شباب فلسطين

.!. وردة الأقصى .!. · 06-24-2008, 05:19 AM

بسم الله الرحمن الرحيم

السلام عليكم ورحمة الله وبركاته

صبآح // مسآء ===> الخيرآت ,,..,,

ويا أهلآ وسهلآ فيكم جميعآ ،،،

بصرآحه. الفكرة أعجبتني كتييييييييير وحبيت أنقلهآ إلكم

][®][^][®][مــــــآيــــك المــنــتــدى][®][^][®][

لكــــــل عضو .. صوت .. لابد أن يـُـــــــــسمع ..

ونحــــن كأخوة .. هنا ..

من واجبنا .. أن نستمع لبعضنا ..!

* ومن هذا المنطلـــق *

برزت فكـرة " مايـــك المنتدى "..

لذا .. سيحــق .. _ في كل أسبوع _ لعضوين ..

بمعــدل .. ثلاث أيام لكل عضو ..

أن يتملك المايك .. ويفصح من خلاله .. عما يريد قوله ..!

مثلا ..

شو عملت اليوم من أول ماصيحت لحد مانمت

شو الاشياء اللي مابتحبها بالمنتدى

بيئدر العضو اللي معه المايك أنه يمثل بلده كمان

يجيب صور عن بلده ويشرحلنا عن عاداتهم وتقاليدهم

بحب يسمع لمين ؟؟؟

وكمان بيقدر يغني أو ينشد على المايك

يعني من الأخر يعتبر حاله ئدام الجمهور وهوا عم يحكي عن حاله وعن حياته

][][§¤°^°¤§][][قواعـــــــد المايك][][§¤°^°¤§][][

) للعضـــــــو * صاحب المايك* :

لك أن تقول ما يحلو لك .. ( مقال .. خاطرة .. قصيدة .. تعرف بذاتك ) ..

ولك أن تجمعهم كلـــــــهم ..

,
,

فشعارنا هنا ..

(( مـــــــــن قــــدك .. المـــايـــــــك بيـــــــــــــــــــدك )) ..!!!

وسيتم منع جميع المشاركات .. وحذفها .. قبل أن يفصح العضو الممسك بالمايك .. بذلك ..

" يعني .. ممنوع أي أحــد يرد .. على الموضوع .. قبل مايقول

العضو اللي معه المايك ..

* (( انتهيت )) .. والآن المجال لكم أيها الأعضاء * "

وذلك لإعطاء حرية أكبر .. للعضو .. في قول مايريد وبدون بلبلة .. أو " دوشه " ..

2) للأعضاء ..

عندما تقرأون هذه العبارة " انتهيت .. والآن المجال لكم أيها الأعضاء "

هنا فقط .. بامكانكم .. الرد ..

وذلك بإبداء .. رأيك .. بالعضو نفسه .. !

" شو مكانة هالعضو .. بالنسبة للمنتدى .. ولك .. وإذا بخاطرك شي

عليه ئولو .. وإذا بئلبك شي إلو .. كمان ئولو " وهكذا .. إلخ ..

أو بإبداء رأيك بما طرحه .. عبـــر المايك نفسه ..!

|--*¨®¨*--|مــــــــــــــلاحظة|--*¨®¨*--|

الأسئلـــــــــــــة .. ممنووووووعة منعا باتا ..

واي سؤال سيحذف .. لأنها فكرة مستهلكة .. بالإضافة ..إلى أنها ترهق ..

العضو نفسه .. وذلك بوجوب الإجابه عليها ..

الموضوع بين أيديكم الآن ..

ونبـــــــــدء بالاختيــــــأأر .. وقد تم اختيار ... عضـــو مميز..

اليوم ضيفنا يمتاز بقلمه الراقي ..

مدير تألق في سماء قلعة شباب فلسطين

عزف لنا بكلماته العذبة لتضيء بعذوبة حرفه ظلمة الليل ..

كان عنوان التميز منذ حظوره حتى تواجده في هذه الحظات ..

مدير معروف بحسن خلقه وتعامله مع الأعضاء ...

ضيفنا ..كبير في أدبه . في تواضعه .

عندما يكتب نرى الفنون والجمال الذي تخطه انامله.

ضيفنا لهذا الأسبوع مديرنا الرائع:

مــــــــــــحـــــــــــــــمـــــ ــــــــود

المأأيك بيدك......من ئـــدك ....

تفضل...

محمود · 06-25-2008, 11:19 PM

..{ الــسلام عليكــم ورحمـــة والله وبركاته } ..

الحمد لله والصلاة والسلام على أشرف الخلق ( محمد ) صلى الله عليه وسلم ،،

وسأبدها بآيات عطرة من الذكر الكريم ،، [سورة الفاتحــة ]

......،،.....

بِسْمِ اللّهِ الرَّحْمـَنِ الرَّحِيمِ

الْحَمْدُ للّهِ رَبِّ الْعَالَمِينَ

الرَّحْمـنِ الرَّحِيمِ

مَـالِكِ يَوْمِ الدِّينِ

إِيَّاكَ نَعْبُدُ وإِيَّاكَ نَسْتَعِينُ

اهدِنَــــا الصِّرَاطَ المُستَقِيمَ

صِرَاطَ الَّذِينَ أَنعَمتَ عَلَيهِمْ غَيرِ المَغضُوبِ عَلَيهِمْ وَلاَ الضَّالِّينَ

......،،.....

[ صدق الله العظيم ]

محمود · 06-25-2008, 11:46 PM

أختي العزيزة ،،

{ وردة الأقصى }

أسعدني أن ألبــي دعوتكـ لي لهذا الموضـــوع ،،

التي هيي شرف عظيم ، أن أكون بينكم للحظات ،،

أسرد بدها بعض حكايا حب ،، لم يتنسى له أن يخرج من سجــني ,,

فكنــت أنا السجان ،، فتحداني .. وهــا هو اليوم ينتــصر عليي ,,

قادرا ً أن يشفي غليل له في فرصـــة أحقتــه إياهــا { وردة الأقصى } ليخرج من ظلامـ حبســـته الأيـــام في ضيـــاع ،،

وردة الأقصـــى ،،

بدايـــة ،،

أختي العزيزة ، لقد سردتي بعض الكلمات الجميلــة في مجاملتي ..

فكان هذا من جزيل كرمك ،، فطابت الدنيا وكرمت لك أغلى ما فيهــا ..

.. أعتذر عن تقصيري { في منتدى شباب فلسطين } ..

فلم يكون هذا بخاطري ،، لكنــه من أجلـــكم ..

فرصــة غيابي تعزيز لمكانــة شباب فلسطين ، فإن كان الغياب مرحليــا ً ..

كـان من وراءه السعي في ديمومــة هذا المكان بأحسن صورة لكــم ,,

ووجودكم هنـــا ،، { إدارة ، ومشرفين ، و أعضاء } ، يعني وجودي || فأنتم حياتي و أحلى ما فيها ..

فــروحي دائمــا ً معـــكم و أينمــا كنتم ، أنا معكم ,,

[ و أعتذر إن كنت قد قسوت على أحدكـم ،، أو قد أخطأت في حق أحدكم ،، والله ما من وراء القصد الا الصلاح ]

.. { وسنبدأ الروايـــة } ..

محمود · 06-26-2008, 12:03 AM

.. من هون بلشنــا ..

في البداية يا اخوتي | أنا هنــا عضو مثلي مثل أي عضو ثاني |

بعض الصلاحيــات الزيادة ما بتعني إني أحسن من أي واحد فيكم ..

بالعكس الصلاحيات بدونكم لا شئ ،، والادارة بدون أعضاء كمان لا شئ ..

ومنتدى بدون إدارة بمشي .. لكن كيف بمشي هالشي بكون عنـوانه الأعضاء ..

المشكلة انو لو الشخص بضمن انو كل الناس مناح ،، لو ما ساوينا صلاحيات

للمواقع و ما كان فيه مدير وعضو ومشرف ، رح تلاقيهم كلهم بصبو في قربــة وحدة ..

وكلهـم نفس الشئ ،، ما فيه حظر ولا حذف ولا اغلاق ..

لأنو كل شئ رح يكون سليم ،، بسلامة قلوب الأعضاء ..

من الآخر | الإدارة مش الكم ، الإدارة لمنع التجاوزات فقط ..

وصح اني كنت بعيد عندكم شوية ^_^ ، أو بالأحرى قليل ما أرد ع مواضيعكم ..

بس كنت متابع كل خطواتكم ..

بعرف انو بهالفترة كانت شغلتي ( إدارة فقط )

من هــون صارت الحواجز بينا وبين الأعضاء .{ مع الأسف طبعا ً }. وانخلقت الفجوة الكبيرة بيناتنا ..

لكــن غصب عني (: ،، كثــرة الإلتزامات الحاليــة بتساوي أكثر من هيك ..

ورح احكيهــا في حديثي في هالمجلس إن شاء الله ..

لكن يعلم ربي إني ما قصدت إني أتعالى على أي شخص //

المشكلة انو الي برتكب الخطــأ صعب أنو يشوف حالــه غلطان الا لما حدا ينبهـه عليهــا ،،

الهيك المشرفين والادارة بكون عندهم درايـــة أكبر بهالمـوضوع وهالإلتزام ،،

بسبب خلطتهم بأكثر من عضو بنفس الوقت

وبسبب اطلاعهم على الأخطاء وبإنهم معنيين بتصليح الخطأ ،، لهيك بتلاقي وجهـة نظر المشرف غالبا ً ما تكون

سليمــة ،، فيا اخواني ما حدا يزعل من حدا لما تم عملية إدارة لموضوعه ،، في النهاية كله بجري لمصلحة المنتدى ،،

الي هيي من مصلحتنا جميعا ً ..

هههههههههههه ،، بعرف رح تقولو ،، قال عضو قال واله ساعه بكتب عن الإدارة وفتح النا المايك

خدمة اجمتاعية ،،

آسف طبعا ً بس خلصنا :] من الإدارة ،،

ويتبــع } } ..

محمود · 06-26-2008, 12:36 AM

.. { حياتي الشخصيــة } ..

إسمي الكل عارفــه : محمــود ،،

انولدت في عيادة جباليـــا ( المعسكر ) : والي ما بعرفها بقولكم جنب مركز اليهود القديم ..

تاريــخ الميلاد : 11/12/1987 ،،

وياريت يتم الربط ..

مكان الولادة + تاريخ الميلاد ..

..{ مخيم جباليا + مركز يهود + الإنتفاضة }..

مخيم جباليا : أول من أشعل شعلة الإنتفاضة بإستشهاد : حاتم السيسي ..

مركز اليهود : يعني مكان خطر هههههههه ،،

يعني كان يوم ميلادي في أصعب الأيام الي تمر على الشعب الفلسطيني ..

بس كانت أيام أمجـــاد اله ، وبدايــة عصر جديد لفلسطين بتاريخ عريق ..

بعد بـ ثلاث أيام ( ع السنة ) إنطلــقت { حركــة المقاومة الإسلامية حماس } ,,

أنا بفتخــر إني إنولدت بأيام عظيمــة على الشعب الفلسطيني ، وبأيام لليوم الكل برفع راســه لما يذكرها ..

على العمــوم ،،

كانت الدنيا ×(منع تجول ): = طوق ،،

طبعا ً والدي الله يخليلنا اياه ،، قبل ما يبلش الطوق كان راح يزور عمتــه ..

وسكرت الدنيــا هههههههه ،، و إمي صارت بدها ( تجيب محمود ) ،،

وما فيه مكان والدنيا طوق الا عيادة جباليــا ، والدنيا أشبه بحرب ..

المهمـ مع صوت نداء الرحمن في صلاة الجمعــة ،، بعدها بدقايق ..

{ محمود يبصر النور و لأول مرة } ^_^ ،،

والحمد لله ، إني انولدت بمكــان مثل هالعيــادة (: ،، وبهيك أوضاع ..

طبعا ً ( ستي ) الي هيي ( مرت سيدي ) طبعا ً ولا مرة حكتلها ( مرت سيدي ) دايما ً بقولها ستي ..

كانتـ بتشتغــل في العيادة ،، راحتـ تتصل في البيت ،،

يا ويلي .. فيش مجــال .. إنولد صبي ..

سيدي طار من الفرحــة ،، و أبويا لسا ما رجع ,,

والطوق شغــال ،، اتصلو في أبويا ..

ألــو : السلام عليكم ..

عليكم السلام ..

إم محمد جابت ولد ..

عنجد ، الحمد لله ..

ألف مبروك يا إبني ..

الله يبارك فيك يا والدي ..

بدنا نسميه يا ولدي ..

سميه محمود | و إنشاء الله بتكون هالأيام محمودة من رب العالمين ..

يا ولدي وكيف رح تيجي وتشوفه ..

والدي : اللي من الله يا محلاه ، وضع البلد صعب والله يجمعنا فيه بأقرب وقت ..

تووت تووت ،، فصل الخط ..

وبهيك سموني محمود ،، وبنفس الوقت ..

سيدي عندو انتمــاء كبير للعيلــة ، وكذلك والدي ..

فكانــو يسمونا على إسماء أجدادنا الأفاضل ..

فكان إسمي مطابق لإسم الحاج { محمود خليل } ،، ههههه طبعا ً ما حدا بيعرفه ..

المهم مرت الإيام .. و أنا في البيت ..

صار عمري أسبوعين .. ووالدي ما شافني بعده ..

ولعت الدنيا في معسكر جباليــــا .. ووالدي انحرق بده يشوف ابنــه ..

إمي خافت عليي ،، راحتـ ع عند بيت أهلها ما كان هنــاك أحداث ( في الشيخ رضوان ) ،،

وسكنـــا هنــاك فترة .. ولسا بعده والدي ما شافني ..

المهم انفرجت الأزمـــة شوية ،، والدي قدر يطلــع من هالطوق والناس اتبحبحت شوية ^_^

وآخيرا ً ،، شافني ههههههههه ،، يا ويلي عليي كثير اتأثرت ..

طبعا ً والحمد لله ،، والدي كان مشتاق يشوفني وأنا صغير ..

ولليوم هالشوق عماله بعوضني اياه ،، وبحبنــي أكثر واحد لليوم ..

ورضــاه فتح عليي أبواب الخير والحمد لله ،،

نيجي ( للشيخ رضوان ) ،، المهم يا اخوتي ..

كنا عند دار خالي زي ما قلــت ،، ^_^

مرت خالي برده كانت بدها تجيب ولد ،

بعد ما شافتني ، أصرت على تسمي إبنها على إسمي ..

{ محمود } -- > طبعـا ً أنا انولدت ناصح ،، وأبيض ، وعيوني زرق .. { كنت حلو زمان ، على عكس هالإيام } ،،

ههههههههههههههه ،، وطبعا ً سمتـه ،، وهالـ محمود هداك الله يحميــه ،، كثير بحبو ..

والحمد لله ، لليوم هيني عايش في هالمكــان الحلو ، الي إسمو { معسكر جباليـا } ..

يتبع .. }}

محمود · 06-26-2008, 01:21 AM

.. { كبرت شوية } ..

وكبرت الهمــوم ، ( بس عمري ما حسيت فيهـا ) ,,

رح أحكيلم قصـــة استشهــاد ( إبن عمي ) ،،

كان عمري 5 سنــوات ..

كان عمره 10 سنين ..

بيــوم من الأيــام .. كنـت بلعب في الحــارة ..

عند دار جيرانا ،، أجــا إبن عمي ، لأنا ناديتــه ..

وقتهــا كان معي كم من سلــك .. ( من سلاك البناء ) ،،

كان تفكيري بهداك الوقت ،، { إني أساوي نظارة } ..

رحت لفيت في الشارع .. ولقيت هالسلك ..

إطع يا ولد في هالسلك ،، وزبطــه ،، واعمـل من هون دويرة ..

ومن هون دويرة .. ووصل مع بعض ،، وصارت نظارة بدون العدسات ..

هلا ، ما عجبتني الفكرة ..

رحت جبت جزايز الكولا ،، واكسرها هههههههه مشان أخد قاعها ..

لأنو مدور ،، وبنفع يكون عدسة .. المهم يعني كنت صغير شو خمس سنوات ..

وجبت مسمار .. كل ما أحاول اعمل ثقب فيهـا ،، تنكسر القزازة ..

ازهقت وانا بكسر ومليت دار جيرانا ،، اقزاز ^_^ ،،

اخر شي مر عليي إبن عمي هاد الشهيد .. بآخر لحظاته معي ..

نديته يساعدني ،، المهم الثاني ما كان خياب حليت اله الفكرة وقعد يجرب معي ..

ما زبطتت وما كانت روحه طويله ،، ههههههههههه بعد ما كسرنا اقزاز الدنيا ..

وطبعا ً دار جيرانا ما كانت بعدها مسكونه لهيك ما كنا خايفين وفي آمان بنفس الوقت

يعني ما حدا رح ينط ويزعق علينا ..

ابن عمي مشي ورح يجيب الطبق تبعــه ، ( الطائرة الورقية ) ،، كان شاطر في عملهم ..

المهم ، امه كانت شاريه اله بنطلون جديد ،، حكالها يما ليش اشتريتلي .. عادي باخد من البناطيل

الي زغروا عن أخوي الي أكبر مني ،، بس امه حكتله حقك مش ناقص ،، وقتها كانت طالعه موضعه

البناطيل الي عليهم ( علم فلسطين ) وكان آخر بنطلون يلبسه ،، واستشهد فيه ..

سحبـ الطبق وطلع على الساحــة طبعا ً أنا من هنــاك بشوفه ..

برده انا كمان زهقت اعملت نظارة بدون اقزاز ، بعدين رميتها ههههههههه ،،

ابن عمي مسك هالطبق ،، طير ^^ ،،

أجت قوات الاحتلال .. طخت طلق واحد ..خفت ..

وما اعرفت شو صار ،،

إبن عمي اتصاوب في راسه ،،

اخته الزغيرة كانت معاه ،،

و أخوي الازغر مني كمان ..

اجيت أشوف شو صار ..

لقيت بنت عمي واخوي بجروا ..

بقولولي عزت انطخ ..

الي صار انو حاولت اخد أخوي و بنت عمي ع البيت ..

رحت سحبتهم معي وقعدت ألف فيهم من بين الشوارع بعين عن قوات الاحتلال ..

واخدتهم ع شارع زغير بين دارنا و دار جيرانا الثانين .. ونطينا ع البيت وصرنا في آمان ..

وطلعنا نبلغ الأهل بالي صار ..

ابن عمي عزت اصابته خطيره ..

استشهد بســاحة مسجد الخلفاء الحالية ..

المهم ودوه ع المستشفى .. موت سريري ..

نقلوه ع اسرائيل (فلسطين المحتلة ) ..

وبعد ثلاث أيام استشهد ...

في فترة الموت السريري .. أجت قوات الإحتلال ع البيت ..

حكو مع والدي .. انهم بدهم ياخدوا بعض الأعضاء من جسمـو ..

مشان تكون أعضاء لناس ثانين ..

كان رد والدي عليهم ..

قتلتوه وبدكم تاخدوا أعضاء جسمــو ،، ما حدا يمسكــه ..

طبعا ً التبرع بالأعضاء بده وراق واجراءات لهيك أجو ياخدو الإزن ..

المهم : الحمد لله ما صار شي وما أخدوا منه شي ..

استشهد ابن عمي .. بظرف استشهاده ..

قلب امه انقبض .. صارت تحكي ابني استشهد ابني استشهد ،،

مع العلم انو ابن عمي كان في مستشفيات اسرائيل وامه في البيت ، لكن سبحان الله حست فيه ..

واستشهد ابن عمي ،، (: ، طبعا ً كان ساكن معنا في البيت ..

كان وقتها منع تجول ، و بدهم يمنـعوا اقامة محل العزاء .. لكن بالعافية لقبلو و لمدة ثلاث أيام ..

وكــان عزاه .. في مراسم الدفن ..

نزلـــوه في القبر ،، دفنــوه .. الشيخ الي نزله في القبر ،،

طلع يكبر ويقول نور اللهم صلي على سيدنا محمد وجهه فيه نور ..

وفاحت رائحــة المسك ،، كل الحاضرين بدأو في التكبير .. الي ساكنين جنب المقبرة شمــو ريحــة هالكرامــة

للطفل الي عمره ( 10 سنوات ) ،، ولليــوم ، كثيــر من الناس الي شهدوا .. بحكولي عن هالقصــة ..

ورح آجي أنا بدوري مع قصة الشهادة ..

بيوم ما استشهد ابن عمي ( عزت ) نفســه ..

أجاني في المنام .. ولليوم هالحلم ما يروح عن بالي ,,

عزت ملفوف بكفن أبيض كله نور ، كان على نعش طاير ..

وقتهـا شفت الرسول ( صلى الله عليه وسلم ) كان يحكي مع عمي بنفس المكان مع النعش الطاير ..

طبعا ً كان الرسول متربع ،، ولابس أبيض .. وبرده بشع نور ..

بعد فترة حكيت هالحلم للأهل وكانت بشرى خير ..

و يتبــع .. }}

محمود · 06-26-2008, 01:47 AM

^_^

{ الأنشودة من نشو }

محمود · 06-27-2008, 11:32 PM

{ قبل ما آنسى }

هي رجعتي للبحــر ^_^ ، وهادي قصتي لليوم :D

كنــت زهقــــــــان ،، فاقترحت إنو نروح ع البحــر :}

طبــعا ً قبل صلاة الجمعــة كانـو عمامي جايين عنــا ع البيــت ..

فرحـت حكتلهمـ شو رايكــو تيجــو معنــا ،،

فإطلعنــا ،، وانبسطنــا ،،

بس شوفو بالله الي صار ^_^

هلقيــت أنا حضرت أواعي السباحـة ،، وأعطيتهم للوالدة تحطهم معها ..

ويا خوي ،، رحنــا ع البحــر ،، صرت بدي أسبح ..

وين الأواعي ،، فش فش | هههههههههه

ادايقت كثير ،، وجابولي البديل ، يعني كان معهم زيادة ..

انا فش إمكانيــة خلص ما فيش مجال الا انو أجيب الأوعي همــا ..

رحت اركبــت راسي و سقــت السيارة ( بنزين ) ههههههههه الي ما بعرف

شو يعني بنزين عنا ،، يعني مش حاسس بمعاناتنا ،،، فش وقود بالبلد كلها :C

واجيت بدي أمشي ،، أجو عليي ، ما فيه تعال للوالد ..

قلي خد أواعي السباحة تعيته و أنو هوي ما بده يسبح !!

ركبت بمخي ،، فيش مجال الا انو اروح ع البيت .. { المسافة بعيدة }

ما علينــا رجعت أخدتها وسقتهــا ورحت ع البيت ..

دور يا ولد عليهم .. ما لقيتهم ..

اطلع انزل ما لقيتهم ،، اختفـــــــوا ،،

انجلطتت بزيادة .. وادايقت ..

المهم رحت جبت شرط و أواعي عادية ..

ورحت اشتريت كم من بطيخــة :} يعني نكسب الطلعــة ،،

لقيت ابن عمي الي ما طلع معنا لحالو في البيت عنا ..

رحت حكتله تعال ، سبحان الله كأنه ضياع الأواعي ..

مشان يجيي معنا وينبسط ع البحر ..

واطلعنـــا هلقيـــت هههههههههه ،، رحت ع البحر ..

شلحــت النظارة { ويا شمس مين بيعرفك ،، ولا شايف حاجــة }

هههههههههه الشكل العام مغبش .. معمول اله فلتر بلور ع الفوتشوب ..

أنا من النوع ،، إنسى لازم أكون الأول .. فلما أسبح ..

وين أبعد شخص بكون واصل ،، لازم أسبقـــه و أرجع ..

بالصدفة مين كانو أبعد اثنين ،، أخوي و إبن عمي ..

ويا حلاوتك بفكروني لاحقكهم هههههه مش عارفيني انو مش شايف ملامح بنآدمين ..

كل الي شايفهم انو في اثنين بعاد وخلص ومش عارف انهم هما ..

وسبحنــا معهم واطلعت عنهمـ شوية ،، سبقتهم يعني ..

المهم كانو في ناس على حسكــة ( سفينة صغيرة ) هلا لازم نسبقهم ^_^ بعد ما قعدنا معهم

قعدت مرتبة بالحكي ،، واسبح يا ولد واسبق وصرت قالطهم بمسافة كبيرة ..

وما بلاقي حالي الا بين كوم قناديل هههههههههههههه المهم وصل ابن عمي ( 15 سنة ) و أخوي

ع المكان الي انا فيه ، وأنا مش شايف النظارة يعني انسا غرامك القنديل ما بشوفه الا لما يلزق فيي لكن ربنا سلم ..

لهوي أخوي بصرخ هههههههه لطشو قنديل ( وأنا بكتب في الرد أجاني أحطله مرهم حروق ،،

القنديل يا ويلي لاسع ايديه كإنها حرق كبير )،، وابن عمي خاف وانا قلت بدنا نقدم شوية ،،

بس هلا خلص ،، الله يعينا ع الرجعــة ، دخول البحر مش زي الخروج منه ،، فاسبح ..

المهم انا أخدتها سباحة حرة وهما كذالك ،، أنا كنت سابقهم جوا ، في الرجعــة أكيد هما رح يكونو قدامي ..

وضليت أسبح حسيت حالي انهلكت ،، هههههههههه بس تنحت لازم أسبقهم بمسافة بعيدة و أبعد عنهم

مشان وقتها أسبح سباحة عادية و أنا متريح ،، المهم انقطع نفسي في السباحــة بعد ما صارت بيني وبينهم

مسافــة كبيرة ..بديت أسبح عادي المهم اطلعنا ع الشط ، ابن عمي الي كان يسبح معنا بقول كنت تخوفوني من القناديل

وقرصكم ما قرصني هههههههههه ، بعد شوية نزل المية طلع مبهدل قنديل قارصه من تمه هههههههه

بقوله اتريحت هيك !! ،،

وبعدها لقيت ابن عمي الصغير الثاني بساوي بخريطة فلسطين

بالرمل ،، كل شوية اجي واقوله ,, هي دارنا ،، هي القدس وآخد كاسة رمل من المكان الي بأشر عليه

ههههههههه يروح يسكر المكان عبيل ما جننته ،،

رحت مسكت ابن آخوه الصغير عمره 3 سنوات ،، بقوله يا وسام تعال نسبح مع بعض .. بقولي بخاف بموت بعدين ..

ههههههههههه ما ألزه ،، حكتله تعال ومسكته ودخلته في الميا غصب عنه و يا ولد لا انتا وسام ولا انتا بتصرخ ..

كنت لابس النظارة لقيتها نزلت في المية .. انا حامله ولا ادور ع النظارة ههههههههههههه ..

رحت مسكت أنفه وقولت اله سكر عينيك وهوي بصرخ ،، بقولي بديش بديش ,, رحت غصب من عنه ..

وغطسته بالمي هههههههههه وطلت النظارة بعد عناء طويل ,, كسب حمام مرتب ،،

بس يالله شو المنظر بضحك .. طلعته من الميا ،بعد شوية لقيته بطاوش مع حمار بياكل بطيخ عماله ههههه ،،

رحت حطيته ع ظهر الحمار ويا ويلي الحمار يقعد يرفس وهداك التمس ههههههههه بطل يطاوش بالمرة

هرب يكمل خريطة فلسطين مع عمــه ،، وكان يوم حافل رهيب جدا ً وببسط الحمد لله ،،

ما فيش فيه نكد الا قصة الـ الأواعي الي اختفوا فجأة ،، بس الحمد لله كانت أول الطلعه وجبت البديل ..

وكان شي مرتب للأمانه اشتهيتكم معي ،،

وبس خلص ، حبيت احكي عن طلعـة اليوم وبس p; ،، ههههههه فيه كثير تفاصيل ..

بس هيك بكفي مشان ما أكون برام كثير :}

.. يتبــع بقصــة قديمـــة ..}

محمود · 06-30-2008, 05:06 PM

..{ قصة حب }..

بالأول أنا مبسوط جدا ً ،، لأنو طلاب توجيهي خلصــو ، وهلقيت أعتبار أنا خلصت امتحانات ..

صح ما بقدم توجيهي ،، لكنه هم عليي ..

نرجع لقصــة الحب ..

هذا المكــان كثير حبيــته ،، الي اسمــو شباب فلسطين .. وحبيت أعضاؤه ..

رح أحكي الـكم قصــتي معــه .. وكيف اتعــرفت عليـــه وكيف صرت مديره ^_* ،،

طبـعا ً بيوم من الأيام .. كنت ماشي بغــابة كبيرة .. بنصهــا كهف ..

كان جوا الكهــف وحش مفترس ،، عماله برعبـ بكل سكان الغــابة ..

وخايفيـــن ،، صدفــة و أنا بكتشف المخــاطر .. لقيــت الكهــف ..

دخلـــته ،، لقيــت شخص بنادي ، بقول يا فــلان ،، ما تدخــل ،، فيــه خطر !!

الوحش بياكلك ،، كان الصوت من جوا الكهــف ،، ما رديــت عليـــه .. اتوترت ..

شدني الفضــول لأعرف ،، مين هالشخص الي بناجي ، وبنفس الوقت ما بده اياني أوقع بالخطـر ..

صوته و أنينــه بحكي انو انسان مجروح ،، وقوة صرختــه بتقول أنا خايف عليك يا إبني ..

دخلــت الكهـف وقعدت أتبع مصدر الصوت .. أمشي و أتحـــرك .. لقيــت حالي في مكان مظلم كبير ..

فجأة وقعت بحفرة .. انكســرت رجليــ ،، ما قدرت أتحرك .. ما يئست .. الأمل زاد وكبير ،،

الطموح صار عظيم .. صار لازم أصل لمكان هالشخص .. زخفت و زحــفت عبيل ما لقيـــت مدخــل

{ باب } فتـــه .. لقيــت شخص مأسور .. عاري الثياب .. بقفص كبيــر ..

من شدة تأثيري بجمال هالشخص و لهفتي لحنينــه ، وقفت ع رجلي ..

وجريـــت عليـــه ،، حاولت أفك أسره .. ما قدرت .. حكالي .. يا غالي .. ما تحاول تنقذني ،،

انجــو بحياتك ،، أهرب من هالمكان .. الوحش بعد شوية برجع ..

حكتلــه { أخي َ أنت مسلم ٌ ومــوتي فداك شهادة } ،،

قلي ايش اسمك ..

حكتله محمود عبد الله الفقيــر ..

قال يا محمود | اترك الي بايديك .. وشوف عيشك ورزق ولادك ..

حكتله عزابي يا عم ،، والزواج مو سبيلي ,, فقير وقلبي بين ايدي .. جاي بشهامة رجل .. وعنك ما أتخلــى ..

قلي يا محمود، الغلابة محتاجينك .. أكثر من أي يوم قبل .. ابني ديارك وعمر أثارك ولا تندم على لحظة تتركني فيها ..

حكتله يا عم | وحش في هالدنيا ماله وجود قلبي فداك موجود فدا الوطن غالي وحبي اله مالو حدود ..

الدنيا أصيلة محتاجة أرض أصيلــة ما عليها وحوش ..

اسمعنــا صوت همــة ،، وهمهمة الوحش جايــة من بعيد ..

قلي الله يرضى عليك .. اترك الي بين ايديك .. واهرب الوحش مارح يخليك ..

قلتله لله وكلها .. حب الله بنى رجال و غير محمود ألوف تبني وطن عزته وكرامته معه ..

ان ما عشت يا عمي بكرامــة وما قاتلت بكرامــة عمره ما يكونلك وجود ..

ساعدني نقتل هالوحش .. ونخلصلك من بين ايديه .. هالحب الي بينا ما رح يأسره وحش مردود ..

قلي عنادك ،، قلتله ثقتي فيك أكبر وحبي فيك بزيد .. يلا ايدي بايديك نكسر قيدك يا حبيبي ما لي غيرك ..

ندق بحجر ، نكسر صفد ،، ما خلينا للأسر مكان .. أجا الوحش ,, قال مين بيتعدى ..

شاف نظرات فيها أمل فيها غضب ضد طغيان .. شرارة تقدح ،، فيها حب فيها وطن ..

قال يا ويلي أجا الي ما يخاف من ذلك يا غول .. أجت العزة والكرامــة .. مالي مكان بينكم ..

كنت بس مستقوي عليكم ،، الجبان بينا ما ينام .. قال الوحش .. ماني بوحش بقدرتكم ..

ولا فيه وحش يكسر أمل .. أمل اسمه حب الوطن .. اسمه حب الوطن ..

أختارلي مكان .. أبني فيه كهف وجورة أخبي فيها وطن مذولول ,, أكبر شان طاغي كبير ..

بقوة عميان .. ويلا سلام ..

وعاشت الدنيا بأمان .. يا محمود هده قصتك .. وقصة فلان .. يا ما تروح عن بالك يا طفل الزمان ..

هذي وطنك وهذي شعبك فرح بهروب الغول .. ما ساعد فيها الا ايد كرامة وايد وطن بالذل ما رضي يقول

ولا ينكسر ولا يموت مقهور ،، هذا أمل ، وجوزني الشخص المأسور بنته وصرت أمير لزمان في الطغيان ما يرضى

بذل وعاشت الدنيا بحلى الدنيا فيها ورد وشجر وصنوبر وريحان ما فيها غالي الا كرامـة وعزة نفس ما تزول ..

ويتبـــع بالقصــة الحقيقة ^_^ ..}

محمود · 06-30-2008, 07:19 PM

.. { مأســـاة } ..

بـ 20 / 5 / 2008 ..

رحت اشتريت معالج ،، اسمــو ..

هيــو هون ..

Core 2 Quad

وهــون موصفات الجهـاز ككل ..

وهاد نوع المذر ..

Asus P5W DH Deluxe

والي بده يعرف خوصاها ..

{ من هون }

كرت الشاشة nVidia 512

^_^

المهم يا جمــاعة الخير ..

اشتريت معاه هارد ثاني للجهــاز ..

لأنو في عندي نظام متطور في المذر اسمــو { Ez-Backup } | نظام النسخ الاحتياطي ..

ويا إخوان يا أفاضل ،، الي صار اني رحت ركبت الهارد والمعالج تمام التمام ..

واشتغل كل شي حلاوة ..

واجيت افعل نظام النسخ الاحتياطي ..

مشان ينسخ الهارد القديم في الهارد الجديد ، ويضلو عندي نسخة من البيانات ..

الي صار .. رح نسخ الهارد الجديد ( الفاضي ) بالهارد القديم ( المليان ) وكل شي راح ..

تعــو شوية بس ..

شو يعني كل شي ..

كل شي = {

1 - كل الصور والفيديوهات الي صورتها على مدار 8 سنــوات ..

2- موسوعـة أناشيد ضخمــة جدا ً حجمهــا 40 جيجــا ومرتبين وفيديو ..

3- موسـوعة صور للمصممين روعة وكل شي فيهم مصنف كمان ومنها صور فلسطينية واسلامية ..

4- كل تصاميمي الي صممتها على مدار الأيام ..

5- كل البرامج النادرة والي تعتبر برامج مرخصة أو في الها كراكات ..

6- مدرسة تعليمية من تجميعي على مدار دوامي بالانترنت وفيها كثير من المواد الرهيبة والنادرة .

8-والأهم من هذا .. شغلي في الشركة ..

أنا مبرمج . كل برمجياتي طارت و منهم برنامج ضخم للموظفين والحسابات بينهم VB.NET ..

9- شهادات تقدير و عقود عمل و مستندات خاصة لأبعد الحدود ،

10 - كل ما كتبت من قصائد ونثر وشعر راح ، والي ضل بس في المنتدى وهوي لا يعد بنسبة 30% ..

11- باسوردات السيرفرات الي كانت معي وكل بيانات ادارتهم ..

12- كل تصاميم الشهيد حسن شقورة ..

13- موسوعة مواقع تعليمية طارت ..

14 - كل اليافطات الي كنت اصممها وكل المواقع الي برمجتها طارت ..

15- من الآخر طار الجهاز وطار عمري معاه وكل شي حلو ..

} ..

بس صدقوني ،، الي صار بالأول انخنقت كثير ..

شغل العمر كله طار ..

اتخيلو كل شي بنيته طار بغلطة بسيطة ..

لكن بديت من جديد .. ورح اعتبرها خطوة جديدة للتطوير ..

الشي الوحيد الي زعلان عليه الصور الي راحتـ .. ورح ارجعهـا ببرنامج استعادة الملفات المحذوفة ..

لأنو هما الشي الوحيد الي بنقدر نطلعه ونقدر نرتبه بالعين ..

ومشانها خطوة جديدة ..

بعرض عليكم صور جهازي ..

^_^

اضغط ع الصورة لتطلع كبيرة ..

وعودة جديدة بالقصــة الي وعدتكم فيها ..}

الذين يشاهدون محتوى الموضوع الآن : 1 ( الأعضاء 0 والزوار 1)

الإهداءات
إضافة إهداء