سيفتى .. يعنى حوادث ؟؟

[حسام المصرى]

موضوع ال safety أو الأمان .. هو موضوع الدول المتقدمه اهتمت بيه جدا .. حفاظ على الأرواح وفى نفس الوقت لزيادة الإنتاجية ... وفيه قواعد ذهبية للأمن والسلامة المهنية أظن الكل بيعرفها وفيه جهات كتير للرقابة بتدى شهادات عن جودة الأمن والأمان فى المنظمات أو الاماكن المختلفة ..

كنت بتفرج على فيلم وثاائقى تبع سلسلة .. لحظات ما قبل الكارثة .. وهى سلسلة بجد بنصح أى حد يشوفها ويشوف إزاى الناس دى بتستفيد من الكوارث وبتعمل التعديل اللى يقلل الحوادث دى أو يمنعها

لأنه مهما حصل من حماية برده فيه حوادث لازم تحصل ..


فى الفيلم .. طيارة وقعت واتحطمت بسبب أن النظام الهيدروليكى بتاعها واللى بيتحكم فى كل شئ فى الطيارة الدقة والجناحات والمحركات اتعطل لأن المروحة بتاعة المحرك انفجرت .. عشان كان فيه عيب فى تصنيعها ..

المهم الناس مسكتوش وعرفوا سبب الحداث بعد شهرين وحاسبوا المسئولين وطوروا فى محركات الطيارات وأنظمة الأمان اللى تقلل من الحوادث دى ...


نيجى بقى لبلاد العرب ..

كام واحد مات على طريق بسبب أن الطريق ضلمة .. أو فيه تحويلات كتير ومطبات ...

فى المصانع كام واحد مات بسبب أن المكن مش بيتعمل عليه صيانة وفى المستودعات كام واحد مات بسبب حدوث تسريبات للغازات السامة ...

وحجات كتير جدا ..

نفسى أفهم ليه حياة البنى آدم عندنا رخيصة .. إزاى حوادث بتؤدى لوفيات بتحصل .. مع أن بحاجة بسيطة خالص ممكن نتجنبها


ليه الغرب بيستفيد من تأثيرات الحوادث .. وبيعرفوا الأسباب وبيتجنبوا الاخطاء واحنا لا حياة لمن تنادى ويمكن نفس الحادثة فى نفس المكان تتكرر علطول ...

الناس دى وصلت أنها دلوقتى بتحاول تقاوم قوى الطبيعة زى الزلازل وارتفاع منسوب مياة المحيطات بسبب ذوبان الجليد فى القطبين كذلك بتحاول تحط طرق عشان تواجه حركة النيازك أو المكونات الفضائية اللى ممكن تصيب الأرض عام 2012 .. زى ما وكالة ناسا والحسابات الفلكية متوقعة ..

واحنا حتى أتفه الحوادث مش قادرين نحلها ... ولحد امتى هنفضل كده ... ؟؟!!

الواحد بيفتح صفحات الجرايد بيشوف حجات والله تبكى ...

الله ينتقم من اللى كان السبب .. بأخطائه ..