♪..مــــــآيــــك المــنــتــدى مـــع ~ شـهيـــد غ ـزة ~..♪

[بنت فلسطين المجروحة]

السلام عليكم ورحمة الله وبركاته



بداية .. حابة احكي انو حكي راح يكون عشوائي

محطات .. هحكي عن نفسي .. عن المنتدى .. يمكن احكي عن أعضاء بس اكيد مش هقدر احصر الكل .. اللي هيجو عبالي هحكي عنهم .. لهيك ماحد يزعل مني ..

وان شاء الله اكون خفيفة على قلوبكم ..

:)

لي عودة

[بنت فلسطين المجروحة]

البطاقة الشخصية

اسمي : أمون :P

عمري : 21 سنة

فلسطينية ومقيمة بالامارات

انولدت في الامارات وعايشة فيها .. وأملي أرجع لبلادي .. والله كريم ..

تخرجت من كم شهر .. بتقدير امتياز .. بتخصص علوم حاسوب .. من جامعة الشارقة :P

حاليًا قدمت عالماجستير .. وإذا تسهلت راح ابدأ بعد شهر تقريبًا .. وراح اشتغل معيدة بجامعتي ان شاء الله..

انتو بس أدعولي تتسهل .. :)

هواياتي .. مليش هواية أنا بكره الروتين ومابحب اضل عاشي واحد

عشان هيك ماالي هواية وحدة .. يعني تنوعت تطريز ورسم وتصميم عالفوتو والقراءة وكل فترة بغير :P



شو كمان أحكي

اه .. انا الوسط بين اخوتي واخواني

بس معمولي اعتبار فالبيت قبل الكل مابعرف ليش ..

يمكن لأني دبلوماسية بعرف اكسب الكل ..

ويمكن لأني كتير بتحمل المسؤلية ..

ويمكن لأني صريحة وقوية ومابهمني اشي



هاي تعريف بسيط بشخصي الكريم




:

[بنت فلسطين المجروحة]

حكايتي مع المنتدى وبنت فلسطين المجروحة الحقيقية



أنا بصراحة .. عمري ماتوقعت أنتمي لهالمكان .. مابعرف ليش



زمان كنت أجي اتصفح المنتدى واطلع ..




زائرة .. بس متابعة بتزكر أيام ماكانت دموع الرحيل مشرفة عامة ..

وكانت أول ما فجر الحياة انحطت مديرة عامة ..

المهم وأنا مرة بتصفح المنتدى .. أجت أختي وحكتلي انتي مشتركة بهالمنتدى ؟!

حكتلها لأ .. فحكتلي اشتركي فيه انا مشتركة فيه .. قلتلها لا مستحيل اسجل فيه مش عارفة ليش :S

المهم ..أيامها كان ابو نور و زامورانا ( اظن هيك اسمه) ..كانوا عاملين دورة فوتوشوب ..

وانا كنت لسة متعلمة جديد عالبرنامج وحابة اكسب خبرة اكتر ..

فحبيت كتير اشترك فيها .. طبعا كلان لازم تسجل اشتراك ..وكانوا كأنه راح ينفتح قسم للدورة وما هيقدر يشوفه الا المشتركين ..

وانا ماكنت حابة اسجل بالمنتدى << مصرة

وكمان مش حلوة انني اسجل بس لاشارك بالدورة >> عاساس يعني منتبهين مين راح اكون

فطلبت من أختي تعطيني عضويتها بس لأشارك بالدورة .. ووافقت بشرط

اني انزللها 5 مواضيع .. وارد 10 ردود <<بزنس از بزنس

وهي ماكنت بتعرف تحط مواضيع .. فحزنت عليها ووافقت

:

وكانت عضويتها .. هي بنت فلسطين المجروحة

..


المهم الدورة مامشيت اسبوع الا ولقيتهم وقفوها

طبعًا انقهرت :@

وصار عليي دين مواضيع وردود عالفاضي

شوي .. شوي لقيت حالي انشديت للمنتدى

و صرت اشارك من حالي ..

واتفاعل مع الكل ..

:

صحيح أختي أول مااعطتني العضوية

قعدتني واعطتني توصيات

مع انها اصغر مني بس حكم القوي

من توصياتها انو مااعمل مشاكل

وما اهاجم الاعضاء .. واكتب اشياء حلوة

لحسن محمود ولا فجر ولا دموع يشوفو مشاركاتي فيحذفوا عضويتها

عاساس عارفينها لأنهم

فديتها اختي.. طيبة و على نياتها هههههههههههه

أحيانًا .. بتشارك هي بهالعضوية ..والها موضوع اظن بقسم الشعر

واحيانًا لما تشوف اهداء الي اوبختاروني لأشي

بتحكيلي .. هاي عضويتي .. يوم هخليكي تنزلي موضوع تحكيلهم الحقيقة

لازم يعرفوني .. :P

بتزكر زمان لما كانت دموع طلبتني لشغلة واعطتني ايميلها

فضفتها عايميلي مو عايميل اختي

زعلت اني ضفتها عندي وحكت همي بدهم اياني انا مابدهم اياكي :S

حزنت عليها وقلتلها ماتقلقي يوم من الايام راح يعرفوكي :P


وبظن يوم من الأيام هتطردني من هالعضوية هههههههههههههه


وهي كل الحكاية



بس اعرفوا يوم من الأيام هتلاقو وحدة تانية بتشارك باسم بنت فلسطين المجروحة

هي اختي :P

[بنت فلسطين المجروحة]

ببداية ما دخلت المدرسة

كنت بمدرسة خاصة

وكانت المعلمة شرانية وتحب بنت بس فالفصل

وتميزها عنا ..

فكنت حاقدة عليها وعالبنت ..

فمرة من ذات المرارير .. ان جاز لي التعبير

كانت بتعلق لوحة .. فقامت طالبتها المفضلة حكت وقعدت تضحك عحالها

فعصبت علينا .. وقامت ضربتنا كلنا بالمسطرة عايدينا الا حبيبة قلبها :@

فقمت أنا روحت البيت عملت مناحة .. و أخدني بابا لمدير المدرسة وشكيتله عنها :P

بعديها بابا نقلني لمدرسة تانية .. ففي أول أيامي لسة بالمدرسة ..طلبت منا المعلمة نجلد دفتر

وانا بعد هديك المعلمة صرت اخاف والتزم .. <<الجبن سيد الأخلاق هههههههههههه:P

المهم اعطيت دفتري لأبوي يجلده .. بس هو طنشني وما جلده ولا حتى خلاني اخده تاني يوم

وانا في الصف في أمان الله .. حكت النا المعلمة طلعوا الدفتر


طبعًا انا معيش الدفتر ..

رحت فتحت مناحة ..

واعيط .. وهي يابنتي مالك شو صار

وانا اعيط

واعيط و هيي يابنتي استهدي بالله شو صارلك

رحت حكتلها اني نسيت دفتري

قام حكتلي طيب طلعي ورقة واكتبي عليها

طبعًا انا تنحت وانصدمت من تصرفها النبيل ههههههه

كانت اول صدمة الي بالمدرسة واكتشفت انو مش كل المعلمات شريرات

وعدت 6 سنين من حياتي في المدرسة الابتدائية ..


بالمدرسة عايامنا .. كان لازم يكون للبنات زعيمة تحكمهم

بتزكر بصف 6 .. كنت الزعيمة وكنت مغرورة كتير واللي ماتعجبني او تدايقني

أخلي كل الصف يقاطعها .. و كنت شاطرة ومتفاعلة بالمدرسة مااخلي اشي الا واحشر حالي فيه

فكانوا المعلمات يحبوني .. ولهيك لو البنات بدهم اشي يخلوني اطلب باسمهم :P

المهم بعد ماخلصنا ابتدائي.. انتقلت عالاعدادية اللي هي من صف 7-9

هالفترة اولها كان من أصعب الفترات اللي مرت علي بحياتي .. خلتني أكره البلد وأزن عاهلي ليل نهار

رجعوني عبلدي :(

كنت نقلت من مدرسةخاصة لمدرسة حكومة

والمدارس خاصة اغلبها من جنسيات عربية مش اماراتية .. بسمونا وافدين ..!

أما فالحكومة فكلها اهل البلد ( بسمو حالهم مواطنين :P ) .. المهم الجو مختلف تمامًا

البنات والمعلمات وكل اشي . ومش هان كانت الصعوبة !

الصعوبة كانت في شلة بكرهوني .. مع اني لا احتكيت فيهم ولا اشي ..

بس كانوا مستلميني .. يسرقوا اغراضي او يلعبوا بدفاتري

وانا طول اليوم اتقاتل معهم

وهمي يقولولي ارجعي عبلدك !

الله لايذل حدا..

المهم فترة وعدت ! بس كنت كتير مستوحشة فيها وحاسة حالي بوحدة ..لأني كنت متعودة عالفلسطينيات من اهل بلدي ..

بتزكر بالمدرسة كنتت دايمًا اطلع ال2

اضلي ادرس وادرس بدي اطلع الاولى

ويكون دايما الفرق بيني وبين الاولى علامة لصالحها ..

المهم انتقلت عالثانوية .. و كان نصيبي في الصف العاشر أكون في صف نصه شطار

بتزكر بنص السنة طلعت النتايج وكان ترتيبي ال3 عالصف

فانا اكتأبت .. وحكيت كنت اموت حالي واطلع التانية

الحين انبليت ببنتين اشطر مني << كنت ماا احب احس انو في حدا اشطر مني وكتير اغار منهم هههههههههههههههه

المهم صرت ادرس وادرس وادرس

لأحاول احافظ عالاقل عالمركز التاني << بدا التواضع :P

أخر السنة رحت استلم شهادتي

اتفاجات انه طلعت الأولى

ومش بس الأولى .. طلعت الأولى عالمدرسة

طبعًا مش لحالي تفاجأت .. المعلمات تفاجأوا معي

ومن يومها صرت فوق الدريسة عشان احافظ عمركزي قال يعني :P



والحمدلله ضليت بهالشطارة لحتى خلصت مدرسة ..

:

:

بتزكر بتوجيهي .. كنت حاملة هم الدنيا عكتافي

مش عارفة ليش اخدتها وكأنها مسألة مصيرية الي..

الصراحة كان في سبب .. لأنو اخوتي اللي قبلي ماجابو معدلات عالية .. فانا كنت احزن عماما وبابا :(

فقررت اني اعوضهم فيي هههههههههه .. لهيك كنت حاملة المسألة كانها حياة أو موت..

اخرتها طلعت بنتيجة مرضية الحمدلله.. جبت 98 % قسم علمي



وللحديث بقية..

[بنت فلسطين المجروحة]

فش حدى فوق القانون

يلا هطير ردك كمان ندشدش

[بنت فلسطين المجروحة]

:
.

اتق شر الحليم اذا غضب

اللي بعرفوني وتعاملوا معي عالواقع ..

بعرفوا انو هالمثل بنطبق علي تمامًا ..

لأني انا قليلة الغضب ..
بس لما اعصب .. بنفجر

ههههههههههه

جد .. انا كتير سمحة وسهلة بالتعامل

ومابحب الرسميات..


لكن لكل اشي حد...

ومتى ما عصبت بكون خلص تجاوز الاشي حدود صبري !


:


يمكن انتو ماتصدقو هالحكي

عشاني عطول بالمنتدى

من لما مسكت الاشراف

بكبر الخط وبعرضه وبخليه باللون الاحمر متل هيك >::مغلق::

لما الاقي موضوع ولا مشكلة ..

فوين الصبر بالله اللي بحكي عنو ؟!

بس انا بعمل هيك مش لأني عصبية

أو بحب افرد عضلاتي زي ماحكتلي بنت من النات هههههههه

بس لأنو هيك مواضيع ما بتحتمل المسامحة

عشان لو صار التساهل .. بصير الكل يخالف او تكبر المشاكل

ومن هالحكي ..


فهمتو ولا اعصب

[بنت فلسطين المجروحة]

بتزكر زمان كان ابوي لما ياخدني بالسيارة من المدرسة الضهر

لو شاف هندي او اي حد واقف بالشارع يوقف ويوصله عوين مابده ..

او مثلا لمايلاقي حد تايه بمعاملة ولا اشي يروح يساعده ..

او قبل مايطلع مشوار شاف عامل نضافة مثلا .. يرجع بالبيت ياخد قنينة مية باردة وفاكهة ويعطيها اله ..لتعينه فهالحر ..


وانا كنت كتير استغرب منه

انو يعني مش لهالدرجة تساعد الناس ..تااخر عمشاوريك لتوصل فلان ولا تعمل معاملة فلان

ولشو يعني شو هوي مستفيد << بزنس از بزنس

بعدين مع مرور الايام .. وخصوصا بالجامعة

اكتشفت اني صرت متله هههههههههههههههه


خدومة وبحب اساعدالغير

مش لاشي .. بس لأنها طريقة لكسب محبة الناس وودهم

ومتى ماكسبت محبة الناس ..قدرت تنصحهم بدينهم..وهادا هدفنا كمسلمين

:

:


حاسة اني زهقتكم بالحكي عني

راجعة بموجة جديدة

[بنت فلسطين المجروحة]

اسمراني & عزيز النفس & فارس الوطن


ابحث عن الرابط العجيب بينهم

حطيت هال3 مع بعض لأنهم 3 مميزين مالهم زيّ بالمنتدى ..

بشو بتميزوا ؟!


أسمراني ..

اذا بدك تحوار حد وتطلع بفايدة..

فحاور اسمراني .. جدًا اسلوبه راقي فالحكي

وحتى لما بعصب عمري ما سمعته حكى كلمة خارج حدود الادب ..

بعصب بهداوة هههههههههههه هادا لو صار وبالغلط عصب

كووول على طول .. ما شاء الله عليه !

بس عيبه انه كتير غياب .. بتلاقي فجاة اجى وفجاة راح :P


عزيز النفس ..

هالانسان مزيته صراحته ... يعني لو بدك مثال عن الصراحة فعزيز النفس خير مثال

صحيح انه أحيانًا بدج الكلام دج .. وبكون جارح .. بسس ببقى فحدود الواقع والصراحة

كنت ويمكن لازلت بخاف منه لأنه بحسه عصبي كتير :P

بس بجد اخ محترم .. وبعرف انه ممكن يعتمد عليه وقت العوزة ..

وصراحته دليل على انه صادق مع الكل .. وان شاء الله يكتب عند الله صديقًا وانا كمان يارب :P

بحس انه لو غلف صراحته بالكلمة الطيبة .. عمره ما هتعمله مشاكل .. ويمكن اكون غلط :P<< بلاش يعصب علي


فارس الوطن ..

فارس شخصيته عجيبة .. عنده كريزما بتلاقي لفت انتباه الكل بموضوع او رد !

مع انه مشاركاته قليلة .. ومواضيعه كمان مش كتيرة

لكن كل مواضيعه الها قيمة.. بحسه طموح ويارب يضل وبتمناله بجد التوفيق

بحسه اخوي و بستنى تخرجك يا فارس بتفوق ..

كمان هو زي اسمراني قليل الوجود ..

[بنت فلسطين المجروحة]

القلب الطيب..

اسم على مسمى ..

بحسه هو مختار المنتدى

يعني هيك مسؤل منا هههههههههههه

مابعرف ليش مع انه ماصارلي مواقف معه !


زمان كنت اشوف مواضيعه


احسه جدي كتير وبخوف هههههههههههههههههه :p

بس ما شاء الله عليه اخلاق عالية


ومافي منه والله

ربي يوفقه

:)

.
:
.

اياد

قلبه طيب .. وبحب يسعد اللي حوليه


بس ابصر ماله اله فترة غايب عنا

وصاير جو النكد عنده عالي :@

ربي ييسرلك امورك يااياد

و ارضى بحياتك تسعد ..

[القلب الطيب]

المشاركة الأصلية كتبت بواسطة بنت فلسطين المجروحة القلب الطيب..

اسم على مسمى ..

بحسه هو مختار المنتدى

يعني هيك مسؤل منا هههههههههههه

مابعرف ليش مع انه ماصارلي مواقف معه !


زمان كنت اشوف مواضيعه


احسه جدي كتير وبخوف هههههههههههههههههه :p

بس ما شاء الله عليه اخلاق عالية


ومافي منه والله

ربي يوفقه

:)

.
:
. ..

الله يخليكي اختي بنت فلسطين

كله من زوقك والله


يعني زمان كنت بخوف

تسلمي والله

ربنا يحفظك ويكرمك ويسعدك