« لـــيــآل » ضـيـف { لَـيالِي شـبابُ فـلسطِيـن و ثـرثـرةٌ حُـرة ~

[.. ليآل ~]

عدنــــآ

::


نـمُرُ جَميعاً بِمواقف مُحزنة آومُفرحة آو مُضحكة ،، حدثـنَا عـنْ موقِف مرَ معـك ؟
المواقف بأنواعها كتير .. مش م يخطرلي شي هلأ

بس أتزكر برجع بحكيلكم



- الموت ،، الحياة ،، النعيم ،، الجحيم ،، الوداع ،، اللقاء ،، الصداقة ،، الخيانة .. ماذا تعني لَكْ ؟
الموت : معنى الوجع الحقيقي ،، طريق طويل ،، طريق للراحلين فقط لا يتسع لأكثر من شخص
ولا مانع ان يحمل الكثير من الحقائب المحملة بأوجاع الباقيين .
[الموت لا يوجع الموتى , الموت يوجع الاحياء ] قالها محمود درويش .. وكم صدق !!

الحياة : رحلة تمل ولا تمل ،، تعشق وتكره ،، وتغزو قلوبنا بالتضاد ،، وكا أن ندرك حقيقتها حتى نكون قد تلوثنا بوحلها .. نسأل الله أن يملأ صرة الزاد بالتقوى .

النعيم : ذلك الحلم الذي نعانقة في السجود .. المطل من كبد السماء .

الجحيم : كلما حولنا .. وإن كان ملوناً .

الوداع : ضيف ثقيل ،، زائر لا يعرف آداب الإستئذان ولا فن إيصال الأخبار،، ألم يلهم الأيد أن تستجدي الشلل حتى لاتلوح وتأذن بالرحيل ،، صدمة تلقمنا الخرس وقد نصاب جرائها باتأتأه مدى الحياة فلا نجيد من النطق سوى أسمائهم وعلامات الإستفهام !

اللقاء : نهاية سعيدة لحكايات لم تكتمل بعد .. فكل الجمال هو فصل لرواية لم يسدل ستارها .

الصداقة : كنز وروعة أجهل كنتها .

الخيانة : ليست شي للوصف ،، لا ترى ولا تسمع بل تستنشق رائحتها النتنة التي لا يغسلها إلى نشوة الإنتقام .


- رُوح في شَباب فلسطين .. تُصغِي إليها باجتهاد و اهتمام .. تطلُب مِن حروفِها المزيد و المزيد .. من يكون / تكون ؟
ليست روح .. بل هي أرواح أذكر منها // ماهيناز - ليمار - شهيد-حفيظ - ام الوليد- إياد ~ أشتاقكم بحق

وحالياً // المهندس - براءة - بيلسان - أحمد ~

أقلام تستحق تتبع خطاها ... كوكبة تزف في كبد السماء وحري بنا ان نباهي بها النجوم


- تَوقيع عُضو من آعضاءِ شَباب فلسطين أعجبَكْ ؟
ما إنتبهت بصراحه ،، في كتير تواقيع بتعجبني بس مش متزكرة

بس حالياً توقيعي هو أحلى شي


- مِصباحُ عَلاءِ الدين بين يديَكْ .. إِمسح سطحَه و ابتسم .. و تمنَ شيئاً ؟
مابحب هالنوع من الأسئلة ~ بتخليني احلم كتير لحد ما أخبط بالواقع

لو فيني بتمنى يتوقف النزف الدموي في كل الوطن العربي

وتتكلل كل ثوراتنا بالنجاح وتحصل كل الشعوب على حريتها ونتحرر من الظلم والطغيان

تعبنا من شوفة الدم بكل مكان ،، كل الوطن بيبكي ،، ووين مالواحد يدير عيونو بيشوف وجع وألم

طفل يتيم / شاب مقهور / ام ثكلى / شيخ متحسر ~ رحمتك بعبادك يا لطيف

- لديكَ ثلاثة كلمـآت وجههـآ لمَنْ شِئتَ مِنْ الآعضَاء ؟

مش كلمات هي جمل

لإلك ،، يلي حتشوف هالكلمتين ~

- دير بالك عحالك .

- لاتنسى آية الكرسي دايماً .

- كون انت - انت بكل مافيك - لأنك أجمل من أي أحد بتحاول تكون بتشبهه

::

وشكراً لألكم على الإستضافة الرائعة

هالباقة لكل من يمر على صفحتي المتواضعة ~

[حسام المصرى]

أهلا أخت ليال ..

عمرك ؟؟


مدينتك ؟؟


كليتك ؟؟


شو أكتر داعية تحبى تستمعى ليه ؟؟ واكتر قارئ قرآن كريم ؟؟


ليش دايما حزينة .. " كن جميلا ترى الوجود جميلا " ؟؟


مواصفات زوج المستقبل ؟؟


ايه اللى استفدتيه من حياتك لحد دلوقتى .. ولو كان لقصة حياتك عنوان فى كلمتين .. تختارى ايش ؟؟


التواصل بين الشباب العربى .. إيش رأيك فيه ؟؟


راجع إن شاء الله

[.. ليآل ~]

أهلا أخت ليال ..
أهلا بيك خيو حسام .. يارب تكون بخير

عمرك ؟؟
ليكو عاليمين

عفكرة أنا من الإناث القلائل إلي ما بيتحسسو من مسأله العمر

عمري 24 سنة


مدينتك ؟؟
أنا من مدينة المجدل - عسقلان ~ مدينة الشيخ الحبيب أحمد ياسين


كليتك ؟؟
بكالريوس تجارة دولية ^^


شو أكتر داعية تحبى تستمعى ليه ؟؟ واكتر قارئ قرآن كريم ؟؟
داعية : عمر خالد - محمد العريفي - خالد الجندي - محمد حسان - نبي العوضي - وختاماً عمر عبد الكافي

مقرئ : عبد الرحمن السديس - عبد الله جابر - ماهر المعيقلي - فارس عباد


ليش دايما حزينة .. " كن جميلا ترى الوجود جميلا " ؟؟
مابعرف ^^

برأيك هل موت الأحبة سبب كافي لنضل محزونين طول العمر ؟؟

أو انو انا ضعيفة جداً ؟؟


مواصفات زوج المستقبل ؟؟
مهم يكون إنسان خلوق ومشهود إلو بهالشي

مؤدب وبيعرف يحترمني ويقدرني ويحتويني بكل حالاتي

ضروري جداً يكون متعلم ومثقف

مش ضروري يجي على فرس أبيض ممكن يجي على فرس أسود عادي ،، و حتى بسيارة أو باتيناج

المهم يكون فارس بجد

وإزا بدي أزودها بحكيلك : يكون صوتو واطي - مابدخن - ووسيم عل الأقل بعيني -دمو خفيف - ومابيحكي لأ بدون سبب ومبرر مقنع ..... إلخ

وإن إجيت للحق هو هداك الرجال الي مالو وجود بالحياة ^^


ايه اللى استفدتيه من حياتك لحد دلوقتى .. ولو كان لقصة حياتك عنوان فى كلمتين .. تختارى ايش ؟؟
مش راح اكون مثالية وأحكيلك استفدت وإستفدت ....إلخ

لكن ياحسام كل مالإنسان بيحتك بالناس أكتر وبيتعامل معهم وبينعجن بالمجتمع بيتعلم دروس كتير

كل مايقرأ أكتر ويسمع أكتر بيستفيد من خبرات وتجارب هو ماعاصرها لكن ممكن تنفعوا

::

حياتي إزا كان إلها عنوان مش راح يكون عنوان جذاب وملفت

لكن حيكون بين الدفة فتاة إزدواجية سادية متلونة ومليانة تجارب وافكار ومشاعر

ومن المغامرة إنك تقرأها






التواصل بين الشباب العربى .. إيش رأيك فيه ؟؟
بوجود مواقع التواصل الإجتماعي بظن انو تعزز التواصل

لكن العيب مش في التواصل .. العيب في المتواصلين

متحيزين ومنغلقين على ثقافة أنفسهم

وكأنهم في منافسه او سباق وكل واحد بدو يثبت انو هو صاحب الأفضلية

محتاجين ثقافة أكبر .. وكيفية في إدارة نقاش .. وترك للتحيز الجاهلي ... وتقبل الآخر


راجع إن شاء الله
مبسوطة بوجودك خيو حسام

وبإنتظـــآرك

[Maram .. ~]

منـورة للوش ^^

اممم اسئلتي حتكون خفيفة .. ما الي ع الاسئلة التئيلة هع

* اي نوع ايسكريم بتحبي اكتر شي

* الك ع المطبخ ؟ ازا آهـ، شو اكتر شي بتحبي تطبخيهـ ؟

* بتشتغلي صح ؟ شو طبيعة شغلك ، احكيلنا عنو ،،

* اكتر حدا ئريب منك ؟

* كم ااخ و اخت عندك ، وكيف علائتك معهم .. انتي اكبر شي ؟

* كيف الشتا معك ، بتحبي المطر اكتر ولا الجو النآشف ؟

* اشي بالمنتدى كـآن موجود و بتتمني يرجع ؟ "كموضوع او فعالية"

* من بناآت المنتدى مين الائرب الك ^^

* وصلك اي اخبار عن ليمار ؟

* بتستخدمي الفيس بوك ؟

اممم راجعة

[.. ليآل ~]

منـورة للوش ^^

نورك مراري ياغالية


اممم اسئلتي حتكون خفيفة .. ما الي ع الاسئلة التئيلة هع

أهلا فيكي يابطة شو ما سألتي ~


* اي نوع ايسكريم بتحبي اكتر شي

هههههههههههه

هلأ بالعادة الإنسان بحب كل الفواكة إلا نوع معين وبحب كل الاكلات الا اكله معينة وهكزا

اما انا بحب البوزة بكل أنواعها ونكهاتها وطقوسها لدرجه اني مستعدة اكل بوزة بنكهه البندورة الي مابحبها ابداً

هلأ في الآيس يلي بيكون بعمود وعليه شوولاتة قاسية من فوئ هادا مو كتير بحبو .. بس ازا مافيه غيرو مابحكي لأ


* الك ع المطبخ ؟ ازا آهـ، شو اكتر شي بتحبي تطبخيهـ ؟
لأ .. مو كتير بصراحة

بس بعرف اعمل بعض الأشياءيلي بتخص المكرونة او البطاطا

وبعض الحلويات :$



* بتشتغلي صح ؟ شو طبيعة شغلك ، احكيلنا عنو ،،
آه الحمد لله

شغلي مالو علاقة مباشرة بالشي يلي درستو

بشتغل Data Entery بشركة على نظام الـ SAP إزا سمعتي عنو

الحمد لله شغلي منيح بس مش ممتع ومابنمي المهارة

يعني بتوصلي لمرحلة بتحسي انك خلص غطيتي كل جوانب هالشغل ومافي شي جديد حينضاف الك



* اكتر حدا ئريب منك ؟
بكل بساطة ... مافيه :]


* كم ااخ و اخت عندك ، وكيف علائتك معهم .. انتي اكبر شي ؟
ماعندي اخوات بنات ،، و4 إخوة الله يخليلي ياهم

انا رقم 2

الحمد لله كتير صحبة انا واخواني وبحبوني وبيدللوني كتير وانا بسمع كلامهم

يعني بدهم بوشار بعملهم - بدم قميص ينكوى - بدهم سلف - أداري عنهم ئدام ماما انتي أدرى عاد

احترام بيناتنا ولله الحمد ومافي غنى طبعاً عن الخنائ والمجاكرة


* كيف الشتا معك ، بتحبي المطر اكتر ولا الجو النآشف ؟

بحب الشتا كتير ~ مع انو مرتبط بزكريات مش ولا بد

بس الحر بيخليني منرفزة ومعصبة ومش طايئه حالي

عكس الشتا بكون هادية ورايئة || مع نو هو يادوب بيمر علينا فصل متنكر بالشتا

كأنو بخلان علينا وبيراجع حالو يشتي ولا لأ

وهالسنة يالطيف السما عنا ما نئطت ولا نئطة


* اشي بالمنتدى كـآن موجود و بتتمني يرجع ؟ "كموضوع او فعالية"

مش موضوع ولا فعالية ~ بتمنى ترجع فترة .

الفترة الي انا سجلت فيها // بتصور هديك الأيام هي احلى ايام المنتدى نشاط+ مواضيع مميزة + وأعضاء رائعين

بتصور هديك الفترة هي العصر الذهبي

اكيد كل الأعضاء خير وبركة وكل فترة الها متعتها الخاصة .. بس بتصور ديك احلى فترة 2008

كمان بتزر السنة يلي كمت فيها مشرفة على موضوع حفظ سورة مريم برمضان

كان شهر رمضان فيها ممتع ومليان فعاليات ممتعة ومفيدة


* من بناآت المنتدى مين الائرب الك ^^

كلهم حبيباتي وئراب لئلبي ~ من زمان صار التواصل بينا قليل لهيك صار فية متل فتور بعلاقتي معهم

بس بحنلهم وبحبهم كتير


* وصلك اي اخبار عن ليمار ؟

أبداً


* بتستخدمي الفيس بوك ؟

لأ .. بس فكرة قيد الدراسة

رغم انو مابيقنعني أبداً

اممم راجعة

نورتي ياغالية

مبسوطة بطلتك

وعن جد اسئلتك خفيفة واتسليت فيها

بإنتظار رجعتك

[PaLeStiNe FlOwEr]

هي اسئلتي حتكون أول شي اسئلة بتخص المنتدى :]


- أعضاء إشتقتيلهم ونفسك يرجعوا ع المنتدى ؟

- مين من أعضاء المنتدى بتعرفيه شخصياً ؟

- لو طلبو منك تغيري اسمك هاد لشو بتغيري ؟

- كم صرلك مشتركه بالمنتدى ؟

- مين اول شخص تعرفتي عليه هون ؟ و ع مين كمان نفسك تتعرفي ؟


احكيلي رأيك بهدول الأعضاء ~

- اسراء الفلسطينية

- براءة

- مرام

- شهيد

- ايمان

- جورية القسام

- قطعة حلا

- كلارا

- ابو مجاهد

- وطن

- محمود

- اسد

- المهندس

- صوفي

- حسام المصري

- دموع الغربة واشواق العودة

- حلا الروح

- شموخ انسان

لو صحلك فرصة تقابلي حد من المنتدى مين حابة يكون ؟


برأيك شو هو سبب الجمود والخمول الي أصاب المنتدى ؟


بتتمني ترجعي مشرفة ؟


{ ليال } قلم ذهبي مبدع .. هاللقب لما تقرأيه بشو بتحسي ؟ هل بيعطكي دافع للأمام ؟!

[PaLeStiNe FlOwEr]

اسئلة عامة :]


- شو هي أكلتك المفضّلة ؟ لونك المفضّل ؟

- امتى اخر مره بكيتي ؟ وليش ؟

- عندك 3 امنيات رح يتحققو , شو رح تطلبي ؟

- شو اكتر اشي بتحبي تعمليه ؟

- شو احلى هديه اجتك ؟ ومن مين ؟

- الصداقة بالنسبة الك ؟

- صداقة الانترنت هل ينوثق بها ؟



حاليا بس هدول .. لو خطرلي شي جديد راجعة :]

[اسد 22]

السلام عليكم ورحمة الله وبركاته

سؤال واحد بدي اكون خفيف بلاش اسير نحيف


ما موقف المسلمين في هذه الايام من الاسلام؟أو نظرتهم للاسلام؟

[.. ليآل ~]

المشاركة الأصلية كتبت بواسطة اسد 22 السلام عليكم ورحمة الله وبركاته

سؤال واحد بدي اكون خفيف بلاش اسير نحيف


ما موقف المسلمين في هذه الايام من الاسلام؟أو نظرتهم للاسلام؟

وعليكم السلام ورحمة الله وبركاتة
أهلا أخي أسد .. أنرت بحضورك ~

//

سؤالك لابد أن تقف به على المنبر وتسأل المسلمين أجمع ~

ستعرف الإجابة من طأطأه الرأس ونظرة الخجل والخذلان

وأظن أن كثير من الرؤوس ستتوارى عن الأنظار خجلاً من أن ترتب الأفراد أبجدياً وتبادرهم بالسؤال واحداً تلو الآخر

::

كثر من ينظرون للإسلام على انة قيد يرجى الخلاص منه

وأن إستقامة الحياه لابد فيها بالتضحية بقيم الدين ومبادئة

وأن السعادة مرهونة بفصل الدين عن الدنيا

::

قد نكون جيل الصحوة الدينية !!؟

لكننا لازلنا مقصرين .. فكم من مسلم يحمل الإسلام عنواناً لديانتة في بطاقة الأحوال الشخصية فقط

وكم من رواد المساجد المؤذين لجيرانهم ؟ وكم من الصوامين كثيرين اللغو ؟؟ وكم من المتصدقين متتبعين للعرض والشهوات ؟

وكم من إنسان في هذا العالم لم يعرف عن الاسلام سوا اسمة .. وكم عدد الذين لم يصل لهم شي عن الإسلام مطلقاً ؟

وكم من أناس رأو إسلاماً بلا مسلمين ؟؟


فالدين ليس إقامة للصلاه والصيام والزكاه وإسقاط للفروض وكفى

بل هو نور نهتدي به .. ثوب نستتر به .. حب نعيش فيه ويشبعنا

هو ميزان العدل والرحمة ... صوت الحق الذي يعلو ولا يعلى عليه

أرانا ندعي الإسلام بالإستسلام .. وكأننا أسأنا الفهم !!

::

أذكر أن أحد السلف رأى عمراً بن الخطاب آتياً يوم القيامة يجر ثوبة ... فقيل ان ثوبة هو عزة ونصرة للأسلام !!

فأين يا نحن ستكون أثوابنا ؟؟

::

أسأل الله أن يرزقنا نصرة دينة ويرضى عنه ويجعلنا ممن يقرأونحروف كتابة ويقيمون حدوده

آميــــن

أسعدني وجودك :)

[إيمـان]

ليــآلي أختي الكبيره هآي

آولـآ :


كيف حــآلك ؟

شــوو رأيك بجده

ليـآل بصـرآحـه بصـرآحـه زعلتي لمآ مآقدرت أشترك معك بالمشروع عــآرفـه أنك مآزعلتي بس سوعال

راجعه بس اخلص دراسه