مرحلة ما بعد التخرج .. الله يستر

[حسام المصرى]

كتير مرحلة مهمة وفاصلة فى حياتنا ألا هو مرحلة ما بعد التخرج .. ومعظم الشباب بيعانوا ..


تكون مثلا طالع عينك مصاريف طول السنين وبتتعلم كل ده عشان تدخل جامعة ويبقى معاك مؤهل عالى ينفع تشتغل بي وبيكون طموحك كبير جدا ومتخيل أنك بمجرد ما تتخرج هتلاقى الوظيفة اللى بالدولارات يا معلم ..


وهتعد سنتين تلاتة تجهز نفسك عشان تتجوز بنت الحلال ..

لكن لما تصدم بالواقع هتاخد ضربة قاضية لكل الأحلام دى .. وتكتشف أنه أساسا مفيش شغل خالص وأن ملايين زيك بنفس شهادتك خريجين وانتا ما تفرق عنهم بشئ والدولة ما رح تعينك ..

واللى بيتعينوا اللى بالواسطة بس .. فشد حيلك ودور على واسطة تكون جامدة قبل ما تتخرج ..


وعشان الواحد يحس أنه مميز بعد التخرج بيبتدى بقى مرحلة تانية .. وهى مرحلة الكورسات وياخد كورسات فى كل حاجة وشهادات عشان ال cv بتاعه يكون محترم .. لما يروح يقدم لشركة ..

لكنه برضه بيكتشف أن كل ده ملهوش أى لازمة ...

وبيكون مصيرك القهوة .. قاعد تقرى كل يوم فى صفحة الوظائف تستنى الوظيفة اللى تناسبك ..

والمشكلة أن أى وظيفة تقولك عايزين خبرة 10 سنين .. طب وانتا هتجيبها منين دى فبتبتدى تحبط وتكره حياتك ..

تدور بقى على أى حاجة تنسيك همومك .. تروح تتعاطى مخدرات ولا تسرق أى حاجة تنسيك الواقع ...

ولو عايز تتزوج .. أقل شقة فى أوحش مكان ب 100 ألف .. أو ممكن تقدم على مشروع إسكانا لشباب اللى بتعمله الحكومة وحلنى بقى لما ييجى دورك وتستلم شقه 60 متر يبقى شعرك شاب .. وأدى أحلام الزواج كمان راحت

فيه كمان حلم الهجرة إلى الخارج لو نجحت وربنا وفقك وسافرت دولة أوروبية أو دولة خليجية فانتا يا معلم عديت .. بس برده مش سهلة الحكاية أوى وكم من ناس هاجرت هجرة غير شرعية وغرقت أو تم القبض عليها واترحلت ..


طب الشباب تعمل إيه ..

الدولة بتقولك احنا عندنا اكتفاء من الوظائف .. الحل روحوا اعملوا مشروعات صغيرة .. يعنى افتحلك كشك بيع فيه سجاير أو أى حاجة .. وسبحان الله معاك مثلا بكاليريوس تجارة أو هندسة وتشتغل كده على آخر الزمن ..

هتقولى الشغل مش عيب هقولك وايه اللى يجبرنى أنى أشتغل فى مجال غير مجالى بعد كل السنين دى ؟؟

بصراحة الموضوع ده محير جدا وربنا يكون فى عون الشباب صراحة ومش عارف إيه الحل ..

هل هو عيب فى التعليم أو عيب فى سياسات الدولة او عيب فى الفرد نفسه ..

موضوع يستحق النقاش ( احنا متفائلين .. بس بنحب نحكى النظرة اللى الناس شايفاها والواقع )