راجعلك يا وطن

[ورقة خريف]

راجعلك يا وطن..
خسارة يا مشاعرنا
قصايدنا وخواطرنا
حرقناها ببرود أعصاب
وسكرنا عليها الباب..
************
خسارة يا بلدنا الدافية ..
وشمستك في السما عالية..
يجتاحك الدمع ودمعتك غالية..
ياعذاب القلب و وجع التراب..
*************
خسارة يا فرحنا يا عريس الزين..
لما كنا نتجمع الحلوات والحلوين..
يا كرم لاتزعل لساتك في العين..
ما تزعلي يا أرض لساتنا صحاب..
************
آخ منك يا زمان دوار..
آخ لما صرنا نتذكر جدي الختيار..
لما كان يلاحقنا جنب الدار..
واحنا نركض ونغني ونمسك كتاب..
************
في وقت الشتا نشوف الدنيا مطر..
لما كان يروي الارض والشجر..
وتغيم السما الزرقاوتغيب شمس الظهر..
آخ يا وطن صرنا بعد الهجر أغراب..
***********
تجلس بجنبي حجة ملبكة..
تمد ايديها الي وتبداالحكي..
تقولي يا بنيي لمين بدنا نشتكي..
وتبدا تخرفني باللي حضرواللي غاب..
**********
تقوللي في ذاك اليوم قاوم محمد
واليوم الي قبلو عيسى استشهد..
وقبل اللي قبلو بالرصاص توفى امجد..
ومن ذاك اليوم لهذا اليوم واحنا ..
منتسبين لهالوطن بالكرت انتساب..
************
في مؤتمر يقولو انحلت القضية ...
ومؤتمر ثاني يصدرو اوامر ثانوية..
مؤتمر ثالث ينذبح الوطن
ويهتفو للجنة الرباعية..
والله يا بنيي من زمن المندوب
والقضية متل ما هيي..
ولسة العدو بيقتل وبيحرق بالوطن من دون حساب..
*************
والعرب يا ستي ما قدمو للوطن..
غير الوعودوالاماني..ملفوفة بكفن
كل واحد منهم باع الارض وقبض ثمن..
والبندقية انباعت لحتى نعيش بكرت المؤن..
والكرامة والعرض والحرية صرن عار وفتن..
ومن بعدها يا بنيي الاه فينا صارت نار وعذاب..
************
نزلت دمعة محروقة من العين على الخد..
وحل سكون على الحكي كانو ما في رد..
بوست ايديها للحجة..ووعدتها للحجة وعد..
قلتلها يا ستي الحجة البلد بدها رجال
واحنا رجال الوطن..من هون بيبدا الجد..
اعطيني البارودة يا ستي لنرجع الارض..
منك يا وطن مخلوق والك راجع يا تراب..

[waяm heaяt]

راجـــعين .. راجـــعين بازن الله
مشكوورة ورقة الخريف
بانتزار جديدك ..

[محمد عمر]

مشكورة أختي الكريمة على الشعر الرائع

الله يسعدك

[أبو يقين]

خسارة يا فرحنا يا عريس الزين..
لما كنا نتجمع الحلوات والحلوين..
يا كرم لاتزعل لساتك في العين..
ما تزعلي يا أرض لساتنا صحاب..

أكيد احنا راجعين

وان شاء اللهـ رجتنا مش مطولهـ

[دموع الحنين]

قصيدة حاملة كلمات قوية ورائعة

بأذن الله راااااااااجع كل لاجئ
الله يصبرهم على فراق الوطن الغالي

موضوع جمييييييل


سلاموو

[الشاعر لطفي الياسيني]

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته
تحية الاسلام
الاستاذة الكبيرة الفاضلة ورقة خريف
جزاك الله جنة الفردوس الاعلى التي اعدت للمتقين
لك مني عاطر التحية واطيب المنى
دمت بحفظ المولى