اختي حنان بحييكي على هذا الموضوع
قضية الاغتصاب للاسف انتشرت بسرعة في مجتمعاتنا بعد ما انتشرت بشكل فاحش في الغرب
و هون في فرنسا شفت العديد من البنات اللي تعرضن لاغتصاب
و مش بالضرورة يكون الخطأ من البنت او بسبب لبسها ... احيانا في بنات صغار ما تعدوا العاشرة تعرضن لهالشي
المشكلة تتفاقم لما يكون المغتصب احد من العائلة او من احد الاقارب ،، ما يعرف بزنا المحارم
البنت في هاي الحالة مش ممكن تحكي او صعب جدا تحكي
و اكيد بتكون في آثار نفسية صعب جدا تنمحى
رح احكي عن تجربة .. و هاي اول مرة احكي فيها هذا الشيء و ما حدا بعرفه ابدا
قبل ما نيجي لفرنسا كانت امي بتشتغل طول اليوم .. و انا و اخواتي عنا مفاتيح البيت بنرجع بعد المدرسة وقت الغدا لما بتكون قدرت تحضر اكل قبل ما تروح للشغل
و اذا ما في بنروح لبيت جارتنا و نتغدا عندها ..
مرة كنت عندها زي العادة و اخواتي كانوا بالمدرسة لسة
جارتنا كان الها ابن عمره هذاك الوقت يمكن ما تجاوز الـ 19
راحت هي تنام و تركتني بالمطبخ اتغدى ... و ابنها دخل المطبخ و بدأ يعمل حركات غريبة
بعدين حاول يقرب مني ... عرفت انه في شيء مش على بعضه ... ما بدي ادخل في التفاصيل
لكن باختصار ممكن تقولي انه تحرش ..
الحمد لله
ما تطور الامر لاغتصاب لأني من الرعب بلشت اصرخ و هربت من المطبخ لغرفة امه
عمري هذاك الوقت ما تجاوز العاشرة ... طبعا ما حكيت هالشي لحدا ... لا لأمي ولا لوالدي
لذلك انا ضد شغل المرأة اللي عندها اولاد ... ليش تروح تشتغل و تترك الامانة اللي في عنقها لشخص آخر
ما ابالغ لما اقولك انه ممكن اسامح امي على اي شيء ... الا قصة شغلها برة البيت
كنت بتمنى ارجع من المدرسة و الاقي امي بالبيت و تاخدني بحضنها و تحسسني بالامان
للآن بكره هذا الشب و نفسي اقتله ... والله لو بطلع بايدي لأقتله ..
كنت لما ارجع للبيت بروح ركض ع البيت خوفا من اني اقابله صدفة و يحاول يعمل شيء اكثر من مجرد التحرش
و كنت خايفة على اخواتي اكثر ... رعب غير طبيعي
لما بتطلع وحدة فيهم بضل خايفة و اصر اني اروح معها لأي مكان بتروحه بس عشان اكون متطمنة
و لحد الآن بخاف انه هالشي يحصل معاهم برة .. ما بطمن لحد ما يرجعوا و اشوفهم مبسوطين
بالنسبة للآثار النفسية اللي عانيت منها ... انمحت مع مرور الوقت ... عالجت نفسي بنفسي
انا على يقين اني ما اخطأت ... و مش مستعدة احمل نفسي وزر ما عملته ... و مش مستعدة كمان ادمر حياتي المستقبلية عشان شخص نذل ..
بعيش حياتي بشكل عادي جدا و لي طموح كثيرة ...
و الشيء اللي ما رح اوقع فيه هو اني مستقبلا ما رح اترك اولادي لحالهم عشان شقفة وظيفة ...
اعتبر هاي التجربة درس تعلمت منه و رح يمنعني من الوقوع في خطأ وقعت فيه امي ..
اعتذر على اطالتي لكن كتبت كل اللي كان ببالي
و يمكن ارجع بعد ما اشوف تفاعل
^^
يسلموا اختي خنان