هم بيدحك .. وهم بيبكي .. وهمبورچر!!

[هادي]

أول إشي صباح أو مسا الخير
امبارح الصبح (الجمعة) صحيت من النوم مبسوط وفرحان، والسبب إنو صارلي اسبوعين مش مرّوح عالخليل ومش شايف أهلي ولا أصحابي ( واليوم مرَوح) ..
طبعاً أنا كنت بجنين .. طلعت أنا وكمان تنين من جنين ولسه ما لحئنا نطلع من جنين .. وأفنا (حاجر إسرائيلي) .. اجانا جندي عالسياره: "صف عاليمين واطفي الماتور .. وطلع الهويات" .. وساعه ونص وهمه بيفتشو بالسياره!! وبدهم يعرفوا شو كنا نعمل بجنين .. (علشان السياره حامله لوحة تسجيل الخليل) .. وبعد هاللطعه تركونا ..
كملنا الطريق لنابلس .. وفي الطريق عرفنا إنو اليهود خففوا أزمة الحواجز على نابلس (طبعاً حكينا خير وبركه) .. وصلنا نابلس .. صلينا الجمعه .. تغدينا وارتحنا شوي .. بلش صوت زمامير الاسعافات وسيارات الشرطه!! صرنا نسأل شو في؟!!@_@
طلع في حادث في منتزه جمال عبد الناصر .. (القرص الدوار انكسر وسقطوا الأولاد عالأرض!!! وفي إصابات) لا حول ولا قوة إلا بالله....
هلأ كملنا الطريق (إلتفافي نابلس رام الله) .. وصلنا (نزول الكسارات)- هيك اسمو- احنا نازلين والسيارات صافه عالرصيف!! والناس بينادوا علينا !! وقفنا السياره!!! بدنا نعرف شو في؟! طلع في شاحنه نازل زيت ماتورها ومغطي الشارع كلّو!!! اضطرنا نصف مع الصافيين (ساعة ونص) لحتى ما جابو ا نجارة خشب وغطوا الزيت فيها .. ومشينا (شوي شو) لعند ما تعدينا الزيت.. وكملنا طريقنا نحو (وادي النار)-كمان هيك اسمو- وصلنا حاجز (الكونتينر) ـسمي بهذا الاسم نسبة إلى حاوية كان يقف الجنود الصهاينه بجانبها- .. واستنينا (كمان ساعه تقريباً)
كملنا الطريق (طريق تقوع) للخليل .. ولما قربنا للخليل (إسعاف رايحه واسعاف جايه)!!! سألنا: خير يا ناش شو في؟!!!
عرفنا إنو واحد فاتح مطعم جديد في بلدة صوريف، قضاء الخليل (وعامل اليوم افتتاح) ـبوفيه مفتوح- وكل إللي أكلوا عندو تسمموا (خمسه وخمسين حالة تسمم)!!!
إشي بيسم البدن
فتحنا الراديو على إذاعة محلية، وعرفنا إنو ما في حالات خطره (الحمد لله) .. واخيراً وصلنا الخليل
الساعه وحده بعد منتصف الليل .. يعني مضيت يوم كامل في الطريق من جنين للخليل
غير الأخبار (التعيسه) وقطاع الطرق (اليهود) .. ويا سلا عالزحاليء!!

ويلي بتسمعوا عنا تعوا شوفوا أحوالنا