[مؤيد]

وهلأ رح احكي عن حالي ...

طبعاً بما انو كنا مغتربين ، نشأت بدولة قطر ، هناك عشت طفولتي فيها وترعرت ، كنا طول السنة هناك ، وبس يجي الصيف وموسم الاجازات نجي على الخليل نقعد 3 شهور ونرجع على قطر عشان الروضة والمدرسة وشغل الوالد وهيك يعني ....

كنت في طفولتي وسط لا مشاغب ولا هادي ، كنت ناصح وسمين ههههه وخدودي بارزين من النصاحة ، بس هلأ وين انا من زمان طبعاً هلأ غير وزني قريب على 70 كيلو بس ...
المهم كنت أنا الأخير بين اخواني ، الي اخت وحدة والباقي اولاد وأنا أصغرهم ولحد هلأ انا أصغر اخوتي جميعاً ....
ما كنت احب قطر وانا صغير ، كنت استنى طول السنة بس نروح على الخليل عشان العب مع الي قدي كنت كتير احب الخليل لإنو الخليل زمان والوضع زمان كان منيح مش متل هلأ ... وكنت بس نرجع على قطر اضل طول السنة اتذكر زكرياتي بالخليل والأيام الحلوة ....

التحقت بالروضة ، وبذكر اني كنت ابكي كتير في الروضة ، ما كنت احبها ههههه ، ما بعرف لإنو كنت متعود على امي وانو اضل عندها ، بعد الروضة تغير الوضع علي وطلعت من البيت من عالم الأمومة لعالم تاني برا البيت ، وكنت ما اصدق امي تجي تاخدي من الروضة واروح واضل عندها لإنو بحس دائماً بطمأنينة معها وبس تتركني كنت ابكي كتير ، يعني صدقوني بذكر كل يوم بالروضة كنت ابكي ههههههه وبدي اروح وما بدي الروضة ...
واسم الروضة متذكره ، اسمها روضة الايمان ^.^ ...

ومرحلة تعليمي الابتدائي كان في قطر ، وكذلك المرحلة الاعدادية لحد ما وصلت الصف الثالث الاعدادي يعني صف تاسع ، من الصف الأول للسادس كنت في مدرسة خاصة وكانوا اغلب المدرسين مصريين بس متدينين يعني ، وكنت مبسوط فيها كتير ....

بعدها انتقلت للمرحلة الاعدادية انتقلت لمدرسة جديدة ، ما حبيت هالمرحلة ولا هالمدرسة طول ما انا فيها ، طبعاً مدرسة حكومية كانت ....

وفي عام 1999 قررنا نرجع على فلسطين ، لإنو طولنا بالغربة واهلي صار وقت انهم يرجعوا على بلادهم ، فرجعنا وكانت الأوضاع قبل الانتفاضة هادئة وكان الوضع افضل وهادا الي شجعنا وشجع غيرنا يرجعوا على فلسطين ....

وفش كتير شوية شهور الا ولعت الانتفاضة - انتفاضة الاقصى - عام 2000 وبلشت الأمور تزداد توتر ، كانت بالفعل فترة ما بنساها بحياتي ، كنا نشوف الموت بعيونا وقريب منا ، عشنا بأجواء صعبة كتير وكان الاحتلال يقتل ويدمر ويجتاح ..

التحقت بمدرسة ثانوية هون بالخليل وكملت للتوجيهي وبعدها دخلت الجامعة والحمد لله اخترت تخصص كنت حابب ادرسه ، وخلصت جامعة وبدأ مشوار طويل من البحث عن عمل في ظروف اقتصادي سيئة جداً هون بالضفة ولحد هل الأمور ما تحسنت ...

وعندي طموح اني اكمل ماجستير ودكتوراه بس لسه مش هلأ ، لقدام شوي أو ما بعرف يمكن عن قريب ...

يتبع ...