تقييم الدكتور مرسى ||

[حسام المصرى]

الدكتور محمد مرسى .. اولا منقدرش نحكم عليه لانه لسة ماسك بقاله يومين ..

برغم عدم اقتناعى بيه .. الا أنى لازم أشجعه اكتر لأنى عايز الخير لبلدنا

بس فيه شوية مؤشرات وقرارات صراحة معجبتنيش ..




الصورة على اليمين من فوق لطفل مصرى من 2 مليون طفل ماشيين حافيين فى الشوارع فى الوقت اللى رئيسنا مرسى - اللى عنده وقت كتيير - بيكرم المجرمين والمزورين أمثال فاروق سلطان وبيمنحه أعلى وسام فى مصر من الطبقة الأولى وفى نفس الوقت سايب دهبنا اللى موجود فى جبال دهب السكرى بيتنهب من عصابات طنطاوى وعنان يوميا ( الصورة على اليمين من تحت ) وفى نفس الوقت واقف ياخد صورة مع المجلس الأوطى للقوت المسلحة ويشكرهم على مابذلوه من جهد وقتل ودهس وقنص خيرة شباب مصر وإلقاء جثثهم فى الزبالة ...




كمان موضوع أنه ملهوش صلاحيات ده صراحة مضايقنى .. بس فرحت أنه على الأقل بقى رئيس منتخب ..

المهم من الموضوعات الخطيرة .. ان المجلس العسكرى هو اللى هيعتمد ميزانية السنادى .. وطبعا الميزانية مش متوزعة صح ..

يعنى الحكومة اللى هيختارها مرسى هتشتغل على ميزانية المجلس العسكرى وده طبعا شئ للأسف هيعيق مشروع النهضة .. اللى أنا منتخب الدكتور مرسى عشانه ..

كمان موضوع انه يعمل مؤتمر فى جامعة القاهرة ويتأجل الامتحانات بتاعة الناس .. ليه يعنى .. مفى مليون قاعة مؤتمرات فى مصر .. طبعا طلبة جامعة القاهرة اضايقت ومن حقهم ..

موضوع كمان المنطقة اللى ساكن فيها جايلها محولات كهربا جديدة ومواسر جديدة ورصف طرق وتشجير وحجات كتير ..

كان من الأولى يسكن فى القصر أفضل .. لكن مدام قال أنه هيسكن فى بيته .. كان يسكن زيه زى الناس اللى ساكنة .. واللى المية والنور بيتقطعوا عندهم كل يوم .. ( سيدنا عمر بن الخطاب كان بينام جمب شجرة وملابسه كانت مرقعه ) ..

وناس كتير اضايقت ..


كمان موضوع أن اى حد عايز حاجة ييجى يعتصم أدام القصر .. او المقر الرئاسى ده هيخلى البلد فوضى علطول ..

كمان ال 100 يوم اللى الدكتور مرسى قال انه هيرجع فيهم الأمن ويحل مشكل المرور .. اتوقع ان ال 100 يوم دول مش كافيين .. بس أدينا هنشوف ..

موضوع أن مصر لا توافق على المجازر اللى بتحصل فى سوريا بصراحة حاجة تحرق الدم .. لحد امتى هنفضل نتكلم وبس .. مهو احنا مش موافقين اها بس سكتين .. وشغالين نعمل مؤتمرات قمة عربية ونكلف فيها البلد فلوس وفى الآخر مفيش حاجة ..

أما الإيجابيات ..

موضوع انه مش معترف ببشار الأسد كرئيس ..



والحملات المرورية كترت .... لكن الامن مش موجود جوه الأماكن الشعبية والطرق الصحراوية ..

موضوع أنه راح التحرير ده شئ كويس .. برده معناه أنه لازم يعرف أن احنا اللى جبناه ولو معجبش الشعب هيمشيه .. من التحرير برده ..


خبر زى ده كمان حلو



إنطلاقاً لبدء تنفيذ خطوات من مشروع النهضة بالتعاون مع تركيا .. م/ خيرت الشاطر يوقع على السجل الذهبي عقب لقائه مع وزير الخارجية التركي في سفارة تركيا بالقاهرة اليوم

دى كلها حجات كويسة

أخيرا أنا بتمنى ان الدكتور مرسى يشكل الحكومة صح .. وياريت بلاش ناس من النظام السابق لأننا مش هنعيش فى جو المؤامرة والتخوين من تانى .. مش طالبة .. ياريت الحكومة كانت كلها إخوان ..


وربنا يوفق الريس ويهديه الى الطريق المستقيم

ندا الروح معجب بهذا