كلو الا هييييييييييييييك!!!

[أم الوليد]

مسا الخير..

انا اكره شي عنفسي الظلم وعدم الانسانية...واليوم شفت اكبر مثال على عدم الانسانية وقلة الزوء...

كنا بنشرب كوفي وبناكل كيك انا وصحبتي ...وادامنا وحدة وولادها...المهم طلبت اكل لولادها والداده واقفة...,بس خلصو الولاد اكل ...حكتلها خدي كلي!!!!

كيف هيك!!!هاي مش بني آدم!!!

ذنبها انو ظرفها اضطرها تشتغل داده!!!

طب ماكان ممكن انو اي حد فينا يكون بدالها!!!

ورحت حكيت معها...خبرتها حبيبتي: الله لايهينك بس هاي داده مابصير تعملي معها هيك لانها انسانة زينا...حكتلي لا هاد مقامها..كيف اساويها بولادي!!!وانا عودتها عهيك!!!

كيف مش مقامها!!!!طب يمكن عند ربها احسن مني ومنك!!!

مش هاي الي بتدير بالها عولادك!!!وبتساعدك بشغل بيتك!!!

احنا ومن وصغار علمونا انو داده خديجة تعد تاكل معنا...وحتى نغرفلها كمان ابلنا...ومافي تاكل بعد ماخلص او بالمطبخ...وبس تجيب شي نشكرها...هيك لانها بني آدمة ومن لحم ودم

كل الحكاية انو ظروفها صعبة!!!

كيف اهينيها او اقلل من شانها وليش!!!!

شي كتييييييييييير بدايئ ...انتو شو رايكم!!

كيف بتعاملو الداده!!!

[نور الهدى]

من اللي فهمته انه الداده هي اللي بسميها البعض شغالة مش هيك ؟؟

ممم

هو بصراحة ما عمره جبنا داده .. اصلا ظروفنا المالية ما بتسمح ههههههههه

//

النبي صلى الله عليه و سلم اوصانا بالخدم خيرا

وقال أَنَس : " خدمت النَّبِيّ صلي اللَّه عليه وعلي آله وسلم عشر سنين فَمَا قالَ لشيء فعلته لم فعلته ولا لشيء لم أفعله أن لا فعلته "

عن أبي مسعود البدري رضي الله عنه قال: "كنت أضرب غلاماً لي، فسمعت خلفي صوتاً: اعلم أبا مسعود، اعلم أبا مسعود – مرتين - أن الله أقدر عليك منك عليه؛ فالتفتُ، فإذا رسول الله صلى الله عليه وسلم".

و الكثير من آداب المعاملات منها اطعامهم مما نأكل و كسوتهم مما نلبس .. و معاملتهم بالمعروف

كل هذه آداب و معاملات واجبة علينا و الا سنحاسب امام الله

يعني شو بنخسر لو اتعاملنا معهم هيك ؟؟

والله ما رح نكون الا كسبانين راحة البال و رضى الرحمن

للاسف هنالك مرضى من الكبر و التجبر .. لدرجة انهم شافين من هم اقل منهم اجتماعيا كحشرات

و هؤلاء حسابهم عند ربنا عسير

و الله يمهل ولا يهمل

//

موضوع مؤثر ملك

يسلموا هالايدين

[PaLeSt!Ne SouL]

نحنا ما عنا هالشي ( داداه)
و هاد الغالب على أهل غزة هيك بعرف

أساسا انا ما برضى حد يخدمني بشي طالما أنا قادرة بحس حالي مدلعة زيادة

و لو كان كنت بعاملها كأخت او شي زي هيك

ما بحب أهين حد و لا أشوف هاد الشي

و اللي بيعمل هيك الله رح يعاقبوا عاجلا أو آجلا

[PaLeStiNe FlOwEr]

احنا ما بنجيب شغالات ع البيت لأنوا طول ما احنا قادرين نخدم نفسنا ليش نجيب حد يخدمنا،، ولو إطررنا انوا نجيب لازم نقدرهم ونحترمهم،،

طبعا انت يا ملك عايشة بالخليج متلي والمعروف هون باستخدام الخدم بكثرة يعني ممكن تلاقي بالبيت تنتين وتلاتة،،

طبعا من القليل تلاقي ناس بتحترمهم وتقدرهم،، وهاد الشي حيأثر ع العائلة وكيفية معاملتها للخدم ان كان طباخ او سواق او لأعمال المنزل،،

يعني هالعيلة اللي شفتيها بكرا هاد الشي حينقلب ضددها ويمكن تصير مشاكل،، وهاد محتمل،،

أقولك ع قصة في اتنين اتزوجوا ومن أول ما تزوجوا الست طلبة خدامة وطبعا عزايم وصاحباتها واستقبلات، يعني الداده تعبت كتيييير وكان كل شي عليها هي،، وطبعا الله أكرمها وحملت للست وشافت حالها ع الداده وما كانت ترضى تعمل شي بالبيت وأي شي تقصر في الداده كانت تضربها لحد ما امتلى الحقد بقلبها للداده،،وبعد ما ولدت بكم يوم ابنها مات للست والاطباء عجزوا عن معرفة السبب وضلت تولد وأطفالها يموتوا يمكن لمدة 4 أو 5 سنين بالنهاية أكتشفوا انوا الدادة كانت تجيب دبوس وتخز في راس الطفل وطبعا يكون لحموا طري لأنوا عمروا كم يوم ،، وكل هالشي بسبب تعاملها مع الدادة تبعتها

والله بتلاقي العجب بالجرايد عنا،، كل يوم أقل شي 3 أو 4 قصص عن الخدم والكفيلين تبعونهم

[أم الوليد]

حبيباتي كلكم شرفتو ...بس لاوضح شغلة صغيرة...انو عنا داده لانو البيت كبير وماما ماكانت تقدر لحالها ...وبس ماما راحت ماعاد ينفع نعد بدون داده ...يعني انا واختي الكبيرة بالدوام صبح ومسا ، والصغار بالجامعة لحد العصر...من بدو يطبخ ويرتب ويغسل ويكوي..!!!! يعني مش اصة رفاهية...وياريت بنقدر نخدم حالنا ...بس داده خديجة مافي منها...تعودنا نحترمها ونقدرها...وماتلاقي منا غيرحب وتقدير...وانا بشوف انو متل ماحكت نور انو الرسول قدوتنا بحسن معاملتهم وانو مابنفع نتعالى عليهم ونعاملهم بتعالي واحتقار....لانو ببساطة مش احسن منهم ...شكرا لتفاعلكم حبيباتي...