[حسام المصرى]

الأنوثة نعمة غالية..ربنا اللى إداها ليكى..

و بإيديكى تحفظيها..او تضيع من بين ايديكى..

احمدى ربك تملّى..و اشكرى نعمه عليكى..

اوعى تفتخرى بجمالك..كله زايل من عنيكى..

الانوثة مش مجرد..حبة أحمر ع الشفايف..

الأنوثة مش إنك تهوسى عقل اللى شايف..

ابعدى عن كل شبهة..دول بناتنا كتير عفايف..

الزهور بتكون جميلة طول ما لسه الشوك حاميها..

بس لو يوم شوكها سابها..ألف إيد تتمد ليها..

خلى نورك جوه قلبك و الإيمان هيكون ماليها..

خلى مكياجك إيمانك..مش باحمر ع الخدود..

طهرى دايما فى قلبك..بكرة نصبح أكل دود..

مش تعدى اى كلمة..قفلى كل السدود..

عطرى روحك بذكرك و ارضى ربك و امشى راضية..

لو فى مرة حد عاكسك..مش تردى بكلمة فاضية..

اوعى تدى فرصة ليهم..و ادى ليهم ضربة قاضية..

الانوثة مش بإنك تهوسى عقل الشباب..

الأنوثة هيا إنك تحمى نفسك م العذاب..

الأنوثة شىء و كامن جوه منك و انتى باب..

اوعى تتميعى بكلامك..او تقولى عادى دول صحاب..

تبقى تستهلى اللى يحصل..و السؤال ملهوش جواب..

اقرى فى القرآن و سيبك م الاغانى مع الصحاب..

اعرفى سنة رسولك..و البسى فرضك حجاب..

اوعى تلتفتى لكلامهم..مش ده ارحم م العذاب ؟؟

لو تقيسى الدنيا ديا..ايه هتاخدى غير تراب ؟؟

انسى مكياجك و سيبى..نور ايمانك يملى وشك..

بدلى مرايتك بقلبك..مستحيل قلبك يغشك..

كل شىء فى الدنيا لما بيداوره بيزيد جمال..

و العفاف للبنت يغلب..اى شكل و اى مال..

مش مهم الخلق ترضى..المهم هترضى ربك..

هو ايه فى الكون ده يغلب..لو إله الكون ده حبك..

هو احسن ترضى ربك..و لا ترضى الناس بحالها ؟؟

هوا ايه للبنت يشفع ؟ شكلها و لا عملها ؟

ده الجمال فى الجسم زايل..انتى شفتيه دام لمين ؟؟

و الجمال فى الروح بيفضل مهما بتعدى السنين..

سيرة البنت العفيفة..هى احسن شىء يدوم..

حبرها مكتوب بدينها..مش بمكياج او هدوم..

اوعى صوتك يعلى مرة..ده الرسول علم علوم..

انتى بإيديكى تكونى زى نور وسط الغيوم..

أحلى حياة لما تطيعى ربك..هتنسى كل الهموم..