ثــانـويـتـكــ فـــي ورطــة...~ lll

[الفتاة المشرقة]

استمتعت بقراءه حديثك ..

ننتظرك بالتكمله ..~

[PaLeStiNe FlOwEr]

أسفة ع الـتأخير

شوي وراجعة مع الأجوبة ^^

[PaLeStiNe FlOwEr]

* الحالة النفسية *

الكثير يقولون أن مرحلة التوجيهي تؤثر على شخصية الطالب!!

فكيف كان تأثيرها عليك؟؟ هل هو ايجابي ام سلبي؟؟!

كانت سنة عادية متل اي سنة,,

بس أكيد بكون في خوف منها لأنوا هي الي بتحدد مستقبل الانسان

كيف كانت حالتك النفسية خلالها؟؟! هل كنت كثير الاضطراب والقلق؟؟!

ما بيخلى هاد شي في فترة الامتحانات خصوصا..

هل كنت تشعر/ي انك غير ويجب ان يكون التعامل معك غير؟؟!

لا عادي ,, حتى كانت أختي أصغر مني بسنة كانت امتحاناتنا بنفس الوئت حتى اخواني الأصغر كلنا كنا نمتحن بنفس الوئت .. فطبعا يكون الكل بدو اهتمام .. فمو عشني توجيهي لازم يكون غير بالعكس.. ريلاكس


احنا عنا كل المراحل بتمتحن نفس الوئت حتى التوجيهي معهم .. يعني مو التوجيهي بكون الهم وئت لحال زي بعض الدول .. بنكون كوكتيل

كيف كان تعامل الأهل معك؟؟!

تمام الحمدلله

من ناحية الدراسة كانوا الأهل يطلبوا منك الدراسة ام كنت/ي مجتهدة بتدرس/ي من غير ما حد يقولك؟؟!

طبعا كنت بدرس.. بس برضوا كانوا يطلبوا .. يعني مجرد ما اطلع من الغرفة ببدوا يئولولي ادرسي ومن هاد الحكي

بس فترة الامتحانت ما حد بطلب بكون عارفة مصلحتي وبدرس

[PaLeStiNe FlOwEr]

* النتيجة *

شو كان شعورك لما بدأ العد التنازلي للإمتحانات النهائية؟؟!

أكيد خوف,, والألة الحاسبة كانت ما تبعد عني ,, كنت كل يوم أحسب وأقدر وأشوف كم حجيب .. وطبعا بدأت الدراسة تزيد .. والنوم يخف .. كوكتيل برضوا

ماذا حصل لكم بالتفصيل يوم النتائج!!

قبل النتيجة:

طبعا من الصبح كان تعزيل للبيت وشطف وتنضيف .. لأنوا ستي ( أم بابا )كانت جاي عنا زيارة من الأردن .. فهاد الشي نساني النتيجة .. ع العصر راحوا أهلي يجيبوا ستي من المطار وئتها بلشت الاتصالات .. طبعا الأغلب ما كان يعرف انوا بهاد اليوم النتيجة كانوا المفروض اليوم الي بعدوا ,, بس أختي كانت شايفها ع التلفزيون ئبل بليلة كانوا حاطين الموعد والساعة ,,

المهم المفروض الساعة 8 بليل النتيجة ع الساعة 7 صحبيتي بعتتلي مسج انوا افتحي ع قناة الكويت الأولى ولا كانت الوزيرة طالعة وحكت شوي بعدين أعلنت أسماء الأوائل وطبعا ما بتطلع النتائج الا لما تبصم بصمة >> هبل يعني

وأحنا النتائج بتبعتلنا اياها الوزارة مسج .. او بنشوفها ع النت .. يعني مجرد ما تبصم البصمة بتبدا الوزارة تبعت مسجات للطلاب..

بعد النتيجة:

اول شي حكيت مع خالي ال عنا وخبرتوا .. وبعتنا المسج الي بعتتوا الوزارة لخالاتي وخوالي الي بالاردن وبابا بعتوا لعمامي وعماتي ,,

وبعدين حكيت مع صحباتي المقربات اطمن عليهم .. وفتحت موقع التربية أتأكد من النتيجة,,

وبعدها اجوا عنا دار خالي ..

كيف تلقيت النتيجة ومين خبرك اياها؟؟!

كان بابا بالدوام بعدين اتصل ردت أختي ما ئبل يئلها .. اخدت التلفون منها وما ئبل يوئلي وبلش لعب الأعصاب ويسألني كم بتتوقعي ومن هالحكي المهم ما ئلي


بعدين حكى مع ماما وئلها لما شفت تعابير وجه ماما عرفت انو مو بالتسعين .. وماما ئالت الحمدلله الحمدلله وسكرت التلفون

توقعت انو نازلة كتيييييير

بس بعدين اتصلت ببابا وسألتوا وئلي .. طبعا ماما ئالت بس ما استوعبت الموضوع .. فاتصلت ببابا أتأكد ..

شو كان شعورك وشعور أهلك ومن حولك؟؟!

هو تعابير وجه ماما وئت تلقي الخبر من بابا ما عجبتني .. بس بالعكس كانوا فرحانين كتيييييير .. ستي صارت تدمع وطبعا ماما أولهم واخواني ينطنطوا وانا مو مستوعبة شي من الي حولي وخواتي يباركوا بس كنت متل الي انضرب كف ع وجهوا او انكب علي مي باردة ..

[PaLeStiNe FlOwEr]

نسيت ئول شي

أنا خلصت امتحاناتي 2009/6/25

والنتائج طلعت 2009/6/29

النتائج بدها يومين بس لتطلع

بس الي صار انوا خلصنا يوم خميس

والجمعة بكون المدرسين معطلين فما كان في تصليح والسبت بكونوا بس نص دوام

فالأحد كملوا تصليح وعملوا النتائج بس الوزيرة كانت مسافرة واجت الاتنين فطلعت النتائج الاتنين بليل الساعة 8

* ما بعد التوجيهي *

بماذا كنت تحلم ان تدرس؟؟!

طبعا حلم الطفولة كان هندسة

بعدين تغير .. المهم طول ما أنا بالتوجيهي خلص كنت حاطة ببالي مختبرات وتحاليل طبية

وما في أي مجال للتغيير .. بس الي صار انوا طلع للوافدين المختبرات بس سنتين وبابا ئلي مهضوم حقهم كتير يعني هو بشوفهم بالمستشفى وشايف شو بصير معهم

وبعدين تغيرت الفكرة وبابا قرر يوديني ع الأردن.. أنا ما كنت حابة أتغرب وماما ما كانت مرتاحة .. وأصر بابا ع صيدلة بالأردن ..

وأهل صحبيتي السورية أقترحوا أروح أردس بسوريا مع بناتهم .. بابا عجبتوا الفكرة وئلي ازا سوريا طب وازا الأردن صيدلة

وماما بدها طب أسنان وانا بدي مختبرات وتحاليل طبية

وما حد عرف يقنع التاني .. بس طبعا قرار سوريا ما كان بالحسبان لانوا ما الي حد فيها والأردن الي كل ئرايبي فيها ما كنت مقتنعة فيها


المهم بلشت الاستخارة كل يوم يطلع حلم مزعج لماما وأنا ما رتحت بالمرة للسفر .. يعني نجيبها يمن نجيبها شمال في أضرار لسفرتي ودراستي ببلد غير الي أهلي فيها

كنت لما أفكر اني بدي أبعد انجن

وبعدين ئلت أدرس شو ما أدرس المهم جنب أهلي

هل كان المعدل بيسمح لدخول هالتخصص؟؟!

انوا لو بدي أروح ع الأردن كنت موازي رح أدرس لأني مغتربة .. ولو لو سوريا طبعا كان احتمال اني اروحها 1% طبعا جامعة خاصة لاني وافدة


وبالكويت عنا جامعتين حكوميات فقط ..

وحدة للكويتين وكل التخصصات موجودة فيها ,, وأقل تخصص اربع سنين .. طبعا لازم أكون من الأوائل بس في استثناءات للي معدلاتهم عالية ولازم واسطة

صحبيتي كانت جايبة 96 وما طلعلها ..


والتانية فينا ندخل فيها ومو كل التخصصات فيها بس مواد التربية وكم مادة علمية بس أغلب التخصصات الي حتكون متاحتلنا بتكون كلها دبلوم بس مدتها سنتين ونص

وفيها تخصصات 3 ونص وفيها 4

طبعا النصاص هي بتكون تدريب ميداني يعني بعد الدراسة النظري بكون في فصل دراسة عملي بتوزعوا فيها الطلاب على شركات أو مدارس أو مستشفيات .. بتدربوا فيها كأنوا شغل بس من غير معاش وعليه درجات ومن غيروا الطالب ما بتخرج

المهم سجلت فيها ما طلعلي لأنوا بدون واسطة =(

<< والكورس التاني رجعت حاولت وما طلعلي والسنة الجاي رح أرجع أحاول أسجل ولو طلع رح كمل بالجامعة الي بدرس فيها هلأ ورح أدرس برضوا بهي ..

لأنوا رح يطلعلي تخصص سنتين فبكمل بالتنتين >>


فطبعا رحت جامعة خاصة .. وكل الجامعات الخاصة تخصصاتها بتكون شغل كمبيوتر وبزنس وانجليزي

ما في فيها اشياء علمية

فأخترت it

هل حصلت معك معوقات لدخول الجامعة؟؟!

اه كل الي حكيتوا فوق

بس الحمدلله على كل حال

درست it بس المهم انو جنب أهلي

ولا إني اروح ادرس شي برا واكون بعيدة عن أهلي

[PaLeStiNe FlOwEr]

* الجامعة *

شو تخصصك الحالي؟؟!

Information & Communication Technologies

مقتنع/ـة في دراستوا؟؟!

الحمدلله

مبسوط/ـة في؟؟!

الحمدلله.. مع انوا بحياتي ما توقعت ادرسوا او خطر عبالي أ, كان من الخيارات

بس قدر الله واختيار الله تعالى

احكيلنا شوي عن حياة الجامعة؟؟!

بتختلف عن حياة المدرسة بكون الشخص ناضج أكتر .. واعي اكتر ..

لازم يكون منتبه لالوا وللأشخاص الي بتعامل معهم

حلوة نوعا ما

جو الجامعة اللي بتدرسوا فيها مريح؟؟!

كجو أخلاقي مو مرتاحة بالمرررررررررررررة.. بس الي بحالوا ما حد بئرب عليه
وبضلني محصنة حالي وماما بتدعيلي والله الموفق ..

شو التغيرات اللي صارت معك بعد دخول الجامعة؟؟!

الثقة بالنفس.. الاعتماد على الذات

تغيرات مو كتيرة بس بحس الواحد انو كبر ولازم يعتمد على نفسوا أكتر



الأيام بتمر بسرعة

متل مبارح كنت توجيهي ,, ئربت أخلص السنة الأولى من الجامعة ,, الخميس بتبدا امتحاناتي الفاينل ,,

دعواتكم ^^

[PaLeStiNe FlOwEr]

الذين يشاهدون محتوى الموضوع الآن : 2 ( الأعضاء 2 والزوار 0)
‏PaLeStiNe FlOwEr, ‏الفتاة المشرقة

منورة

أكيد تعبتي بالقراءة

لسة كنت ناوية اكتب اكتر بس اختصرت كتييييييير

بانتظار تعليقك ^^

[الفتاة المشرقة]

ههههه

نورك هذا

صحيح تعبت وانا اقرأ بس حلو كتير اسلوبك

يعني بالتفصيل الممل ههههه بمزح مو ممل


نورتي اختي وربنا يوفقك بحياتك

يلا اختاري حد تاني :)

[*أحلى رتآآج*]

أجوبة رائعة مها..~

الله يوفقك يا رب..~

بانتظآر التالى..


^^^

[هادي]

.. استمتعت مها