أيـــامـ قد مضــت بالمنتدى .. ذكريــات لا تنســى .. نداء لكل الاعضاء

[اسيرة النجوم]

بدي احكي لكل عضو لساتو ضايل هون بهاد المنتدى

لكل عضو ما اخدتو الحياة بمشاغلها ليبعد عن هالبيت الكبير

اللي جمع كتير ناس وكتييير احباب من دول عربية ما كنا بنظن في يوم انها راح تتلم

من فلسطين مصر الامارات عمان الاردن سوريا العراق الجزائر السعودية المغرب وكتير كتير دول

يمكن بنكون هون بلمتنا اثبتنا للحكومات العربية انو نحنا روح واحدة ممكن نجتمع في اي وقت

ممكن نكوّن صداقات واخوة في الله

لا وممكن ان نرتقي الى حد ان تكون اجسادنا فداء لاي بلد عربي ممكن انو يتمس حرماتو

اتلمينا على كلمة واحدة وهي كلمة الحق كلمة انو الارض لالنا وفلسطين ما بنبيعها لو بكنوز الدنيا

ما راح اطول عليكم انا بدي احكي للاعضاء الجدد قصتنا

وكمان بدي من الاعضاء القدامى يعيشوا معي ذكريات زمان

مو مشان شي

بس مشان اني اورجيهم كيف كنا زمان وكيف بدي يضل المنتدى

يا جماعة قد ما حكيت ما راح اقدر ابلغ لالكم كيف كنا

قصة كيف كنا طويلة كتييير ورائعة كتييير لدرجة انو فيه ناس اتزوجت وراح تخلف وناس راحت من المنتدى للدراسة وابدا ما قدرت تنسى لمتنا الحلوة بهالمنتدى

كنا يا اخواني روح واحدة لا وعيلة واحدة ما بعني انو ما كنا بنتخاصم لكن كنا دغري بنرجع ونهزر

اول شي كانت فيه كتيير مواقف بنعملها مع بعض

كان اذا دخل حدا جديد بالمنتدى بنحاول ما امكن انو نرضيه ونحببو ونجاوب على مواضيع ونعيش احاسيسو بس مشان نكسب اخ جديد يمكن يصير الاغلى

كنا اذا حدا طلب منا خدمة اللي بستطاعتو بيحاول جهدو انو يخدمو

كنا بنحاول نرد على مواضيع بعض وكان عننا اعضاء مميزين ما بنقدر بنوب ما نقرا مواضيعهم

كنا بنعمل مقالب لبعض

ما بقدر انسى ابدا نور اليقين وقسامي غزة وقصة النون حاء سين

لانو قسامي غزة كان بيحكي عن نور اليقين النحس لانو كل ما بتدخل علمنتدى بتفصل عندو الكهربا واكتشفنا انو فعلا بتحصل عننا كمان هههههههههههه اسفه نور

وكمان ما بنسى يوم حطيت للاعضاء صور مضحكة عنهم

كلياتهم تقبلو الموضوع الا سيد الظلام قال بدو يعمل حرب

وانفتحت حرب بين فلسطين والمغرب

قصدي بين سيد الظلام واسيرة النجوم وقامت الدبة نور اليقين كمان واتلمت للحلف تبعي

بس عندو حق هاي الصورة ما حدا بيصبر عليها




وهاي ردو لما انوكس وشاف الواقع المر تبعو في هاي الصورة

يا شماتة الاعداء فيا يا اسيرة هيك اخريتي ههههههههههههههههههههههههه

يسلمو اختي على الصور و الانتقام قريب ههههههههههههههههههه قريب جدا كمان

وفضايح كتيرة صارت في هاد المنتدى

بتذكر في مرة كنت عم بحكي في المسن مع شمس العروبة وصاحبة القلم الحزين وفجاة رحت لميت عليهم الاعضاء في الاهداءات وحكيت انو بيرغوا كتير في المسن فهما لعصبيتهم مني حكوا اسمي الحقيقي بالاهداءات من غير ميحسو رحنا بنجري على حلالة المشاكل المديرة نــانـا ومسحت الاهداءات


وكمان قامت حرب بين الخلايلة والمغاربة لانو اسيرة النجوم سمعت انو الخلايلة بيطلعوا عنهم نكت فكان وللاسف مؤيد وصاحبة القلم الحزين واحلى رورو خلايلة فكانت يوميها الاهداءات هتولع


اما مؤيد وعاشق الحور فما كانو بيخلصو من المجاكرة الحلوة بيناتهم لغاية منحطت عليهم هالصورة



وكتييير كتيييير مقالب عملناها لبعض

وما بنسى الهدايا اللي اهديناها لبعض ومواضيع شتى بيهديها كل واحد مننا لعضو عزيز عليها

زمان يا احباب كان حلو

اتمنيت اول مدخلت بعد الغيبة الاقي اللي كان زمان

بس شفت غير

ما لقيت الحضن الدافئ اللي كان زمان

ما لقيت الاخوة والحب والحنان اللي كانت زمان

لقيت انو كل واحد منكم بيحاول يحط موضوع ويرد عليه وخلاص

كانو هاد الهدف وبس

الهدف اي نعم الاستفادة لكن كمان لازم تحاولو يا اعضاء تعملو جو بالمنتدى مشان اذا دخل حدا جديد يحس حالو بدو يكمل مو يدخل ويطلع تاني

اصدقكم القول بعد ما غبت مدة عن هاد المنتدى صرت بشوف انو المنتدى غريب عني واني صرت غريبه كتير عنو مو مشان انو ما فيه الاعضاء القدامى لا بس لانو بحس انو المنتدى مهجور رغم انو فيه اعضاء

ومن هون ببلغ سلامي للرائعين: نور اليقين صاحبة القلم الحزين لانيا صدى الصمت دموع الرحيل قسامي غزة سيد الظلام عاشق الحور القلب الطيب محب الاقصى شمس العروبة

اللي تركو فيني بصمة رائعة ابدا ما بيمسحها الزمن

واخر قولي يا اعضاء هاي المنتدى امانة برقبة كل واحد فيكم

شيلوه هو بيستاهل كل خير

وارجوكمـ رجعولنا ايام زمان

[أنين]

مش عارفه شو أحكي والله .,

[السيف عدي]

كلامك مزبوط اسيره .. ان شاء الله المنتدى يضل عامر بالخير وبالاعضاء المخلصين ..

[ღ حورية فلسطين ღ]

زمان يا احباب كان حلو

اتمنيت اول مدخلت بعد الغيبة الاقي اللي كان زمان

بس شفت غير

ما لقيت الحضن الدافئ اللي كان زمان

ما لقيت الاخوة والحب والحنان اللي كانت زمان

[حنان16]

ما باعرف شو احكي خيتو

فعلا نفسنا يرجع المنتدى لايام زمان

بس الله بيعين

..

[إسراء الفلسطينية]

فعلا ايام زمان ابدا ما بتنتسى

احلى ايامات والله !

بس للأسف في كتير ،، لهتهم اشغالهم و دراستهم ،، و صار صعب عليهم انهم يدخلوا المنتدى متل قبل :(

و منهم انتي أسيرة ،، اشتقنــالك كتير ،، و اشتقنا لروحك الحلوة بيناتنا

والله ما عارفة شو احكي ،،

بس بحمد الله ،، انو المنتدى لساه موجود ،، و انو ذكريات كل واحد تركنا لساها موجودة

و اكيد ما بتنتسى مهما غابوا !

[.:.!دموع الرحيل!.:.]

أسيـــــــــرة

[مسك الحماس]

روعه

[مؤيد]

ما أحلى المنتدى زمان ....

فترة عام 2006 و 2007 .. هدول أحلى سنوات بتاريخ المنتدى ....

كان عنجد أروع منتدى بشوفو وبشترك فيه ...

وأيام من احلى الأيام وذكريات ولا أجمل ولا أغلى ....

تعرفت فيها على اعضاء وحبيتهم وصرت اتشجع وافوت عشانهم ، كان جو الإخوة مش طبيعي كإنو بين اهل وصحاب ...

كنت رغم انشغالي في الامتحانات ايام الجامعة افوت من كتر ما كنت احب المنتدى والأعضاء ...

لكن ما بعرف ...

هلأ ليش هيك الأمور صارت ...

كتير تركو ورحلو وخلونا وتخلو عنا ...

وهلأ لما نجي نفوت ، ما بنلاقي الجو الحلو اللي أخدوه منا اللي تركونا ...

يعني ما بعرف شو بدي أحكي لأحكي ..

وينهم أعضاء زمان ، عنجد شو اشتقت لهديك الأيام ...

والكل بينشغل ايامها كان ، بس الحب للمنتدى والأعضاء بخليه يفوت ، فالامتحانات ومشاغل الحياة كانت موجودة زمان ، فهي مش سبب ولا مبرر لترك المنتدى والابتعاد عنه ، بس شو نعمل هم تركونا وابتعدوا عنا ....

وهيني انا التاني يا دوب بفوت المنتدى كل فترة وفترة ....

ما بعرف كل شي تغير ...

يا ريت ترجع أيام زمان ، مع انو صعب ....

يسلمو كتير اسيرة النجوم ...

وبوجه كل التحية لكل عضو وعضوة عرفتهم وبالأخص الأعضاء اللي كانو زمان ، شو مشتاقلهم ....

[رأفت]

كلامك صحيح

المنتدى زمان كان غير هيك كان في نشاط و حركة و حياة

في اعضاء كثير حافظو على نشاطهم و الهم فضل كثير كبير على المنتدى

ما بدي اذكر اسماء حتى ما انسى احط حد و يزعل ... هم بعرفو حالهم

و الله يعطيهم العافية ...

انشاء الله رح ترجع هديك الايام و نعود متل زمان و احسن

و انتي يا اسيرة لا تضلي تغيبي و تطولي بغيبتك ...

تحياتي للجميع ...