جدوى وجدية المنتديات

[.. ليآل ~]

شفت شغله لولا لطف ربي لكان إنشليت !!

::

عالعافيه خيو المهندس

يارب تكون بخير وأمورك تمام

إسمحلي هون أحكي بالعامية

مع انو هالقسم أكتر قسم بكره فيه هالشي

بس بعد إختبار العربي الي خبرك صرت خجلانة أتفزلك بالعربي الفصيح

::

المنتديات هي جزء كبير من الي بيشغل انشطتنا على الشبكة العنكبوتية

وفي منها الصالح والطالح

واكيد في منتديات بتحمل رسالة سامية

وكتير بتعجبني فكرة وجود منتديات مخصصة

متل المنتديات الإسلامية البحتة / أو منتديات تحت عنوان ملتقى ثقافي / أو مدونات وماشابة من ناحية النثر الأدبي

أو حتى منتديات رياضية / وصفحات بأسماء أشخاص سواء فنانين او دعاة أو مشاهير وخلافة

هالشي بيحدد توجهات واضحة وصريحة للمتصفح

وبتعطية الفرصة إنه يكون في مكان بيحب أغلبة مش بعض وبعض !!

مع إنو بالغالب المنتديات المتخصصة بتفتقد للنشاط والديمومة بسبب رتابة نشاطها

لكن من توجة المنتدى وطبيعتة بتقدر ترف ميول الاعضاء ونوعيتهم

::

بتفق معاك انو مؤسسي المنتديات عندهم هدف مادي - لكن مافينا ننكر إنو في منتديات بتتوازى فيها الفائدة والتسلية والمنفعة لكل الأطراف ~

::

أنت سألت : هل المنتدى وسيلة لتبادل المنفعة والخبرات ؟

الجواب نعم ... لكن مش بالشكل الكافي ومش مصدر موثوق

لانو بالنهاية في المنتديات قلة ماتلاقي رقابة على نوعية ومصداقية الموضوعات والمعلومات

وفي ناس مقدم عندها دائماً حسن النية وكل ما يسمع يصدق وبشدة

وبالنهاية 90% من المعلومات إما من مواقع الأخبار أو من منتديات مشابهه أو من وحي تجارب شخصية

يعني كل شي نسبي وخاضع لمعيار الذات والقبول


::

الإيجابيات //

مافيني أنكرها

انا من هالمنتدى كونت علاقات وصداقات من الصعب بمكان اني احصل عليها في ارض الواقع
المنتدى هذب شخصيتي وغذى قلمي وزاد من قدرتي على النقاش وتقبل الآخر
وشغل وقتي بشي ممتع ومفيد في فترة من فترات حياتي

السلبيات //

كمان مافيني أنكرها

سرقني من اهلي كتير

وفوق ما انا انطوائية زاد عندي هالشي أكتر -بفترة من الفترات-

وكمان خلاني اقلل قراءة ورسم يعني كمان سرقني من هواياتي

واحياناً ممكن يجيك وجع رآس وبلحظة صفا بتحكي لحالك انا شو جابرني ؟؟

::

التيرموميتر لنجاح اي منتدى هو الأعضاء بشكل كبير

بالتوازي مع وجود إدارة حكيمة بتمسك العصا من النص

لا بتكسر ولا بتعجن

لما العضو يحس انو كل شي بيتعمل سواء من انشطة او مسابقات أو حملات هو مشانو ولما يشعر انو لما ينظلم

أو انو في سياسات بتتغير وفقاً لمطالبو وان مشترك في سياسة المكان بيشعر بإنتماء أكبر

وبيداوم على التواجد والعطاء

بالنهاية هي كفة ميزان والأخذ والعطاء لازم يكون متكافىء

::

بتمنى اكون غطيت كل النقاط الي حضرتك زكرتها

ويعطيك ألف عافية

إنت من الأشخاص الي بتعطي كتير

وبتمنى انك تكون بتآخد الأخد الي بيشعرك بالرضا وبيخليك تستمر

:)

وعفواً عالإطاله

[almuhandes]

أهلين ليآل
أنا كمان بدي أحكي بالعامية ويلي يصير يصير
بكفيش السقوط المريع في امتحان اللغة العربية

كفيتِ ووفيتِ وما قصرت وسلم دياتك
كثير بتفق معك في تحليلك للأمور

في شغلة كمان حكتيها أعجبتني كثير المنتديات المتخصصة بتفقد الديمومة بسرعة يعني مصيرها بين قوسين الفشل
والسبب أكيد الأعضاء
منتدى إذا ما كان فيه تسلية ولعب ومرح لا يمكن يستمر ورح يدخل بغيبوبة وغرفة الإنعاش وعمره ما رح يطلع منها إلا خارج السيرفر
الشغلة المهمة يلي حكتيها كمان عن مصداقية المعلومات
هاي الشغلة ضروري الجميع يكون فاهمها ومش اي شي بينطرح في المنتدى أو على النت بشكل عام لازم يكون صح
ما في تدقيق ولا معايير لهيك شغلات
أنا نظرتي للمشاركة بالمنتدى إذا ما نفعت ما رح تضر
بغض النظر عن مقدار العطاء والأخذ
والشي المهم كمان إنو في ناس مجرد ما تشوف اقلامهم بترمح قدامك بتصير تحاول تكون مثلهم بفنهم وابداعهم
في ناس هون علموني كيف امسك القلم ولسا بتعلم منهم
بحب الأقلام يلي بتحكي مو الخرسا لأني بموت من الرتابة
بس في بعض اقلام بتمنى لو ما تحكي ابدا لأنها لو تحكي رح يكون حكيها نشاز

//
الشبكة العنكبوتية مليانة
وعلى كل واحد يعرف كيف يختار حتى يستفيد قدر الإمكان

//
ليآل شكرا بحجم الأرض
كوني بخير