معلش أغلبكم !!!!!!

[فلسطيني وافتخر]

السلام عليكم

مساء الخير

ليش ؟

سؤال ينطح نفسه بقوة ...

ومعلش عالحكي الي رح احكيه...!!

>>بحس حالي سرت ازعل الكل من غير ما اقصد بكلامي بس معلش طنشوا..

المهم

ليش احنا فينا ناس بتحب العوج و اللف و الدوران !

ليش القوانين و الأنظمة و لمين !!


مشهد رقم ( 1 )


شب طول و عرض و ارتفاع و مساحة = نصف القاعدة في الإرتفاع . . ماشي في الشارع و طول ما هو ماشي ( زي البهيمة أعزكم الله ) كل شوي اشي بينترك وراه !!

بصقة , فاين , عقب سيجارة , ترمس , بزر !!!

طيب ليش !

المصيبة الكبرى انو لما انت تيجي ترمي ورقة في الحاوية او في السلة الموجودة في الشارع في أي مكان بتلاقي نظرات استغراب !!

شو بيعمل هالهبيلة

يييييي اطططللللع على هالنهفة بكب الورق في الزبالة


مشهد ( 2 )


في الباص عبارة ممنوع التدخين بخط واضح و كبير

لم تسعفني نظارتي لملاحظة ان كانت توجد عبارة استثنائية تقول ( إلا للسائق و الكنترول و صاحب الكنترول و أنسباؤهم و أقرباؤهم .. جنة الاطفال منازلهم )



مشهد ( 3 )


شب محترم طول بعرض بمساحة = 2 باي نق تربيع

دوام المكتبة للساعة 8 مساء

الإعارة تتوقف قبل نهاية الدوام بربع ساعة

- طيب يا خوووووك ساعدنا

- يا عمي ما بقدر النظام هيك و السيرفر و الـ . . . . . .

- ساعدنا بكرة عندي بحث و امتحان و . . . .

- يااااااااا عمي يا حبيبي يا روحي يا بعد تشبدي انتا . . و الله ما بقدر أخدمك

- بليز من شان الله لازم آخد الكتاب دبرها

- ما بقدر اساعدك

- طيب خلص برجع بكرة

طيب ليش من اول ما حكى المحترم برجع بكرة .. ليش كتر الحكي !!!

مشهد ( 4 )


الشاب المحترم الـطول و العرض و الـ ( كملوها انتو )

صف السيارة صفة زي العمى

- اذا سمحت ممنوع تصف هيك

- يا عمي كلها 10 دقايق

- ما بصير ممر هون مدخل

- يا حبيبي ما رح اتأخر

- ياااا روحي يا حياتي مدخل هووووون ما بينفع

- أي كان رحت واجيت وانت بتناقشني

- يا خالتي يا بني يا ( &%&%^% ) أي خلص انقلع من هون

- طيب متقول هيك من الصبح و يحرك سيارته بعيدا !!!



مشهد ( 5 )


لطفا الأسعار محدودة

لافتة يقرأها الصرصور الاحول ( زمان عنك يا صرصور أحول )

يدخل الرجل المحترم ليتبضع من المحل

يقرأ السعر على السلعة

يأخذها

- راعينا يا زلمة

- يا حجي السعر محدود و انا مجرد عامل في المحل

- يا رجل راعينا شوي

- يا عمي و الله ما بقدر

- يا رجل أي عند المحل الفلاني ارخص

- و الله يا عمي انا ما بقدر اتصرف و السعر محدود

- أي لحلحها

- يااااااااا عمي والله ما بقدر

- أي عند جاركم أرخص

- طيب روح خذها من عند جارنا و خلصني

- خلص .. هاتها

و يدفع المبلغ و يغادر

طيب لييييييييييييش ما دفع من أول و ريح حالو وريح الزلمة !!!!!


- - - - - - - - - - - - - - - - - - - - - - - -
مش النهـــــــــــــــاية



ليش في ناس بتحب تخالف كل شي و أي شي ( مش انا )

ليش في ناس بتحب تناقش و تجادل في أمور بتعتبر منتهية !!

هل انت اذا تناقشت و جادلت و تفلسفت بتعتبر زلمة !!

هل مخالفة القوانين و الانظمة و اللوائح بتعطي للشخص نشوة !!

و ليش الواحد يحط حاله بموقف تعيس و يسمع حكي بلاش منو

و يبقى السؤال ناطحا نفسه

فهل من مجيب !!!

عجبني الموضوع ولطشتلكم اياه