للأسف .. إبليس غادر الأردن :(

[البيساني]

قصه ابليس مع الحياة في الاردن

كان في غرفته, يلملم ملابسه في حقيبة إلى جانب باقي متعلّقاته, على المنضدة القريبة كانت استقالته موقّعة ومختومة حسب الأصول, وبجوارها تقبع ون-واي تيكت إلى جزر القمر.
كانت ملامح وجهه في تلك اللحظات تنطق بالحزن, الكآبة, الإحباط, اليأس, وقلّة الحيلة... مع دهشة مزمنة ارتسمت عليه منذ فترة ليست بالقريبة, واعترافٍ بالعجز والفشل.
إبليس راحلٌ عن بلادنا إلى غير رجعة... فليفرح المؤمنون...


- وين يامسهّل؟ ليش عم بتضبّ اغراضك؟

- يازلمة ماظلّلي قعدة عندكو, إلي سنين عاطل عن العمل وقرّبت أموت من الجوع.. بلاقيش معك سيجارة ياخوك؟
مش قاطع فيكو لا وسواس ولا خنّاس! كنت زمان بوسوس للوحدة تسيب ابنها يعيّط وهي بتحكي مع جاراتها, هسّة صاروا لحالهم يرموا اولادهم في الحاوية أوّل مايجوا!
كنت أوسوس للواحد ينسى يسمّي الله قبل مايوكل, هسّة بطّل حدا لاقي إشي يوكله! يازلمة إذا أنا إبليس تسمّمت بالشاورما!
كنت برضو بوسوس للشب يرميله كلمة ع البنت وهي ماشية بالشارع, صاروا البنات يطقّسوا ع الشباب بكلام أنا نفسي بستحي أحكيه!
واحد بسرق 6 مليون دينار عينك عينك بحبسوه 3 سنين في فيلاّ ع شطّ العقبة, وتنين بنبشوا في مكبّ الزبالة بتطخّهم الشرطة, إنتو بدّكو إبليس إنتو؟!
صار عندكم فائض في الفساد بكفّي 30 سنة لقدّام, صرت أخاف على حالي منكم!
يازلمة مرّات بضطرّ أوسوس بالشقلوب وأقول للمسؤول إرحم وللحرامي بكفّي خلّي شويّ للحراميّة اللي رح ييجوا بعدك!
يعني إذا إنتو لحالكو سمالله بتعملوا كل هالبلاوي, أنا إبليس شو أعمل؟ أشتغل شوفير تكسي يعني ولاّ أفتح صالون حلاقة؟ ماظلّ غير أقدّم للأوقاف يعيّنوني واعظ أو إمام جامع!

ثمّ فتح الباب وانطلق خارجاً إلى غير رجعة

[&نسيم الروح&]

لا الاه الا الله

بجد شر البليه ما يضحك يعني الناس صارت ابالسه وابليس بده يشتغل

واعظ في جامع

الله يجيرنا من شي اعظم يمكن اخي انتا حطيت الموضوع على شكل نكته

بس هادي الحقيقه الي احنا مو مصدقينها

وانا شوف عيني سمع داني سمعت بنات بترمي حكي لشب كلام بستحي احكي

لدرجه انه الشب صار وشه احمر وبهدل صاحبه انه جابه يقابله هون

ميرسي الك على الموضوع

[البيساني]

لا والله يا خيتو ما هو نكتة .. فعلا هاد الواقع .. ومش بس بالأردن ..

بس المميز بالأردن انه لفظ الجلالة علسانهم متل أي اشي ,, وما اله احترام بالمرة ..

أجارنا الله وإياكي ..

مشكورة خيتو عالرد والتعليق ,, مرورك أسعدني .. .