نغمة الجوال .. موضة .. ام فوضة ؟؟

[لالا-فلسطين 48]

المشاركة الأصلية كتبت بواسطة دمعة أسى السلام عليكم

موضوع مهم و واقعي

وانا قرات كل المشاركات و الأغلب إنو غير رنة الجوال بعد موقف

طب ليه نستنى الإحراج حتى نغيرها ليه ما نحط شي ما بيحرجنا من الأول

أنا نغمة جوالي أنشودة إسلامية بغيرها من فترة لفترة بس للتغيير مش أكتر
كنت حاطة بلغ عني يا أبتاه و هافيت حاطة أحبائي لكم مني سلام

و عادي وين ما يرن ما بخجل من رنته

و أنا ضد إنو يكون في أغاني برنة الجوال سواء هادي و لا راقي على رأي البعض

بتزكر موقف صار بمحاضرة لدكتور مروان حمد بالجامعة الإسلامية و هاد الدكتور ملتزم كتير يعني شيخ بيعطي دروس بالجوامع و محاضراته بيغلب عليها الطابع الديني مع إنو بيدرس تربية
خصص آخر محاضرة ليحكي معنا عن رمضان و كل القاعة هادية و قاعد بيقرأ آيات قرآنية و أحاديث و الكل منسجم بالجو
أول طاولة رن فيها جوال و رنته أغنية كان فيها حبيبي ضمني و شغلات زي هيك
و صارت البنت ساعة تدور عالجوال
و لون وجه الدكتور تغير لألف لون و تضايق كتير

ليه نعرض أنفسنا لهالإحراج

و بعتقد إنو من الأسباب رفقاء السوء بيصير كل واحد يتفاخر إنو حاطط أجدد أغنية و شغلات زي هيك خاصة عند الشباب بيكون بيحبوا يلفتوا الإنتباه كتير حتى لو بأشياء مو منيحة

و مش دايما بيعكس شخصية الإنسان اللي حامله ممكن يكون بس بيقلد حدا تاني و ممكن بنصيحة صغيرة يغير هالشي

لكن الحق عالأهالي اللي بيعطوا لأولادهم الجولات قبل ما يتأكدوا من إنهم بيستاهلوا يحملوه و لا لأ


مشكور مرة تانية بو جاسم

دمعة أسى..
اسمحيلي بهالمداخلة!

انت حكيتي انك ضد اغاني برنة الجوال سواء هادي او راقي....... وبتفضلي عليهن الاناشيد الاسلامية، بس بتعتقدي انو الموقف اللي زكرتيه بالمحاضرة الدينية، مش كمان رنة الاغاني حتى لو كانت دينية رح تسبب احراج وانا بشوف حتى لو كانت رنة عادية وبدون حكي اصلا رح تحط الواحد بموقف محرج والافضل انو يتقفل التلفون بموقف زي هاد او ينحط صامت (تماما متل الموقف اللي حكا عنو بو جاسم: رن تلفونو وهو بالمسجد يصلي)

ومن وجهة نظري انا مش ضد انو تكون رنة الاغنية بالمرة، بس بحالة وحدة انو الشخص نفسو عرف يلاءم حالو للموقف. متلا بمحاضرة بمسجد مش حلوة تنتسمع رنة التلفون بالمرة شو ما كانت، بمؤسسة عامة الافضل انها ما تكون الرنة صاخبة وملفتة كتييييير للنظر......ز يعني لكل مقام مقال....

وعلى فكرة انا بشوف انو تكون الاغنية راقية هادية الها معنى انسب بكتير من انها تكون اغنية صاخبة وخلع، وكمان انها تكون انشودة دينية او اغنية وطنية اهون بكتييييييييييير واكيد انسب وانسب لو انها تكون بس موسيقى لحالها، يمكن رح تسبب ازعاج اقل للاخرين!!!!!!!

ويمكن رنة تلفون مش هي اللي بتخلي الاهل يقرروا ازا ابنهم بستاهل يحمل تلفون والا لع!!!



بو جاسم.....

حسيتك بتبالغ شوي لما حكيت انو رنة التلفون بتعبر عن صاحبها!
اللي بتحكيه في منو بس مش بكل الحالات، عادة الشباب الي هيك بكونوا متحررين بحطوا اغاني خلع وعكسهم الرومانسيين بحطوا اغاني هادية ورايقة، والملتزمين بحطوا اغاني دينية والوطنيين اغاني وطنية، واللي مش فارقة عندهم هاي الشغلات بحطوا اي رنة بتيجي بايدهم....... بس هاد لا يعني انو بكل الحالات نوع الاغنية بتشبه طباع صاحبها، يمكن واحد بالمرة مش ملتزم يحط اغنية دينية بس لانها عجبتو او لانها جديدة او حتى يكون شخص حدا تاني بختارلو الرنة وهو اساسا مش عارف شو هي رنة تلفونو!

بالزبط متل اختي.... اخوي الازغر ببعتلها من تلفونو كل يوم رنة جديدة وبحطلها اياها وهي مسكينة ما بتعرف انو اللي برن هاد تلفونها من كتر ما بغيرلها رنات. صح انها بترجعها لرنة عادية بس فجأة ما بتشوف والا هي الرنة متغيرة!!!!!


وتحياتي لالكم!!!!!!.....