:: للمغتربين .. اتفضلوا وفضفضوا ::

[عبير فلسطين]

البلد الي مغترب فيها
سلطنة عمان (مسقط)

عيوبها وحسناتها
حسناتها: عمان بلد نضيفة كتير وحلوة كتير وأهلها طيبيين كتير وبحبوا الفلسطينيين كتييييير وبس يعرفوا عن حدا انه فلسطيني بشيلوه عن الارض شيل وكانهم لاقيين لقية...شعب عنجد طيب كتير ومتواضع كتير والبلد أصلا كتير هادية ومافي حدا اله دخل بالتاني كل واحد بحاله كمان دراستي فيها كتير منيحة وشغل بابا كمان الحمد لله
عيوبها: انها بلد غربة يعني على قد ما هي حلوة على قد ما بحس فيها بالغربة وبالوحدة ودايما بسأل حالي ليش أنا مو عايشة ببلدي زيي زي كل هالناس أعيش ببلدي مع اهلي وقرايبي واهل بلدي...بالعيد ما بنعمل اشي غير بنقعد بالبيت وبنستنا العيد يخلص عشان حسرتنا تخلص مع اخر يوم عيد

وهل بيشعر بانتماء لهذه البلد سواء كان مغترب للدراسه او العمل ؟
أنا انولدت بالكويت ومعي الجنسية الاردنية وعشت طول عمري بعمان يعني لاي بلد بدي انتمي من هدول؟؟؟!!!!!!
ما رح احس بالانتماء لاي بلد غير فلسطين لاني بكل بساطة فلسطينية
يمكن برتاح ببلد أكتر من التانية يعني أنا بحب عمان وبرتاح فيها كتير ومتأقلمين مع الشعب العماني الطيب كتير بس سبحان الله الواحد بلده غير...
الشي يلي بقهرني انه أنا الي أشياء بسلطنة عمان بس عمان مش الي...والي أشياء بالاردن بس كمان الاردن مش الي...وما الي ولاااا اشي بفلسطين مع انه فلسطين الي... :((وشو الاشياء الي

بحس بنقص فيها وبفتقده بالبلد الي مغترب فيه ؟
بفتقد فلسطين
أنا بحسد كتير الفلسطينيين يلي عيشين بارضهم...بعرف انهم بعانوا كتير وبعرف انهم بحسوا بالغربة وهمه ببلدهم وعلى ارضهم بلس على الأقل معهم الهوية الفلسطينية...بمشوا كل يوم على تراب فلسطيني...بشوفوا كل يوم وجوه فلسطينية...أقل ما فيها انهم بعرفوا شوارع فلسطين شو هي وبناياتها كيف شكلها حتى لو كانت دمار بنايات مش بنايات عادية...
أنا فلسطينية عمري ما زرت فلسطين لاني ببساطة شديدة ما معي الهوية الفلسطينية...بس مع هيك ما رح أحس بالانتماء لاي بلد الا فلسطين

كل يلي بتمناه اني ارجع لبلدي محررة كانت أو لأ وأموت بأرضي فلسطين