مُـمـيـز .. هديّتي لكم // الطموح يصنع المعجزات ..

[.. ريتّـــا ..]

السلام عليكم ورحمة الله وبركاته

هذا الموضوع في بدايتي في شباب فلسطين أقدمه هديّة القدوم

.

الفرق بين الأغبياء والأذكياء : أن الأغبياء يملكون حلماً ، والأذكياء يملكون هدفاً


" إرفنج واشنطون "

Steven Paul Jobs


ستيفين باول جوبز


المؤسس والمدير التنفيذي لشركة أبل


في معلومة مهمّة مش الكل بيعرفها هيّي إنو ستيفين باول جوبز هو سوري الأصل


يعني عربي


يعني أبل ماكنتوش هيّ فكرة عربية من مخ عربي من تعب وجهد عربي


>>> علّقت ، مًـــ صدقت


للأسف عندي كمان معلومة ما حبيتها بتقول إنو جوبز تبنّته عائلة أمريكية ، والآن يحمل الجنسيّة الأمريكية وديانته بوذي

تخرّج ستيفين من الثانوي ، والتحق للجامعة .. بس يا خسارة ما كمّل حاله حال كتار من شُبّانّا المفكّرين واللي بيطلع منهم طتير شغلات ، لكن ع أول مطبّ في طريقهم العلمي بيوقّفو


لكن جوبز كان عندو شي مهتمّ فيه وبيحبّه ، وأخذ يطوّر فيه بمهاراته بهالمجال وهوّي مجال التكنولوجيا والإلكترونيات


فقدّم ورقة بأفكاره في مجال الإلكتروينات لشركة " أتاري " الاولى في صناعة ألعاب الفيديو ، وتمكّن هالزلمة من الحصول على وظيفة كمصمم ألعاب بشركة أتاري

ومرّت الأيام والتقى ستيف بـــ وزنياك ، وقرّروا الاتنن سوا اقتحام عالم التكنولوجيا


وأطلقوا شركة أبل .. كان عمر ستيف آنذاك 21 سنة وصديقه وزنياك أكبر منه بـــ 4 سنوات


يعني تعالو نفكّر شوي يا جماعة بين الناس اللي عندها طموح وهدف وبين شُبّانّا وشابّاتنا اليوم اللي بنفس عمر ستيف ووزنياك؟؟ شو حقّقو؟

في مقولة بتقول الطموح لا يحدّه عمر ولا يعرف اليأس ، بتمنى ما نستهين بقدراتنا حتى لو انخلقنا بظروف مساجين

نكمل القصة


تمكّن الصديقان من تصميم أول كمبيوتر شخصي أطلقوا عليه إسم " أبل1 "


وتمكّنوا من تكوين ثورة معقولة من بيع 600 جهاز كمبيوتر







هادا أول إشي أصدروه


قال كان أحدث إشي عندهم زمان


يقال إنو الجهاز عمره 30 سنة أو أكثر

" تفاحة ستيف ! "






شعار شركة أبل


أتوقع إنو هالشعار منسوب لقانون الجاذبية تبع نيوتن


ولإنو هالتقنية " تقنية الحاسب " كانت جديدة أول ما انطلقت شركة أبل ، فكانت مرغوبة من العالم ولا يمتلكها إلا أصحاب الثروات والنفوذ والمناصب العليا في المجتمع .. فكان هالإسم


>> هاد تحليلي والله أعلم


قريت بمكان ما إنو القضمة اللي ع الشعار هي رمز لقضمة أبويا آدم وحواء من الشجرة المحرّمة

بعد الجهاز الكركعة اللي فوق


قرّر ستيف وزنياك تطوير الإشي هداك ويعملو شي أحدث وأحلى ويكون أسهل ف الإستخدام


ومن هنا جاء " أبل2 " وشهد انطلاقة قوية جداً في عالم الكمبيوتر ، وباعوا من خلاله مئات الأجهزة







هادا على أيامهم كان أحدث أحدث إشي








صورة تانية لمنتج " أبل2 "


بالله ما بيشبه تلفزيون أبيض وأسود أو الميكرويف؟

من بعد هالنجاح أصيب زونياك بإصابة بليغة أوقفته عن إكمال حلم الصداقة


فقرّر إنه يتفرّغ لحياته ومشاريعه وتدريس الكمبيوتر بمكتبة كاليفورنيا

استمرّ ستيف جوبز بتطوير جهاز أبل ، ثم أطلق " أبل3 "


لكنه ما نجح فيه بسبب العيوب التقنية







هادا هوّي " أبل3 "


مش عارفة ليش حاسّة إنو رقبتو طويلة غير عن الأجيال السابقة

لكل تكنولوجيا منافسيها ، بهديك الفترة ظهرت " شركة IBM "


وأنتجت أول كمبيوتر شخصي .. فكانت منافس قوي لشركة جوبز


لذلك قام جوبز بشنّ حملة قوية بعالم التكنولوجيا وأصدر جهاز " ليزا "








شوفو محلاه


مقارنة مع الأجهزة السابقة حاسة هادا الجهاز أنثوي


بس يا خسارة .. برضو فشل


وسبب هالخسارة كان ارتفاع سعره .. يعني يا جماعة يلي عندكو محلات كهربائية والكترونيات خفّضو السعر شوي عشان تبيعو >> خذوا العبرة من مجرب

لكن جوبز ما وقّف طموحه على هالنقطة ، وضلّ من تطوّر لتطوّر حتى أطلق أحلى إختراع بالدنيا حبيب قلبي وروحي وعيني .. أمل المستقبل ، وزينة الحياة الدنيا ، هواءي العليل وغذاء الروح وكل أنواع الغزل العذري

أطلق " ماكنتوش "


أكيد ما يحتاج أشرحلكم مدى النجاح اللي حققه هالجهاز


أطلق جوبز هالجهاز من هان وهلّت عليه الثروة من هان


ولكن بعد هالنجاح مش عارفة شو خبطه على دماغه وقرر الانسحاب من شركة أبل ، فباع نصيبه من الشركة وأسّس شركة " نكست ستيب "


وأنتج جهاز " نيكست " ، وعلى الرغم من تقنيته العالية إلا إنو برضو خسر بسبب ارتفاع سعره >> ردّوا عليّ وخفّضو الأسعار يا جماعة

بعد هالخطوة قرر ستيف العودة إلى شركة أبل اللي بعد ما تركها خسرت خسارة شنيعة


وبعد ما رجعلها ، شافت شركة أبل النجاحات اللي حققتها شركة نيكست اقتصادياً وعلى صعيد التكنولوجيا ، وقررت شرائها وضمّها لشركة أبل


وتم تعيين ستيف جوبز كمدير تنفيذي للشركة

وبعد أن أطلق جوبز جهاز "Imac" عادت مرة أخرى شركة أبل لساحة المنافسة وحققت مبيعات كبيرة جداً


وفي يناير من العام 2000 تم تعيين جوبز مديراً تنفيذياً دائماً لشركة أبل

بعد هالنجاحات قرّر ستيف دخول عالم الكرتون ، واشترى استديو للرسوم المتحركة من زلمة إسمو جورج لوكاس ،


الشيء الذكيّ جداً إنه دمج فكرة الرسوم المتحركة مع الكمبيوترات الحديثة وحقّق نجاح كبير


وصار ملياردير ، وله حصة كبيرة في شركة والت ديزني

" ابتكارات ستيفين جوبز "


كل التقنيات الحديثة اللي بين ايدينا واللي بنحلم فيها ، وكل يوم طالعنا جهاز جديد هيّ من اختراعات هالرجل السوري العربي


رح أستغل الفرصة وأسألكم: هل أنتم مع أو ضد هذه التقنيات؟ أقصد الآيبود والآيفون والأيباد وأخيراً البلاك بيري؟ .. رح نحكي شوي عن كل واحد فيهم ، بس بستنى بالإجابة ع سؤالي

" Ipod "






بتذكر أول ما نزل قعدت أزن ع أهلي إلا بدي واحد


ولما جابوه صار يتطوّر شوي شوي .. وملّيت من القديم اللي عندي وهيّو مرمي مش عارفة وينو ، وصرت أتفرج ع الأيبود المحدّث بالنت وأحلم فيه

" Iphone "







هالجهاز كمبيوتر مصغّر بين إيديك ، يصنّف بعالم التكنولوجيا على إنه جهاز ذكي


لو كان مشبوك فيه نت يا سلااااام بتبطّل محتاج لجهاز كمبيوتر ولا لاب توب ولا ما يحزنون


إلا إني بفضّل اللاب توب دايماً مش عارفة ليش

هاد " Iphone5 "


كل ما بشوفو ما بتتصوّرو كم آآآهـ بتطلع مني


بحبو بحبو بحبو ، شو هالرقة والنعومة والكسم النحيل


شو هالطلّة وشو هالخلفية وشو هالتصوير يا سيدي آآآى يا ليل >> بدي أحوّل مطربة

وهادا الإشي غني عن التعريف الــ " Ipad "


مصرّة عليه مش حرتاح غير لما أجيبه


مع إني بسأل حالي شو بيفرق عن اللاب توب إلا إنه هالإشي كتير روعة


يعني بتبطّل لما تصحى من النوم تضطّر تعدل حالك عن السرير لتفتح لاب توبك


بتصير وإنت مغمض عيونك تمسكو من جمبك وتشتغل عليه تسمع فيروز ، تسمع أخبار ، تقرا كتب ، تعمل اللي بدّكياه


بكفّي شكلو وحجمو وخفة دمو بتفتح نفسك للي بدك تعمله

في شي لفت إنتباهي


ما لاحظتو إنو ستيفين جوبز مع إنه ملياردير وغني وصاحب ثروة وشهرة إلا إنه بكل صوره لا يظهر إلا ببنطلون جينز وقميص أسود؟


بصراحة معطي لنفسه طلّة مميزة وستايل خاص


هالشي كتير حلو ملفت للإنتباه ، لفت نظري برضو إعلامي لبناني أرمني إسمه نيشان يمكن بتعرفوه ، ماخد نفس الخطّ وببرنامجه أبشر ظهر بكل حلقاته ببدلة سودا مع قميص وكرافا سووود برضو


ومرة قريت إنو في عالم بس نسيت مين بالزبط ، عنده بخزانته 6 قطع من نفس الشي ونفس اللون عشان كل ما يصحى الصبح ما ياخد وقت كبير باختيار ملابسه


يعني يا جماعة شوفو العلماء والناس الناجحة كيف بفكّرو وإحنا كيف بنفكّر .. إحنا كل يوم بالوق وكل يوم لبس وكل فترة لازم كوافير ونيو لوك وما بعرف شو .. طب اهتمّينا بجواهرنا زي ما بنهتم بظاهرنا؟؟ بنهتم بتطوير ثقافتنا؟ وبنعزّز قدراتنا وبنهتم بمهاراتنا؟؟

المساحة الآن مفتوحة لكم


انتهى موضوعي وهو مجهود شخصي مستند لبعض المراجع


عن ستيف جوبز وبعض التقنيات اللي سبق وذكرتها


أتمنى هالمجهود ينال استحسانكم

.. ريتّـــا ..

[.. ريتّـــا ..]

خسارة تعبي ووقتي يروح أدراج الصفحات
ومفيش حتى كلمة شكر
ولّا عشاني جديدة؟




.

.

[PaLeSt!Ne SouL]

لا و الله موضوع مميز جدن

كتير عجبني

بس قصة الشعار انه لآدم و حواء غريبة !

لانه بوذي


و المعلومات الي ذكرتيها اول مرة اسمع باغلبها


ان شا الله بتجيبي آي باد

و انا باخد جهازك هههه

يعطيكي العافية يا عسل :)

[شهيد]

خسارة تعبي ووقتي يروح أدراج الصفحات
ومفيش حتى كلمة شكر
ولّا عشاني جديدة؟




.

هههههههههه شو هالحكي ريتا ؟!!!

ما شآء الله موضوع رآئع ، مليئ بالنوآدر

ألز شيء هادا :



ثاآنكس كسيرن ريتآ

يعطيك آلف عآفيهـ ،،

[عاشقة فلسطين..]

موضوع عنجد حلووو ورااائع
يعطيكِ الف عافية يا غالية
دمتِ في تألق =)

[PaLeStiNe FlOwEr]

موضوع مميز ريتا ..

عجبني كتير ..

بعض معلوماتو جديدة ..

عجبتني طريقة السرد وتعليقاتك عليها , أعطت الموضوع روح وخفة ..

عوافي يا قمر ^^

[محمود]

والله موضوع فآخر ..

وعرض وطرح مرتب كثير ..

من أول ما شفتك كنت حآسس انك مبدعة ..

وطلعتي هيك ..

يعطيك العافية وما تحرمينا ..

[ع’ـبير]

و لك أصبري علينـآ هلـء لساتني شايفة الموضوع
p=
رآئـع جداً و الصرآحة استفدت مع إني ما
بظن الآيبآد كتير مهـم، و جه نظري xd

يلآ إن شاء الله يوصل لك على يوم ميلادك p=
و معك حق، إحنـآ ما عم نعطي جوآهرنـآ
حقهـآ في تدريبها & تنميتهـآ

يلآ نتظر جديدكـ يآ عسسـل =)

[Maram .. ~]

موضوعك روعـة والله

استمتعت بقرآءته كتير :)

كل الي حكيتيه معلومآت جديدة علي

طريئة الطرح حبيتهآ :)

"بس تجيبي الك آي بآد جيبيلي معك ههههههههههههههه

يعطيكِ العآفية حبيبتي :)

[.. ريتّـــا ..]

أحلى شي إنك تحصد ثمار تعبك كلمات
بسيطة بس بتزرع فيك ثقة وعزم
أول ما نزلت الموضوع مرّ عليه أكثر من 24 ساعة بدون ولا رد
رغم إنو عدد المشاهدات في ازدياد
استغربت كتير لأنو معظم المواضيع ينفاعل معها الجميع بشكل حلو
بس لما شفت ردودكم وتميّز الموضوع وتثبّت برّدتولي قلبي
وحسيت إنو تعبي ما راح هدر ، والموضوع هاد حافز لمواضيع تانية إن شاء الله

" PaLeSt!Ne SouL "
قصة آدم وحواء موجودة بكل الأديان السماوية الأصلية ،
أما لإنه بوذي فهاي معك حق لإنو البوذيين في عندهم "شخص" إسمه بوذا يعتقدون أنه الإله
ممكن تكون القصة مفبركة وإشاعات أو تحليلات البعض
وممكن يكون هالحكي صحيح .. بس قبل ما يحوّل ديانته للبوذية
نوّرتيني يا قمرة ، وإن شاالله إزا لقيت جهازي الضايع ببعتلك ياه هههه
خصوصي إنو بنّوتي جداً ولونه فوشي .. حتحبيه كتير

.

" شهيد "
الله يعافيك أخوي
والله أول جهاز أبل عامل زي الريموت ، زراير بدون شاشة
لأ والزراير كمان بدهم عصاية لتعرف تضغط عليهم
الغريب في الموضوع كيف باعو منو 600 قطعة؟؟ هاد منظر بس شو فايديته؟
يمكن ع أيامهم كان بفيد

.

" عاشقة فلسطين "
تسلمي خيتو الله يعافيكي
دام الألق عنوانكم

لي عودة لأرد ع البقية

.

.