وأفران . لزوم الفصل ..





ده بقى التانك أو الخزان اللى بعد ما المعالجة والفصل بيتم .. بروح أخزن فيه المنتج اللى عايز أستخدمه وأوزعه على مثلا محطات البنزين .. على الشركات كوقود ..

سعات بتلاقوا عربيات شايلة خزان مثلا وكاتبة مواد قابله للإشتعالى وهيك .. بتكون معبياه ..



وعشان التوضيح أكتر ..



أكيد كلكم بتشوفوها .. وعلى فكرة التانك ده مش بيتصمم أى حاجة .. دى بيتصمم بناء على ضغوط ودرجات حرارة وأشياء كثيرة جدا ..

صور تانى ..





ده بقى برج للفصل .. عن طريق الجاذبية ..
بمعنى الجزيئات التقيلة بتنزل لأسفل البرج واللى كثافتها قليله بتبقى لفوق .. طبعا باخد التقيلة وأوديها لفرن التقطير وهناك بقى بتسخن عشان أحصل على فصل أقوى للعناصر الخفيفة مش زى الفصل بالمرحلة الأولى ..



ده بقى فرن التقطير .. تحت البرج خالص فيه نار طبعا رهيبة .. درجة حرارتها رهيبة .. عشان يتم الفصل .. تبعا لدرجة الغليان .. أكيد فهمين القصة دى .. والبرج ليه أكتر من مدخل بيتفاوتوا فى المسافة .. يعنى مثلا لو اللى طالع من برج الفصل العادى زيت تقيل أوى .. أحطه على المدخل القريب من النار عشان أحصل على فصل أفضل .. وكل مدخل حسب خواص المادة اللى داخلاله بختاره .. وبنتحكم فى كل ده من خلال خطوط تحكم أو وحدة تحكم آلى plc



وصورة للتوضيح ( طبعا علم النادى الأهلى مرفوع )



طيب .. سعات المواد اللى راجعة من البرج بترجع سخنة أوى .. واللى داخل بيبقى بارد .. فأنا عشان أستفيد من عملية التبادل الحرارى بين الداخل والخارج .. بستخدم مبدلات حرارة أو heat exchangers
أكيد الى بيدرسوا سمعوا فيها .. الساخن بيفقد حرارة للبارد وبالتى درجة حرارة بتقل ولما مثلا أدخله على التانك أو الضاغط .. تكون درجة حرارته مناسبة لظروف التشغيل ..

النوع ده اسمه shell & tube

الساخن مثلا بيدخل فى ال shell والبارد فى ال tube وبيحصل التبادل ..




طب .. الحجات اللى ماشية فى الأنابيب لما بحب أسحبها مثلا لخط معين أسحبها إزاى .. منا محتاج مضخة .. ( pump ) >> فبستخدم مضخة شغالة بضغط معين لازم يكون مناسب للضغط اللى هسجب منه .. عشان يحصل انتقال .. ليها كذا نوع .. والنوع ده .. اسمه centrifugal pump

وفيه أنواع كتير لو حبين تستفيدوا ... زى ال positive displacement >> وزى ال reciprocating ?<< وكل نوع ليه تكنيك معين لو حبين تعرفوا ..




لو كان هناك شئ فى كلامى خطأ او مش واضح ..
عادى .. لأن ده مش مجال تخصصى الأصلى .. أنا روحت وحدتين بس فى الشركة وفهمت اللى فيهم الحمد لله ..


انتظرونى فى صور جديدة .. لما ارجع بقى إن شاء الله من رأس غارب .. شركة فى مجال تخصصى .. على البحر الأحمر ودلع وهننزل البحر وكل شئ فله بإذن الله



أسألكم الدعاء ..
وصدقونى أى طالب .. بيشوف الموضوع .. فيه فرق كبير جدا أنك تدرس الموضوع نظرى وأنك تخده عملى .. وبنصحك أنك تستخدم جوجل لو عايز تشوف فيديو مثلا لماكينة أو شئ بيشتغل إزاى وتقرى عنه من النت .. وفكك من الكتب ..


حسام المصرى .. مهندس لم يتخرج بعد