قررت اصير حرامي واللي يصير يصير

[الصمـــ رفيق الصحراء ــت]

هاليومين صارت شخصيتك ودرجة الترحيب فيك على حسب الستايل حقك
مثلا اذا جوالك عنيد وسيارتك سيدرك فانت ضمن قائمة الجحلط

واذا الجوال المملكه والا الفيصليه والسياره فورد والا كابريس فانت ضمن متوسطي الدخل ( يعني حبه فوق تريش وحبه تحت تروووووح في خرايطها )

واما اذا كنت ممن يحمل جهاز الزعيم والسياره فياقرا فانت ماعليك خلاف فابشر من يفز لك لادخلت مجلس وابشر من يمشيك لامريت نقطه تفتيش ولاجيت تخطب فالف بنت وبنت تتمناك لان بنات هاليومين اول مايسألن عنه هو سيارته وجواله اما علوم المرجله اللي خابرين فراحت مع سنة جدي الله يرحمه

موضوع النقاش :

اخوووووووووووي الصغير ابلشني شب علي وراك ماتشتري زي سيارة صديقك محمد وراء ماتغير جهازك ، والا شفت سياره ولد خالتي عبدالله الجديده بيودينا اليوم عليها للملاهي

اما بالنسبه للوالده فعليها ( ذبات ) على مستوى مثل تذكر ياولدي يوم تودينا للسوق برمضان ومشينا بعدها لسدير قلت : ايه قالت : خالتك وعيالها مشوا معنا ووصلوا قبلنا ب ساعتين ( الظاهر انهم على اف 16 ماهي سياره ) وكل يوم على هالحال ماخلص من اخوي الا مستلمتني امي (الله يطول عمرها ) وكل يوم (تحن) على راسي كي اشتري سيارة (عليها القيمة وترفع مكانتي بين الناس) على حد تعبير (مامي)

(( امي تؤمن ان اسعار النفط, ورواتب الموظفين تسير باتجاه واحد )) ... معذورة الوالدة .. ما لحقت على النظرية الرياضية التي تقول (( النفط والرواتب والمخصصات )) هي زوايا مثلث منفرج عند الزاوية (مخصصات) ..

ورغم النقاشات الطويلة الا انني اطبق سياسة حكومتنا الرشيدة في التعامل مع الاوضاع الداخلية للبلاد .. وهي نظرية تقول (( إذن من طين وإذن من عجين . واسحب عليهم الخامس )).

قررت ان اطمر لاحد البنوك لاخذ قرض لشراء سياره وطبعا من كلام الناس فبنك الراجحي هو بنك اسلامي غير ربوي ( ومن هالكلام والتمليح ) ولكن بعدما زرت الراجحي ...... اتضحه انه (اسلامي ) في معاملاته البنكيه .. ولكنه (حيواني) في تعامله مع الناس.....

وجاء احد الزملاء قال رح للأمريكي ولا أنت متعطل ان شاء الله ولكن الزين مايكمل وعلى قولة المثل ( ان لقينا الخراب مالقينا ؟؟؟؟؟؟ وان لقينا ؟؟؟؟؟؟؟؟ مالقينا الخراب )

وبعد لف ودوران اكتشفت ان القرض اللي ممكن يتحمله الراتب يالله عساااااه يجيب كامري ( وعادي بعد ماهي بفل اوبشن )

المهم حلينا موضوع السياره بعدما تدخل الاخوان بالموضوع بس ياحسره ماقدرت اخذها بأسمي ( ودي احس اني امتلك شي غير جوالي وهدومي )

وتشوفوني كل يوم مرتز بحوش البيت أخايل السياره بس كل ماشفتها ضاق صدري تذكرت الديون والاقساااااااط .

طبعا نسيت اقولكم ان الوالده نست موضوع السياره وفتحت جبهه جديده ولكن هالمره بالتحالف مع العمات والخالات

المووضوع الجديد هو ( الزوااااااااااااااج ) وصار ت العيشه ماتنطاق ان دخلت بيتنا وقلت خل اقعد معهم شووووووووي فتحوا هالموضوع وان رحت لاحد الخالات اسلم عليها ( عطتني كم ذبه ) مثل ياعساني اشوووف عيالك والا دريت خطبنا لولدنا فلان ماشاء الله هذا وهو اصغر منك .
طبعا ولو اني عزوووووووووبي بالفطره ولا عندي من الشيطان طاري بس حبيت افكر في تكلفة هالزواج بالاعتماد على نفسي فقط دون الوالد او الاخوان ( محاولا الدخول في سيكولوجيه المشكله فليس كل الشباب عندهم اباء او اخوه بل الكثير منهم ملتزم بعائلته واعالتهم )

كما أن أغلب البنات هاليومين صارن مثل الأسهم البيعه للي يدفع أكثر أذكر وحده تقول اللي بيتزوجني لازم ينقد اقل شي 250 الف واذا ماعنده مو لازم يتزوج عشان يعرف اني ماني برخيصه ويعرف قيمتي مضبوط <<<<<<<<<<<<<<< هذي فوايد المسلسلات لابارك الله فيها
اذكر واحد من الشباب يوم جاء يتزوج اخذ سيارتين اقساط ( هايلكس غمارتين ) واللي مايعرف هالطريقه فهذي سيارات ياخذها الواحد بالاقساط ويبيعها كاش ويستفيد من هالكاش لتغطية مصاريف اما زواج او بناء
الزبده ان خوينا يقول من تزوجت وانا كل ماشفت المدام ( كأني اشوف خشة الهايلكس اللي قطعت ظهري باقساطها وكل ماخفت الاقساط كل مابدت تبرز ملامح زوجتي وشوي شوي اولها الخشه ثم الابواب ثم الكفرات لين ميزت خشة المدام بعد انتهاء الاقساط
وطبعا اغلب الموظفين الجدد او من رواتبهم قليله يضطر للتحايل باخذ القرض باسم اخيه او زميل له تنطبق عليه الشروووووط
وحتى من حب ينوع مصادر دخله بان يفتح له نشاط تجاري فالموظف ممنوع من مزاوله النشاط التجاري ولا بد يتحايل بعد يسجله باسم امه او زوجته يعني الدعوى تحايل في تحايل
والتحايل حرام شرعا ومن يمارسه يعتبر حرامي قانونا والله يخلف

وبحسبه بسيطه اكتشفت اني لو ابتزوج ام 250 الف ابقعد 25 سنه اقسط الا ان تحايلت ولفيت ودرت بمعني اصح اصير حرامي

عاشت العزوبيه
وعاشت امتنا المجيده
وعاشت ايامكم
__________________
لاضاق صدري شلت بندق ودربيل*** وجميع مايطري على البال راهي

وأخذت صندوق الفشق والمعاميل***مع دلتن صفرا وبراد شاهي

ويطري علي من الرجال المشاكيل*** لاقلت أبي خوتك ماقال لاهي