[.. ريتّـــا ..]

أنا بشوف إنو الوطن مش بالحدود
الوطن مش فلسطين والأردن والعراق
الوطن بيتي وإمي وأبويا وإخواتي وأصدقائي
الوطن جوة بقلبي .. بعاداتي وتقاليدي .. بتعاملي مع الآخرين
وطنيّتي ما بتحكمها أي سياسة

الوطن اللي بتحكو عنّو تشرّدنا منّو ويا دوب اللي بنعرفه عنه بضع صور من الذاكرة
وقرايبنا اللي بنحكي معهم بالتليفون كل فترة
وأصدقاءنا النتّيين .. الوطنيين زيّنا

كوننا فلسطينيين ما عنا أساساً جنسية
بأوروبا بتقول فلسطيني بقولك وين هاي
بتكتب بأوراقك الشخصية أنا فلسطينية بيمسحوها وبكتبو بلا جنسية
فبتضطر تكتب جنسيتك اللي حاملها من البلد اللي عايش فيها
عشان ما تجذب الأنظار إلك ولا يشوفوك عنصري

ومع كل هاد
أنا بفتخر لما بقولولي إنتي من وين بقولهم فلسطين
وبنفس الوقت
لما كنت صغيرة وأجت معلّمتي تقولي فرجينا بلدك ع الخريطة
وقعدت أدور ع فلسطين بخريطة العالم لقيتهم كاتبين اسرائيل
قلت للمعلمة الخريطة هاي مش صح .. وين فلسطين؟
قالت قصدك اسرائيل .. قلتلها لأ فلسطين
قالتلي أقعدي مكانك :)


لهيك وطني بقلبي مش شي بلمسه
وطني ما فيّا أمتلكه ، لكن الأكيد إنه بيملك إحساسي وإنتمائي
أنا فلسطينية بدمّي .. مش بجوازي




شكراً كتير أريج
موضوعك بيفتح جروح لم تُلملم بعد