مهم لكـل من انضم إلينا بمشروع "معـا لنرتقي بالأقسام الفلسطينية .."

[.:.!دموع الرحيل!.:.]

.!.الســلام عليكم ورحمـة الله .!.





ان شاء الله الجميع بخير

المهم ندخل بالموضوع بدون لف ودوران

استكمالا للخطوة الي بدينا فيها

ضمن مشروع تنشيط الأقسام الفلسطينيه في المنتدى

"معاً لنرتقي بالأقسام الفلسطينيه في المنتدى"

الي هيي كــانت تجميع اسماء الأعضاء الي حابـه

تشاركـ معنـا بهالمهمـه ..

رح أكتب الأسمـاء هون

بمـا أنه الموضوع بحاجة لجهـد مضاعف منكم

1_ لانيـــــا



2_ بــو هبــه



3_ بـنـت الرمـلـه



4_ إبنتة الشـتـات



5_ إسراء الفلسطينيه



6_ صدى الصمـت



7_ عاشقـة فلسطين



8_ اللاجئ الفلسطيني



9_ لـولـو اليبناويـه



10_ دموع الرحيـل



11_ مؤيد " مـع إنك ما سجلت اسمك ،، بس انا سجلتك مش براحتكـ يعني "

<!>الخطـوة التانيه <!>

هـي تجميـع أفكـاركم

واقتراحاتكمـ ،،

الي بتلاقوهـا مناسبة لتنشيط الأقسام المعنيه

والي بتبث الروح فيهـا

وبتجذب القارئ والأعضاء بشكل متواصـل

إلي عنـدو أي فكـرة يحطها هون لو سمحتـو

ما حدا يتردد أبدا مهما كانت الفكرة بسيطة

يمكن من فكرة صغيرة يطلع معنا مشروع كبير

كلنـا سوا منتساعد ان شاء الله

بس ما حدا يمنع عننا إقتراحاته

والإقتراحات والأفكار هون

مش بس من الأسماء الي انذكرت

أي حدا من بـاقي الأعضاء عنـده فكرة

يفيدنا فيها ما يوفرها علينـا ...

بتمنى من هون لأسبوع أو عشر أيـام

نكون جمعنـا عدد منيح من الأفكـار

عشان نبدا نقسم ونبلش خطوة خطوة ،،

<><><>


بس شغلنـا لازمـ يبدا من اليـوم

الي هو لازم كل واحد فينـا الي سجلنا اسمائنـا

نعتبرو متل الواجب علينـا (( وطبعا كل الأعضاء ،، بس بما أنه كلفنا حالنا بهالمهمة يعني

نبدا بنفسنا .. وأكيد ساعتها الأعضاء ما بقصرو .. ابدا .. ))

إنـنا ما نطلع من المنتدى كل يومـ

إلا ومشاركين بالخمس أقسام الفلسطينيه ...

عنــا

:: المنتدى الفلسطيني العـام ::

:: منتدى المدن الفلسطينيه وحضاراتهـا ::

:: منتدى الشخصيات الفلسطينيه والشهداء والأسرى :: (( الي وقفة عنـده ))

:: منتدى الأخبـار الفلسطينيه ::

:: منتدى الأناشيد الوطنيـه والإسلاميـه ::

<><><><>


" منتدى الأخبار الفلسطينيه ،، الحمدلله نشـط وماشي حاله

بس ما بيمنع انه بيحتاج لتفاعل مننـا دائم

وأكيد متل ما بتعرفو بحياديه وبشكل بنّاء "



" منتدى الأناشيـد الفلسطينيه في إقبال عليـه

رائع ودائم ،، بس كمان ما بيمنع أنه نطلع بأفكار

تضيف للقسم رونق خاص

ويصير من أجمل الأقسام بالمنتدى ..

ونخللي الإقبال عالأناشيد مضاعف أكتر وأكتـر

لأنه الأناشيد الوطنيه رساله ناجحه ومهمه للقضيـة

وأكيد طبعا الاناشيد الإسلاميـة لازمـ تفعليها بشكل أكبـر "



:... نجي للأقسام الي بحاجة لجهود مضاعفـه ...:

" المنتدى الفلسطيني العامـ ،،

المواضيع فيه متجدده نوعـاً مـا

بس الإقبال عليه للأسف

أقل من الي لازم يكون بكتـير

المفروض شخص فينـا

ما يطلع من المنتدى إلا ويكون زايرلو بهالقسم أقل شي موضوعين

وموضوعين تانيين باليوم الي بعدو

هيدا لازم نعتبرو واجب علينـا

بس بلهفه وحب ..

وطبعا بحاجه لأفكار لتنشيط هالقسم

يا ريت تزودونـا بأي شي عنـدكم .. "



" نجي لقسم المدن الفلسطينيه وحضاراتها .. ،،

هالقسم متراوح بين صعود ونزول

وأحيانا نايمـ

وطبعا الحق عالمشرف

الله يسامحها بس

كمـان لازمـ يكون هالقسم من اكتر الأقسام

النشيطة ويكون اللهفه عليها كبيرة

من الكل لأنه لازم نكون أدرى الناس

بوطننـا ونعـرف الكـل على كل شبر بوطننـا

المهم ،، هالقسم بحاجة لزيارتكم

الدائمـة ،، لمواضيعكم المتجددة

بس ما تكون مكررة كمان

وبحاجة لأفكار واقتراحات إله .. "



" نجي لمنـتدى الشخصيات الفلسطينيه والشهداء والأسرى ..

الي بجد بيبكي الواحد من قهره

من طريقة إهمال الأغلبيه اذا بدنا نبعد عن كلمة الكل لهالقسم العظيـم

الي الناس والعالم كلها ما أعطـت حق للفرد الفلسطيني

وحجبت قدرات هالشعب العظيمـ

وظلمتو بإخفاء كل إبداعاته وبطولاته

المميزة عن العالم ،،

نجي نحن كمان نقصر مع ابطال شعبنـا

إذا ما بدينا بنفسنـا وعرفنـا قيمة أبناء شعبنـا

وحاولنا نرد إلهم ولو القليل من حقهمـ بنشر

وتعريف الكل بسيرتهمـ وحقيقتهم أو على الأقل نحن نعرفهـا

كيف بدنـا الغير يقدر ؟؟

المهم سامحوني كترت حكي بهالنقطة

بس لأنهـا كانت قاهرتني كتير

ويمكن كون انا اول المقصرين فيكم

بس إيد بإيد لنرفع هالقسم فوق

وهالقسم بالذات

لازم يكون جزء من ثقافة كل واحد فينا

وكل فلسطيني كمان لنقدر نزرعهـا

بعقل وذاكرة كل شخص بنلتقى فيـه ..

المهمـــــــ ،،

هالقسم لا بـد من زيارة يوميه الـه

وعلى فكرة فيو مواضيع كتير مش ماخده حقهـا

يعني مش غلط لما نطلع مواضيع قديمة نرد عليها

نلفت الأنظار إلها

أجمل المواضيع فيه للأسف بلاقي فيو رد ولا تنين

والله قهـر

المشرف مش مقصر ابدا

وانا بلاحظ انو دايما بنزل مواضيع

بس الحق علينـا

على كل هالقسم بحاجة لزيارة دائمـة

ويا ريت كم اقتراح لتنشيط القسم .. "

<><><>

البدأ بالعمل بهالأمور يا ريت من اليوم نبتديها

بانتظار افكاركم واقتراحاتكم للأقسام

الله يعزكم يا رب

كترت حكي بعرف

بس اتحملوني ،،

وهيدا واجبنا كلنـا

والله يقدرنـا ..

يعطيكم الف عافيه

وما تنسونـا من اقتراحاتكم

[صدى الصمت]

100%

والله معك حق بكل نص حرف حكيتيه

والله يقدرنـــا على هالأقســـام وان شاء الله الاقتراحــات رح تنزل زخ مطر باذن الله

اما شغلة كل يوم هااي والله ما بقدر عليها ،،

بتعرفي قرف المتااايس والبين تاعها

تقارير

واجبات

تطبيقات

اختبارات

مراجعة الدرووس اللي اخذناها في نفس اليوم

تحضيـــر الدرووس الجاية

فايلااات <> اقرف حاجة جد

ووووووووو

والك عليي وعد اول ما اعطــل ان شاء الله ما رح افاارق المنتدى الفلسطيني بحااالوو

بس ادعيلنــا انتــي ^^

وهمتكــو يا رجــــال

بارك الله فيكي يمـــا 666

[aBo SaLeeM]

طيب وانا وين رحت من المهمه هادي

اوكي بس راح اساعدكم واحاول بقد ما اقدر

شكرا كتير الك يدموع الرحيل للفكرة

تحياتي لكي

[هلــون]

الله يسامحك على هالعمله ,,

فاهمه قصدي ..

[لولو اليبناوية]

السلام عليكم ورحمة الله وبركاته...
انا احبذ ادخال قليلن من الفرفشة لهذا القسم...
ولكن فرفشة بمقدار بسيط...
بحيث يشد الاعضاء لدخول هذا القسم..
ولا يفقد رونقه وطابعه الوطني...
نظرا لتكاثر الأعضاء في منتدى النكت والفكاهة...
وزالك ب....

انو انسوي مسابقات وطنية...
كطرح مجموعة اسئلة عن مدينة او قرية معينة بفلسطين...
او مسابقات عن اي شي وطني...بس

[إسراء الفلسطينية]

السلام عليكم و رحمة الله و بركاته

انا كمااان رايي من راي لولو انو يكوون في مسابقاات عن المدن الفلسطينيه ..و كماان عن فلسطيين.. تاريخها و قصصها و هييك
.
.
و الصراحه منتدى الشخصيات الفلسطينيه والشهداء والأسرى بحسو حزييين و ما فيه كتيير تفاعل من الاعضاء

هوي طبعا كتيير منتدى مهم و بعرفنا على الشخصياات المهمه بفلسطيين

بس ما بعرف بحس انو لازم يكوون فييه شي هييك يخليي الاعضااء تكثر من مشاركتهم فييه

بس شو هل شي هااد هوي السؤاال؟؟

و انا هلا الصرااحه ما في شي ببالي

بس ضغري ان شاء الله بس يجي شي ببالي بكتبو هوون

و الله يوفق الجمييع :)

[Iemy]

السلام عليكم
مرحب بالجميع
معلش أنا إسمي مش مكتوب لكن راح أحط اقتراح صغير وياريت أقدر أوصللكوا الفكره بالزبط
فكرتي أن يكون تواصل مابين فلسطين الداخل وفلسطين الخارج
يعني
تحطو صفحه أو أي شي المهم تخصصو موضوع معين يكون عامل كجسر التواصل مابين الداخل والمغتربين
مثلا
كتييييير من أهل فلسطين اللي عايشين بالخارج بيحبوا يعرفوا كيف الداخل عايش ويساعدوا أهل الداخل بشتى الطرق المتاحه والمقدور عليها
لكن مابيعرفوا كيف أو من وين يبدءوا
مثال عن التبرعات للأسر المحتاجة في فلسطين خصوصا بعد الحصار أو لتحمل تكاليف الدراسه اللي غير مقدور عليها أو لكفالة الأسر والأيتام
كتير بكون نفسهم يقدموا أي شي بيقدروا عليه لكن بدهم مين يدلهم على الطريق الموثوق
ممكن من خلال هالمنتدى يكون في تواصل بينهم يعني عناوين البنوك والجمعيات الخيريه والمؤسسات القائمه على ذلك أرقام هواتف أي شيء ممكن يساعد
هيك يعني الواحد يحس انه بيعمل شيء لبلده حتى وهو بالخارج
****************
اقتراح آخر بيخص منتدى الأسرى والشهداء
برأي لو يُعاد تصميم الصفحه الخاصه بهالموضوع بشكل آخر بحيث تخلي جميع مواضيع الشهداء والأسرى مرئية والواحد يختار اللي بده ويدخل ويشوف
يعني
يكون في ارتباط بيخص الأسرى والشهداء
ومن هالارتباط يكون في خيار ين واحد للأسرى والتاني للشهداء
ومن لما يختار الشخص اللي بدياه بيبعته الرابط على صفحه جديده فيها صور لكل الشهداء "لو اختار صفحة الشهداء" هيك مصفوفه بشكل مرئي وتحت كل صوره اسم الشهيد ومدينته والصورة تكون رابط للتفاصيل الخاصه فيه من تواريخ والعمليه وحياته وغيره
هيك لأنه الصور بتشد الواحد أكتر وبترسخ ببال الواحد أكتر بدل الدش تبع كتب التاريخ اللي الواحد بيوصل لنص الصفحه وبيطفش وبيقوم يغير الموضوع
يعني هيك تصنيف صحيح متعب شوي وراح ياخد وقت ومجهود لكن راح يكون أفضل للتصفح وبيسهل على القارئ من عضو أو ضيف أنه يتعرف على أكبر عدد من الشهداء والأسرى ويتعرف على شغلات تانيه ممكن تنضاف زي معاناة المعبر والأسر الفلسطينية ومعناة سكان القدس مع اليهود وغيره وغيره

هاد مثال صغير وجزء صغير من شغل كبير
ممكن يكون ترتيب المواضيع بهالشكل
الشهداء
الأسرى
معانة الأسر الفلسطينية
معاناة عرب اسرائيل
وكل موضوع بياخدك على صفحه خاصه فيها كزا موضوع بيخص العنوان الأساسي اللي اختاره
يعني كأنه صفحة نت معلوماتيه بعيده عن جو المنتدى لكن اللي بيحدثها باستمرار هم الأعضاء بإضافة مواضيع جديده وعلى المشرف انه يرتبها منيح
وازا في مواضيع مإلها دخل بهالعناوين بتنحط في صفحة المنتدى العاديه
يعني قليلا من التنظيم للمعلومات مع دعمها بالصور بيخلي التصفح سهل وممتع أكتر
مابعرف وصلت المعلومه ولا كيف
ومابعرف ازا هالشي ممكن ولا لاء
**************
بالنسبه للمسابقه كتير فكره حلوه يكون في مسابقه حول ثقافتنا بالمدن الفلسطينية هيك تحدي وبث روح حماس أكتر بين الأعضاء بيخلي الواحد يبحث أكتر ويستفيد أكتر


كلامي كتير بس ياريت تكون الأفكار وصلت مزبوط وازا في شي مش واضح ماعندي مانع بعيد الشرح مع الصور

[سنا القمر]

فكرة الأخت imey كتيير حلوة

شكرا

[هلــون]

كيف الحلوين ,,

يلا عيشوا هلون جابت أفكار للمنتدى الفلسطيني ,, (( مين قدكم ))

STart



طبعا هيدا المنتدى احنا كتير مئصرين فيه ..

أنا أولهم ,,

يعني لو دخل كل عضو يوميا .. وشارك بمشاركتين .. هيدا أقل واجب ممكن نعملو

لهذا القسم ,, بما انو عام ,, وعام فلسطيني .. فكرتي

اسمها"" موسوعة فلسطينية بسطرين ""

نكتب سطرين عن ..

تراثنا

تقاليدنا

اعراسنا

اغانينا

زينا

حفلاتنا

امثالنا

اراضينا

زيتونا

عملاتنا

لهجتنا

كل عضو يدخل يكتب .. يحط صورة ,, يكتب كلمات ,, يحط اغنيه ,, يكتبلنا امثال .. عمله .. زي ,,

ويكتب سطرين عنها ,, لانو الي بكتبوا مواضيع بتكون كبيرة وبتملل ,,

اما ازا كانت سطرين ثلاث مفيدات ,, ممكن اتفيد وتستمتع بنفس الوقت ,,



هون فكرتي .. والي اسمها :: مدينتي بسطر ::

احنا عنا اعضاء ما شاء الله من كل انحاء فلسطين ,,

ليش ما كل عضو ,, يصورلنا صورة .. من مدينتو ,, الشارع الي ساكن فيه ,, الحي الي حوليه

ويكتب نبذه صغيرة ,, ما اتكون نقل ولا نسخ ,,

يكتب هوي شو هالمدينه بلنسبه لالو ,, شو اهم شغله مميزه بهاي المدينه ,, اهم المطاعم ..,, بشو مشهورة هالمدينه ,,

يعني سطرين ما رح يغلبوك ..

or

نعمل مسابقه عن المدن الفلسطينيه ,, كل واحد يحط صورة من تصويروا

ويعرف شو اسم هاي المنطقه ,, طبعا رح اتكون صعبه علينا احنا الي برى ,,

بس كل ما كانت اللعبه صعبه كل ما زادو الاعضاء حوليها ,,




هيدا المنتدى جاي عبالي فكرة فيه

كل عضو ساكن بفلسطين او غير فلسطين

استشهد الو صاحب .. اخ .. اخت .. معارف .. من قريته .. من مدينتو

ناس سمعنا عنهم وناس لأ

فليش ما نعمل موضوع اسمو "" شهداء شباب فلسطين ""

كل عضو يحط صورة لشهيد .. ويحكي عنو ,,

اي شي .. اسمو .. هواياته .. عمرو ... اولادة .. حاله الاجتماعيه ,,

اي سطر ,, المهم انو يحط ..

وهيك بالنهايه بيكون عنا ملف كامل ,, ملف خاص لشباب فلسطين ,,

وبعدين بنعمل شجرة فيهم ,, لتكون ذكرى لاعضائنا ,,



هيدا القسم .. رح اخليه يتفعل ,,

هوي ما شاء الله متفعل ,,

بس لاخلي نسبه زواره أعلى ,,لانو هيدا القسم من اختصاصي .. ومن ضمن شغلي

احنا بشغلنا عنا قسم للأخبار الفلسطينية ,,

رح اكتب بآخر كل موضوع رابط منتدانا ,,

بهيك شغله نكسب .. زياده زوار للمنتدى الاخبار ,,

وومكن كتير انهم يسجلو عشان يعلقوا عالموضوع

فبنكسب اعضاء قراء ,, وتعليقات علموضوع

ورح احط بنر لمنتدانا في موقعنا .. للي حاب يشارك معنا ,,


بس ^^ اتعبت وانا بكتب ,,

وأي فكرة جديدة رح احطها هون ^^

[مؤيد]

أول شي يعطيك ألف عافية اختي دموع الرحيل على موضوعك وجهدك ...
وكمان بشكر اقتراحات وردود الأعضاء خاصة هيلن كتير أفكارها حلوة ....

قبل ما أحكي على الأقسام ... الأصل في كل فلسطيني وفلسطينية انو يكون مهتم في بلده أكثر من اهتمام أي انسان آخر في بلده . والاهتمام أنا ملاحظ إنو قليل في هذه الأقسام الفلسطينية ....... مش عارف شو الي بشغلهم عن قضايا وأخبار ومواضيع بلادهم .....
اليهود المحتلين يعرفون عن فلسطين أكثر من الفلسطينية نفسهم أحيانا ً إن لم يكن غالبا ً ، لماذا يا عالم ، اصحو بلادنا بتروح ونحنا مش عارفين وين هاي المدينة موقعها في فلسطين ، واليهودي الي بأمريكا بعرف فلسطين وبخطط شو يعمل وشو يسوي عشان يشتري أراضي ويعمرها ويقوي دولة ما يسمى بإسرائيل ..
اليهود بدرسو أولادهم في المدارس ، كل قرية بفلسطين وينها وشو مزاياها وخصائصها .. نحنا ما بنتهم ..

حب الوطن من الإيمان .. وواجبنا كبير وعظيم ، ما بدنا من كل عضو إلا يخصص جزء من وقته ولو جزء صغير من جهده ووقته ..

أنا حاولت أضع المشلكة الأساسية الي هي عائق كبير في تفعيل هذه الأقسام ... وهي ضعف الولاء لفلسطين وضعف حبها ...

بالنسبة للأقسام وتفعيلها ،، بعتقد الأعضاء حكو ووفو وما قصروا ، وأفكارهم كتير ممتازة ومافي بعدها ، لكن ينقصنا المثابرة والاهتمام .........

ويسلمو الك اختي دموع الرحيل
يعطيك ِ ألف عافية