[.:.!دموع الرحيل!.:.]

بسم الله الرحمن الرحيم

أولاً يا أخــتي رح أحكي من منطلق اني من فلسطينية لبنان

ويمكن يكون وضعنـا بيشبه ولو القليل وضع الفلسطينيه الي داخل وطنــنـا

يعني فلسطيني حاصل على الجنسية الإسرائيليه = نوعا ما حاصل على حقوقو كإنسان

فلسطيني في لبنان حصل على الجنسية اللبنانيه = توطين = حاصل على حقوقو كإنسان

وانتي أكيد بتعرفي مدى معاناة فلسطينيي لبنـان ،،

ومدى القهر والحرمان الي عايشين فيه كحال اي فلسطيني وين ما يروح

بس يمكن بلبنان أزود شوي ^^

بس مع هيك,,

جنسيتي وهويتي الفلسطينيه ما ببدلها بالدنيا كلهــا

ولو على موتي

لو بدي اقعد بدون اكل وابوي بدو يقعد بدون شغل

واخوي ما يلاقي وظيفة

كل هاي الامور ما بتخليني اني مجرد الفظ ولو حتى بالكلام

كلمة اني يا ريت اتجنس !!

موتـي أهون عليي من إني الفظ هيك كلام

قضيتـنا .. جزء كبير من ديننا

ولما بدي احس اني اتخليت عنها ولو شعرة

واني ضعفت ..

معناها في خلل كبير صاب إيماني بربي

والله يبعد عن شر وساوس الشيطان

يوم الي الدنيا وزينتها بدها تدخل وتملا قلبي

وأبديها على قضيتي !!

الموت اشرف الي .

وهون يمكن بسمع كتير

الكل بيقولو بوجي يا ريتك تاخدي واحد لبناني

مشان ولادك يطلعو لبنانيه !!

وبفكروا انهم بيدعولي دعوة غير شكل

واني رح اتشكرهم عليها !!

هاي نصيب طبعا ..!!

أمـا بالنسبة الي ..

غير فلسطيني ما بتمنى أخد

فلسطيني القلب ووالقالب مشان ولادي يكونو فلسطينيه

أزيد فيهم عدد انفار الشعب الفلسطيني

ويكونو كيد وقهر لأعدائنا

ما في حدا بموت من الجوع !!

وربنا ما ببينسى حدا

ومتكفل بكل واحد فينـا

بس قضيتـنـا إذا نحن أصحابها اتخلينا عنها بهالسهولة

مين رح يضل الهـا ..

وليش أصلا لأحرم حالي من شرف كوني فلسطينيه ^^

فلسطينيتي شرف كبير بحمـد عليه ربي بين كل الوقت والوقت

وكل ما عذبوني أكتر لأني فلسطينيه

بحبها أكتر وبتمسك فيها أكتر :)

والله يثبتــنـا ويقر عيننا بوطننـا

وعمرو صاحب الحق ربنا ما بضيعو

وكمان نفس الشي .. اظن اي إنسان عايش جوا فلسطين

ولو شو ما شاف

الي قلبو مليان إيمان برب العالمين وبعدها بصدق قضيتـنـا

ما أظن يحكي غير هالحكي !!

لكن ذخيرتنـا إيمانا بالله تعــالى

<><><>

اريد ان اعرف ما هي اكثر المشاكل التي تواجهوها انتم الشباب الفلسطيني?

ما في أكتر منـهـا هون !!

يعني 75 وظيفه ممنوعه عن الفلسطيني

ان شاء الله يكون دراس 10 سنين طب

بالنهايه ممنوع يفتح عيادة بإسمو

ومجبر يكون نيرس تحت إيد دكتور تاني

يمكن يكون الفلسطيني أشطر منو بمليون بمرة

مع العلم روحي شوفي الجامعات

كلها فلسطينيه ومن المتفوقين وعشاق العلم

لكن كلهم مصير واحد ..

بخلص بس ما في شغل !! >> ممنـــــــوع <<

+ ممنوع يسجل البيت بإسمو

يعني ممنوع يشتري بيت مضطر يعييش بالأجــار كل عمرو

وان اشترى ولا بد

البيت بيتسجل بإسم اي مواطن لبناني مش باسمو هوي

حتى خط التلفون ممنوع ينكتب باسم شخص فلسطيني...

بتكوني مركبة خط تلفون على اسم بيت جيرانك مثلا :)

غير هيك المغص الي بيصيب البعض لما يعرفو انو الي قدامهم فلسطينيه ههههههههههههههه

لكن طبعا في ناس فيهم خير .. الدنيا ما بتخلى من ولاد الحلال

وهلم جر من الظلم الي عايش في الشعب الفلسطيني هون ..

وأولهم سكان المخيمات المغلوب على أمرهم

<><><>


هل بحسب رايكم ان نسبه المتعلمين مننا قلو بسبب الاحتلال ام ماذا؟؟

والله بالنسبة لفلسطين ما بعرف !!

لكن من ناحيتي بشوف انو كتر خيرهم

رغم كل الي بصير عندهم ..

وهني بهالشكل عشاق علم ..

يعن بسمع سمعيات والله بترفع الراس

ومعروف بالعالم كلو

عن الشعب الفلسطيني ،، انه شعب بيتلهف للعلم

ومثابر ..

غير عن اوقات كنت أسمع بالمئات من الأسرى

قدمو توجيهي من جوا سجونهم

ونجحو المئات ..

<><><>

يعنــي بالنهايه ..

جنسيتي وشعبي أكبر شرف برفع فيه راسي

بعد ديني وإسلامي

والناس الي جوا وطني الي ما عرفت قيمتو واسائت اله ولقضيتي

ما بيطلع عملهم شي

قدام اخلاص وعظمة

أصغر طفل فيه عرف قيمة وطنـي

وقدم إلـه

أسفـــة كتير ع الإطـــاله

لكن والله لو لسه بدي أحكيلك الي بقلبي

لأملي الصفحات كلهـا

قضيتنـا عظيمة ..

والكلام فيهـا عظيم

وبحاجة لشعب عظيم مثل أغلبية شعبي الحبيب

يعطيكِ الف عافيه حبيبتي