[حسام المصرى]

دى قصيدة .. كتبها واحد صاحبى فى الكلية ..

تحكى قصتى ..

لما افترقنا


زي أي اتنين
حبوا بعض وعاشوا قصه
طلعوا منها مجروحين


زي أي اتنين
كانوا فاكرين السعادة ف كلمتين


كانوا ضايعين وسط دنيا
بيدوروا علي يوم أمان
كانوا خايفين م الزمان
كان هواهم غصب عنهم
كانوا لسة مصدقين
اسم دنيا العاشقين


فاكره أخر يوم وداع
فاكرة قلبي
اللي قولتي خان وباع
فاكره يوم مانطق بحبك
عاش أكبر قصه خداع
كان مصدق
قال بيعشق
ضيعك ومعاكي ضاع
...


عارفه إني
لما بفتكر اللي فات
ببكي دمعي
بسرق الضحكة ف لحظه
م الآهات



عارفه لما بفتكرنا
وأحنا ماشيين ف السكوت
بين الشوارع والبيوت
بفتكر خوفنا ومصيرنا
لما ف الأخر نموت


بفتكر لهفة عيوننا
بفتكر لحظة ما خوننا
بسأل أزاي أحنا كُنّا
بنحب بعض ف وسط نار
بسأل أزاي كُنّا بنمّوِت ضميرنا
بسأل أزاي ف البدايه كان قرار
كُنا عايشين ف انتظار
كنز مش موجود وراه بركان دمار
...

بسأل أزاي الشيطان صور لنا
حب وبراءه وقال لنا
مالكوش بين العشاق مثيل
ويقولنا
أحساس جميل
أحنا اتخلقنا لبعضنا
أحنا بشر
م الناس وهما مننا
عايشين حياتهم زينا


طب ليه ماشوفناش ربنا
ليه ماشوفناش كل ضحكه
كل همسه
كل وعد
ف الكتاب مكتوب علينا
ولا مكتوبه لنا


ليه ماشوفناش الحجاره
لما بتسبح وتدعي ربها
ليه قلوبنا كانت أصم من الحجر
مش عارفة تعمل زيها


ليه ماشوفناش نفسنا
وأحنا بنخون الأمانه
ليه رسمنا ألف معني
قلنا حب ومش خيانه
قلنا عادي
أحنا مش لوحدنا
ألف مليون ف الزمان ده زينا
ليه ماشوفناش ربنا
...

قولنا استحاله يوم تخوني
واستحاله يوم أخون
كُنّا بنغير جلودنا
كُنّا لينا ألف لون
قولنا استحاله يوم نخون
وأحنا بسيوف الخيانه
أبتدينا حبنا


خوننا أهلي .. خوننا أهلك
خوننا النبي
طب كام شافونا
كام وكام بنت وولد
ميت عجوز وميتين صبي
كل دول يوم الندا راح يشهدوا
فاكره ساعتها هتهربي
فاكراني ههرب


كُنا بنقول ناس ومش هتهمنا
كُنا بنقول كل كلمه بقلبنا
بنرضي بعض
ونخون أمانة ربنا
...


كُنا بنقول الهوا
كُنا ليه ماشيين سوا
قولتي يوم هتلاقي جنه
وتلاقي لجراحك دوا
بس الحقيقه كانت بعيده عننا


كُنا ف طريق رسمه شيطان من نار
كان حلمنا لازم ف يوم ينهار
قولنا كل الناس كده مش وحدنا
وهتفرق أيه
لو ألف مليون يومها خسروا زينا
...


فاكره مرة
خوفتي من عين البشر
كُنّا سوا
قولتي لي ممكن ينقلوا
عنا الخبر
قولنا خطر
طب والحجر؟
والأرض برضو والشجر؟
طب والقمر؟
وكلامنا ف الليل والسهر؟
مليون شافونا هيشهدوا
لرب القدر


هيقول لساني ده مش أنا
ويقول لسانك مش أنا
"نختم علي أفواههم"
يشهد علينا قلبنا
لمسة أيدينا وكل خطوة برجلنا
تشهد علينا للملك
تصرخ تقول
أحنا عصينا ربنا
...


تفتكري يومها أزاي هنهرب م العذاب
تفتكري يومها بأي أيد هاخد الكتاب
تفتكري مهما كان اللي بينا
وقتها
هنمد أيدنا لبعضنا ؟!!
...


عرفتي يا حبيبتي إننا
يوم ما افترقنا
كان ندا من ربنا
كان بداية نور بيغسل ذنبنا

عرفتي يا حبيبتي إننا
يوم ما افترقنا
كان دمعنا
كانت طهارة لقلبنا
كان القدر
كانت مشيئته
ترجع قلوبنا للهداية تضمنا

وأسجد مابين ضعف وأمل
ساعتها كان نفسي أوي
نبقي سوا
مع بعضنا ف نفس الطريق


لقتني رافع أيدي ناحية السما
وبقول يارب
رجعها للنور والأمان
سمعها اسمك ف الأدان
لقتني ببكي وأقول يارب
إحميها من غدر الشيطان


وساعتها بس
عرفت إني ف قلبي شايل حبنا


وعشان بحبك
بجد بدعيلك تفوقي من وهمها
دنيا بتسقي الناس تملّي سمها
تملي بتغش الحقيقه
تقتل ضحيه وتقول بريئة
من دمها
بجد بدعيلك تفوقي من وهمها


وعشان بحبك
بجد بدعي ربنا أشوفك هناك
ف جنة الرحمن وأجمل م الملاك

ولو ف يوم مكتوب لنا
نلاقي بعض
أنا هسألك
عرفتي أني ف قلبي شايل حبنا