[.:.!دموع الرحيل!.:.]

رح أبدأ بنفسي ،،

لأنه الموضوع بعتبره من اجمل الأشياء الي صارت بحياتي

بداية لعمر ال 20 سنة وانا ما بعرف شي عن فلسطين للأسف

غير الي بسمعه من ماما واهل ماما عن اهلنا الي بفلسطين بالقدس وعن مدى حبهم لفلسطين

بس ما كان كتير ينحكى بهالموضوع

يعني بابا من متابعين الشؤون اللبنانيه اكتر ووضع البلد هون وهيك ،،

وما كان في جو حواليي يخليني اقدر احب فلسطين متل ما لازم

خصوصا أنو نحن ساكنين بمنطقة عاديه وبين لبنانيه

فكان الإنخراط شبه تام

وما اعرف اي شي عن فلسطين

ولما اسمع عنها احسها غريبة عني

لحد ما دخلت الجامعه

واتعرفت على بنات فلسطنيات من صيدا ومن الجنوب

من مخيمات عين الحلوة ومن مخيم الرشيديه الي بصور

كنت دايما الاحظ عليهم كل حكيهم عن القضية وبصراحه ما اقدر افهم عليهم

وبنفس الوقت كانو ينقهرو مني لما يشوفوني لا مبالاة

لحد ما صار عندي شوق اني اسمع كلامهم واعرف شو سر حبهم لفلسطين بهالشكل

وشو هي هالقضية الي دايما بحكو عنها

صرت اسأل واتواجد معهم لأسمع وأعرف اكتر

واروح مع صاحبتي عالمخيم لأشوف الجو الفلسطيني

بعدها ركبنا النت ،،

أخدتو وسيلة للبحث عن كل شي ما بعرفو عن فلسطين

وشوي شوي لحد ما صارت فلسطين هي كل حياتي

يمكن حبي لوطني أجا متأخر لكن المهم اني عرفت هالكنز

والله ما يحرمني هالنعمه ابداً

هون حابه انبه لشغله ،،

اديش دور الأهل مهمـ، بزرع حب الوطن بقلوب الأبناء

وحثهم على التمسك بالقضية

وكمان اديش دور الرفقه والاصدقاء مهم جداً

وكيف إنو حبي لفلسطين

لازم انقلو لكل صحباتي

والواحد يمثل فلسطين بأخلاقه وتصرفاته

ويبين مدى أهمية القضية من خلال التمسك بالثوابت

ويترجم الواحد حبو لفلسطين لأعمال

حتى الي حواليه يتشوق يعرف شو هي فلسطين وشو هي القضية ....

وبس ..

طولت عليكم

بس هاي هي قصتي مع حبيبة عمري :)