كيف بتذاكروا ؟؟

[نور الهدى]

السلام عليكم و رحمة الله

قبل كزا يوم شفت ع الاهداءات اخت بتحكي انه عندها امتحان و مش قادرة تحفظ

و انه كل ما حفظت درس بتنساه بسرعة

فقلت يمكن في مشكلة بطريقة الحفظ

و جاء الالهام ..

حبيت اطرح هاد الموضوع عليكم

//

كيف بتذاكروا ؟؟

و هل بتحفظوا الدروس عن ظهر قلب ؟؟

هل طبيعة الامتحانات و الاسئلة المطروحة هي اللي بتخلي الطلاب يكتفوا بمجرد الحفظ ؟؟

ولا الاسئلة بدها تفكير و فهم اكتر للدروس ؟؟

هل محيطكم مساعد على الدراسة ولا لأ ؟

//

انا بستناكم و رح احكيلكم كيف بدرس ^^

لكن بعد ردودكم

سلامي :)

[PaLeStiNe FlOwEr]

كيف بتذاكروا ؟؟
بدرس عادي.. يعني بدرس من الكتاب او من المذكرات.. عنا بالكويت اعتماد كلي ع المذكرات خصوصي اسئلة امتحانات السنوات السابقة هي كلها لازم توخديلك نظرة عليها.. وما بجيب العلامات الا اللي بيدرس من المذكرات اللي فيها أسئلة عشان تحليها لأنها هي اللي بتعود ع الحل ومن دراسة امتحانات للسنوات السابقة .. :ShababSmile233


و هل بتحفظوا الدروس عن ظهر قلب ؟؟
مستحيييييييييييييييييييييييييييل.. انا ما بعرف أحفظ ومستحيل احفظ الشغلة ازا ما فهمتها منيح.. وهي المشكلة بتواجهني بالامتحانات يعني بتلاقي جوابي صح بس لازم أنقص نص او درجة من السؤال لأني ما بكتب بالضبط بكتب عن فهمي..الا ازا المعلمة طنشت..


هل طبيعة الامتحانات و الاسئلة المطروحة هي اللي بتخلي الطلاب يكتفوا بمجرد الحفظ ؟؟
لأ.. لأنوا الأسئلة ما بتيجي مباشرة بيكون السؤال لافف وداير الدنيا فلازم تكوني فاهمة عشان تعرفي تجاوبي..

ولا الاسئلة بدها تفكير و فهم اكتر للدروس ؟؟
أكيييييييييييييييييييييييييييييد


هل محيطكم مساعد على الدراسة ولا لأ ؟
تقريبا.. يعني لما نكون ندرس ماما ما بتخلي خواني الصغار يتنفسوا بس احيانا بتفقد السيطرة عليهم..

[إسراء الفلسطينية]

وعليكم السلام ورحمة الله وبركــآته ..

//

مممممـ

موضوع الدراسة .. بيختلف من مكان لمكان ومن شخص لشخص

في بلاد بيعتمدوا ع الحفظ كتير

وهل شغلة ما بتعجبني كتير ..

لانو الطالب بصير كل همو انو يحفظ .. بس من غير ما يفهم يلي عم يحفظو !

//

من الصف الاول لهلأ .. بعمري ما بتذكر انو كان لازم أحفظ شي .. وأروح أسّمعو تاني يوم للمعلمة او للاستاذ

..

برأيي انو فهم الدرس أهم بكتير من حفظو ..

متعودة انو مثلا المعلمة تشرح الدرس .. فبتعطينا واجب انو نقرأ بالكتاب اكم صفحة ..

طبعا بتكون بتتعلق بنفس الدرس يلي شرحتو المعلمة

ولما نيجي تاني يوم بتصير تسألنا عن الدرس نفسو .. وبهيك بتشوف هيي شو فهمنا وشو ما فهمنا لحتى تفّهمنا ياه أكتر .. وبتكون سائلتنا بأول الحصة .. عندكم أسئلة عن اللي قراتوه لليوم ..

هل طريقة .. هي الطريقة يلي بدرس فيها

وطبعا كتابة النقاط المهمة بالدرس .. نقطة مهمة كتير .. وبتساعدني بشكل كبير لأفهم وأضل متذكرة يلي درستو ..

لانو الواحد لما يكتب يلي بدو يدرسو ويفهمو .. حيفهمو أسرع بكتير وحتقدري دايما انك ترجعي وتشوفي أهم شي بالدرس .. ان نسيتيه شي يوم :)

::

بس هيك ^ــ*

شكرا ع الموضوع الحلوو نور حبيبتي

[الحان الحرية]

أحسن دراسة و اللي بتتركز بالمخ هي مراجعة الدرس بشكل سريع بعد ما ناخدو ..!

بس الحمدلله انا كسولة مش دايما ً بعمل هيك ههههه

و دراستي بشكل عام بتعتمد ع الكتابة ..

بجيب دفتر و بلخص الاشياء المهمة فيه و لما اكتبها بتثبت بمخي غالبا ً ..

مرات برجع بقرأ من الكتاب الاشياء المهمة اللي تحتها خط ازا ضل وقت ..

و ازا كانت قصيدة بحاول أغنيها ..!

و مرات ازا شغلات بدها حفظ صم بربطها باشياء من مخي ..

اشياء بتشبهها ..

مرات بتكون بتضحك هههه

يسلمو ع الموضوع النايس =)