« لـــيــآل » ضـيـف { لَـيالِي شـبابُ فـلسطِيـن و ثـرثـرةٌ حُـرة ~

[.. ليآل ~]

- كيفَ كان حالُكَ قبلَ دقائِق ؟

شكراً لأنكم سألتوني عن حالي ،،، مو كتار بحياتي الي بعملوها

مزاجي ونفسيتي إجمالاً هالفترة متل مؤشر البورصه

شوي فوق وشوي تحت

لكن دائماً الحمد لله... وبكثرة


- مَا هُو شُعُورُكَ حينَ تتَجولُ فِي رئِيسيةِ شَبابِ فلسطِين وَ أقسَامِها ؟

شباب فلسطين شيء مابيمس الذوق أو الحاله أو حتى الميول

شباب فلسطين شيء مرتبط بعاطفتي،، وشكل ولا زال بيشكل جزء كبير من ذكرياتي

برتاح كتير هون ،، وبحس اني عم بعيش حياه كامله

بعصب وبفرح وببكي وبرتاح وبشتاق وبتوجع وبنقهر وبحلم ....

أنا كتير إنولدت من جديد على إيد هالمكان :]

يمكن تفكروني ببالغ ~ لكن هي الحقيقة دايما بتكون مره أو صادمة


- [ لـــيـــآل ] فِي أَسطُر ؟

بيكفيني أكون ليال الي بتشوفوها بعيونكم بدون ما أوصف نفسي و أهديكم عيوبي


- حِكمَة ، مَوعِظة، أو بيتُ شِعر، تنطَبِق على شخصِك ، تُطبِقهَا فِي حَيَاتِك أو تُحبُ تردِيدها ؟

[كل شيء بقضاء ،، مابأيدينا خلقنا تعساء]


- طُـمُوحاتُك و آهدافُكَ بينَ الحاضِر و المُستقبلْ .. حدثينَا عنهَا ؟

بالحاضر // عندي إلتزامات وتحديات كتير بهالفترة سواء على الصعيد المادي او المهني او حتى النفسي وبتمنى يسعفني الوقت لتحقيقها وتجاوزها

بالمستقبل // بالمستقبل عندي أحلام كتير كبيرة .. أول شي أبني مسجد يكون وقف لروح بابا الله يرحمو وأمتلك بيت خاص فيني - أكمل تعليمي الأكاديمي - أسافر على مكان دايماً بحلم فيه - وأساعد خالي في تدريس ولادو وبالأخص ابنو حمودي وأقدر اساعد إخواني بكل شي بئدر عليه حتى يكونوا مبسوطين ... والقائمة تطول :)



- لا بُد و أن لكَ هِواية ..دعنَا نستكشِفها معكْ ؟

بحب الرسم والقراءة والتأمل ~

زمان كتير كنت اعزف جيتار بس هلأ ناسي كل شي تماما

وإجمالاً ماعم بمارس هوايات ئد ماعم ضيع وقت بالخربشه والكتابة


- شَخصٌ أو جِهةٌ تخطُر فِي بالِكَ بِأولِ الفرَح و آخِر الحُزن ؟

أحكيلكم سر

إكتشفت إنو أنا حدا نكد كتير ... ومعو كباية نصها مليان ونصها فاضي

وبالنادر لما يفكر يطلع بالنص المليان

أنا لما بحزن أو بفرح فوراً بفتقد بابا الله يرحمو

وما بعود أشوف إلا انو انا محرومه منو


- هلْ تنَاولتَ وَجبةَ إِفطاركَ وحيداً اليومْ ؟ أ مُعتاد عليها أم هِي حالَة طارِئة ؟

مافطرت اليوم ،، بس شربت قهوة .. على مكتبي ولحالي

بس اغلب الأحيان بفطر شي خفيف متل الكوكيز

بس اليوم إشتريت بوزة واكلتها ئبل ما ابلش اجاوب ،،، مشان المصداقية


- مَا الذِي يدعُو حاجِبيْكَ للتقطِيبِ و العبس فجأة ؟

لما أحس إنو كل المبادئ والقناعات الي تربيت عليها ومؤمنه فيها مالها درب للتطبيق بالحياة

أو انها مستنكره من قبل الآخرين

لما أشوف الظلم والعوج هو السائد والمقبول والمستساغ

لما احس انو كل شي حوالي غلط وانا لحالي صح ... بالتالي بيتحتم علي اكون جزء من هالغلط

هالشي ممكن يدخلني بحاله تعاسة لا متناهية





- متَى تغارُ بِشدةٍ وَ تُثيرُ القلقَ كفُوهة بُركان ؟

الحمد لله ... الشي الوحيد الي بقدر اسيطر عليه واحدد وجهتو هي غيرتي ~

وازا حتكون غيرتي متل البركان وتثير القلق حتكون على ما حتكون من !!


رآجعة :)