::: بيان خمسة بلدي ::: طبل وارقص !

[بو هبه]

جلس هيات يراقب بفضول شديد أبو الرعد الذي عقد حاجبيه باهتمام بالغ وهو يستمع بصمت لمحدثه على الهاتف ، واستمر هكذا إلى أن غمغم بجدية منهياً المحادثة بقوله : - عُلم ويُنفذ ..

حاول هيات أن يحترم صمت أبو الرعد الذي بدأ يحرك إصبعه على ذقنه كأنه يفكر ! .. إلا أن الفضول دفع هيات ليستفسر سائلاً:
- شو في ؟!!

نظر أبو الرعد نحوه باستنكار شديد كأنه يعاتبه على قطع حبل أفكاره ،ثم تلفت حوله ليستكشف إن كان أحداً سيسمعه ، وعندما تأكد من انه لا يوجد أحد غيرهما همس بحذر قائلاً :
- أجتني تعليمات سرية من مسئولي المباشر ، بيقول فيها : إنو صدرت تعليمات عُليا من القيادة المركزية بتطلب منا نلاعب حماس خمسة بلدي !!

حملق هيات في وجه أبو الرعد وفكه السفلي يتدلى ببلاهة محاولاً فهم الحديث ، ثم أشاح بوجه وقال وهو يقهقه ضاحكاً :

- يا راجل خوفتني .. كل الفلم والفزع اللي سويتو عشان هالحكي ؟ .. أي أنا فكرت إن المسئولين جايبينلك خبر عن المكان اللي اليهود مخبيين فيه الصواريخ النووية تبعتهم !!

عض أبو الرعد على شفته من الغيظ بسبب سخرية هيات ثم قال غاضباً :
- وانا إيش اللي مخليني برتبة نقيب لهلا ، مش الحمير اللي مشغلهم معي زي حضرتك

- خلص يا أبو الرعد ، تزعلش ، حقك علينا .. بس فهمني شوي شوي ، عشان أفهم .. شو يعني نلاعب حماس خمسة بلدي ؟ .. يعني نجيب طبلة ونرقصهم ولا شو بالضبط ؟!!

- يا تيس افهم .. هادا مصطلح سياسي معناته نشغل حماس في أمور فرعية عشان ما يعرفوا يشتغلوا في الحكومة .. هيك حكولي ..

- هالحين فهمت .. يعني نجيب خمس شباب ازقردات مش من الجهاز ، ونخليهم يطخوا على بيوت تعون حماس ، وبهيك يبطلوا يطلعوا من بيوتهم من الخوف وينشغلوا عن الحكومة !..

- أيوة عشان يرجعوا الخمسة مكسحين و مطخوخين في رجليهم وأهاليهم يحملونا مسئوليتهم عشان بعتناهم ..

- وليش نتحمل المسئولية ؟.. يتحمل المسئولية اللي كسّحهم .. وبهيك تنشغل حماس عن الحكومة مع عائلاتهم ..

- والله هي فكرة حلوة .. بس الخوف واحد فيهم يعترف عليا وساعتها بتروح في كيسي .. اسمع .. شوفلك اشي تاني ميكونش فيه طخ ، لانو أكيد الكل حيفكر زيك وأنا بدي شغلي يكون متميز !!

- طيب .. شو رأيك ننزل بيانات كذب باسم حماس ؟ ..

- نيلة تنيلك على أفكارك القديمة .. مش عملناها مرة وكشوفها وصارت فضيحة وعليها شهود !..

- لا لا .. هديك المرة نزلنا بيان من شرفاء حماس ضد حماس .. المرة هاي بنزل بيان باسم حماس ضد الأجهزة الأمنية ونحكي فيه انهم كفار وزناديق وهيك يعني .. وعشان ما ينكشف البيان ، بلاش نطبعه على الفاكس زي المرة اللي فاتت ..

- حلوة حكاية البيانات هاي .. على الأقل تبعون الأجهزة الأمنية يكرهوا حماس وبيبطلو يسمعوا كلام الحكومة ، وممكن كمان ننزل بيان باسمهم ضد الموظفين وضد التنظيمات ، وبهيك نحرض الكل عليهم ..

- عشان تعرف وتقدر انو في وراك رجال بتفكر وتخطط !..

- أه والله معك حق .. ابصر مين ميت اليوم ؟!! .. بس يا فالح كتابة البيانات بدها واحد بيفهم وبيعرف يحكي زي اسلوب حماس .. وأنا بعرفش حدا أثق فيه بيكتب زيهم ، ولو رحت حكيت لواحد من اللي بيعرفوا ممكن يسرق الفكرة ويعملها ويطلع على اكتافي ..

- وهادا اشي يفوتني .. عندي واحد ثقة بيقدر يحكي زيهم بالزبط .. لو تشوفو وهو بيقلدهم لتفكرو من حماس

- مين ؟

- حنكورة تبعنا !

- ولك انت انجنيت ؟ .. هو حنكورة بيعرف يكتب ولا يقرا ؟..

- فاهم فاهم .. صحيح هو بعرفش يقرا ولا يكتب .. لكن بيعرف يقلدهم و يحكي ويخطب زيهم تمام .. احنا بنجيبو هون نسمع منو ونكتب كلامه ، وبعدين نطبع منو زي ما بدنا .. ووزع يا ولد في هالبلد ..

- والله أتاريك منت قليل يا هيات !!.. خلص خير البر عاجله .. اتصل فيه وخليه ييجي هون عشان نضمن السرية ..

- فش معي كرت !

- ولك مش امبارح ماخد مني كرتين .. لحقت اتخلصهم ؟

- ما انت عارف تكاليف العواطف يا أبو الرعد ! ..

- الله يعدمك عواطفك .. اعطيني رقمو ، بس انت بتحكي معو ، بلاش يفكر حالو اشي اكبير


لم يغب حنكورة كثيراً بعد أن اتصل به هيات ، وعندما حضر و شعر بحاجتهما إليه بعد أن شرحا له الفكرة ، أخذ يساومهما تارة ويستعرض عليهما بغرور تارة أخرى مما جعل أبو الرعد يتميز غيظاً ويترك لهما الغرفة حتى ينتهي هيات من كتابة البيان الذي سيمليه عليه حنكورة ..

- ها .. فرجوني شو سويتو في هالساعتين ..

- اسكت يا أبو الرعد .. والله حنكورة ملاني بيان بطلعش بإيد خالد مشعل يكتب واحد زيو

- هات أشوف ..

ألقى أبو الرعد بالورقة في وجه هيات بعد أن أخذها منه وهو يقول متذمراً :

- ولك في حدا يعرف يقرا هالخط .. خود اقرا انت وسمعني شو فيها ..

- طيب اسمع .. بيان سري رقم واحد .. بعد بسم الله الرحمن الرحيم وشوية آيات قرآن عن الكفار والمنافقين لسة مكتبنهاش .. بيقول البيان :.. يا أيها الأجهزة الأمنية الجبناء ، لقد وصلنا الى الحكومة بقرار من الشعب الذي انتخبنا ولم ينتخبكم بانتخابات شافتها جميع الناس وقالت عنها نزيهة وبريئة ، واليوم جاء حسابكم يا من كنتم تختبئون في الاجتياحات كما تفعل المرات ..

قاطعهأبو الرعد باستغراب :
تفعل المرات !! .. شو يعني المرات ؟

التفت هيات إلى حنكورة وهو يسأل :
- صحيح يا أبو الحناكير .. كان بدي أسألك عنها ونسيت .. شو يعني المرات ؟؟

مط حنكورة شفتيه بازدراء وقال بنبرة المنزعج من الجهل :
- مرات جمع مرة .. يعني نسوان بالبلدي ..

هتف أبو الرعد معلقاً بزهو :
- معناته يا أهبل بتخليها كما تفعلن .. مش تفعل !! .. ما سمعتش عن اشي اسمه نون النسوة ؟

- بعدين بنصلح النحو يا أبو الرعد . هلا اسمع اللي جاي .. وين وقفنا ؟ .. أه .. كما تفعل .. تفعلن المرات المزعورات ، وإننا في حركة المقاومة الإسلامية حماس نحذركم لأننا قررنا أن نقتلكم لو لم تتوبوا وترجعوا الى خيار حماس وخيار الشعب أولاً وأخيراً ، وإننا نطلعكم أننا عرفنا عنكم أنكم مرتدين وكفار وعملاء للعدو المتصهين ، الذي جابكم الى هنا بالاتفاقات المشبوهة لتصبحوا كجيش العميل رفيق الحريري ..

- استنى يا متخلف .. شو دخل رفيق الحريري في الموضوع

نظر هيات إلى حنكورة بعد مقاطعة أبو الرعد له كأنه يحوّل له السؤال ، فأجاب حنكورة باشمئزاز وامتعاض :

- رفيق الحريري تبع جيش لبنان الجنوبي اللي أعدموه قبل سنتين ..

- ولك هادا وزير خارجية سوريا اللي قتلوه لما راح زار لبنان وصارت مشاكل بين البلدين .. تبع جيش لنبان الجنوبي اسمه انطنيو أو

- علي الطلاق بالتلاتة انو تبع لبنان وقتلوه تبعون القاعدة .. حتى بالأمرية اللي قتلو واحد فلسطيني حطوا إلو شريط فيديو على تلفزيون الجزيرة وهو بيعلن مسئوليتو ..

- برضو بيقول لبناني !! .. اتشارط ان الحريري سوري ؟ ..

- بشارطك .. عشر سجاير بانجو مني و سجارة وحدة منك ..

- ماشي الحال اتفقنا .. ولة هيات .. رفيق الحريري لبناني ، ولا سوووري ؟؟..

- وانا شو بيعرفني ؟.. ملقيتوش غيري تسألوه !! .. بس تستبعدوش يكون سوري واتجوز لبنانية وأخد من وراها الجنسية وصار لبناني ..

- طب انخمد بلاش هبل ! .. كمل قراية و بعدين بنشوف هالموضوع ..


زفر هيات أنفاسه بضيق قبل يستطرد قائلاً

- يا أيها الأجهزة الأمنية ولا نستثني أحداً ، اعرفوا انه قد آن الأوان لقطف رؤوسكم التي أعنبت وحان وقت قطافها ..

أمسكأبو الرعد بكتف هيات يستوقفه وموجهاً حديثه لحنكورة سائلاً :
- شو هادي أعنبت .. ما فهمتها بالمرة ؟

أجاب حنكورة وهو يلوح بيديه موضحاً :
- هادا يعني ان روسهم حتنقطع زي الحصرم لما يستوي ويصير عنب وبعدها نقطفه

- قوية هاي .. من وين اتعلمتها ؟

تدخل هيات مقاطعاً وهو يقول بضجر
- حكيتلك انو بلوة وعارف كل كلامهم .. خليني أخلص قراية البيان وبعدين بتسأل ..

- طيب اقرا يا فالح .. اللي بسمعك بفكر انك بتقرا ميثاق مجلس الأمن

- رؤوسكم التي أعنبت وحان وقت قطافها ، ونحن الذين سنقطفها لو لم حولوتوا وصرتوا حمساويين وبوستوا التوبة وندمت على ما فعلتم ورجعتم الى حضن الثورة والشرعية الدولية وبطلتوا عربدة واعترفتم بعلم حماس الاخضر الاسلامي وكرهتم علم فلسطين المتبرج ، وانها لثورة حتى النصر حتى النصر .. اخوانكم في حركة المقاومة الإسلامية حماس بالاشتراك مع كتائب عز الدين القسام القيادة العليا والممثل الشرعي والوحيد للشعب الفلسطيني

صمت هيات بعد عبارته الأخيرة فقال أبو الرعد مستفهماً

- خلص ؟؟!! .. مش شايفين ان البيان قصير شوية ؟

صاح حنكورة مجيباً :

- ما هو لسة في شوية قرآن بين كل فقرة وأختها عشان البيان يكون يقنع اللي يقراه ، بس أجلناها بعدين لما نشوف شو اللي بيناسب الكلام ..

تدخل هيات وهو يسأل بفرح واضح :
-ها .. شو رأيك .. أظن فش بعد هيك بيان ؟

صمتأبو الرعد وأخذ يحك ذقنه كأنه يفكر ، ثم قال برضا :
- بعد شوية تعديلات ، وخصوصاً حكاية رفيق الحريري ، بيصير بيان امنيح وحمساوي 100% .. كمان اشي كان ممكن يضيعنا ويفضحنا في اخر البيان لما كتبتبوا في النهاية انها لثورة حتى النصر .. لان حماس ما بتنهي بياناتها بهاي العبارة ..

انتفض حنكورة صائحاً وهو يضرب على جبهته بكفه :
- أخخخ .. هاي نسيتها عن جد وراحت من بالي .. غيرها يا هيات وخليها .. خليها .. والصلاة خيرٌ من النوم





طبعا الحوار مش خيالي لكن بناء على اوامر القيادة العليا
ومن هنا الأمر

رابط مباشر من الموقع فلسطين الحرة
http://www.freepal.net/dahlanvoice.htm

مدة الحوار 20 دقيقة


رابط التحميل للملف الصوتي حجم الملف 18 ميجا

http://www.freepal.net/Dahlan.mp3