اهل القدس نايمين ........................

[صاحبة القلم الحزين]

السلام عليكم و رحمة الله و بركاته


أختي و حبيبتي أم البراء،،

أنا عارفه ليش نزلتي هالموضوع

لاني كنت معك لما شفنا كل المحلات فاتحة

في يوم حداد على شهداء غزة

وأنا هون مش راح ادافع و لا ابرر تصرفات اهل القدس

بس انتي عنجد حطيتي ايدك ع الجرح

و الشغلة بداخلي من زمان

و نفسي كل العالم يعرفها

بس كل ما اجي احكي لحدا عن الوضع هوون

بخاف،، بخاف أشوه صورة القدس و أهلها بعيونهم

بحكي خليني ساكته و خليهم مخدوعين

و بدعيلهم انهم يصحوا!!

والله يا عزيزتي صرختك بمكانها

بس للأسف

وقد أسمعت اذ ناديت حياً،،،،، و لكن لا حياة لمن تنادي!!

مشكلة أهل القدس مش جديدة

و لسه هلأ الحمد لله الوضع أهون بكتير من قبل

الحركة الاسلامية و شباب المساجد

عم يبذلوا قصارى جهدهم في ايقاظ النيام

حملات اثر الحملات

دعوة للرباط بالمسجد الأقصى

لأنه و للأسف طبعا

أهل القدس مش بس كأنهم بعالم آخر و مش سائلين عن فلسطين

أهل القدس مقصرين تقصير واضح جداً

بالمسجد الأقصى

يعني والله مشهد مبكي

و يدمي القلب

لما تصلي المغرب أو العشاء بالمسجد الأقصى

و تلاقي المصلين يا دووب يكملوا صفين تلاته!!!

ما بدي أطول كتير

بس اللي بدي أحكيه

انه كلامك صح 100%

بس طبعا ما بيشمل الكل

لأنه في ناس من اهل القدس

الله يبارك فيهم و بجهودهم يا رب

ما بقصروا والله

و في كمان شغلة حابة أحكيها

يمكن السبب اللي وصلهم لهون

هو الخناق الضيق المفروض على مدينة القدس

يعني لا أهل الضفة الغربية و لا أهل غزة بيقدروا يفوتوا القدس

بس أهل القدس و أهل ال48

و هالشي بحد من علاقات أهل القدس مع باقي الشعب الفلسطيني

و كأنه بيعزلها عن باقي فلسطين

يعني ما في تعامل الا مع اليهود للأسف...

و ما في مجال ما نتعامل معهم

لانهم غصب عنا ربطوا حياتنا بحياتهم

الماء.. الكهرباء.. المعاملات.. البيع.. الشراء.. الخ

و كل شي بحياتنا مرتبط فيهم و بالتعامل معهم

و كأنهم فارضين على القدس و أهلها سجن كبيير

يعني انا والله العظيم

ما بلشت اشعر بفلسطين كفلسطين بلدي

و اصحى لكل شي فيها

الا بعد ما بلشت اطلع من القدس

لما داومت بالجامعة و صرت اروح و اجي برا القدس

حسيت انه الضفة عالم آخر

فيها كل شي عربي

حسيت هناك فلسطين

هناك بلدي

و الشي الوحيد اللي بربطني بالقدس

المسجد الأقصى المبارك اللي احتل جزء من روحي

و البلدة القديمة بحجارتها و أزقتها

بعرف اني طولت كتير بهالرد

بس بالنهاية

ما بايدنا الا الدعاء ثم الدعاء ثم الدعاء

و واجبي كفلسطينية ساكنة بالقدس

أشارك قد ما بقدر بتصحية أهل القدس النايمين

.....