قفشات ....غير بريئة

[almuhandes]

ثوار اليمن
يرفضون الإلتفاف على ثورتهم وسرقتها من قبل الموقعين على المبادرة الخليجية البلهاء
ويتوعدون بالإستمرار في التظاهر لحين رحيل النظام بأكمله


إبن أخ علي عبد الله صالح
يدلي بتصريح جميل
يخاطب فيه شباب الثورة
عليكم أن تستحوا وترحلوا عن شوارعنا

مين يلي لازم يستحي يا قليل الحيا
الواحد لو مرتو قالتلو افرقنا يا .. حل عنا .. قرفتنا عيشتنا ...بستحي على حالو وبطلقها
الشعب بالملايين بقول مشااان الله حلوا عن سمانا طلقونا خلينا نعرف نتنفس وإنتو مثل القراد ملزقين بظهره
شرش الحيا طق عندكم من زمان زمان
عيلة مثل قاع الكيلة
من أصغرها لأكبرها
بكفيكم النهب والسلب والحرمنه يلي عملتوها
خلي هالشعب المسكين يشوف غيركم
ولكم بكفي استحوا ولو بشلن
الشعب رافع عليكم قضية خلع علشان بتعرفوا مو عشان ما بتعرفوا بس آخرتو يربحها ويتحرر

[almuhandes]

بيريز في زيارة مفاجئة للإردن
يلتقي خلالها الملك عبد الله
توقيت الزيارة جاء بعد زيارة الملك عبد الله لمحمود عباس

الحدق يفهم القصد من الزيارة
الحدق بس
ياناس يا عالم يا هو افهموها وريحونا
هلا عباس تورط في قضية المصالحة الكذبة ولوعلى عين الشعب وبيضحك على لحانا فيها لحتى يتجنب ثورة شعب تعود على اللطيم وما بخاف بلا ما يصير فيه مثل حبيب قلبه مبارك الله لا يبارك فيه
بس هو ما نسي حبايبه وما تراجع عن الاعيبه وما تخلى عن المفاوضات
هلا مين الوسيط الأمين صاحب المهمة النبيله
أكيد الملك عبد الله
حملو رسالة امريكيه بتقول لا تسوق الدلال علينا وتصدق حالك
ارجع للطاولة احسن نقلبها على راسك
الملك ما كذب خبر حطها دغري بدانو وبهرها شويه ومحمود من اول بقول أفي ونفسي فيه
يعني أجت الفرصة تمام
هلا العم بيريز أجا يشوف الرد منيح ويخطط للي جاي تمام
يا شعب فلسطين اذا الملح بنور عباس وشلتو بصيروا مناح
وهاي دقني...

[almuhandes]

إعلام

قناة الرأي الفضائية
تدعي بأنها ناطقة باسم المقاومة العراقية
تمجد المقاومة
تبث الأغاني الحماسية
تبث البرامج النارية
كل هذا جميل وأكثر

نفس القناة
تصف ثوار سوريا بالهمج والقطعان
تصف ثوار ليبيا كما وصفهم القذافي بالجرذان
وضعت لفترة طويلة شارة الحداد على القذافي
وصفتة بأنه الشهيد المجاهد البطل

يعني بدي أفهم كيف الموازين مقلوبة
والمفاهيم ملخبطة عندكم
ساعة مع الثوار وعشرة مع البسطار
رسينا على بر يا مشعان يا ابن الجبوري
خلينا نعرف راسنا من رجلينا
ليش الواحد منكم بوق وبس
شو يعني انك بتبث من سوريا
لازم تتبنى وجهة نظر الأسد
ما في ثوابت ولا قيم تتمسك فيها
معمر القذافي شيخ المجاهدين تبعك بتصور عمره بحياتة ما صحي من السكر والعربدة
وعمك الأسد عم يذبح ويسلخ عيني عينك
كيف صاروا هالجماعة بنظرك أبطال..؟
والله أهلين إعلام
وصباح المقاومة مشعان

[وَطنْ~♥]

و نـحـن بـآلإنـتـظـآر ~ :d

[almuhandes]

مفارقة

مفاوضات

من زمان زمان وانا بسمع بالمفاوضات
يعني تقريبا من عمري أو أقل شوية للحق
وزلمنا حاملين شنطهم ودفاترهم واقلامهم
ونازلين طس تواقيع ومعاهدات
وتنسيق
فوج رايح وفوج جاي يخزي العين عنهم
مسمعتش طول هالفترة عن سجين تحرر
ولا شبر تحرر
ولا لاجىء رجع

مقاومة

بحجارة ومقليعة
وقنابل مولوتوف
وصواريخ بسموها عبثية
وصمود صناديد
حرروا غزة
وافرجوا عن كثير كثير

بس خليني اكون حقاني وما اظلم حد
الزلمه ما قصر
حمل حاله وطلبلنا عضوية كاملة
سامعين كاملة ها غير منقوصة
دولة بترن رن على 22% من فلسطين اليهودية
رقمها 194
يعني في ورانا أزلام قد حالها بدها تشلح اليهود أرضهم غصب عن الراضي والزعلان
وتسويلنا
دولة من عجائب الكون
لا أرض ولا سما
لا هوا ولا مجاري
لا سلاح ولا جيش
ولا حتى نتوفة مسدس
ولا عوائد ضرايب
ضريبة تضرب هيك دولة وهيك زلمه
أي أنا عارف من وين هالبلوة طاحت على روسنا..!
افرقنا يا بكفي....

[almuhandes]

الجامعة العربية

ثورة مصر

اليمن

تونس

ليبيا

البحرين

لا حس ولا خبر


ثورة سوريا

قرارات متتابعة بسرعة البرق
تجميد اموال,عقوبات اقتصادية, لجان تحقيق,حقوق انسان وحدث ولا حرج

الجامعة العربية للي ما بيعرف
إنشئت بقرار بريطاني
يعني ما بتقول واو إلا بأمر من هناااااك
هلا شبيحة الجامعة بلعوا ولسه بالعين لسناتهم عن مجازر حصلت لشعوب عربية كثيرة وفي منها لهلا شغال
نشوف اليمن اكبر دليل
يا ترى شو السبب حاملين حملة سوريا
خليني أحكي الصحيح
لأنو
سوريا مش على قد ايد السعودية
ومش على قد ايد قطر
ولا على قد ايد مصر وغيرها
يعني خارج بيت الطاعة متحالفة مع ايران وحزب الله وتركيا
هاي هي الحكاية
يعني مش لأنها سوريا زي ما بيضحكوا علينا قلعة الرفض والمقاومة والصمود
لو كانت سوريا قلعة صمود ما حمت الحدود
لو كانت سوريا ممانعة ما بلش اليهود يبنوا جدار على الحدود وتحصينات أمنية لأول مرة من عهد الأسد الكبير لعهد الأسد الصغير مجرد ما قامت الثورة
اليهود كانوا مبسوطين بجيرانهم وحماة حدودهم لهيك ما كان في تحصينات أمنية أول

يعني بالعربي المشرشح الجامعة العربية مش عربية
وقراراتها مزاجية
وكل الموجودين فيها أرانب وحرامية وبلطجية

ورقصني يا جدع على قرار ونص

[almuhandes]

علياء المهدي

مدونة مصرية
في مقتبل العمر
نالت شهرتها من خلال الطريق الأقصر
إلحاد
وتعري

مؤيدين علياء مهدي قبل التعري كان يعد بالمئات
الآن تجاوز أكثر من 14 ألف مؤيد ومؤيدة

فور ظهور علياء مهدي عارية على تويتر أعلنت 40 فتاة صهيونية تضامنها معها

علياء المهدي
لاأ نتِ بلغت العلا ولا أنتِ مهدية
عريك من القيم والمبادىء والأخلاق
عريك من الدين
عريك من الحياء
عريك من الستر
ما هو إلا إنحطاط
وتمرغ في أوحال العار والحياة البهائمية
تعري كيفما شئت وأنى شئت ومتى شئت وبالطريقة التي تشائين
فإنك بالية بفكرك وجسدك وفراغ روحك
تعري كما يحلو لك على الملأ وخلف الكواليس وفي أحضان الذئاب المسعورة
لينهشك الجميع ثم يبصقوك كقذارة عافتها أننفسهم البغيضة
كم أنتِ مقيتة وكل من حذا حذوك وشد على يدك
كم أنتم مثيرون للشفقة والإشمئزاز

[ملوكة]

استمعت بكتاباتك خيووو

تقبل مرووري

[almuhandes]

المشاركة الأصلية كتبت بواسطة ملوكة استمعت بكتاباتك خيووو

تقبل مرووري

يا هلا ومرحبا
نورت ملوكة
كوني بخير

[almuhandes]

العرس الرياضي في الدوحة يوشك على الإنتهاء
وفد دولة عربية عريقة عائد بحصاد مجموعة من الميداليات الملونة
ذهب ,فضة ,برونز

لقاء مع أحد وفود الدولة العائد في المطار


أبطال الميداليات
نشكر سيدنا ونهدي الميدالية لسيدنا وكل يلي تحقق بفضل جلالة سيدنا

أنا بحياتي ومتابعتي لكل الألعاب الرياضية
عمري ما شفت ولا سمعت واحد جاب سيرة الحاكم
إلا بالهالبلد
ياترى شو السر
أكيد أكيد أكيد
مش ملقنين ولا مبرمجين ولا غصب عن لحية ابو الواحد فيهم
يا عمي ومن الحب ما قتل
يا هيك الحب يا بلاش