صباح الورد
والله الموضوع أجا عالوجع
لو فينا نحكي عن سبب الكراهية بشكل عام
أكيد رح يكون التناجش والتحاسد والتباغض والتكبر (العوج)
لكن هاي في إلها أسباب بطول شرحها
بس خليني استغل الموضوع واحكي عن الكره الموجود في المنتدى
وما في حد بقدر ينكره إلا إذا كان أعمى
أنا عني إذا قلت إني ما بكره حد بكون كذاب
بكره وبكره بشدة بالعكس أنا بفتخر إني بكره لأني بعتبر حالي صاحب ذائقة سليمة وفطرة جميلة
تخيلي كيف الأمور مقلوبة
هون في المنتدى الأسباب يلي بتخلي الناس تكره بعضها
* - اول شي التملق
مثلاَ الإدارة نزلت شي معين سواء مناسب أو مش مناسب عبارات المديح والتهليل والترحيب وكأنو القدس تحررت
أو ذكر بخاطب أنثى لازم أبدي الولاء والطاعة وكل عبارات التبجيل ابتداء من سيدتي وليس إنتهاء لحد معين تحت باب اتيكيت
أو إني أشوف موضوع لسين من الناس والموضوع لايستحق عناء النظر فيه وأقيم الموضوع بأعلى الدرجات
(على فكرة أنا بعرف إنو في اختلاف أذواق وبقدر هالشي لكن في الحد الأدنى المعقول )
* - الشي الثاني
التلون (الحربائية)
اليوم أنا بموقف بكره بثاني بعده بثالث تطبيق تام إذا الريح مالت مال حيث تميل
اليوم أنا مع فلان بكره ضده
اليوم أنا بنط وبلعب ومجنون وبكره ناسك وواعظ وإمام وملاك
* - الشي الثالث
التعصب الأعمى
يعني أنا بحب سين وبكره صاد لو صاد صار نبي بظل أكرهه وما عندي استعداد اتقبل منو موقف ولو صح وما بقبل حد يجيب سيرتو بشي كويس حتى لو حقيقي والعكس صحيح
كمان التعصب للبلد - أنا بحب بلدي وما بقبل حد يمسها بس مش معنى هالشي انو قيادتها مقدسة
احكي بالحق حياك الله غير هيك يفتح الله اتعرض لمين ما بدك بس للبلد لأ وهاد الشي الصح
في ناس فاهمه انو اذا انت حكيت عن شي ببلدها إنك بتسب البلد أو بتكره أهلها وهاد شي بدل على فراغ عقلي قبل ما يكون فراغ روحي وغبا مش ممكن نشوف مثلو إلا عند الجاهلين
كمان الشللية فلان بجامل حبيبي أنا معو على طول الخط
ما بجاملو أنا لازم احرق الأرض تحت رجليه أو قاطع منتجاته وخليها للريح تصفر فيها
* - التباهي الأهبل على قولة ستي الله يرحمها (فستق فارغ)
مثلا في موضوع انطرح بالمنتدى عن اختبار معين
شفت تباهي وهبل فارغ من بعض الناس بخلي الواحد يستفرغ على صورتهم ويلعن حضورهم
والمصيبة فراااااااااااااااغ
قلت خليني اكشفهم ورميت عظمة الهم أنا أقل واحد في الإختبار إجو يبكوا عليَّ مصدومين
بعدين نشرناها وشفنا تباهيهم خرسوا
ليش تلبس حالك ثوب انت مش قده
يا عمري ما حد طلب منك هالشي ومش عيب الواحد يغلط ويتعلم وتتفاوت المستويات هيك الدنيا
بين قوسين بقدر أقول السبب الرئيسي العوج
والمصيبة لازم انك تقبل بالعوج وتتعامل معو شي واقع واوقات كثير صوتو بطغى على صوتك
//
أي واحد رح يجي هون ويقول أنا ما بكره اعتبريه واحد من النوعيات يلي حكيت عنها فوق
ما فينا ملائكة وقديسين وأنبياء
أنا بكره أنا موجود
يلي ما بكره بالمرة معناه ميت بدون إحساس
بكره الظالم
بكره المحتل
بكره المعاتيه
بكره بكره بكره القائمة طويلة
أي واحد بقول ما بكره أنا مغسل ايدي منو
//
تسلم دياتك على الإنتقاء
كوني بخير