شباب فلسطين // بين مصر والجزائر ؟!

[بنت فلسطين المجروحة]

السلام عليكم ورحمة الله وبركاته ..


كيفكم ياطيبيين ؟!

انا هكتب هاالموضوع عالسريع لأني بصراحة ظروفي صعبة و مش راح اقدر اعطي وقت كتير لهالموضوع

فاعذرونا للعجلة ..

//


اول شي خليني احكيلكم شو صار معي

طبعا اكيد عرفتوا الفضايح اللي صارت من وخلال المبارة اللي بين مصر والجزائر

واكيد شفتو انفعال الناس المصريين مع منتخبهم والجزائيين مع منتخبهم

وهادا نوع من التعصب القبلي ،، يعني اشي نوعا ما طبيعي ولو انه خطأ وخطأ كبير

واكيد شفتوا انها وصلت لينعمل مجموعات (الجروبات) اللي عالفيس بوك

جروب نكره الجزائرييين اولاد الفرنسيين

و جروب نكره الفراعنة ولا مش عارفة شو

لسة هادا كله راح نتحمل ونقول من تضخيم الاعلام زادت الحساسية

اما المش معقول

والذي لايصدق

اني اشوف هيك تخلف في شباب فلسطين

انا فعلا انصدمت .. واتمنى هادا يكون بس هان مش عالواقع


انو عفوا انتا فلسطيني تيجي تحكي الجزائريين كسروا رؤوس المصريين

او الجزائريين مابستاهلوا الفوز لانهم بربرييين

انو عفوا ؟؟؟ نعم ؟؟؟ شو في؟؟

يعني تعالوا نحلل سوا :

اللي بحكي مثلا انو الجزائريين كسروا رؤوس المصريين وانهم بستاهلوا القتل ومش عارفة شو

يعني بجد انا لما شفت واحد من الاعضاء هييك حاكي تنحت

انو عفوا ..

1. لما الجزائر غلبت مصر فمبارة .. مباراة ياعالم .. هل معناها انو سبقت المصر فتحرير الاقصى ؟؟

2. قمة التخلف اني اشوف الجزائر كسرت مصر في مبارة لانو عفوا المقياس تافه ..

شوفوا المصرييين الهم الاسبقية في كتير مجالات .. بالعكس ظروف المصريين بشكل عام واليي بعانوه من واقع حكومة مخزية .. طلع منهم مبدعين مش موجودين على مستوى العالم العربي.. والجزائر كمان فيها علماء وعباقرة .. لا نقلل من مكانة اي من الطرفين


فاي نصر انتا او انتي بتحكو عنو ؟؟

واللي بيجي يحطلك سبب خطير ..

انو مش قليل الللي عملوه فغزة ؟؟

هدول اقل مايقال عنهم واعذروني عهالكلمة انه تفكيرهم سطحي ومحدود!!

انو شو دخل هاي بهاي

عفوا ليش الجزائر كانت عدت الجيوش والمساعدات ومصر منعتها عغزة

ماكلهم حكومات وركزوا عحكومات فالهوا سوا ..

ولا هتقولوا انو والله الشعب المصري ماثار عحسني مبارك عشان غزة

ما تطلع عحالك انتا وانتي .. كان الاولى انتا تثور عالبلد اللي انتا عايش فيها عشان بلدك فلسطين

واذا بدنا نحاسب الشعوب عحكامها .. فالاولى نحاسب نفسنا عرئيس دولتنا المصون محمود عباس


//


هادا كلو بغض النظر انو العقلاء مفروض يهدو الوضع بين اخوانهم المصريين والجزائريين مش يزيدوها اشتعالا..

وبغض النظر انو كل هالهبل اللي صار والتعصب والضرب ووو ضد الاسلام..


يااخي عفوا انتا او هييي عشو مبسوطين

انو فازت الجزائر هذا ليش بالانجاز العظيم .. مش تقليل من شان الجزائر ولكن تقليل من شان كرة القدم


ونفس الحال للي كارهين الجزائر

بجد شو هالهبل حد يفهمني ؟؟



واللي عم بحكي هالكلام بدون حساب

ناسيين انو بينا ناس جزائريين ومصرييين من خيرة الناس ولا نزكي على الله أحدا..

عيب عليكم وعلينا كلنا و همي بينكم حاملين همكم تسيؤا الهم هيك ..

وماتحكولي احنا مو قصدنا كلهم ،، لما تعمم فانتا قصدك الكل ..لكن خصص ماحد بقلك انتا غلطان

ياريت يكون الوعي عنا اكبر

وفش داعي لرمي الكلام بدون مانوزنه

وخلونا نرتقي باخلاقنا وافكارنا

واذا اتنافسنا يكون تنافسنا لخير الامة

مش لكرة بتجري واحنا بنلحقها!!


اكيد هالكلام مش صادر من الجميع

لكن نسبة مش بسيطة بدها توعية

وعسى كلامي يكون اله صدى في عقلي وعقولكم



مع تحيتي

بنت فلسطين