[ابوخضر]

نحن مع الزيت
والزعتر
مع الزيتون
مع هالشعب ل معتر
مع المفلس ليوم الدِين
ومش مع صاحب الملايين
مع الفلاح
مع العمال في المحجر
مع الحلويين
في الشارع والحارة
وفي البساتين
ومش مع حامل الخنجر

ولا نهتف للرّيس
ولا لوزيرو ل مهلس
ولا حتى للمخاتير
لا نهتف لحكومه
ولا لشلة ملعونه
او زمرة من الخناشير
نحن الشعب ل معتر
من اطفال ازقتنا
ومن زهرات تلتنا
وحجارة حكورتنا
نعلن إنـّا منسيين
من خطابات زعامتنا
ومش ناسين
إنـّا شلة مساكين
تحت الخوصة والسكين
وقرابين لأمتنا
مع ان الجرح يقهر
ويفسخ صخرة المرمر
والصوان
وإن القاتل تجبر
والطغيان
ما يوقف على الحاجز
وما رده جدار الفصل
ورقبتنا ع حد النصل
وتحت المدفع الجنزير
لا تستغرب القصة
والبعصه
إن القائد الهمام
ابو فلان وشيخ منسف وأبو بطين
قالوا عنـّا معترين
ومغبونين
ومنبوذين
وقالوا أكثر وأكثر!!
وشو بتقول يا بن شعب الجبارين؟؟
ويين غضبك ويين قهرك
وليش قهرك ما يتفجر.؟؟