يا ريت ما ينحذف هالموضوع ،،،

[الغاضب]

السلام عليكم ورحمة الله وبركاته ،،،

بداية اخواني الكرام ، الله يمسيكم / يصبحكم بالخير ،،، كلُ حسب توقيته ،،،

استوقفتني مسألة خطيرة هذا اليوم ، وأنا أستمع الى احدى الإذاعات المحلية ( بالعربي يعني إذاعة غزة Fm ) فش عليكو مخبى ،،،

معلش يا شباب خلوني احكي بالعربي المشرمحي علشان أعرف افضفض عن اللي بقلبي ، باختصار يعني كنت بقلب باذاعات الراديو اليوم علشان أسمع أخر اخبار الأزمة التي حدثت في غزة والتي تحزن قلوبنا جميعا ، وفجأة سمعت تغنية على هذه الإذاعة الفاضلة ، الإذاعة المحترمة الوقورة ، فكركم شو هالاغنية هاد ،،،

والله العظيم اني خجلان احكي كلماتها ، لأنها أصلا ليست كلمات ، ولا حتى حروف ، يعني اغنية بتقول : ( بوس الواوا أحححح ،،، خلى الواوا دحححح ) ومش عارف ايش كمان من التفاهات هاد ، طبعا لا يخفى عليكم مين بيغني الاغنية هاد ، ملكة الأخلاق والاحترام ، الفنانة الكبيرة القديرة الملتزمة ( هيفا وهبي ) ،،، ما علينا

المهم اللي بدي احكيه ، مش عيب برضو على اذاعة تسمي نفسها اذاعة فلسطينية ، تبث برامجها من ارض غزة الصامدة ، الواقفة في وجه الحصار ، أن تبث اغاني هابطة وتافهة الى هذه الدرجة ، والله العظيم عيب والف عيب كمان ، لكن قالها المثل ( اللي اختشو ماتو ) ، يعني يا عالم خلصت كلمات الأغاني ، خلصت الحروف ، خلصت الألحان ، ولا شو القصة ، دخيل الله فهموني يا عمي ، أنا مجنون وانتو عاقلين ، بس حدا يحكيلي معقول هالاذاعة هاد فلسطينية ، معقول اللي بيشتغلو فيها ، عايشين ظروفنا ومعاناتنا ، معقول شايفين الأوضاع اللي حاولينا ، ما بظن ،،،

لا وغير هيك كمان ، يا ريت تسمعوا برامجهم التافهة ، يعني على سبيل المثال مرة بسمع للاذاعة هاد ، وانا ما بنكر اني كنت احيانا احط عليها علشان اسمع بعض الأغاني ، لكن مش هيك يا عالم ، والله مش هيك ،،، المهم مرة وانا بسمع كان جاي برنامج بيقدمه مش عارف واحد ولا وحدة اسمه او اسمها ( جياب ) ، يا حبيبي على هيك جياب ، أي والله البنات استحو يكونو هيك ، اللي بيحرق أكتر ، مش جياب ولا غيرو ، اللي بيحرق الأعصاب اللي بيتصلو فيه وبيدلعو ويتمسخروا ويتهلسنوا على الهوى مباشرة ، معلش يا شباب سامنحوني على الألفاظ هاد ، بس بجد اشي بيحرق الدم ، قال ايش : مرحبا معك دلوعة جياب ،،، وشو بتحبي تسمعي يا دلوعة جياب ،،، بدي اغنية فلان العلنتاني ،،، ولمين بتحبي تهديها ،،، بهديها الك انت وبس ،،، ولمين كمان ،،، بس الك يا حبيبي يا جياب وبحكيلك اني بحبك وبموت فيك ،،،

والله العظيم يا شباب هاد اللي صار ، وهاد اللي سمعتو بداني اللي حياكلها الدود ، يعني بجد شو اقول بالحالة هاد ، غير استغفر الله العظيم ، طيب يا عمي بتحبي اخينا جياب ، حبيه براحتك بس مش عالهوى ، مش عالهوى يا عالم ، والله الهوى اتوسخ باغانيكم التافهة وكلامكم التافه ، والله اللي بيسمع لهيك اذاعة بيفكر حالو بشيكاغو ولا في بيروت ، مستحيل يقول انه هدول اهل غزة المحاصرين ، الصامدين ... الخ ، مستحيــــــــــــــــــــــــــــــ ـــــــــــــــ ـــــــــل ،،،

على العموم بديش اوجع راسكو معي ، وبيكفينا اللي فينا ، ويا ريت هالإذاعات هاد ما تستخف بعقولنا وأذوقنا مرة تانية يا ريت ، يعني أنا مش ضد الفن نهائيا ، لكن في فن اسمه فن راقي ، فن محترم ، فن ملتزم ، يا عمي بلاش يكون ملتزم ولا محترم ، بس ميكونش تافه لهالدرجة ، يعني الكلمات لسه ما خلصت ، صدقوني لسه ما خلصت ، علشان نستخدم المصطلحات المريخية ( أححححححح و دحححححححح ) الله يهدي الجميع يا رب

ويعطيكو الف عافية يا أحلى شباب ،،، ويا ريت تسامحوني اذا خبصت بالحكي

أخوكم / الغاضب ،،،

[رفعت]

الله يعطيك العافية اخي الغاضب

كلامك مزبوط مية المية

وزي ما قلتها اللي اختشو ماتو

وربنا يرحمنا من هيك اذاعات

[~ | Mazaj]

هههههههههههههههههههه ..

لا يوجد تعليق لانك والله كفيت ووفيت اخي الغاضب .. ومع حقك تغضب ..
وما بتجوز الهم الا الدعوة بالهدايــــــة ^^

[anos]

هههههههههههههه
هههههههههههههههههههههههههههههه
هههههههههههه

[عاشق البندقية]

صحيح والله يا كبييير . الله يهديهم.ويستتر عليهم ويساعدهم....

[عاشقة الليل]

عنجد لا تعليق

يعني اخي هاد حال المسلمين كلهم
يعني هاي مش اول اذاعة ولا اخر اذاعة
والمطربات كلهم بتنافسو مين تنزل اكتر اغنية هابطة
وخلص قضية فلسطين عندهم صارت شبه منسية ..

الله يهدي الجميع

شكرا على موضوعك

[atallah97]

بسم الله

يا شباب أصبحنا نفهم تمامً أن معظم الشباب والفتيات يندفعون إلى هذه الأغاني الهابطة
ولكن نحن من لا يرضى بهذا الشيء ، ماذا قدمنا؟؟ وماذا فعلنا؟؟ لكي نعالج هذه الظاهرة
وهي استخفاف العقول والانجرار خلف نشاطات مشروع امريكي لتحقيق اهداف امريكية

والله يا جماعة اليوم الي بدو يفهم المشروع الصليبي ينظر لكندرة رايس شو بتقول عن الاسلام وبماذا توصفه في كاركاتير من موقع اسرائيلي
لم اتمن من رفع الصورة لا اعلم لماذا ولكن اجتهد لوصفه
تقف كندرة رايس وتشير غلى قنبلة يكتب عليها ارهاب الاسلام وتقول هذا هو اللوح(السبورة) الجديد ويجب علينا ان نتعلم درسنا بأقصى سرعة.

الترجة: ارهاب الاسلام وتصور الاسلام قنبلة موقوتة من الارهاب
ام ما يكتب اسفل الكاريكاتير هو: هذا لوح جديد وينبغي علينا ان نتعلم درسنا بأقصى سرعة

أرهبهم الله بأيدي المجاهدين يا رب العالمين

اخوكم ابوصلاح

[قمر الخليل]

والله معاك حق بكل كلمة قلتها

ولسا الشي الي بقهر اكتر واكتر لما تشوف شباب دلوعين مايعين ميتين بهيفا والحقيرات الي متلها

وبكل فخر بقولولك والله من حقنا نعيش

طيب بالله هاي عيشة؟؟ والله هادا الزمن زمن الفتن وهادا يا اخي من علامات القيامة يعني لا تزعل ولا تعصب كل واحد جايييه يومه وبكرا بنسير نضحك ونترحم على هيفا ان اجا حد اوسخ منها
والله حال المسلمين بتبكي والله ولو فكرنا شوي يعني ليش مافي قوة تمنع هالاشكال هادي من الظهور؟؟

ليش مافي قوانين تعاقبهم او تحرم القنوات والاذاعات الي بتحط متل هيك فن منحط

الله يرحم ايامك يا ماجدة الرومي ويا فيروز ويا صباح

والله يجيب الي فيه الخير ويهدينا ويريحنا من هالمصايب

[jikoo]

ههههههههههههههههه

أول شي أخي مشكور ع الموضوع

وإنتا أدرى بالفلسطينيه بدهم يعيشو ...

ومافيها شي أنا من عندي لو طلعوها لان هما بتصلو وبطلبو الأغاني

وانا شايف إنو إنتا معارض هالشي من ناحية التدين ...

وهادي هيفا وما أدراك ما هيفا ...

والمحطات الإذاعيه الها مواعيد ع راس الساعه أخبار وفي لاء

وفي برامج أغاني للشباب .. وإنتا مختار وقت غلط ...

انا من جهتي ما بيها شي ...

يبوس الواوا بطيب هههههههههههههههههه

ما عليه

هادي وجهة نظري

وربك يعدلها

[jikoo]

لان لو ضليتكم كاتمين ع نفسكم ...

مش كويس ...

لان بشوف أغلبية الشباب عندنا مـــعــــقـــــديــــــــــــــــــ ــــــــن

لانو مش عارف الصح من الغلط ...

والشباب شباب شو يسوو بهلبد الخربااان ...

اللي عايش بره فلسطين بفكرها جنه

اللي بيجي هان بعرف إنهم محرومين من كل شي

كل يوم والتاني المعبر مسكر ومش عارف ايش إلخ ...

وأخي ما بيها شي لو طلعو الأغاني

وهادا علشان تراضي الشباب

وإنتا أدرى بالشباب


يعني بدك تمنعهم يعملو كل شي ..