♪..مــــــآيــــك المــنــتــدى مـــع ~ شـهيـــد غ ـزة ~..♪

[أميـرة فلسطين]

المشاركة الأصلية كتبت بواسطة رأفت الذين يشاهدون محتوى الموضوع الآن : 6 ( الأعضاء 6 والزوار 0)
‏رأفت, ‏a7la sereen, ‏أميـرة فلسطين, ‏أع ـــشقـ أنفاسهـ, ‏السيف عدي, ‏حورية فلسطين+

ما شاء الله ما شاء الله

اهلا و سهلا ...

بلمهلي ههههههههههههههههههههه

[رأفت]

مسا الخير ...

اليوم اول يوم برمضان .... طبعا فطورنا كان شيح المحشي .. و دجاج بالفرن ..

اكلت لما استويت ... هههههههههههههه

اول يوم مر الحمد لله لا عطش و لا جوع و لا شي ...الله يعينا على صيامو ...

اما الان سيداتي آنساتي سادتي ...نعود و اياكم لمتابعة احداث اليوم الثاني من ..

مين قدك المايك معك ...........

و المايك طبعا مع رأفت ..

اخ رافت عن شو بدك تحكيلنا اليوم ..؟

اليوم بدي احكي عن حاجات كتير ..... اعطيني المايك و زحلق ..هههههههههههههههه

بدي احكيلكم اليوم عن رأفت ..(مواقف و احداث )

الاحساس بالذنب...

اصعب ما في الحياة ان تكون سببا في اذية شخص عزيز عليك ...

فما هو احساسك اذا كان هذا الشخص والدك ...؟؟

في يوم من الايام كنت اشتغل بالتجارة و كنت اتعامل مع تجار سوريين .. كنت اجيب البضاعة من سوريا

و ابيعها بالجملة .. لتجار المفرق في الاردن ..

و كنت على قد حالي متل ما بقولوها ( دبساتي مي ) يعني على الخفيف

كنت اتعامل مع تاجر من اربد و كان ياخد مني بضاعة ... كبر حسابو عندي و صار لازم استد فلوسي

طبعا ما كنت آخد من هاد الشخص اي ورق او ضمان .. لانو كان بينا ثقة ..

طالبتو بالفلوس تفاجات فيه انو بنكر اكتر من ثلثين المبلغ .. فكرتو بمزح ... لكن تبين انو بحكي جد ..

احساس بالصدمة والغضب .. تركتو اول يوم و حكيتلو راجع حالك ... رح اجيلك بكرة .. و كان الرد تاني يوم اكتر قسوة

خلاني افقد اعصابي و اتصرف تصرف ... ندمت عليه فيما بعد ..

دخل الرجال هو والموظف تبعو المشفى .. و انا اخدوني الشرطة على المركز ..الرجال كان يعاني من كسر في ايدو اليمين

و كان شاكين بارتجاج بالمخ .. لاني كنت اخبط براسو في الارض بدون وعي .. لاموظف طلع بنفس الليلة ما كان في اشي

كدمات بسيطة .. اخوي الكبير كان متابع الموضوع ..

انا كان همي انو ابوي ما يدرى ولا يصلو خبر ... تاني يوم حولوني على القاضي و حبسني لحين الاطمئنن على صحة الرجال

اجا اخوي تاني يوم و انا بالمحكمة وقلي انو الرجال صحتو منيحة لكن صعب التفاهم معو ومع اهلو بالوقت الحالي ..

اتفقت مع اخوي انو ما يصل الخبر لابوي ...و اذا سال عني انا بعمان عندي شغل ...

رحت على السجن ..و ما بعرف شو صار وراي ... كان يوم سبت .. تاني يوم الاحد بتفاجأ بنادو علي افراج ...

استغربت ... على بوابة السجن لقيت اخوي بستنى فيي على الباب ... و كان ظاهر عليه الزعل ... سالتو مالك شو في

و كيف طلعوني ... حكالي انو خوالي اتدخلو بالموضوع و حلوها مع الرجال و خلوه يتنازل ...

لكن ضليت حاسس انو في اشي .. اصريت على اخوي يحكيلي ... حكالي و فجعني بالخبر ..

قلي انو ابوي بالمستشفى بعاني من نزيف بالدماغ .. ادى لشلل نصفي ...

كيف صار هيك .. قلي انو عرف شو صار و اني بالسجن ... كيف عرف ..

سمع امي و هي تحكي مع اخوي و بتسالو عني ... و سمعها و هي تحكي انها رح تروح على خوالي و تخليهم يتدخلو ..

و يطلعوني تاني يوم ..ابوي كان يعاني من ارتفاع الضغط ...ما تحمل الخبر ...

الان ابوي راح عن الدنيا ... احساسي بالذنب ما فارقني لغاية الان ... مع اني بعرف انو ابوي سامحني ..

لكن انا في يوم من الايام ما رح اسامح حالي ..

[رأفت]

رجعتلكم ...

احداث جديدة و متنوعة اعزائي المستمعين .. تابعونا ...

و ما زال المايك انساتي سادتي معععععععععععع .. رأفت ..

المدرسة وايام الدراسة ...... ...

انا درست في مدرسة تابعة لوكالة الغوث ... كان اسمها ( مدرسة اربد الاعدادية الاولى ذكور )

درست فيها من الصف الاول ابتدائي لغاية التاسع ...

و طبعا كان جنب مدرستنا بالضبط سور بفصل بينا... مدرسة البنات ...

انا الحمد لله .. ما بدي اقول كنت من المتفوقين .. لكن الحمد لله

كنت معروف بين الاساتذة ... و تقريبا كل المدرسة بتعرفني ...

كان الي نشاطات كثيرة .. بالرسم.. الشعر .. المهرجانات .. الرياضة ... التمثيل باللغتين ... مخيمات كشفية

بطولة المدرسة ثلاث سنوات على التوالي .. بالشطرنج ...

ما عمري فزت في بطولات خارج نطاق المدرسة ...

كنت اجيب الرابع او الخامس او السادس ....

كانت تسع سنوات مليانة نشاط و حيوية ..

نهفات صارت معي بالمدرسة ..

كان عنا استاذ تاريخ و جغرافيا .. زكنت احبو كتير لهاد الاستاذ ...

و بنفس الوقت كان جارنا ...

مرة بعد ما خلصت الفرصة .. بروح على الحمامات ...و كانو طبعا كل طلاب المدرسة داخلين صفوفهم ..

لكن انا حظي التعيس خلاني اروح هناك ... لقيت كم طالب قاعدين بدخنو ...

فجاة بيجي الاستاذ بطب عليهم ... بتفاجا فيي اني معهم .. من بين الطلاب اللي كانو بمسكني من داني و بجرني على الصف ..

و طول الطريق و هو يخبط فيي شلاليط ..و كفوف على رقبتي .. و يقلي بتدخن ها ...هاي اخرتها ... و الله لاعدمك ..

و انا احاول اشرحلو لكن ما في فايدة ...و احلفلو .. وابدا ... سكر مخو ... هههههههههههههههههههه

و اكلنا يومها اللي فيه النصيب ..

موقف تاني ..

كنا بالصف و طبعا بعد ما يطلع الاستاذ بطلع واحد من الطلاب ... كنا نسميه عريف الصف

يكتب على اللوح اسماء الطلاب اللي بشاغبو ..

يومها انا ما عملت شي .. الطلاب قايمين الدنيا مش مقعدينها ..و انا قاعد ساكت ...

بيجي طالب قاعد وراي بحكي معي .. بقوم العريف بسجل اسمي وا سمو على اللوح ...

بفوت الاستاذ بقول اللي اسماؤهم مسجلة على اللوح يلحقوني ...

طلعنا لحقناه ... اخدنا على الصف التاني و قدام كل الطلاب اكلنا كل واحد عشرين عصاي ..

انا انقهرت ..

ضليت ورا مربي صفنا لحتى م شالو و حطني انا ...انا شو صرت اعمل صرت اول ما اطلع على اللوح اسجل اسمو ...

هههههههههههههههههههههه

عامل شي مش عامل شي اسجل اسمو .. حتى لو غايب برضو اسجل اسمو ...ههههههههههههههههههه

موقف تالت ..

ابن خالي كان معي بنفس المدرسة .. اكبر مني طبعا .. وسابقني بصفين ...

لما خلصت التاسع كان هو لسة بالسابع ...ما شاء الله عنو كان مخو نظييييييييييييييييييييييييييييييييي يف...ههههههههههههههه

طبعا خلال الفترة هاي صدف اني كنت انا وهو بنفس الصف ..اجانا استاذ مطبق من الجامعة ..

اما شو استاذ من الاخر ..تسلط على مين ؟؟ على ابن خالي ... لازم كل يووم يسلخو فلقة ..

بسبب بدون سبب ..يسلخو ...لازم كل يوم يطلعو على اللوح .. وطبعا ابن خالي ميييييييييييييييييييييييييح و لا حبة ...

الاستاذ يطجو ... ههههههههههه فاض الكيل بابن خالي .. و كان آخر يوم للاستاذ بالمدرسة .. يعني خلصت فترة التطبيق تبعو ..

خلاه ابن خالي لما طلع من المدرسة ويلحقو بالحجار ... هداك يركض و ابن خالي يركض وراه ... لوصلو لجامعة اليرموك ..

كان منظرهم بفرط ضحك ..

برجعلكم ... تعبت .........

المرة الجاي رح نحكي عن مرحلة الثانوية ......انشاء الله ........

[رأفت]

مسا الخير ...

و اهلا ومرحبا بكم اعزائي المستمعين ... في حلقة جديدة من برنامج ...

ميييييييييييييييييييييييييين قدك.. الـــــــــــــــــــــــــــــــــ ــــــمايك ... معك ..

و طبعا ما زال المايك مع ... رأفت ...

اخواني اخواتي ... رح نحكي اليوم عن فترة الدراسة الثانوية ..

الفترة هاي كانت كتير حلوة ... خصوصا انو كان فيها تغيير كامل في كل شي ..

المدرسة .. المناهج .... الاصدقاء ... المدرسين ... حاجات كتيرة ... اثرت على نفسيتي انا شخصيا ...

خصوصا انو كمان في صار عندك نمو فكري و صرت تفكر كرجل .. يعني مرحلة الطفولة راحت ...

يعني زادت المسؤولية ...

ثلاث سنوات مرو بسرعة ما حسيت فيهم ...........

لكن انا دخلت على المدرسة بنفسية دمار ... يعني لما تقضي 9 سنوات في مدرسة و بعدها تنتقل على مدرسة تانية ...

و كل شي جديد ... حتي ريحة المدرسة تغيرت علي ..... المهم اخدت وقت كبير لحتى تاقلمت ..

*******************************

مواقف طريفة صارت معي بالمدرسة ..


اذكر مرة كان علينا حصة رياضة ... و انا كنت مضرب انا وكمان ثلاث شباب عن الحصة ....

لانهم ما بخلونا نلعب تنس طاولة ... و جايين احنا التلات بدون لباس رياضة ..

اجا استذ الرياضة حكى اللي مش لابس رياضة يطلع برة ...

اجينا سحبنا حالنا و طلعنا ...

كان في عنا برة المدرسة مطعم ... كان يبيع ساندويش و عصير و بسكوت .. بالاضافة للدخان ...

طبعا انا كنت ايامها ادخن على الخفيف ... وفي واحد من الاتنين اللي معي بدخن و واحد لأ ..

و احنا قاعدين بندخن ... طب علينا استاذ .. الله يسهل عليه اسمو قتيبة اللحام ..

كان مناوب ..

شوف لتشابه بين القصة و انا بمدرسة الوكالة .. و بين هاي القصة ... بس هون انا متورط .. ومذنب ...

المهم قلنا الاستاذ تعالو وراي .. دخلنا المدرسة و ضلينا رايحين على الساحة ... قلنا الاستاذ وين ...

تعالو على المدير ... دخلنا على المدير ... كان اسمو محمود البطاينة ... سال الاستاذ مالهم .. قلو كانو يدخنو بالمطعم و عندهم حصة ...

اجا المدير خبطنا كل واحد كف .. اما شو كف ...

اجيت انا زي الابطال ... قلتلو استاذ احنا صحيح كنا ندخن ... بس احمد ما دخن معنا ....

اجا المدير بقلي و انتا ليش بتدافع عنو ... قلتلو استاذ لانو حرام ما كان يدخن ... اجا المدير سالو كنت تدخن

قلو لا ما دخنت ... قلو طيب ليش ما بتدافع عن حالك ليش بتخليهم يحكو عنك ؟...اجا مسكو و خبطو كمان كف و قلو هاي

اخر مرة ..و قلو روح ... طلع احمد ... اجا المدير قلنا و انتو ؟؟.. قمت انا قلتلو استاذ خلص هاي اخر مرة ما رح نعيدها ..

اجا حكى لاستاذ قتيبة اكتب عليهم تعهدات ....

بعد ما وقعنا على التعهدات ...ان صرت اضحك .. يقولولي الشباب مالك ...

قلتلهم طلعنا بكف و تعهد ... الا احمد لانو ما كان يدخن طلع بكفين و تعهد ...هههههههههههههههه

شوفتو شو فوائد التدخين ...........هههههههههههه

و كتير مواقف .... شو بدي اذكر لاذكر ...

بس كانت مرحلة كتيركتير جميلة ...

*********************

نتواصل بعد الفاصل ...

[رأفت]

فترة الدراسة بالمعهد ... طبعا من اجمل و احلى ايام حياتي ........

لا يمكن انساها ...

كنا ناضجين ... فهمانين ... و كنت و الحمد لله من المتفوقين ...

الاول على الدفعة 3 سنوات متواصلة ... نظريا و عمليا ...

كانو بدهم يعملولي تمثال ... بس انا ما رضيت ...هههههههههههههههههههههههههههههههه هههههه

نهفات ...مقالب ... ضحك ... لعب ...


احلى شي مرة رحنا رحلة على العقبة ...

حطونا في اسكان هناك اسمو الرابية ...

كانو كل 15 بغرفة ...

و صدف اني آجي انا و كل صحابي اللي معي بنفس الغرفة ...

السراير ... المفرش تبعها بنضب متل الاوكورديون ... صرنا نشيل المفرش ... و نخلي الفرشة لحالها ...

و يجو من بعيد و ينطو على التخت ... ما يشوف حالو الا هو و الفرشة خابط بالارض

ههههههههههههههه

و الي نحطلو عيدان كبريت و اللي نخربش على وجهو ...

انا شو عملو فيي ... حطو في ايدي طين .. و نكشو مناخيري ,,..

صحيت لقيت وجهي مطين بطينة ....ههههههههههههههههه

ذكريات .. قديش كانت رائعة هديك الايام ...

خليكم معنا رح نتواصل معكم ...

راجعين ...

[رأفت]

كيف تعرفت على المنتدى ...؟؟؟

كنت عم بدو في جوجل على شغلة ... مش ذاكر بالضبط

و دخلت على المنتدى اخدتها منو ... و سجلت فيه .... و استمريت فيه

لاني حبيتو و حبيتكم و حبيت الجو اللي هون و العلاقة اللي بتربط بين الاعضاء ...

كل هاد خلاني اتشجع و استمر و الصراحة لما اضطر ابعد عنو ... اني بدايق

*******************

بدي احكي عن بعض الاعضاء اللي تعرفت عليهم و اللي بحبهم ... و صارت تربطنا علا قة صداقة جميلة ..


رح ارجعلكم ... بدي ارتاح شوي ...

[رأفت]

مسا الخير صارت الساعة 6:30.......

ضايل نص ساعة على الفطور ...

بدي اروح اروح ...

و الله من الصبح معدتي بتوجعني ما بعرف مالها ...

كنت مفكر اروح على المستشفى ... بس خفت انهم يخلوني افطر ...

بدي اروح بعد الفطور انشاء الله...اذا ضل الوجع مستمر ...

حورية جيبيلي معك اطايف ... و بدي تكوني انتي اللي عامليتهم

انا بحب الاطايف بئشطة .. مش تجيبيهم بجوز .. بخبط الصحن براسك ..

ماشي طنجرة العصر ...

[رأفت]

الذين يشاهدون محتوى الموضوع الآن : 2 ( الأعضاء 2 والزوار 0)
‏رأفت, ‏:: فتى الانبار ::

[رأفت]

مسا الخير...

انشاء الله .. افطار هنيء و صيام مقبول باذن الله

اليوم فطرت مقلوبة ... و شوربة وسلطة

بنرجع مع المايك ...

انا ما حكيتلكم عن امنياتي بالحياة ..

اول امنية ...

انها تتوحد امة الاسلام تحت راية لا اله الا الله ...

الامنية التانية .. اني ازور فلسطين ... او بالاحرى مش زيارة ...عودة تامة ..

الامنية التالتة ... اني اعيش حياة هادئة مستقرة ...

الامنية التالتة ... رحت عمرة .. و بتمنى اني اروح كمان مرة ... و ياريت حج ...

الامنيات كتيرة .. و بتمنى انها كلها تتحقق ...

هادي الامنيات ...

الاحلام ....

بحلم انو انجح بشغلي و يكبر و اكبر معو و اعمل شي يكون مفيد للناس ...

بحلم تصير عندي الامكانيات .. لحتى الافكار اللي براسي اترجمها على الواقع ...

برجعلكم ... بدي اطلع عندي شغل هلا ...

انتظروني

[رأفت]

رجع رأفت و اكيد حامل معو موضوع جديد بدو يحكي فيه ...

ايوا رافت عن شو بدك تحكيلنا هلا ...

هلا بدي احكي عن الاعضاء و رايي فيهم و كيف تعرفت عليهم .. و بس الله نبدا ...

بمين بتحب نبلش رأفت ..

بدي اربلش بحبيب قلبي جيفارا ...

جيفارا نابلس ..

من اميز و اروع و الز الشباب في المنتدى ..

شب كتير جنتل و مرح و قلبو طيب ...

كان الي الشرف اني اتعرف عليه و تصير بينا مودة و صداقة ..

و انبسطت كتير لما اخدت ايميلو وصرت احكي معو على المسنجر ..

و اتعرفت عليه اكتر و اكتر ...

طموح و ذكي ..

شاعر لا يستهان بقدراتو ..

محبوب من الجميع ... و الكل بحترمو ...

من فترة ما شفتو بالمنتدى ... وما بفتح ايميلو ...

بتمنى يكون بخير .. و بقولو كل عام و انتا بخير ...

طمني عنك ...