[نسرينا الفلسطينيه]

يا هلا باخي مؤيد^^

اولاً..

كلامك الي كأنو شايفني عم دافع عن ابومازن وواقفه مع اعمالو وسياستو..

بالنسبه لابومازن او غيره..قلت هالكلام قبل وعم عيده..الشغله واضحه وما بدها تنين يحكو فيها..ابومازن رأس للفساد كبير..

ومن اول ما استلم السلطه قلت الدنيا خربت!!

فما تحدثني ع اساس انو انا وحده من اتباعه:)

كلامي واضح..وكل الي حكيتو وجه نظر من جهة بعيده نسيبياً عن السياسه

فيك تقول جهة عاطفية ومحايده بنفس الوقت..

مو محايده ضعف مني..لأ طبعاً

بس لما انظر بشكل عام للموضوع خلاصه كل الي عم بصير حرب بين الفلسطينيه وفتنه كبيره بتصير بينهم..وفيه دماء بريئه راحت كتير بسبب هالكلام..

هاد الشي الي حكيت فيه..

والي باع فلسطين العرب قبل الفلسطينيه..وكلنا منعرف هالحكي..


وكلنا ضد الاتفاقيات والمؤتمرات الي بتصير..

بالنسبه انكم غلطو انكم سكتو زمان..

في عهد احمد ياسين ما اظن كان سكوته غلط..بالعكس برأي هاي حكمه منو..لانو حافظ على دماء شعبو:)

لانو العنف مش الحل لكل شي.. ولا كل هالحروب الي قايمه ومو قاعده..

لحد ما صرنا فرجه ومضحكه لليهود وبتشمتو فينا..

اسرائيل طول عمرها كانت تحاول تشب نار الفتنه بين الفلسطينيه..لتشغل المقاومه عنها وتاخد راحتها ..بس عمرها ما قدرت..لانو كان فيه قاده واعين لكل الي عم بصير..

ثانيا..

لازم نعرف ليش هدول الجماعة متلا ً بتفطر ؟ ... أكيد قلة دين ، لإنهم ما بركزوا على الدين بحياتهم أو نهجهم السياسي ..... هيك هم وطريقة تنشأتهم لأبنائهم .....

حماس متلا ً ليش ما بنشوف أعضائها مفطرين ، لإنو حماس بتركز في تنشأة أبنائها على الدين .....

فيعني مستحيل ما يكون في فرق بين الي بتربى على الدين والي بتربى بعيد عن الدين .... في فرق أكيد في السلوك والتصرف ، والي برتكب حرام ، وبستصغر الحرام ، مستعد يرتكب اكتر من حرام ....

احنا كلنا مسلمين..

الاسلام ما نزل لحماس بس..

حماس هيي الي اولادها مربين ع الاسلام وغيره مش متربي!

طيب انا مش حمساويه..هلا صرت مش مسلمه وما بعرف في ديني وبفطر برمضان؟

هاد كلام مو منطقي بالمره..

هاي نقطه مهمه لازم تراجع حالك فيها شوي..

هالشغله عندي فيها انتقاد كبير مش الك بس لكل الحمساويه ..

لاحظت كتير من الحمساويه..بكفرو الناس ع الطالع والنازل..يعني الي مش حمساوي هاد كافر

ما بعرف هالمنطق من وين جايبينو..

وازا انتي مش حمساويه..ما النا كلام معك..

وانا بحكيلك من تجربه شخصيه بهيك موضوع..


مع اني من الناس الي بحب اسمع من كل الاطراف واشوف مين الي بعمل صح ومين الي بعمل غلط..والدليل هيني عم بسمعك وبشوف رأيك ومنشوف دلائل..

طبيعتي ما بحب اتحزب لحزب معين..بحب اكون فلسطينيه بس..وبنفس الوقت لما اشوف فتح ولا حماس عملو شي صح بوقف معهم..وازا عملو شي غلط بحكي هاي الحركه عملت غلط..

متل هالخبر الي انت حاطو هلا..اكيد بستنكر هالعمل..بس شو الدليل انو هدول فتحاويه الي عملوه

ليش ما يكونو مندسين وجاين يحط هالتهمه ع فتح..ويشعلو الفتنه بزياده!!


هالمره الواحد معمي عن الصح من الغلط..لانو كلا الجهتين مو مقصرين ببعض

يعني بتفوت منتدى حمساوي ..بتلاقي كل ادله عندهم رهيبه ضد فتح

بتفوت منتدى فتحاوي..بتلاقي ادله عندهم كبيره ع حماس..

واحنا عايشين بره فلسطين..هالشي بضل غامض قدام عيونا

فبطلت اسمع اي طرف من الاطراف..لانو كل واحد عم ينشر غسيل التاني

مشان هيكـ رح ضل محايده^^

الفلسطينيه نسيو فلسطين..صدقاً هالكلام خيي مؤيد..لانو شغلهم الشغال صار فتح وحماس

نقاشاتهم وحواراتهم ومظاهراتهم حتى النك نيمات الي ع المسن بتلاقيها حزبيه..

قليل لتلاقي هلا حدن بحكي بروح بدم نفديك يا فلسطين:)

الكل هلا نموت وتحيا حماس او فتح :)

هالشي بحزني جداً

يعني هلا انتا رح تجيبلي ادله وبراهين وشغلات كتير اكيد

بس ابعد عن هالكلام كلو وتأمل بالجانب الي عم فكر فيه رح تلاقي في تغير كبير بعقول الشعب صار وعم بصير..

اذاً اسرائيل نجحت تشبكنا ع بعض وتنسينا فلسطين :)

فلسطين الي نخلقنا نهتف الها ونفديها بدمنا

هلا منهتف لحزب ومنفديه بدمنا

حتى غــزه صارو بدهم يغيرو اسمها وتصير حمسستان!!

طيب مثال بسيط هلا فوت اي عيله فلسطينيه..بتلاقيهم محاربين بعض..لانو هاد فتحاوي وابن عمو ولا اخوه حمساوي مثلاً!!


وكل عيله فيها الحمساوي والفتحاوي والكل طوشهم واصله اخر الدنيا وصارو يكرهو بعض مشان هالموضوع..

وصلة الرحم وقفوها طبعا مشان فتح وحماس ومشاكلهم..هالشي انا شايفتو كتير صاير واكيد عندكم هيك؟


فما بالك الجيران والاصحاب وغيره كل اتأثر..

اللعبه اكبر من الي عم يتخيلو الكل..

ع العموم

الله يجيب الي فيه الخير لهالشعب..الواحد صار يخاف من الي جاي كتير..والي جاي اكبر ولازم نكون واعين لشغلات كتيره

احترامي الكـ اخي مؤيد