♪..مــــــآيــــك المــنــتــدى مـــع ~ شـهيـــد غ ـزة ~..♪

[.. ليآل ~]

مساء الخير عليكم

سامحوني طولت عليكم

شويه ظروف

//

في شي مهم كتير ،، مافيني أمسك المايك وما أحكيه

لأنو هو المؤثر الأكبر بحياتي




{ وفـــآه بابا }


هادا هو العنوان للي بدي أحكيه

وللي مابحبوا يوجعوا ئلبهم ما يقرأوا هادا الجزء بالمره


//


يمكن أول انطباع شكلتوه عني اني حزينه

مع اني بعمل جهدي انو هالإحساس وهالجانب من شخصيتي ما يظهر

بس سبحان الله الطبع بيغلب التطبع ،،

مابعرف من وين أبدأ

ومابدي أفوت بالتفاصيل

بس يمكن صار واضح الكم ئديش كنت حدا مهم بالنسبه لبابا

وئديش كان بابا الشطر الأهم بحياتي

ماكان الو هم غيري ،، اهم شي عندو انا ودراستي وصحتي وبعدين اخواني

الي كان يشوف ئديش بابا مرتبط فيني ،، ماكان يسدئ انو عندو ولاد غيري

بس يرجع من الدوام اول حدا يسأل عنو هو انا ،، مايعطي وجه الا الي

بابا الله يرحمو كان دكتور ،، وطبيعه حياتو بغزة خلتو انسان كتير جدي

خصوصا انو هو اكبر حدا بإخواتو وكان متحمل مسؤوليتهم

بس معي انا كان غير ،، كان يضحك ويلعب وينط ويجري وكل شي بتتخيلوه

كانت ماما تحكيلوا والله حرام عليك خربت البنت بدلالك الزايد الها

يحكيلها لأ ،، طول وانا عايش هالبنت بدها تضل تدلل ،، مابعرف بكره راح تكون من نصيب مين وكيف راح يعاملها ؟؟

11 سنه من عمري ئضيتهم جنب بابا ،، ئلال كتير ،، ماشبعت منو بالمره

ولا ئادره انساه واكمل حياتي عادي ،،

انا كنت طفله وكبرت فجأه بوفاه بابا

أيام الله يرحمو ماتوفى ،، ماكنت ئادره ابكي ولا اصرخ ولا اعمل شي ودخلت بحاله نفسيه صعبه

كنت طول الوئت ساكته ،، يمكن كنت اصغر من اني استوعب شو هو الموت

بلشت ابكي على وفاتو بعد شهر يمكن ،، وللآن ببكي

وبتمرء ايام ببكي بشكل هستيري ،، وكأنوا وصلني خبر وفاتو هلأ

أنا لحد هلأ والله مابئدر احكي [ بابا ] بصوت عالي ،، مابئدر بالمره

بتمنى احياناً انو يرجع يوم واحد

لأ ،، ليش يوم !!

ساعه وحده ،، ساعه احكيلوا فيها ئديش انا بحبو ومحتاجه الو ومشتائه

ئديش الحياه من غيرو صعبه

كيف كل شي اتغير بعد ماهو راح

احط راسي على صدروا واضل ابكي لحد مايبطل في بالدنيا دموع

بس آآآآخ


انا مابدي تفهموا من كلامي انو ماما واخواني مش مناح معي

بالعكس

عندي ام بتجنن الله يخليلي ياها ويكرمني برضاها ويئدرني اردلها شوي من الي عملتوا مشاني ومشان اخواني

وعندي اربع اخوة بيموتوا فيني ،، ومحتارين كيف يدللوني

وعندي عيله كبيره ،، كلهم بيعاملوني احسن معامله

بس انا مالي زنب ازا كانت روحي في بابا الله يرحمو







انا صرت اكره الموت ،، مابحب سيرتوا

ولابحب اسمع عنو ،، بعرف انو حق وانو كلنا بدنا نموت وماعندي مشكله اني انا شخصياً اموت

بس الموت اخد مني الناس الي بحبهم ،، حرمني منهم للأبد

فكره انو حدا بحبو يموت صارت ترعبني ،،

اني أتخيلهم مجرد عظام تحت التراب ،، مابئدر احكيلكم كيف بحس

كيف هيك ناس بنحبهم وعشنا معهم وحلمنا معهم ،، يختفوا

ولما يئولوا فلان الله يرحمو ،، نئول مين فلان

اووووووووووووف ،، بهالبساطه انتسوا

بجد الموت شي بشع ،، ابشع شي بالدنيا هو الموت

هو الألم الي بنوقف امامو عاجزين

مابنئدر نعمل شي ،، سوا الإستسلام


life is not fair


//


سامحوني على سمه هالبدن

انا حكتلكم من البدايه ما تقرأوا هادا الجزء