عتاب من سيد الظلام للاعضاء..وتفاصيل ارعب قصة مريت فيها بحياتي هون :)

[سيد الظلام]

السلام عليكم

الصراحة بجد انا زعلان من الاعضاء لاني لاحظت انه ما في حد استذكر غياب سيد الظلام في اخر 3 ايام

اما السبب في هذا الشيء فكان انه عمي توفى وعمي ماله ابناء يتكفله بعزاه فمسكته انا واخي ومشينا الوضع

تفاصيل القصة بدأت ليلة الخميس صباح الجمعة كان الجهاز يعاني مع بعض المشاكل فجأة جاني اخي وبقول

لي في خبر عاجل جدا جدا

سالته خير شوفي

قال لي عمي توفى ا.....نا حقيقة كنت بصلح بالجهاز رخيت كل شيء لانه صدمة كبيرة كانت ليا

المهم ثاني يوم صحيت حوالي الساعة 7 وطلب مني اخي اني اروح احضر سيارة الموتى لحتى نجيب

جثة عمي من المستشفى ونروح نغسله

بعد شوية جانا اتصال وبقول لنا الخطة تغيرت ولازم نغسله بالمستشفى

المهم سحبت حالي انا وابن عمي ورحنا لثلاجات الموتى.

بهذا الوقت كان هناك جنازة لشهيد انتظرناها لحتى تنتهي ونادا عليا حرس من المستشفى وقال لي بالحرف الواحد : تفضل يا اخوية دور على عمك في ثلاجات الموتى

انا انصدمت صرت اقول له ما بعرف عمي قصدي ما عمري شفت ميت ولا لمسته بدك اياني ادور عليه

بين الاموات

قال لي دبر حالك والله يوفقك

المهم سميت بسم الله فتحت ثلاجة كانت على جنب .المهم اول ما فتحت الثلاجة لقيت بني ادم

وجه اخضر وكله دم قلت للحارس بعد اذنك ممكن تمسح الدم والخضار يمكن هذا عمي

والصراحة انا فاتح الثلاجة وبحياتي كلها ما شفت انسان ميت غير ابوية الله يرحمه وبعض الشهداء

بس اني فتح كفن للناس واقعد اطلع فيهم واشكال ولا بافلام الرعب .. الله يجيرنا مما هو اعظم

المهم طلبت من الحارس يمسح الوجه الا هو بقول لي يا شيخ سيبك من هذه الثلاجات هذه لانه اصحاب

الجثث

صار لهم ميتين من 5 سنوات ومش معروف مين هم

انا تجمدت في مكاني وصرت اطلع بالراجل ومعي غيبوبة وانا مفتح عيني قعدت على الحال دقيقتين وانا

بطلع في الراجل وكل شياطين الدنيا حوالين راسي

اقسم بالله في حياتي ما شعرت بخوف مثلك هيك

لحتى فتحت الثلاجة اللي لقيت فيها عمي كان منظره متغير

وسبب الموت كان جلطة في الدماغ غيرت معالمه لدرجت اني تهت فيه

المهم الاستاذ المغسل بقول لي شيله وحطه على اللوح بقول له يا بني ادم انا عمري ما شفت مش لمست انسان ميت

قال لي دبر حالك وتوكل على على الله .

المهم اجا اخيرا ابن عمي ورفع معي عمه وحطيناها على لوحة التغسيل كان جسمه قمة بالبرودة

ابن عمي كان اكثر واحد مقرب منه ودايما معه صار يبكي ووقف على جنب واستملت انا المهمة مع المغسل

اشيل واضغط وانظف واقلب واكفن واعطر وبالاخير جينا نطلع بسيارة نقل الموتى

حطينا عمي بالخلف وانا قعدت قدام .والسيارة زجاجها الفاصل بينا وبين الميت لونه اسود صار كل شوية يتهيأ لي انه عمي بده يقوم وانا

اصير زي المجنون وحالة على الله

والحمد لله انتهت المهمة بسلام

وليلة اول امبارح قعدت احلم كوابيس مش بسيطة

دايما ماكل خوازيق سيد الظلام

وصلى اللهم وسلم على سيدنا محمد وعلى اله وصحبه اجمعين

القصة طويلة شوية بس اللي ايده في النار مش زي اللي ايده براها رعب ولا في الاحلام

لا الاحلى بكل القصة انه اخد

[حافيه القدمين]

اللهم صلي عليك يا محمد
رحم اله عمك اخي الكريم وجمعك واياه وكل موتاكم في الفردوس الاعلى
كلنا ع هالطريق
وحمدلله ع سلامتك يا غالي وما تواخذنا

[الاماني الفلسطنية]

يا الللللللللله :(

الله يرحمو ويرحم جميع اموات المسلمين يا رب ,,

والله يئدرك على فعل الخير يا اخي ..

بجد كتييير صعب على الواحد يشوف ادامو ميت , بس هادا بالاخير مصير كل انسان منا ..

[lnosh]

الله يرحمه

قصتك عادية يار اجل

طيب انا مات قدام عيوني شخصين من اهم الاشخاص في حياتي

بابا و ..... شفتهم قدام عيوني وهم بيموتوا

والله كانت صعبة والواحد بيخاف من قصص الموت اخر هالنهار الله يسامحك مش حنام الليلة

الله يرحم جميع المسلمين الاحياء منهم و الاموات

[أحلى مايا]

والله اصتك بترعب وخاصة انو اعدت دور على عمك بين ناس ميتة كتيير وتفتح التلاجات وتسكرهم والله شي برعب منيح انو الله حط فيك شوية اوة الي خلاك تغسلو والله يرحمو

[اسيرة النجوم]

وحدوا الله
لا الاه الا الله

يعني عن جد اخي سيد الظلام قصة كتير صعبه
انو يموت شخص عزيز عليك
وتشوف ميتين
وكمان تشيلو وتغسلوا
والله جد صعبه
الله يرحموا ويجعلو من اصحاب الجنان
يارب
اما قصة انو مو فاكرينك لساتك بسال نور اليقين عنك
وبقولها وينو سيد الظلام
بس عرفت انو انت كان عندك امتحان ولازم تحفظو منيح
بالتوفيق انشاء الله
والبقاء لله اخي سيد الظلام
والله يرحم اموات المسلمين جميعا
ويجعل قبورهم روضة من رياض الجنه
بس ما عليك انشاء الله راح ترجع لحياتك الطبيعيه وتصير تحلم احلام سعيده
يسلموووووو
ومننا ناسينك ابدا
فيه حد ينسى سيد قلق سيد الظلام
مشكوووور

[الخليل]

بارك الله فيك ياسيد الظلام
ولك الاجر العظيم ان شاء الله
بس لازم تتعلم وتتأثر من هاي الشغلة وتراجع حساباتك مع ربنا
وثوابك عند ربنا كبير ان شاء الله بمساعدتك بتغسيل عمك
تحياتي

[نور اليقين]

انا لله و انا اليه راجعون

البقاء لله سيد الظلام

و كن على يقين انو مش ناسينك

بس الدنيا تلاهـــي أخي

[بنت فلسطين المجروحة]

انا لله وانا اليه راجعون

الله يرحم عمك يارب

والله انك قوي قلب

انك قدرت تعمل هيك

الك الاجر ان شاء الله

بس هدول اللي الهم خمس سنين مو معروف الهم حدا :(

حرام طيب يدفنوهم

لاحول ولاقوة الا بالله

[لولو اليبناوية]

سيد الظلام والله استفقدناك

ما تقول ما استفقدناك

بعدين انتا فتت وكتبت انك مشغول بالامتحانات..

يالله...اخ شو بكره اللحظات هاي..

بجد موقف لا تحسد عليه

الله يرحمه يارب

ويصبر اولادو

ويجمعنا كلنا بالجنة