~ |[ مَـآيــك الـمنـتــدى مــع // دَمــعَة أســى .. ~

[PaLeSt!Ne SouL]

احلى رحلة رحتها ع البحر

لما كان عمري 10 سنين

طبعا ع بحر خان يونس و اللي مش عاجبه

يشرب من بحر غزة المهم يخليلنا بحر خانيونس

...

كان اول صيف يجتمعوا فيه اعمامي المغتربين و اللي بالقطاع مع بعض

و طلعنا ع البحر سوا من اول النهار

كنا عاملين محشي ^^

طبعا ما في استراحات كتير فعملوا معرش ( خيمة )

و غلبتهم كتير و بالآخر وقعت فوق راسنا

كان من احلى الايام بحياتي

و من بعد هالطلعة ما رحت ع بحر خان يونس
و لا شفت اعمامي المغتربين
و لا اجتمعنا زي قبل

صارلها هالذكرى 11 سنة

[PaLeSt!Ne SouL]

السلام عليكم

سؤال بحياتكم جربيتوا الشعور

انكم تعملوا شي غلط ( مصيبة ) و تضلوا مخبينه لكن محتاجين تحكوه لحد

...


بيوم من زات الايام كنت نايمة انا و اختي الصغيرة لوحدنا بالغرفة (طبعا كنت صغيرة برده )

صحيت و كان باب الغرفة مسكر و كنت اصرخ حد يفتح الباب و ما حد يرد

ال كانوا بالحاكورة بيقطفوا الزيتون

و صرت انادي من الشباك و ما حد منتبه الي

فصرت اضرب اي شي حواليا

و من ضمن اللي انضرب اختي ( سمية )

و بعد فترة ماتت

هذا الموضوع ضليت فترة مخبياه اني انا اللي ضربتها

و انها ماتت مني


لكن و انا بالاعدادي ما بعرف شو جاب سيرتها

الا ماما بتقول كانت مريضة و مشان هيك ماتت

يعني ما ماتت باليوم اللي ضربتها فيه و لا بسببي

و ان صرت ابكي ليش ما حكيتوا من قبل انها مريضة و ريحتوني

ما كان الها كتير اثر بحياتنا لانها يدووب كملت السنة و كنا صغار

و لما ماتت كان بابا بالسجن ما شافها كتير

...

شو جاب سيرتها ؟؟

امبارح بسال بابا شو كان شعورك لما قالولك سمية ماتت و انت بالسجن ؟؟

قال فرحت و قلت عقبال التانية

بدو يستفزني بس انا طنشتوا

ملاحزة بابا ما تقولوا فرح بجد
هو قال الموت اريح ما تعيش مريضة طول عمرها


حلو الواحد يعيش و باله مرتاح

[PaLeSt!Ne SouL]

الذين يشاهدون محتوى الموضوع الآن : 4 ( الأعضاء 4 والزوار 0)
‏دمعة أسى, ‏Arabian girl, ‏بنت فلسطين المجروحة+


مين متخفي
اظهر و بان ^^

منورين

[PaLeSt!Ne SouL]

اكثر شئ اكرهه الظلم


اول و آخر كف انضربته من المدرسة طبعا كان في صف سادس

اما البيت متعدوووش

ما حكت المعلمة انو علينا واجب

و ما كنا مخلصين الدرس اصلا
تاني يوم خلص الدرس لهي بتقول يلا طلعوا الواجب

و الله ما علينا واجب

كل الصف طبعا مش كاتبه لانا ما بنقرا بالفنجان و لا الكف

شو بدو يعرفنا يعني

قامت عصبت المعلمة و طلعت كل الصف برا

و نادت االمديرة

طبعا الكل اخد بهدلة ع الماشي

لكن انا الوحيدة اللي انضربت كف من حضرتها

ال كل الصف كوم و انا كوم

لكن جكارة فيهم طلعت برده الاولى ع مدارس المنطقة

كنت مبيضة وجه المدرسة

من فترة كنت ماشية بالشارع مع بابا و شفتها _ المديرة _

بقول لبابا شايف هديك ضربتني كف و ان بسادس



بس ع فكرة الكف ما جاب نتيجة لاني للوقت كسولة بالواجبات

[PaLeSt!Ne SouL]

السلام عليكم ^^

سين سؤال يقول


اين ولد الرسول صلى الله عليه و سلم ؟



^

^

^


الواحد بيقول مكة


^
^
^
و في اسوا الاحوال بيشك بالمدينة

^

^

^

او الطائف برده ليش لا !



المعلمة : اين ولد الرسول عليه الصلاة و السلام؟
الفلتة = انا : مستشفى ناصر هههههه

هاي اللي انولدت فبها كنت افكر كل الناس بيطلعوا منها

[PaLeSt!Ne SouL]

طول عمري بكره غزة !
و بحب خان يونس

وقت ما سكنا بغزة كنت صغيرة و ما فرقت كتير

بس رجعنا مرة تانية و انا بالاعدادي

كانت ايام حلوة هناك و قرايبنا حوالينا

و كنا ساكنين مع اعمامي

بس لما اجينا ع غزة للمرة التانية كتير كتير اتاثرت

و ما كنت احكي مع حد

ما كونت علاقات و صداقات كتير مع جيرانا و لا المدرسة

حتى ما بتزكر اسامي البنات بهديك الفترة

مع اني زاكرة بعض اللي كانوا بالروضة !!!

كنت هااااادية بشكل مش طبيعي

و كنت حساسة بشكل رهيب

اي شي يزعلني


اصعب فترة مرة عليا بحياتي كلها

بس ما شا الله عليا الوقت بحكي 25/24 ساعة

و صرت اجتماعية اكتر و بحتك بالناس اكتر

و ناااااادر ما حد يستفزني و بالغالب اللي بيقدر ع هيك بابا و بس

الدنيا بتغير في الناس كتير

و بتعب منها كتير

لكن بالآخر رح نعرف انها ولا شي ما بتساوي شي

نعيشها كيف ما كانت

و بعد تسعين سنة باحسن الاحوال رح نرتاح ان شا الله

[PaLeSt!Ne SouL]

و الله يا ايوش صرت حكاية المدرسة من ورا هالسؤال

بس و الله كنت شاطرة

بس السؤال صعب ههههه

و لما ادرس اخواتي الصغار و ما يعرفوا سؤال اضربهم او اصرخ فيهم بيزلوني

بيصيروا يحكوا اين ولد الرسول ؟

و طبعا بيبدا مسلسل توم و جيري و عملية المطاردة هههههه

[PaLeSt!Ne SouL]

[PaLeSt!Ne SouL]

قبل شوي اخي بيقلي مالك غيرتي عن شباب فلسطين خخخخ

نيو لوك يخو

...

نيجي لرمضان

اول شي كل عام و انتو بخير و صحة و سلامة

تسحروا منيح ؟

ما بعرف ليش رمضان ما اله جو عنا بالبيت

السنة الماضية كان غير و لما كنا صغار كان غير

اخواتي الصغار و لا راضيين يتنحنحوا لا قنابل و لا العاب نارية

اي و لا حتى فوانيس

قال خايفين من بابا

و الله آخر زمن الاولاد يصيروا يخافوا

ع ايامنا كنا نعمل اللي بدنا اياه

و عااادي ننضرب بعدها و هكزا

احلى شي كنا نعمله نولع سلك الجلى

و الاسوا انك تنحرق منه

اول يوم برمضان فطور بدون كهربا

و اليوم سحور بدون كهربا

مع انه مش موعدها تقطع !!

كانها ناقصة يعني

الله يتقبل منا و منكم الصيام و القيام

[PaLeSt!Ne SouL]

السلام عليكم ^^

انا & النت
كنت دايما افوت النت بس للعلم

يعني آخد المعلومة و اطلع و ما نفتح غير صفحة الجامعة

كنت عاقلة

ما بعرف ليش سجلت بالمنتدى اول شي
ما بيطلب تسجيل لنشوف اي شئ

المهم سجللت فيه اول منتدى

و شاركت بمواضيع و كنت احط الموضوع و ما ارجع اشوف شو صار فيه

و بعد فترة سبت المنتدى لانه اجت امتحنات الجامعة

لما رجعت تاني نسيت كلمة مروري

و سجلت بعضوية جديدة

...

اول ما الواحد بيسجل بتجيه رسالة ترحيب بالمنتدى صح ؟

لما اجت كنت انا و اخي قاعدين و الرسالة طبعا من عمو محمود

و اخي بقول من اولها بدينا رسائل !!!
بقلي مش لاقية غير اسم محمود زي اسمه

هو التاني زيي ما له بالمنتديات

المهم فتحنا الرسالة و فرطنا ضحك بعدين صار عااادي

طبعا هاد الكلام بالعضوية الاولى