{}{}سوالف جدتي{}{}

[دلوعه العيون الساحره]

هذي فكره جت في بآلي وانشالله تعجبكم..

المهم لو شفتوها بأي منتدى ترا والله يمكن توارد خواطر,,لأني وربي اخترعتها وحبيت انفذها هنا...

طبعآ كلنا كلنا بدون استثنآء نحب القصص...!!!

قولوا صح ..!!!

وأنا أكثر وحده أحب القصص ,,وأعشق سماعها

فكيف لو كانت قصص الجدآت اللي نتسآبق حتى تسولف لنا قبل تنام ((الله يطول بأعمارهن ولايحرمنا منهن يآرب))

والى الأن قمه سعادتي يوم تجلس جدتي تسولف..

وهاليومين طبعا مع الأجوآء الرمضآنية تكون أحلا جلسه بالحووش والجو العليل البآرد

وتتوالى السوآلف اللي ماتخلو من الطرافه والحكمه بنفس الوقت...

و قمة سعادة الجده لما تقولون لها سولفي لنا ..!

أنا بقول سآلفه من سوآلفها ...


وأتمنى من تعجبه الفكره يطرح لنا هنآ سآلفه قديمه تحضره ويتذكرها قالها له جده والا جدته ..واذا ماعجبتكم فكرتي مو مشكله قولوا لي ..
طبعا أنا موضحه المفردات بين قوسين للي تصعب عليه لأني بحكيها زي ماتسولفها جدتي . 


يالله لاتفشلوني تراني متحمسه لهالموضوع ..صح بعض القصص طويله بس ممتعه

<<<<<<<<<أول مره أخترع شي....


هذا طآل عمركم كآن ياماكان بهآك الزمآن ,,

النآس ذابحه الفقر والنقر ,, ومايقدر الواحد يعيّش نفسه ولا عيآله...


ويجيك هآك الرجآل اللي زوجته ماتجيب الا البنات ,, وهو نفسه بولد 

وهو عنده ست بنآت وزوجته تنتظر المولود السآبع وهي تجيها بنيه ..!!


ويقوم الرجآل يوم درا أن زوجته جابت البنت السآبعه وهو يرحل وقال


((أنا ماقدرت أعيشك أنتي قبل يوم أننا لحآلنا ,, وتجيبين رعية بنآت ((رعيه= شله)) حتى ماجبتي لي ولد يسندن والا يعاوني عشان أقوم بتس أنتي وبنآتس))

وهو يقوم ويرحل عنهن ويتركهن ....

في يوم من الأيام البنيآت يلعبن حول الخربوش ((الخربوش=بيت صغير ولكن خرابه او شبه صندقه))

وهن يحفرن بهالتراب يعملن بيوت والا هآك الشي المدفوون بالأرض وطالعن طرفه خيشه..!!!

وهن يتراكضن على أمهن عشآن تعاونهن يطلعنه من الأرض وقآلت(( أذلفن عني الله لايكثركن طلعنّه أنتن والا عمره لاطلع وانتبهن... لايطلع لكن من الأرض شي ))

وهن يروحن يكملن الحفر بيطلعن هالشي وعجزن ورآحن مره ثانيه لأمهن وجت معهن عشآن تفتك من شرهن..

وأبتدت الأم تسحب معهن وأنه شي ثقيل ..!! الا هي جره مربوطه بهالخيشه..!!

وهي تقوم تفتحها وتلقى دآخلها ليرآت ذهب أو جنيهات على قول الأولين..

وهي تحرص على بناته مايقولن لأحد شي,, وصارت كل فتره تبيع جنيه وتقضي حاجته وحاجة بناته بدون محد يلاحظ...الين زينت له ذاك البيت الصيآح النيآح له ولبناته..

نرجع للأب ×× ظل يدور بهالبران ويحوم على العرب مره ينام عند هذولا يوم يومين ومره العرب الثانيه كم يوم...ويجي يوم وهو يروح لذآك البيت الكبير مشآء الله اللي مفتوح بيبانه مسوين عشا ((لاتقولون بيت بناته زي يوم نطيت بحلق جدتي لأن لسى ماراح يوصل لهن)) وهو يلقى بجنب البيت الكبير خربوش..ويجي يم الرجال اللي ساكنن بهالخربوش ويجلس عنده ويسولف معه..يوم صار لهم شوي الا كل دقيقه تجي يم هالرجال بنيه وتقول ((يبه سبقني يمك أحد ..ويقولها لا والله محد جاني..وتقوم وتعطيه صحن عشا ..وهكذا نفس الحركه الين ماصارن خمس بنات وكل دقيقه تجيه وحده تبي تسبق خواته من تعشي أبوها أول,,شوي الا جته بعد وحده وجابت له صحن عشا بس بنفس شينه..!!)) يوم أكتملن وهو يقول للرجال اللي جاه أقلط تعشى معي...وهم ياكلون سأله أبو البنات السبعه ((من هالبنات اللي كل دقيقه يجنك وهذي اللي جتك اخر شي نفسه شينه ماهي مثل خواته...قال هذولي بناتي والبيت الكبير لولدي وبه زوجته أم النفس الشينه..ومسّكن بناتي معه.. أما أنا مالي رغبه فيه ولا بزوجته ولوما الله ثم هالبنات تراني هايت بهالبران..!!!))

قآم الشايب أبو البنات السبعه يقلب بمخه وكنه حن لبناته وتحسف على فعلته..!! بس وش عقبه مرت سنين وين بيلقاهن..!!

وشجعه الشايب الثاني وقال لازم تدور على بناتك لأنهن عزوتك لاحتجت لهن ومال عليك الزمن..

رآح الشايب يمشي ويدورهن بين هالديار..وطبعا يمشي ويستريح بين هالعرب..وهو يلقى ذاك البيت الكبير اللي بيبانه مفتوحه وعندهم عشا والا ذيك البنت الجذعه ((الشابه)) المحتشمه وتقلط الرجال والضيوف وتقول ((حيآكم الله على شرف أبوي وهو يقلط الشايب معهم عشان يتعشى..)) طبعا قبل عادي عندهم المره تقلّط الرجال...ويعتبر نوماس وفخر..!!! (ماعلينا)

وخلصوا عشا الرجال وهو يتعب الشايب وقال اذا تسمحين يابنيتي بستريح عندكم اليوم وباكر أمشي ,,قالت أصبر ..وهي تروح لأمه قالت(( يمه في شايب مسكين ويبي يمرح(ينام) عندنا اليوم وباكر يسري قالت شلون ينام عندنا هالرجال وأبوك مو فيه وماعندنا أحد وش تبين الناس على اخر عمرنا تقول عننا وحنا لنا اسمنا بينهم

قالت البنت((يمه هالشايب يكسر الخاطر تعالي شوفيه ماحد بيقول شي لو شافه))
وهي تروح الأم عشآن تشوفه وتقنعه بأنه مالهم حيله عشان يخلونه ينام عندهم ولايقدرن..

وشافته وهي ترررركض يم غرفته تصيح ((أخيرآ)) ويتجمعن بناته ((يمه وش فيك..!!))

قالت هالشايب اللي تشوفنه أبوكن..!! ((وجلسن يسألن كيف ووشلون وانتي تقولين أبونا جاك خبره مات وجلست تسولف لهن القصه والسبب اللي خلاه يتركهن))

بهذا الوقت الشايب استحى انهم ماردوله هو يجلس والا مايجلس ..وياخذ نفسه ويمشي ((لااااااا تكفى لاتروووح  ))

الا يوم تنبهت بنت من البنات قالت أبونا..!! خلنا نروح يمه وش تنتظرن ..يوم راح الا انه مو فيه ..
وهن يركض حول البيت ينادن عليه ويتجمعن حوله والا تبوس رجلينه والا تبوس راسه ويرجعنه للبيت مو فاهم ؟ الا يوم شاف حرمته وهو يقعد يصييييح ويستسمح ,, وقال أبنن لي خربوش بس المهم أقضي باقي عمري جنبكن ,, قالن وهن يبكن (( يبه أنت تدخل البيت وحنا نطلع بخربوش ويحرّم علينا دخلت البيت الا وأنت فيه ))

وسلامتكم ولو أنها طويله ..


][تحيتي للجمــــــــــــيع][

[دلوعه العيون الساحره]

[.:(خالد):.]

يعطيكي الف عافية اختي العزيزة

موضوع مميز

للامام

[دلوعه العيون الساحره]

يعطيك العافيه ع الرد والطرح الجميل ...

[دلوعه العيون الساحره]

[أبو معاذ]

الله يخليلنــــــا جداتنـــــا ,, بصراحة هم اللي حافظين ألم الماضي ,, ما يحرمنا منهم يا رب

بوركتي يا اختي لهاي القصة الجميلة

[ضوء الشمس]

فكرة حلوة


بس انا ستي توفت من 24يوم


الله يرحمها

[دلوعه العيون الساحره]

..........